"Azərbaycan Respublikası müdafiə, daxili işlər, milli təhlükəsizlik nazirliklərinin, Azərbaycan Respublikası Dövlət Sərhədini Mühafizə Komitəsinin və Azərbaycan Respublikası qanunvericiliyində nəzərdə tutulan digər hərbi birləşmələrin hərbi qulluqçularını, sıravi və rəis heyətinə mənsub şəxslərini ərzaq payı və pul vəsaiti ilə təmin etmək haqqında" Azərbaycan Respublikası Nazirlər Kabinetinin 1992-ci il 19 may tarixli, 271 nömrəli qərarına dəyişiklik edilməsi barədə

AZƏRBAYCAN RESPUBLİKASI NAZİRLƏR KABİNETİNİN QƏRARI

Azərbaycan Respublikası Maliyyə Nazirliyinin və Milli Təhlükəsizlik Nazirliyinin təkliflərini nəzərə alaraq Azərbaycan Respublikasının Nazirlər Kabineti qərara alır:

1. "Azərbaycan Respublikası müdafiə, daxili işlər, milli təhlükəsizlik nazirliklərinin, Azərbaycan Respublikası Dövlət Sərhədini Mühafizə Komitəsinin və Azərbaycan Respublikası qanunvericiliyində nəzərdə tutulan digər hərbi birləşmələrin hərbi qulluqçularını, sıravi və rəis heyətinə mənsub şəxslərini ərzaq payı və pul vəsaiti ilə təmin etmək haqqında" Azərbaycan Respublikası Nazirlər Kabinetinin 1992-ci il 19 may tarixli, 271 nömrəli qərarının 9-cu bəndi aşağıdakı redaksiyada verilsin:

"9. Xidmət yerinin dəyişdirilməsi ilə əlaqədar olaraq yaşayış yeri olmayan və bu səbəbdən kirayədə yaşamağa məcbur olan zabitlərə, gizirlərə, miçmanlara, müddətdən artıq xidmət edən hərbi qulluqçulara faktiki məsrəflərə uyğun olaraq, lakin aşağıdakı məbləğlərdən yuxarı olmamaq şərti ilə mənzilin kirayəsi üçün pul kompensasiyası ödənilir:

Bakı şəhərində - 1 sutka üçün 1700 manat;

başqa şəhər və rayon mərkəzlərində - 1 sutka üçün 1200 manat;

digər yaşayış məntəqələrində - 1 sutka üçün 1000 manat.

Göstərilən hərbi qulluqçulara onlarla birlikdə yaşayan hər bir ailə üzvü üçün yuxarıda göstərilən müvafiq pul kompensasiyasının 25 faizi həcmində əlavə ödənilir."

2. Nəzərə alınsın ki, bu qərarın 1-ci bəndində nəzərdə tutulmuş dəyişikliklərlə bağlı aidiyyəti nazirlik və baş idarələrə 2000-ci il üçün tələb olunan vəsait həmin təşkilatların 2000-ci il üçün təsdiq edilmiş büdcələrində nəzərdə tutulmuş vəsait dairəsində ödənilir.

3. Bu qərar 2000-ci il 1 oktyabr tarixindən qüvvəyə minir.

Azərbaycan Respublikasının Baş naziri A.Rasİzadə

Bakı şəhəri, 9 oktyabr 2000-ci il

№ 183

Azərbaycan Respublikasının Qanunvericilik toplusu .- 2000.- 31 oktyabr, № 10.- S.4424.