Azərbaycan Dövlət Teleqraf Agentliyinin (AzərTAc-ın) fəaliyyətinin təkmilləşdirilməsi haqqında

 

AZƏRBAYCAN RESPUBLİKASI NAZİRLӘR KABİNETİNİN QƏRARI

 

"Azərbaycan Respublikasının Nazirlər Kabineti yanında Dövlət Teleqraf Agentliyinin (AzərTAc-ın) fəaliyyətinin təkmilləşdirilməsi haqqında" Azərbaycan Respublikası Prezidentinin 2000-ci il 17 yanvar tarixli, 260 nömrəli Fərmanının 4-cü və 5-ci bəndlərinin icrası ilə əlaqədar Azərbaycan Respublikasının Nazirlər Kabineti qərara alır: [1]

1. "Azərbaycan Respublikası Nazirlər Kabineti yanında Dövlət Teleqraf Agentliyinin (AzərTAc-ın) işinin yaxşılaşdırılması haqqında" Azərbaycan Respublikası Nazirlər Kabinetinin 1996-cı il 31 oktyabr tarixli, 152 nömrəli qərarının adından və mətnindən, həmin qərarla təsdiq edilmiş "Azərbaycan Respublikası Nazirlər Kabineti yanında Dövlət Teleqraf Agentliyinin (AzərTAc-ın) yeni strukturu"ndan, eləcə də "Azərbaycan Respublikası Nazirlər Kabineti yanında Dövlət Teleqraf Agentliyi işçilərinin əmək haqqı dərəcələri"ndən "Respublikası Nazirlər Kabineti yanında" sözləri çıxarılsın.

2. Azərbaycan Respublikası Nazirlər Kabinetinin 1996-cı il 31 oktyabr tarixli, 152 nömrəli qərarı ilə təsdiq edilmiş "Azərbaycan Dövlət Teleqraf Agentliyinin (AzərTAc-ın) yeni strukturu"na "15. Xarici dillərdə xəbərlər hazırlayan və yayan Baş redaksiya" sözləri, "işçilərin sayı" qrafasında "8" rəqəmi əlavə edilsin və "144" rəqəmi "152" rəqəmi ilə əvəz edilsin.[2]

3. "AzərTAc-ın tərkibində yeni yaradılan "Xarici dillərdə xəbərlər hazırlayan və yayan Baş redaksiya" işçilərinin əmək haqqı müvafiq olaraq AzərTAc-ın strukturunda fəaliyyət göstərən Azərbaycan və rus dillərində informasiya baş redaksiyaları işçilərinin əmək haqlarına uyğun olaraq müəyyən edilsin;

4. Azərbaycan Respublikasının Maliyyə Nazirliyinə tapşırılsın:

AzərTAc-ın maddi-texniki bazasının müasir tələblər səviyyəsinə çatdırılması, o cümlədən AzərTAc-ın xarici ölkələrdəki müxbir məntəqələrinin texniki avadanlıqla təchiz olunması məqsədi ilə 2000-ci ilin dövlət büdcəsində nəzərdə tutulmuş Ehtiyat Fondundan 500,0 milyon manat, 2000-ci il yanvarın 17-dən etibarən AzərTAc-ın əməkdaşlarının əmək haqqının əsasən əlli faiz artırılması ilə əlaqədar 373,5 milyon manat - cəmi 873,5 milyon manat ayrılmasını təmin etsin, Agentliyin maddi-texniki təchizatı üzrə zəruri olan vəsaitin qalan hissəsinin isə 2001-ci ilin dövlət büdcəsi layihəsində nəzərə alınması üçün lazımi tədbirlər görsün;

AzərTAc-ın beynəlxalq əlaqələrinin xeyli genişlənməsi ilə əlaqədar, gələcəkdə dövlət büdcəsi layihələrini tərtib edərkən Agentliyə ayrılan rabitə xərclərinin artırılmasını nəzərə alsın.

5. Azərbaycan Respublikasının Rabitə Nazirliyinə tapşırılsın ki, Azərbaycan Dövlət Teleqraf Agentliyinə (AzərTAc-a) büdcə təşkilatları üçün nəzərdə tutulmuş tariflər əsasında rabitə xidmətlərinin göstərilməsini, eyni zamanda Agentliyin İnternet rabitəsi xidmətindən istifadə etməsi məqsədilə qlobal İnternet şəbəkəsinə qoşulmasını və bu şəbəkədə WEB səhifəsinin yerləşdirilməsini təmin etsin.

6. Bu qərarın icrasına nəzarət Azərbaycan Respublikası Nazirlər Kabineti İşlər İdarəsinin elm, mədəniyyət, xalq təhsili və sosial problemlər şöbəsinə həvalə edilsin.

 

Azərbaycan Respublikasının Baş naziri  A.Rasİzadə

 

Bakı şəhəri, 15 mart 2000-ci il

№ 44

 

Azərbaycan Respublikasının Qanunvericilik toplusu.-2000.- 31 mart, № 3.- S. 1240-1241.