Azərbaycan Respublikası Hökuməti ilə Özbəkistan Respublikası Hökuməti arasında neft maşınqayırması sahəsində əməkdaşlığın əsas prinsipləri haqqında

Sazİş

Bundan sonra “Tərəflər” adlanan Azərbaycan Respublikası Hökuməti və Özbəkistan Respublikası Hökuməti,

ikitərəfli qarşılıqlı faydalı iqtisadi əlaqələri genişləndirmək istəyərək,

xammal bazalarının səmərəli istifadəsi, əməkdaşlığın yeni formalarının təşkili və təsərrüfat subyektləri arasında bazar münasibətlərinin təkmilləşdirilməsi üçün əlverişli şəraitin yaradılmasında qarşılıqlı maraqlı olduqlarını təsdiq edərək,

iqtisadiyyatın başlıca sahələrindən biri kimi, neft-qaz sənayesinin inkişafına mühüm əhəmiyyət verərək və onun bütün regionun gələcəyində əhəmiyyətini dərk edərək,

neft maşınqayırma sənayesinin qarşılıqlı inteqrasiyalaşmış olduğunu və neft-qaz sahəsinin inkişafında baza təşkil etdiyini nəzərə alaraq,

aşağıdakılar barədə razılığa gəldilər:

Maddə 1

Tərəflər, neft-qaz kompleksinin neft maşınqayırma məhsulları ilə təmin edilməsi sahəsində əvvəlki əlaqələrin saxlanılması və onların daha da inkişaf etdirilməsi məqsədilə mühüm növ neft-mədən və qazma avadanlıqları istehsalının təşkilində, onlara servis xidməti göstərilməsi, göndərilən avadanlıqların əsaslı və cari təmiri, onların ehtiyat hissələri ilə dəstləşdirilməsi üzrə birgə müəssisələrin, həmçinin neft-qaz-mədən avadanlıqlarının satışı üzrə bazaların yaradılması işində səylərini birləşdirəcəklər.

Maddə 2

Tərəflər, təsərrüfat subyektlərinə bağlanmış müqavilələrin (kontraktların) icrası ilə bağlı neft-qaz-mədən avadanlıqlarının, ehtiyat hissələrinin və materiallarının göndərilməsi üzrə öz üzərlərinə götürdükləri öhdəliklərin yerinə yetirilməsində hərtərəfli köməklik göstərəcəklər.

Maddə 3

Tərəflər, təsərrüfat subyektləri arasında qarşılıqlı faydalı əməkdaşlığın səmərəliliyini yüksəltmək marağı əsasında neft maşınqayırma müəssisələri tərəfindən işlənib hazırlanan və istehsal olunan məhsulların, həmçinin göstərilən əsas xidmət növlərinin siyahılarının müntəzəm mübadiləsini həyata keçirəcəklər.

Tədiyə-hesablaşma və digər maliyyə əməliyyatları Tərəflərin mövcud qanunvericiliyinə uyğun aparılacaqdır.

Maddə 4

Tərəflər, milli energetika proqramlarının işlənməsi zamanı neft-qaz sənayesində inteqrasiya əlaqələrinin daha da dərinləşməsi, elmi-texniki əməkdaşlığın inkişafı və yeni texnikanın tətbiqi məqsədilə birgə məsləhətləşmələr aparacaqlar.

Maddə 5

Tərəflər vahid metodoloji yanaşma əsasında neft-qaz avadanlıqlarının hazırlanması, göndərilməsi və istifadəsi zamanı beynəlxalq ekoloji standartlara nail olunmasını təmin edən zəruri tədbirlər görəcəklər.

Maddə 6

Tərəflər, iqtisadi qarşılıqlı əlaqələri gücləndirmək məqsədilə onların ərazilərində keçirilən tenderlərdə, sərgilərdə, yarmarkalarda iştirak etmək üçün neft-qaz şirkətlərini dəvət edəcəklər.

Maddə 7

Bu Sazişin yerinə yetirilməsi üçün Tərəflərin səlahiyyətli orqanları aşağıdakılardır:

Azərbaycan Respublikasından — «Azneftkimyamaş» Dövlət Şirkəti və Dövlət Neft Şirkətinin Maşınqayırma İstehsalat Birliyi;

Özbəkistan Respublikasından — «Özbəkneftqazmaş» səhmdar şirkəti, «Özbəkneftqaz» Milli holdinq şirkəti.

Maddə 8

Bu Sazişin təfsiri və tətbiqi ilə əlaqədar yarana biləcək bütün mübahisəli məsələlər Tərəflər arasında danışıqlar və məsləhətləşmələr yolu ilə həll ediləcək.

Maddə 9

Tərəflər, qarşılıqlı razılıq əsasında, bu Sazişə onun tərkib hissəsi olan müvafiq protokollarla rəsmiləşdirilən zəruri əlavə və dəyişikliklər edə bilər.

Maddə 10

Bu Saziş Tərəflərin onun qüvvəyə minməsi üçün zəruri olan dövlətdaxili prosedurları yerinə yetirmələri barədə son bildirişinin alındığı tarixdən qüvvəyə minir və beş il müddətinə qüvvədədir. Əgər Tərəflərdən hər hansı biri altı aydan gec olmamaq şərti ilə Sazişə xitam vermək niyyəti barədə digər Tərəfə bildirməzsə, bu Sazişin qüvvəsi avtomatik olaraq sonrakı birillik müddətlərə uzadılır.

Daşkənd şəhərində 1999-cu ilin iyulun 23-də hər biri Azərbaycan, özbək və rus dillərində iki əsl nüsxədə imzalanmışdır, bütün mətnlər eyni qüvvəyə malikdir.

Tərəflər, bu Sazişin müddəalarının təfsiri məqsədilə rus dilindəki mətndən istifadə edəcəklər.

Azərbaycan Respublikası Hökuməti Özbəkistan Respublikası Hökuməti

adından adından

(İmza) (İmza)

Azərbaycan Respublikasının Qanunvericilik toplusu .- 2000.- 31 mart, № 3.- S.1074-1075.