Azərbaycan Respublikası Hökuməti ilə Özbəkistan Respublikası Hökuməti arasında geodeziya, kartoqrafiya, kadastr və Yerin məsafədən zondla tədqiq edilməsi sahəsində əməkdaşlıq haqqında

Sazİş

Bundan sonra “Tərəflər” adlandırılan Azərbaycan Respublikası Hökuməti və Özbəkistan Respublikası Hökuməti,

bərabər hüquq, qarşılıqlı hörmət və qarşılıqlı fayda prinsipləri əsasında geodeziya, kartoqrafiya sahəsində, həmçinin elmin sıx əlaqəli və texnikanın, texnologiyanın praktiki tətbiqi sahələrində ikitərəfli əməkdaşlığın daha da inkişaf etdirilməsinə birgə səylərini bildirərək,

aşağıdakılar barədə razılığa gəldilər:

Maddə 1

Tərəflər hamı tərəfindən qəbul olunmuş beynəlxalq hüquq normaları və prinsipləri əsasında öz dövlətlərinin qanunvericiliyinə müvafiq olaraq ikitərəfli əlaqələrin, həmçinin geodeziya, kartoqrafiya, kadastr və Yerin məsafədən zondla tədqiq edilməsi sahəsində qarşılıqlı əməkdaşlığın hər bir formasının inkişafı üçün bütün tədbirləri görəcək və istənilən şəraiti yaradacaqlar.

Maddə 2

Tərəflər birgə işlərin əlaqələndirilməsinə, həmçinin bu Sazişin şərtlərinin yerinə yetirilməsinə cavabdehliyi və nəzarəti özlərinin aşağıdakı təşkilatlarına həvalə edirlər:

Azərbaycan Respublikasında — Azərbaycan Respublikasının Dövlət Geodeziya və Xəritəçəkmə Komitəsi;

Özbəkistan Respublikasında — Özbəkistan Respublikasının Nazirlər Kabineti yanında Geodeziya, Xəritəçəkmə və Dövlət Kadastrı Baş İdarəsi.

Maddə 3

Bu Saziş çərçivəsində əməkdaşlıq Tərəflərin bu Sazişin 2-ci maddəsində göstərilən dövlət geodeziya xidmətləri tərəfindən həyata keçiriləcəkdir və aşağıdakı fəaliyyət sahələrini və növlərini əhatə edə bilər:

topoqrafiya-geodeziya və kartoqrafiya işlərinin aparılması, xəritələrin, atlasların və digər növ çap məhsullarının nəşri üzrə poliqrafiya xidmətləri;

ərazinin aerokosmik plana alma işlərinin yerinə yetirilməsi və məsafədən zondla tədqiqi üzrə göstəricilərin mübadiləsi;

geoinformasiya sistemlərinin, kadastrların rəqəmli məlumatlar və elektron xəritələr banklarının yaradılması metodologiyasının işlənib hazırlanması;

inzibati-ərazi bölgüsünün, coğrafi obyektlərin adlarının dəyişdirilməsi ilə əlaqədar, Tərəflərin ərazilərinin coğrafi tədqiqinə və coğrafi xəritələrinin məzmununun yeniləşdirilməsinə aid məlumatların mübadiləsi;

digər elmi-texniki və istehsalat məlumatları üzrə mübadilə;

təcrübi-konstruktor işlərinin birgə yerinə yetirilməsi;

topoqrafiya-geodeziya, xəritəçəkmə təşkilatları və tədris müəssisələri arasında iş təcrübəsi mübadiləsini;

geodeziya və xəritəçəkmə üzrə mütəxəssislərin təlimi və təcrübə keçməsi;

avadanlıqların və materialların qarşılıqlı verilməsi və birgə istehsalı.

Maddə 4

Tərəflər, ərazi mənsubluğu üzrə 1998-ci ilin 1 yanvar vəziyyətinə onların sərəncamlarında olan ilkin geodeziya, xəritəçəkmə və aerokosmik sənədlərinin qarşılıqlı mübadiləsini (verilməsini) öhdələrinə götürürlər.

Göstərilən materialların mübadilə qaydaları, şərtləri və müddətləri bu Saziş qüvvəyə mindikdən sonra Tərəflərin geodeziya xidmətləri arasında qarşılıqlı razılaşma əsasında müəyyən edilir.

Maddə 5

Tərəflər, bu Sazişin həyata keçirilməsi üzrə birgə fəaliyyəti əlaqələndirmək, həmçinin bu Saziş çərçivəsində əməkdaşlığın konkret şərtlərinin və təkliflərinin işlənib hazırlanması və razılaşdırılması məqsədilə, onların rəsmi nümayəndələrinə məxsus səlahiyyətləri olan ekspertləri təyin edirlər.

Maddə 6

Əməkdaşlıq proqramının həyata keçirilməsi üçün hər iki Tərəf öz dövlətlərinin qüvvədə olan qanunvericiliyinə müvafiq olaraq hazırkı Saziş çərçivəsində bağlanmış müqavilələrə uyğun şəkildə qarşılıqlı fəaliyyətin aparılmasına, o cümlədən zəruri avadanlıqların, ləvazimatların, hazır məhsul və materialların göndərilməsini və yerdəyişməsinə köməklik göstərilməsi üzrə hər cür tədbirlər görəcəklər.

Maddə 7

Bu Saziş çərçivəsində əməkdaşlıq geodeziya, xəritəçəkmə, kadastr və Yerin məsafədən zondla tədqiq edilməsi sahəsində, o cümlədən kompensasiya və kommersiya əsasında Tərəflər arasında qarşılıqlı razılaşma üzrə digər ixtisaslaşdırılmış əlaqə formalarını istisna etmir.

Maddə 8

Bu Sazişlə müəyyən olunmuş sahələrdə əməkdaşlığı yerinə yetirərkən Tərəflər öz dövlətlərinin qanunvericiliklərinə, bu məsələlər üzrə ikitərəfli və çoxtərəfli müqavilələrə əsaslanmaqla bir-birinin təhlükəsizlik maraqlarını qarşılıqlı şəkildə nəzərə alırlar.

Maddə 9

Bu Sazişdə nəzərdə tutulan elmi-texniki informasiyaların, xəritəçəkmə və digər materialların mübadiləsi Tərəflər arasında açıq xarakter daşıyan sənədləşmə üzrə aparılır.

Məhdud açıq xarakterli material və informasiyaların mübadiləsi zamanı Tərəflər öz dövlətlərinin qüvvədə olan qanunvericiliklərinə, bu məsələlər üzrə ikitərəfli və çoxtərəfli müqavilələrə müvafiq olaraq həmin informasiyanın mühafizəsini təmin edirlər.

Maddə 10

Geodeziya, xəritəçəkmə, kadastr və Yerin məsafədən zondla tədqiq edilməsi sahəsində əməkdaşlıq üzrə Tərəflərin subyektlərinin əldə etdiyi nəticələr onların rəsmi nümayəndələrinin bu işə ilkin yazılı razılığı olmadan nəşr edilə bilməz və ya üçüncü tərəfə verilə bilməz.

Maddə 11

Bu Sazişin müddəalarının təfsiri və tətbiqi, həmçinin, əməkdaşlığın digər aspektlərinin razılaşdırılmasına münasibətdə fikir ayrılığı yarandıqda, Tərəflər onları özlərinin rəsmi nümayəndələri vasitəsilə əlavə ikitərəfli danışıqlar və məsləhətləşmələr yolu ilə həll etməyi öhdələrinə götürürlər.

Maddə 12

Tərəflər, qarşılıqlı razılıq əsasında, bu Sazişə onun ayrılmaz hissəsi sayılan müvafiq protokollarla rəsmiləşdirilən zəruri əlavə və dəyişikliklər edə bilərlər.

Maddə 13

bu Saziş beş il müddətinə bağlanır, Tərəflərin onun qüvvəyə minməsi üçün zəruri dövlətdaxili prosedurları yerinə yetirmələri barədə son yazılı bildirişinin alındığı tarixdən qüvvəyə minir. Əgər Tərəflərdən biri bu Sazişin müddətinin bitməsinə ən azı altı ay qalmış ona xitam vermək niyyəti barədə yazılı xəbərdarlıq etməzsə, avtomatik olaraq hər sonrakı birillik dövrlərə uzadılır.

Daşkənd şəhərində 1999-cu il iyulun 23-də hər biri Azərbaycan, özbək və rus dillərində olmaqla iki nüsxədə imzalanmışdır, bütün mətnlər eyni qüvvəyə malikdir.

Bu Sazişin müddəalarının təfsiri məqsədilə rus dilində olan mətndən istifadə edilir.

Özbəkistan Respublikası Azərbaycan Respublikası Dövlət

Makroiqtisadiyyat Statistika Komitəsi adından

(İmza) (İmza)

Azərbaycan Respublikasının Qanunvericilik toplusu .- 2000.- 31 mart, № 3.- S.1080-1082.