Azərbaycan Respublikası Dövlət Gömrük Komitəsi və Ukrayna Dövlət Gömrük Xidməti arasında qarşılıqlı yardım göstərilməsi qaydaları haqqında

Memorandum

Bundan sonra, Tərəflər adlandırılan Azərbaycan Respublikası Dövlət Gömrük Komitəsi və Ukrayna Dövlət Gömrük Xidməti,

24 mart 1997-ci il tarixdə imzalanmış Ukrayna Hökuməti və Azərbaycan Respublikası Hökuməti arasında gömrük işi sahəsində əməkdaşlıq haqqında Sazişin (bundan sonra-Saziş) 16-cı maddəsini rəhbər tutaraq,

Sazişin həyata keçirilməsi mexanizmini müəyyən etmək məqsədilə,

aşağıdakılar barədə razılığa gəldilər:

Maddə 1

Tərəflər bu Memorandumun 1 və 2-ci Əlavələrində göstərilən mərkəzi aparatların və ayrı-ayrı gömrükxanaların müvafiq bölmələrinin rəhbərlərinə Sazişdə göstərilən müddəaları həyata keçirməsi məqsədilə birbaşa əlaqələr yaratmaq və onları davam etdirmək səlahiyyəti verirlər.

Zəruri hallarda, Tərəflərdən hər biri digər Tərəfi xəbərdar etmək şərtilə Əlavələrə dəyişikliklər və əlavələr edə bilər.

Maddə 2

Sazişin fəaliyyətini qiymətləndirmək və gömrük orqanlarının işinə dair digər aktual sualların müzakirə edilməsi məqsədilə iki ildə bir dəfə gömrük idarələri rəhbərlərinin görüşü keçiriləcəkdir.

Maddə 3

Gömrük idarələri Sazişə müvafiq olaraq sorğu əsasında yüksək gömrük rüsumları təyin edilmiş mallar və gömrük dəyərinin əhəmiyyətli dərəcədə aşağı salınması barədə məlumatlar təqdim edəcək, həmçinin idxal və ixrac zamanı qadağan və məhdudiyyətlər tətbiq edilən malların siyahılarının mübadiləsini aparacaqlar.

Maddə 4

1. Əməkdaşlıq haqqında Saziş çərçivəsində yardım göstərmək haqqında sorğular və onlara cavablar yazılı surətdə, o cümlədən faks, teleks və ya digər rabitə vasitələrilə təqdim olunacaqlar.

2. Təxirəsalınmaz hallarda sorğular şifahi surətdə qəbul oluna bilər, lakin onlar yubadılmadan yazılı formada təsdiq olunmalıdırlar. Sorğu edən Tərəfin tələbi ilə faks, teleks, yaxud digər rabitə vasitələrilə verilmiş məlumatlar məktubla təsdiq olunur.

3. Sorğu alan gömrük idarəsi tələb olunan məlumatları və sənədləri təcili olaraq təqdim edir.

Maddə 5

Yardım göstərilməsi haqqında sorğu rus, ingilis dillərində və ya sorğu ünvanlanmış Tərəf üçün münasib sayılan başqa dildə təqdim ediləcəkdir.

Maddə 6

Yardım göstərilməsi haqqında sorğuya aşağıdakı məlumatlar daxildir:

a) sorğu edən gömrük idarəsinin adı;

b) sorğu edilən tədbirlər;

v) sorğunun məğzi və səbəbi;

q) sorğuya aid olan qanunlar və digər normativ aktlar;

d) barəsində təhqiqat həyata keçirilən fiziki və hüquqi şəxslər haqqında daha dəqiq və müfəssəl məlumat.

Maddə 7

Bu Memorandum imzalandığı gündən qüvvəyə minir və Sazişə müvafiq olaraq qüvvəsi ləğv edilir.

Kiyev şəhərində, 1999-cu il iyulun 30-da Azərbaycan, Ukrayna və rus dillərində iki nüsxədə imzalanmışdır, bütün mətnlər eyni qüvvəyə malikdir.

Azərbaycan və Ukrayna mətnlərinin təfsiri zamanı fikir ayrılığı yaranarsa, rus dilindəki mətnə üstünlük verilir.

Azərbaycan Respublikası Dövlət Ukrayna Dövlət Gömrük Xidməti

Gömrük Komitəsi adından adından

(imza) (imza)

Azərbaycan Respublikasının Qanunvericilik toplusu .- 2000.- 31 mart, № 3.- S.1003-1005.