Azərbaycan Respublikası Prezidenti Heydər Əliyevin və Polşa Respublikası Prezidenti Aleksandr Kvasnevskinin BİRGӘ Bəyanatı

Polşa Respublikasının Prezidenti Aleksandr Kvasnevski 1999-cu ilin 27—28 oktyabrında Azərbaycan Respublikasında rəsmi səfərdə olmuşdur.

Prezidentlər Heydər Əliyevin və Aleksandr Kvasnevskinin danışıqları zamanı hər iki Tərəf Şimali Atlantika Tərəfdaşlıq Şurası və NATO-nun «Sülh Naminə Tərəfdaşlıq Proqramı» çərçivəsində ikitərəfli və çoxtərəfli qarşılıqlı fəaliyyətin əhəmiyyətini qeyd etdilər. Tərəflər, eyni zamanda onların ölkələrinin Avropa və Avroatlantika strukturlarına inteqrasiyası prosesində qarşılıqlı fəaliyyət göstərəcəkləri barədə eyni fikirdədirlər. Polşa Tərəfi Azərbaycanın Avropa Şurasına və Ümumdünya Ticarət Təşkilatına üzv olmasını dəstəklədiyini bildirdi.

Tərəflər, beynəlxalq münasibətlərdə zor işlətmək və ya zor işlətməklə hədələməyin yol verilməzliyi prinsiplərinin yerinə yetirilməsində və bununla bərabər Birləşmiş Millətlər Təşkilatı, Avropa Təhlükəsizlik və Əməkdaşlıq Təşkilatı, habelə digər beynəlxalq təşkilatlar çərçivəsində əməkdaşlığın inkişaf etdirilməsində öz iradələrini təsdiq etdilər. Onlar, münaqişələrin BMT-nın Nizamnaməsinə və ATƏT-nın sənədlərinə uyğun olaraq, dövlətlərin ərazi bütövlüyü və sərhədlərinin toxunulmazlığı əsasında sülh yolu ilə həll edilməsinə tərəfdar olduqlarını bildirdilər.

Tərəflər, demokratik dəyərlərin, qanunun aliliyinin, insan hüquqları və əsas azadlıqlarının, o cümlədən milli azlıqlara mənsub olan şəxslərin hüquqlarının qorunmasının əhəmiyyətini qeyd etdilər. Demokratik qaydalar və bazar iqtisadiyyatı müasir dövlətlərin inkişafının, habelə onların vətəndaşlarının firavanlığının və rifahının əsasıdır. Bu faktorlar beynəlxalq münasibətlərdə etimad mühitinin dərinləşməsini, sabitliyin və sülhün möhkəmləndirilməsini artan səviyyədə müəyyən edir.

Tərəflər siyasi dialoqu daha da inkişaf etdirəcəklərini, o cümlədən müxtəlif səviyyələrdə parlamentlərarası əlaqələrin və beynəlxalq və ikitərəfli məsələlər üzrə məsləhətləşmələrin keçirilməsini inkişaf etdirəcəklərinə tərəfdar olduqlarını bildirdilər. Xarici işlər nazirlikləri, habelə Azərbaycan Respublikası və Polşa Respublikası arasında münasibətlərin genişləndirilməsinə cəlb edilmiş digər idarə və təşkilatların əməkdaşlığının inkişaf etdirilməsində Tərəflərin maraqlı olduqları təsdiq edilmişdir.

Tərəflər, hazırkı səviyyəsi və çeşidi hər iki ölkənin tələbatı və imkanlarına cavab verməyən ikitərəfli ticarət dövriyyəsinin əhəmiyyətli dərəcədə artırılması barədə öz iradələrini bəyan etdilər. İnvestisiyalar sahəsində əməkdaşlığın inkişaf etdirilməsində, o cümlədən Mərkəzi Asiyanı, Qafqazı və Mərkəzi və Qərbi Avropanı birləşdirən yeni kommunikasiya və nəqliyyat xətlərinin layihələşdirilməsi ilə əlaqədar istifadə edilməmiş potensial mövcuddur.

Hər iki Prezident əmin olduqlarını bildirdilər ki, qarşılıqlı mədəni, elmi-texniki və ictimai əlaqələrin artırılması da xalqların daha yaxşı tanışlığına və yaxınlaşmasına kömək edəcəkdir.

Bakı, 27 oktyabr 1999-cu il

Azərbaycan Respublikası Prezidenti Polşa Respublikası Prezidenti

Heydər ƏLİYEV Aleksandr Kvasnevskİ

Azərbaycan Respublikasının Qanunvericilik toplusu .- 2000.- 31 mart, № 3.- S.1016-1017.