2000-ci il yanvarın 24-25-də Moskva şəhərində Müstəqil Dövlətlər Birliyinin Dövlət Başçıları Şurasının, Hökumət Başçıları Şurasının və Xarici İşlər Nazirləri Şurasının iclaslarında imzalanmış sənədlər barəsində

AZƏRBAYCAN RESPUBLİKASI PREZİDENTİNİN SƏRƏNCAMI

1. 2000-ci il yanvarın 25-də Moskva şəhərində Müstəqil Dövlətlər Birliyinin Dövlət Başçıları Şurasının iclasında Azərbaycan Respublikası tərəfindən imzalanmış aşağıdakı sənədlər təsdiq edilsin:

1) 2000-2003-cü il dövrü üçün cinayətkarlıqla mübarizənin birgə tədbirlərinin Dövlətlərarası Proqramı haqqında Qərar;

2) Müstəqil Dövlətlər Birliyinin iştirakçısı olan dövlətlərin Müdafiə Nazirləri Şurası haqqında Əsasnaməyə dəyişikliklər və əlavələr edilməsi barədə Protokol və ona dair Azərbaycan Respublikasının xüsusi rəyi;

3) Müstəqil Dövlətlər Birliyinin iştirakçısı olan dövlətlərin başçılarının 1941-1945-ci illərin Böyük Vətən müharibəsində Qələbənin 55-ci ildönümü ilə əlaqədar Birliyin iştirakçısı olan dövlətlərin xalqlarına və dünya ictimaiyyətinə müraciət haqqında Qərar və ona dair Azərbaycan Respublikasının xüsusi rəyi;

4) Müstəqil Dövlətlər Birliyinin İcraiyyə Komitəsi haqqında Əsasnamə barədə Qərar və ona dair Azərbaycan Respublikasının xüsusi rəyi;

5) Müstəqil Dövlətlər Birliyinin Dövlət Başçıları Şurasında sədrlik haqqında Qərar;

6) Müstəqil Dövlətlər Birliyinin Dövlət Başçıları Şurasının, Hökumət Başçıları Şurasının, Xarici İşlər Nazirləri Şurasının, İqtisadi Şurasının iclaslarının keçirilməsi üçün xərclər smetası haqqında Qərar.

2. 2000-ci il yanvarın 25-də Moskva şəhərində Müstəqil Dövlətlər Birliyinin Hökumət Başçıları Şurasının iclasında imzalanmış aşağıdakı sənədlər təsdiq edilsin:

1) “Mir” Dövlətlərarası teleradiokompaniyası əməkdaşlarının əməyinin ödənilməsi şərtləri haqqında Qərar və ona Azərbaycan Respublikasının xüsusi rəyi;

2) Razılaşdırılmış antiinhisar siyasətinin keçirilməsi haqqında Müqavilə;

3) Müstəqil Dövlətlər Birliyinin Hökumət Başçıları Şurasında sədrlik haqqında Qərar.

3. 2000-ci il yanvarın 24-də Moskva şəhərində Müstəqil Dövlətlər Birliyinin Xarici İşlər Nazirləri Şurasının iclasında imzalanmış aşağıdakı sənədləri Azərbaycan Respublikasının Xarici İşlər Nazirliyi tərəfindən nəzərə alınsın:

1) Müstəqil Dövlətlər Birliyinin Dövlət Başçıları Şurası iclasının gündəliyinin layihəsindəki “Abxaziyada (Gürcüstan) münaqişənin tənzimlənməsi barədə” bəndlə əlaqədar Gürcüstanın təkliflərinə baxılması haqqında Qərar;

2) Abxaziyada (Gürcüstan) münaqişənin tənzimlənməsi üzrə Müstəqil Dövlətlər Birliyinin Müvəqqəti Operativ İşçi Qrupunun rəhbəri haqqında Qərar;

3) Dnestryanı münaqişənin tənzimlənməsinin vəziyyəti barədə MDB İcra Komitəsinin məlumatı haqqında Qərar;

4) 1999-cu il üçün Müstəqil Dövlətlər Birliyi çərçivəsində xarici işlər nazirlikləri arasında çoxsəviyyəli məsləhətləşmələr Planının yerinə yetirilməsi və 2000-ci il üçün Plan haqqında Qərar (Azərbaycan Respublikasının xüsusi rəyi ilə birlikdə);

5) 2005-ci ilədək dövr üçün Müstəqil Dövlətlər Birliyinin inkişafı üzrə hərəkətlər Proqramı layihəsinin hazırlanmasının gedişatı haqqında Qərar;

6) Müstəqil Dövlətlər Birliyinin Xarici İşlər Nazirləri Şurasında sədrlik haqqında Qərar;

7) 2000-2002-ci illərdə MDB Dövlət Başçıları Şurası, Hökumət Başçıları Şurası, Xarici İşlər Nazirləri Şurası və İqtisad Şurası iclaslarının keçirilməsinin ehtimal olunan müddətləri və yeri, Birlik orqanlarında sədrliyin növbəsi və 2000-ci ildə MDB orqanları iclaslarında baxılmaq üçün təklif edilən əsas məsələlərin Siyahısı haqqında Qərar;

8) Müstəqil Dövlətlər Birliyinin Dövlət Başçıları Şurası və Hökumət Başçıları Şurası iclaslarının gündəliklərinin layihələri haqqında Qərar;

9) Müstəqil Dövlətlər Birliyinin iştirakçısı olan dövlətlərin hərbi-texniki əməkdaşlığının dövlətlərarası proqramlarının işlənib hazırlanması və həyata keçirilməsi haqqında Müqavilənin və Müstəqil Dövlətlər Birliyinin iştirakçısı olan dövlətlərin iqtisadiyyatının, hərbi və humanitar daşımaların ehtiyacları üçün nəqliyyat yolları şəbəkəsindən istifadə və onun inkişafı haqqında Sazişin layihələri barədə Qərar;

10) Protokol qərar (Birliyin iştirakçısı olan dövlətlərin Müdafiə Nazirləri Şurasının sənədlərinin layihələri haqqında);

11) Müstəqil Dövlətlər Birliyinin iştirakçısı olan dövlətlərin narkotik vasitələr, psixotrop maddələr və prekursorların qanunsuz dövriyyəsi ilə mübarizədə əməkdaşlığı haqqında Sazişin, MDB iştirakçısı olan dövlətlərin təhsil sahəsində məlumatın mübadiləsi haqqında Sazişin, radioekologiya, radiasiya təhlükəsizliyi, radiobiologiya və qonşu elmlər üzrə mütəxəssislərin hazırlanması sahəsində əməkdaşlıq haqqında Sazişin layihələri haqqında Qərar;

12) Dövlətlərarası Aviasiya Komitəsi və Müstəqil Dövlətlər Birliyinin iştirakçısı olan dövlətlərin xarici siyasət idarələrinin birgə işinin praktiki nəticələri haqqında Qərar (Qərarın 2-ci bəndinin ikinci və dördüncü abzaslarının istisna olunmaqla);

4. Azərbaycan Respublikasının Nazirlər Kabinetinə tapşırılsın ki, bu Sərəncamın 1-ci və 2-ci bəndlərində göstərilən sənədlərin həyata keçirilməsi ilə əlaqədar lazımi tədbirlər görsün.

5. Azərbaycan Respublikasının Xarici İşlər Nazirliyi bu Sərəncamın 2-ci bəndinin 2-ci yarımbəndində göstərilən Müqavilənin qüvvəyə minməsi üçün zəruri olan dövlətdaxili prosedurların yerinə yetirilməsi haqqında Müstəqil Dövlətlər Birliyinin İcraiyyə Komitəsini xəbərdar etsin.

Azərbaycan Respublikasının Prezidenti Heydər Əlİyev

Bakı şəhəri, 21 oktyabr 2000-ci il

№ 556

Azərbaycan Respublikasının Qanunvericilik toplusu .- 2000.- 31 oktyabr, № 10.- S.4304-4306.