Məhkəmə nəzarətçilərinin və məhkəmə icraçılarının fəaliyyətinə nəzarət Qaydasının təsdiq edilməsi barədə

Azərbaycan Respublİkası Nazİrlər KabİnetİNİN QƏRARI

«Məhkəmə nəzarətçiləri və məhkəmə icraçıları haqqında» Azərbaycan Respublikası Qanununun tətbiq edilməsi barədə» Azərbaycan Respublikası Prezidentinin 2000-ci il 5 yanvar tarixli, 246 nömrəli Fərmanının 1-ci bəndinin 4-cü abzasının icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. «Məhkəmə nəzarətçilərinin və məhkəmə icraçılarının fəaliyyətinə nəzarət Qaydası» təsdiq edilsin (əlavə olunur).

2. Bu qərar imzalandığı gündən qüvvəyə minir.

Azərbaycan Respublikasının Baş naziri A. RASİZADƏ

Bakı şəhəri, 1 may 2000-ci il

№ 80

Azərbaycan Respublikası Nazirlər Kabinetinin

2000-ci il 1 may tarixli 80 nömrəli qərarı ilə

təsdİq edİlmİşdİr

Məhkəmə nəzarətçilərinin və məhkəmə icraçılarının fəaliyyətinə nəzarət

Qaydası

I. Ümumİ müddəalar

1. Bu Qayda «Məhkəmə nəzarətçiləri və məhkəmə icraçıları haqqında» Azərbaycan Respublikası Qanununun tətbiq edilməsi barədə Azərbaycan Respublikası Prezidentinin 2000-ci il 5 yanvar tarixli, 246 nömrəli Fərmanına əsasən hazırlanmışdır və məhkəmə nəzarətçilərinin və məhkəmə icraçılarının fəaliyyətinə nəzarət qaydasını müəyyən edir.

2. Azərbaycan Respublikası Konstitusiya Məhkəməsinin, Azərbaycan Respublikası Ali Məhkəməsinin və Azərbaycan Respublikası İqtisad Məhkəməsinin məhkəmə nəzarətçiləri istisna olmaqla, məhkəmə nəzarətçilərinin və məhkəmə icraçılarının fəaliyyətinə nəzarət Azərbaycan Respublikası Ədliyyə Nazirliyinin məhkəmə nəzarətçiləri və məhkəmə icraçıları idarəsi tərəfindən həyata keçirilir.

3. Məhkəmə nəzarətçilərinin və məhkəmə icraçılarının fəaliyyəti ilə əlaqədar Ədliyyə Nazirliyinə daxil olmuş şikayət və ərizələr, şikayətlərin daxilolma səbəbləri, ümumi statistik məlumatlar, məhkəmələrin məhkəmə qərarlarının icrası ilə bağlı məlumatları və s. təhlil edilir və yoxlama aparan şəxs tərəfindən yoxlamanın planı hazırlanır. Bu plan ədliyyə naziri tərəfindən təsdiq edilir.

II. Məhkəmə İcraçılarının fəalİyyətİnİn yoxlanılması

4. Məhkəmə icraçılarının fəaliyyəti yoxlanılarkən yoxlama aparan şəxs birinci növbədə tamamlanmamış icra icraatlarını diqqətlə öyrənir, hər bir icra olunmamış işlə tanış olur, ləngimənin səbəblərini öyrənir, zəruri hallarda icranın tezləşdirilməsi barədə göstəriş verir. Ləngimənin həqiqi səbəblərinə dair şübhə yarandıqda, yoxlama aparan şəxs yaranmış şübhələri aradan qaldırmaq məqsədi ilə borclunu söhbət üçün dəvət edə bilər.

5. Tamamlanmış icraatların yoxlanılması onların inventarlaşdırılmasından başlayır. Bütün icra icraatları sıra nömrəsi ilə qeydə alınır və onların qeydiyyat kitabında qeydə alınması yoxlanılır. Uyğunsuzluqlar müəyyən edildikdə onun səbəblərini aydınlaşdırmaq və aradan qaldırmaq üçün tədbirlər görülməlidir.

6. Eyni zamanda icra sənədlərinin özlərinin hazırlanmasının düzgünlüyü, onlarda məhkəmə icraçıları tərəfindən həyata keçirilən icra hərəkətlərinin əks edilməsi, borcluya təklifin göndərilməsi, borclunun əmlak vəziyyətinin yerində yoxlanılması üçün oraya gedilməsi, pulun borclu tərəfindən banka və ya məhkəmə icraçısına ödənilməsi, tutulan məbləğin tələbkara göndərilməsi üçün poçt göndərişinin tərtib edilməsi, tələbkara pulun alınması üçün çekin verilməsi və s. öyrənilir. Məhkəmə qətnamələrinin qərarlarının icra edilməsi ilə əlaqədar məhkəmə icraçısına daxil olmuş sənədlər onların aid olduqları icra icraatlarında olmalıdır.

7. Bundan başqa, yoxlama aparan şəxs ictimai işlər növündə, cərimə növündə cəzanın icrası, müəyyən vəzifə tutma və ya fəaliyyətlə məşğul olma hüququndan məhrumetmə növündə cəzanın icrasına, islah işləri növündə cəzanın icrasına baxan məhkəmə icraçısı tərəfindən qanunvericiliklə müəyyən olunmuş vəzifələrini yerinə yetirilməsini, məhkəmə icraçıları tərəfindən şərti məhkum edilmiş məhkumlara nəzarətin həyata keçirilməsini yoxlayır.

8. Həmçinin yoxlama aparan şəxs icra işinin təşkilində hakimlərin və məhkəmə sədrinin rolunu, məhkəmə icraçısının fəaliyyətinə nəzarət edib-etməmələrini, məhkəmə işçilərinin əməliyyat müşavirələrində məhkəmə qərarlarının icrası işinin müzakirə olunub-olunmamasını, hakim tərəfindən məhkəmə icraçısına praktik yardımın göstərilib-göstərilməməsini öyrənir.

III. Məhkəmə nəzarətçİlərİnİn fəalİyyətİnİn yoxlanılması

9. Məhkəmə nəzarətçilərinin fəaliyyəti yoxlanılarkən birinci növbədə onların qüvvədə olan qanunvericilik aktlarına riayət etmələri, vəzifə borclarını layiqincə yerinə yetirmələri, onlara tapşırılmış sahəni təmin etmələri, müəyyən olunmuş qaydalara riayət etmələri, tutduğu vəzifədə tabeçilik prinsiplərinə əməl etməsi yoxlanılır.

IV. Yoxlamanın nətİcələrİ İlə bağlı tədbİrlər

10. Yoxlamanın nəticələrinin həyata keçirilməsinin məqsədi işdə olan çatışmazlıqların və pozuntuların, onları yaradan səbəblərin aradan qaldırılması, işin təşkilinin müsbət forma və metodlarının təbliği, onların gündəlik təcrübədə tətbiq edilməsidir.

11. Yoxlamanın gedişatında yoxlama aparan şəxs məhkəmə nəzarətçisi və məhkəmə icraçısı ilə konkret işin öyrənilməsi zamanı aşkar edilmiş hər bir pozuntu üzrə ətraflı söhbət aparır, bu pozuntunun məzmununu aydınlaşdırır və onun səbəblərini müəyyən edir. Yoxlama aparan şəxs vətəndaşların pozulmuş hüquq və maraqlarının bərpa edilməsi üçün tədbirlər görməyə borcludur. Bu zaman yoxlama aparan şəxs məhkəmə nəzarətçisinin və məhkəmə icraçısının yol verdiyi pozuntulara görə məsuliyyət dərəcəsini qiymətləndirməlidir.

12. Yoxlamanın nəticələri üzrə arayış hazırlanır və orada görülmüş işin vəziyyətinin ümumi xarakteristikası verilir, həm müsbət cəhətlər, həm də aşkar edilmiş çatışmazlıqlar və onların səbəbləri qeyd olunur. Yoxlamanın nəticələri məhkəmədə və Ədliyyə Nazirliyinin əməliyyat müşavirələrində müzakirə edilir.

Azərbaycan Respublikasının Qanunvericilik toplusu .- 2000.- 31 may, № 5.- S.2204-2206.