“Heyvanlar aləmi haqqında” Azərbaycan Respublikası Qanununun icrasının təmin edilməsi barədə

AZƏRBAYCAN RESPUBLİKASI PREZİDENTİNİN FƏRMANI

“Heyvanlar aləmi haqqında” Azərbaycan Respublikası Qanununun icrasını təmin etmək məqsədilə qərara alıram:

1. Azərbaycan Respublikasının Nazirlər Kabinetinə tapşırılsın ki, bir ay müddətində:

heyvanlar aləmindən istifadənin xüsusi razılıq tələb edən növlərinə və xüsusi razılıq verilməsi qaydalarına aid təkliflərini hazırlayıb Azərbaycan Respublikasının Prezidentinə təqdim etsin.

2. Müəyyən edilsin ki:

- həmin qanunun 6-cı maddəsində nəzərdə tutulmuş heyvanlar aləminin mühafizəsi və istifadəsi ilə bağlı hüquq münasibətlərində Azərbaycan Respublikası adından Azərbaycan Respublikasının Ekologiya və Təbii Sərvətlər Nazirliyi (o cümlədən, Naxçıvan MR üzrə Naxçıvan MR-nın Ekologiya və Təbii Sərvətlər Nazirliyi) iştirak edir;

- həmin Qanunun 8-ci maddəsində nəzərdə tutulmuş heyvanlar aləminin mühafizəsi və istifadəsi sahəsində idarəetmə sisteminə Azərbaycan Respublikasının Ekologiya və Təbii Sərvətlər Nazirliyi və Naxçıvan MR-nın Ekologiya və Təbii Sərvətlər Nazirliyi daxildir;[1]

həmin Qanunun 15-ci maddəsinin 2-ci, 22-ci maddəsinin 3-cü, 26-cı maddəsinin 2-ci, 43-cü maddəsinin 2-ci hissələrində nəzərdə tutulmuş “müvafiq icra hakimiyyəti orqanı”nın səlahiyyətlərini Azərbaycan Respublikasının qanunvericiliyinə uyğun olaraq, Azərbaycan Respublikasının Ekologiya və Təbii Sərvətlər Nazirliyi həyata keçirir;[2]

həmin Qanunun 17-ci maddəsinin 2-ci hissəsində nəzərdə tutulmuş ov və balıqçılıq obyektlərinə aid edilməyən vəhşi heyvanların növləri, tutulması, vurulması və digər istifadə qaydaları Azərbaycan Respublikasının Nazirlər Kabineti tərəfindən müəyyən edilir;

həmin Qanunun 34-cü maddəsinin 1-ci hissəsində nəzərdə tutulmuş “müvafiq icra hakimiyyəti orqanı”nın səlahiyyətlərini Azərbaycan Respublikasının qanunvericiliyinə uyğun olaraq Azərbaycan Respublikasının Ekologiya və Təbii Sərvətlər Nazirliyi həyata keçirir;[3]

həmin Qanunun 43-cü maddəsinin 3-cü hissəsində nəzərdə tutulmuş heyvanlar aləminin mühafizəsi və istifadəsi sahəsində dövlət nəzarətinin həyata keçirilməsi qaydaları, 48-ci maddəsinin 4-cü hissəsində nəzərdə tutulmuş heyvanlar aləmindən istifadəyə görə ödəmələrin məbləği, tətbiq edilmə qaydaları və qeyri-qanuni heyvan ovuna görə təbiətə dəymiş ziyanın məbləği və 51-ci maddəsinin 3-cü hissəsində nəzərdə tutulmuş hallara aid təlimatlar Azərbaycan Respublikasının Nazirlər Kabineti tərəfindən təsdiq edilir.[4]

Azərbaycan Respublikasının Prezidenti Heydər Əlİyev

Bakı şəhəri, 6 mart 2000-ci il

№ 294

Azərbaycan Respublikasının Qanunvericilik toplusu .- 2000.- 31 mart, № 3.- S.979-980.