“Ərazi quruluşu və inzibati ərazi bölgüsü haqqında” Azərbaycan Respublikası Qanununun tətbiq edilməsi barədə

AZƏRBAYCAN RESPUBLİKASI PREZİDENTİNİN FƏRMANI

“Ərazi quruluşu və inzibati ərazi bölgüsü haqqında” Azərbaycan Respublikası Qanununun qüvvəyə minməsi ilə əlaqədar həmin Qanunun tətbiq edilməsini təmin etmək məqsədi ilə qərara alıram:

1. Azərbaycan Respublikasının Nazirlər Kabinetinə tapşırılsın ki, iki ay müddətində:

qüvvədə olan qanunvericilik aktlarının “Ərazi quruluşu və inzibati ərazi bölgüsü haqqında” Azərbaycan Respublikasının Qanununa uyğunlaşdırılması barədə təkliflərini Azərbaycan Respublikasının Prezidentinə təqdim etsin;

Nazirlər Kabinetinin və müvafiq mərkəzi icra hakimiyyəti orqanlarının normativ hüquqi aktlarının həmin Qanuna uyğunlaşdırılmasını təmin etsin və bu barədə Azərbaycan Respublikasının Prezidentinə məlumat versin;

“Ərazi quruluşu və inzibati ərazi bölgüsü haqqında” Azərbaycan Respublikası Qanununun pozulmasına görə məsuliyyət növlərini müəyyən edən qanunvericilik aktının layihəsini hazırlayıb Azərbaycan Respublikasının Prezidentinə təqdim etsin;

həmin Qanunun 5.6-cı maddəsində nəzərdə tutulmuş ərazi vahidlərinin, habelə ayrı-ayrı milli təhlükəsizlik və ya müdafiə təyinatlı ərazilərin qapalı elan edilməsi və xüsusi rejimli dövlət idarəetmənin tətbiq edilməsi qaydası barədə təkliflərini Azərbaycan Respublikasının Prezidentinə təqdim etsin;

öz səlahiyyətləri daxilində “Ərazi quruluşu və inzibati ərazi bölgüsü haqqında” Azərbaycan Respublikasının Qanunundan irəli gələn digər məsələləri həll etsin.

2. Müəyyən edilsin ki:[1]

2.1. “Ərazi quruluşu və inzibati ərazi bölgüsü haqqında” Azərbaycan Respublikası Qanununun 5.7-ci, 7.2-ci, 7.4-cü, 7.5-ci, 8.2-ci, 8.4-cü, 9.2-ci, 9.6-cı, 10.2-ci, 10.3-cü, 11-1.1-ci, 11-1.3-cü, 11-1.4-cü, 12.1-ci, 12.3-cü, 12.3.1-ci və 13-1.1-ci maddələrində nəzərdə tutulmuş “müvafiq icra hakimiyyəti orqanı”nın səlahiyyətlərini Azərbaycan Respublikasının Prezidenti həyata keçirir;[2]

2.2. həmin Qanunun 7.4.1-ci, 7.4.3-cü, 7.5.1-ci, 7.5.4-cü, 8.4.1-ci, 9.6.1-ci, 9.8-ci, 10.3.1-ci, 10.3.3-cü, 11-1.3.1-ci 11-1.3.2-ci, 11-1.4.1-ci və 11-1.4.2-ci maddələrində “müvafiq icra hakimiyyəti orqanları” dedikdə yerli icra hakimiyyəti orqanları (şəhər rayonu icra hakimiyyəti orqanları istisna olmaqla) nəzərdə tutulur;

2.3. həmin Qanunun 7.4.2-ci, 7.5.2-ci, 8.4.2-ci, 9.6.2-ci və 10.3.2-ci maddələrində “müvafiq icra hakimiyyəti orqanının ayrı-ayrı inzibati ərazi dairəsi üzrə nümayəndəliyi” dedikdə yerli icra hakimiyyəti başçılarının inzibati ərazi dairəsi üzrə nümayəndəlikləri nəzərdə tutulur;

2.4. həmin Qanunun 7.4.5-ci, 7.6-cı, 8.4.5-ci, 10.3.4-cü, 11.2-ci, 11-1.3.3-cü, 11-1.5-ci, 12.3.2-ci və 13.3-cü maddələrində “müvafiq icra hakimiyyəti orqanı” dedikdə Azərbaycan Respublikasının Ekologiya və Təbii Sərvətlər Nazirliyi və Əmlak Məsələləri Dövlət Xidməti qismində Azərbaycan Respublikasının İqtisadiyyat Nazirliyi nəzərdə tutulur.[3]

2.5. həmin Qanunun 9.8-ci maddəsinin ikinci cümləsində “müvafiq icra hakimiyyəti orqanı” dedikdə Əmlak Məsələləri Dövlət Xidməti qismində Azərbaycan Respublikasının İqtisadiyyat Nazirliyi nəzərdə tutulur.[4]

3. Şəhər rayonu inzibati ərazi vahidi hüdudlarında olan ərazi vahidlərinə və sahə inzibati ərazi dairələrinə münasibətdə “Ərazi quruluşu və inzibati ərazi bölgüsü haqqında” Azərbaycan Respublikası Qanununun 7.4.1-ci, 7.5.1-ci, 7.5.4-cü, 8.4.1-ci, 9.6.1-ci, 10.3.1-ci, 10.3.3-cü, 11-1.3.1-ci və 11-1.4.1-ci maddələrində nəzərdə tutulmuş qərarlar və sənədlər müvafiq şəhər rayonu icra hakimiyyəti orqanının rəyi nəzərə alınmaqla qəbul və tərtib edilir.[5]

Azərbaycan Respublikasının Prezidenti Heydər Əlİyev

Bakı şəhəri, 21 oktyabr 2000-ci il

№ 406

Azərbaycan Respublikasının Qanunvericilik toplusu .- 2000.- 31 oktyabr, № 10.- S.4274;4275.