2000-ci il iyunun 20-də Moskva şəhərində Müstəqil Dövlətlər Birliyinin Hökumət Başçıları Şurasının və Xarici İşlər Nazirləri Şurasının iclaslarında Azərbaycan Respublikası tərəfindən imzalanmış sənədlər haqqında

AZƏRBAYCAN RESPUBLİKASI PREZİDENTİNİN SƏRƏNCAMI

1. 2000-ci il iyunun 20-də Moskva şəhərində Müstəqil Dövlətlər Birliyinin Hökumət Başçıları Şurasının iclasında Azərbaycan Respublikası tərəfindən imzalanmış aşağıdakı sənədlər təsdiq edilsin:

1) "Müstəqil Dövlətlər Birliyinin xarici iqtisadi fəaliyyətinin vahid Əmtəə nomenklaturu haqqında 1995-ci il 3 noyabr tarixli Sazişə dair Protokol";

2) "Standartlaşdırma, metrologiya və sertifikatlaşdırma sahəsində razılaşdırılmış siyasət yeridilməsi haqqında 1992-ci il 13 mart tarixli Sazişə əlavələr və dəyişikliklər edilməsi barədə Protokol" və ona dair Azərbaycan Respublikasının xüsusi rəyi;

3) "2000-2005-ci illərdə qarşılıqlı surətdə göndəriləcək məhsullar üçün əməyin təhlükəsizliyi və mühafizəsi sahəsində standartlar hazırlanmasına dair Dövlətlərarası Proqram haqqında Qərar" və ona dair Azərbaycan Respublikasının xüsusi rəyi;

4) Xatirə Kitablarının, "Şöhrət ordeninin hər üç dərəcəsini alanlar" məcmuəsinin nəşrinin başa çatdırılmasına, müharibə illərinin (1941-1945-ci illər) Sosialist Əməyi Qəhrəmanları haqqında kitab nəşr edilməsinə dair Qərar.

2. 2000-ci il iyunun 20-də Moskva şəhərində Müstəqil Dövlətlər Birliyinin Xarici İşlər Nazirləri Şurasının iclasında Azərbaycan Respublikası tərəfindən imzalanmış "Birliyin nizamnamə və digər orqanlarında Birliyin iştirakçısı olan dövlətlərin daimi səlahiyyətli nümayəndələri Şurası haqqında Əsasnaməyə dair Qərar" təsdiq edilsin.

3. Azərbaycan Respublikasının Nazirlər Kabinetinə tapşırılsın ki, bu Sərəncamın 1-ci bəndində göstərilən sənədlərin həyata keçirilməsini təmin etmək üçün lazımi tədbirlər görsün.

4. Azərbaycan Respublikasının Xarici İşlər Nazirliyi bu Sərəncamın 1-ci və 2-ci bəndlərində göstərilən sənədlərin qüvvəyə minməsi üçün zəruri olan dövlətdaxili prosedurların yerinə yetirilməsi barədə Müstəqil Dövlətlər Birliyinin İcraiyyə Komitəsini xəbərdar etsin.

Azərbaycan Respublikasının Prezidenti Heydər Əlİyev

Bakı şəhəri, 25 oktyabr 2000-ci il

№ 559

Azərbaycan Respublikasının Qanunvericilik toplusu .- 2000.- 31 oktyabr, № 10.- S.4365.