Azərbaycan Respublikası Səhmdar Kommersiya Aqrar-Sənaye Bankının məhkəməyə verilən iddia ərizələri (şikayətlər) və məhkəmə qərarları barəsində kassasiya şikayətləri üçün dövlət rüsumunu ödəməkdən azad edilməsi haqqında

AZƏRBAYCAN RESPUBLİKASI NAZİRLƏR KABİNETİNİN QƏRARI

"Dövlət rüsumu haqqında" Azərbaycan Respublikası Qanununun 3-cü maddəsinin 2-ci hissəsinə əsasən və Azərbaycan Respublikası Səhmdar Kommersiya Aqrar-Sənaye Bankının Azərbaycan Respublikasının Maliyyə Nazirliyi, Ədliyyə Nazirliyi və Milli Bankla razılaşdırılmış təklifini nəzərə alaraq, Azərbaycan Respublikası Səhmdar Kommersiya Aqrar-Sənaye, Sənaye İnvestisiya Səhmdar Kommersiya və Səhmdar Kommersiya Əmanət Banklarının problemli borclarının qaytarılmasını təmin etmək məqsədi ilə Azərbaycan Respublikasının Nazirlər Kabineti qərara alır:

1. Azərbaycan Respublikasının Səhmdar Kommersiya Aqrar-Sənaye Bankı məhkəməyə verilən iddia ərizələri (şikayətlər) və məhkəmə qərarları barəsində kassasiya şikayətləri üçün dövlət rüsumunu ödəməkdən azad edilsin.

2. Bu qərar imzalandığı gündən qüvvəyə minir.

Azərbaycan Respublikasının Baş naziri A. Rasİzadə

Bakı şəhəri, 17 may 2000-ci il № 88

Azərbaycan Respublikasının Qanunvericilik toplusu .- 2000.- 31 may, № 5.- S.2229.