Azərbaycan Respublikası Hökuməti və İtaliya Respublikasının Azərbaycandakı Səfirliyi arasında "İtaliya-Azərbaycan Qarşılıqlı Balans Fondunun yaradılması və işlədilməsi haqqında" Niyyətlər Memorandumunun təsdiq edilməsi barədə

AZƏRBAYCAN RESPUBLİKASININ QANUNU

Azərbaycan Respublikasının Milli Məclisi qərara alır:

1. Azərbaycan Respublikası Hökuməti və İtaliya Respublikasının Azərbaycandakı Səfirliyi arasında "İtaliya-Azərbaycan Qarşılıqlı Balans Fondunun yaradılması və işlədilməsi haqqında" 1999-cu il aprelin 14-də Bakı şəhərində imzalanmış Niyyətlər Memorandumu təsdiq edilsin.

2. Bu Qanun dərc edildiyi gündən qüvvəyə minir.

Azərbaycan Respublikasının Prezidenti Heydər Əlİyev

Bakı şəhəri, 17 mart 2000-ci il

№ 838-IQ

Azərbaycan Respublikası Hökuməti və İtaliya Respublikasının

Azərbaycandakı səfirliyi arasında İtaliya-Azərbaycan Qarşılıqlı

Balans Fondunun yaradılması və işlədilməsi haqqında

Niyyətlər memorandumu

Azərbaycan Respublikası Hökuməti və İtaliya Respublikasının Azərbaycandakı Səfirliyi (bundan sonra Səfirlik) humanitar yardım layihələrinin rasional şəkildə inkişaf etdirilməsi və istifadəsi üçün aşağıdakılar barədə razılığa gəlmişlər:

Maddə I

1.1. Səfirlik Azərbaycan Respublikası Hökumətinə humanitar yardımın gətirilməsini təklif edir; gətiriləcək humanitar yardım ərzaq məhsulları olduğu halda, onlar Avropa Birliyində qüvvədə olan sanitar normalara uyğun olmalıdır.

1.2. Azərbaycan Respublikası Hökuməti və Səfirlik gətiriləcək humanitar yardımın Azərbaycan Respublikasında mövcud olan istehsala mənfi təsirinin istisna olunması məqsədi ilə gətirilən yardımın çeşidi barədə əvvəlcədən razılaşırlar.

1.3. Azərbaycan Respublikası Hökuməti Səfirliklə razılaşaraq humanitar yardım kimi gətiriləcək ərzaq məhsullarının qəbulu və satışı ilə məşğul olacaq və humanitar yardımı pul ekvivalentinə çevirəcək təşkilatı təyin edir.

Maddə II

2.1. Azərbaycan Respublikası Hökuməti ya Səfirliklə razılaşma əsasında təyin edilmiş Azərbaycanda kənd təsərrüfatının inkişaf və modernləşdirilməsi layihələrini və ya qaçqın və məcburi köçkünlər üçün nəzərdə tutulan başqa humanitar layihələri maliyyələşdirmək məqsədi ilə Qarşılıqlı Balans Fondu yaradır.

2.2. Qarşılıqlı Balans Fondu Azərbaycan Respublikasının daxili bazarında humanitar yardımın satışından əldə edilən vəsait hesabına yaradılır və «Humanitar yardım üzrə İtaliya-Azərbaycan Qarşılıqlı Balans Fondu» adlanaraq əlavə «A»-nın əsasında idarə olunur.

2.3. Azərbaycan Respublikası Hökuməti Səfirliyin nümayəndələrinin tələbi əsasında, onları mühasibat, büdcə və Qarşılıqlı Balans Fondunun idarə olunmasına aid digər sənədlərlə tanış edir.

Maddə III

3.1. Qarşılıqlı Balans Fondu, onun iş qaydaları və tərkibi əlavə «A»-da göstərilən Birgə Komitə tərəfindən idarə olunur.

3.2. Birgə Fond 2.1-ci paraqrafında açıqlanan məqsədlər üçün Azərbaycan Respublikası Hökuməti tərəfindən istifadə olunur.

Maddə IV

4.1. Azərbaycan Respublikası Hökuməti Səfirliklə birgə Azərbaycan Respublikasındakı daxili bazarın şəraitləri ilə tanış olaraq, məhsulların aşağı (dempinq) və ya yuxarı (spekulyativ) qiymətlərlə satışına yol verilməməsini nəzarətdə saxlayır, humanitar yardım kimi göndərilən məhsulların satış qiymətləri və satış müddəti barəsində razılaşırlar.

4.2. Azərbaycan Respublikası Hökuməti Səfirliklə birgə razılığa gəlir ki, hər bir daşınma əməliyyatı haqda xüsusi razılaşma olmadığı halda, işin təşkilinə, məhsulların qəbuluna, hazırlanmasına və ərzaq məhsullarının satışına ayrılacaq vəsait məhsulların satış qiymətinin 20 faizindən artıq olmamalıdır.

4.3. Humanitar yardımın satışından əldə olunan vəsait Azərbaycan Respublikası Hökuməti tərəfindən cari bank hesabında Azərbaycan milli valyutasında depozitləşdirilərək toxunulmaz saxlanılır (bax əlavə «A»).

Maddə V

Azərbaycan Respublikası qüvvədə olan qanunvericiliyə uyğun olaraq, İtaliyadan göndərilən humanitar yardımı ölkəyə daxil olarkən bütün növ vergi və rüsumlardan azad edir. İtaliya tərəfi heç bir növ vergi və rüsum ödəmir.

Maddə VI

Azərbaycan Respublikası Hökumətinin və Səfirliyin nümayəndələri altı aydan bir görüşərək maliyyə layihələrinin yerinə yetirilməsinin gedişini və Fondun maliyyə fəaliyyətini yoxlayırlar. Bundan əlavə onlar bu sahədə fəaliyyət proqramları barədə də razılaşırlar

Maddə VII

Əməkdaşlığın ümumi aspektləri ilə bağlı fikir ayrılığı yarandığı hallarda Azərbaycan Respublikası Hökuməti və Səfirlik tərəflərin hər ikisini qane edən qərara gəlməyi üzərlərinə götürürlər.

Maddə VIII

Bu Memorandum müddətsizdir; dəyişikliklər tərəflərin ikisinin də razılığı ilə edilə bilər.

Maddə IX

Bu Memorandum Bakı şəhərində 14 aprel 1999-cu ildə, eyni qüvvəyə malik olan dörd nüsxədə, nüsxələrin ikisi italyan, ikisi isə Azərbaycan dilində tərtib olunmuşdur

Azərbaycan Respublikası Hökuməti İtaliya Respublikası Səfirliyi

adından adından

Baş nazirin müavini, İtaliyanın Azərbaycandakı səfiri

Beynəlxalq Humanitar Yardım üzrə Alessandro FALLAVOLLİTA

Respublika Komissiyasının sədri

Əlİ HƏSƏNOV

Əlavə «A»

HUMANİTAR yardım üzrə Qarşılıqlı Balans Fondu

Maddə 1

Azərbaycan Respublikası Hökuməti Azərbaycan Respublikası Prezidentinin 15 yanvar 1995-ci il tarixli, 144 nömrəli Fərmanı ilə yaradılmış Beynəlxalq Humanitar Yardım üzrə Respublika Komissiyasını təyin edir. Beynəlxalq Humanitar Yardım üzrə Respublika Komissiyası İtaliyadan gətirilən humanitar yardımın satışından əldə edilən, yalnız Qarşılıqlı Balans Fondunun fəaliyyətinə xidmət edən ayrı, milli valyutada olan hesabda saxlanılmasına məsuliyyət daşıyır.

Azərbaycan Respublikası Hökuməti tez bir zamanda, yalnız humanitar yardımın yola salınmasından əvvəl, yuxarıda göstərilən, Azərbaycan Milli Bankında açılan ayrı hesabın nömrəsini və identifikasiya kodunu Səfirliyə bildirir.

Maddə 2

2.1. Qarşılıqlı Balans Fonduna nəzarət üçün bu Memorandumun 3.1-ci maddəsinə əsasən Birgə Komitə yaradılır.

2.2. Birgə Komitə Azərbaycan Respublikası Hökumətinin və Səfirliyin nümayəndələrindən təşkil olunur. Beynəlxalq Humanitar Yardım üzrə Respublika Komissiyasının sədri Birgə Komitənin sədri, İtaliyanın səfiri isə Birgə Komitənin sədrinin müavinidir. Birgə Komitənin katibi humanitar yardımın satışından əldə olunan vəsaitin depozitləşdirilib saxlanıldığı Milli Bankın işçisi təyin olunur.

2.3. Qarşılıqlı Balans Fondu vəsaitlərinin istifadəsi barədə olan hər bir təklif Beynəlxalq Humanitar Yardım üzrə Respublika Komissiyası və Səfirliklə razılaşdırılmalıdır. Fondun cari hesabda olan vəsaitləri yalnız Səfirliyin razılığı ilə istifadə olunur.

2.4. Qarşılıqlı Balans Fondu gəlir əldə edilməsi üçün istifadə edilə bilməz.

Bakı şəhərində 14 aprel 1999-cu ildə tərtib edilib.

Azərbaycan Respublikası Hökuməti adından İtaliya Respublikası səfirliyi adından İtaliyanın Azərbaycandakı səfiri Alessandro FALLAVOLLİTA

Baş Nazirin müavini,

Beynəlxalq Humanitar Yardım üzrə

Respublika Komissiyasının Əli HƏSƏNOV

Azərbaycan Respublikasının Qanunvericilik toplusu.-2000.- 30 iyun, № 6.- S. 2373-2376.