Regionlarda İKT sürətlə inkişaf edir

Şirvan rabitəsi

İnformasiya və kommunikasiya texnologiyaları

Regionlarda rabitə və informasiya texnologiyalarının inkişafı sürətlə davam etməkdədir. RİTN-in birlik və müəssisələri tərəfindən əhalinin müasir poçt, multimedia xidmətlərinə, o cümlədən internetə çıxış imkanları daha geniş şəkildə təşkil olunmuş, onların maraqlarını təmin edən müasir infrastruktur şəbəkəsi yaradılmışdır. Bu istiqamətdə Şirvan şəhərində aparılan işləri xüsusi qeyd etmək lazımdır. Ölkə başçısı İlham Əliyev cənablarının tapşırıq və tövsiyələrinə uyğun olaraq şəhərdə aparılan quruculuq və yenidənqurma işlərinə paralel olaraq inkişaf edən rabitə şəbəkəsi özünün yeni inkişaf mərhələsinə qədəm qoymuşdur.

Tarif gəliri artır

Telekommunikasiya Qovşağının rəisi Rəhman Məmmədov möhtərəm Prezidentimiz İlham Əliyev cənablarının diqqət və qayğısı sayəsində ölkəmizdə bütün sahələrin, o cümlədən informasiya və kommunikasiya texnologiyalarının sürətlə inkişaf etdiyini bildirərək “Regionların sosial-iqtisadi inkişafı” Dövlət Proqramına uyğun olaraq Rabitə və İnformasiya Texnologiyaları Nazirliyinin “Aztelekom” İB-nin dəstəyi ilə Şirvan şəhər rabitəsinin TAE xəttinə qoşulduğunu, şəhər rabitəsinin tamamilə elektronlaşdırıldığını, inzibati binada müasir abunə şöbəsinin, şəhərin “Köhnə şəhər” hissəsində müasir elektron ATS binasının, abunə şöbəsinin və internetklubun əhalinin istifadəsinə verildiyini bildirdi.

R.Məmmədov daha sonra bildirdi ki, Şirvan TKQ ötən ilin plan və tapşırıqlarını 103 faiz yerinə yetirmişdir.Bütün istiqamətlərdə öndə duran qovşaq abunə haqqı proqnozunu 103.2 faiz yerinə yetirmişdir. Plandan əlavə 67,5 min manat əlavə xidmətlərdən gəlir əldə edilmişdir ki, bunun da 36.7 min manatı servis xidmətlərindən gələn gəlirdir ki, bu da 2008-ci il ilə müqayisədə 157 faiz artım deməkdir.

Hər evdə internet

Qovşaq tərəfindən şəhərdə əhalinin internetə çıxış imkanlarının artırılması istiqamətində köklü işlər aparılmışdır. Rabitəçilər “hər evdə internet” şüarını əldə rəhbər tutaraq bu istiqamətdə səylərini artırmaqdadırlar. Qeyd edək ki, əgər bu xidmətdən 2008-ci ildə 106.7 faiz gəlir əldə edilmişdirsə, 2009-cu ildə bu rəqəm 198 faiz olmuşdur. Bu rəqəmdən aydın olur ki, 2009-cu ildə Şirvan TKQ tərəfindən əhaliyə göstərilən xidmətin səviyyəsi artmış və bu istiqamətdə davamlı tədbirlər aparılır. Ötən il əhalinin internetə olan tələbatını ödəmək məqsədilə 1 ədəd ADSL(16 yerlik genişzolaqlı internet xidməti) avadanlığı REMUT stansiyasında quraşdırılmış, 1 ədəd ADSL (24 yerlik) avadanlığı isə mərkəzi EATS-də quraşdırılmışdır ki, bunun nəticəsində ilin əvvəlində ADSL avadanlığından istifadə edənlərin sayı 39 ədəd olmuşdursa, ilin sonunda bu rəqəm 100 faiz və ya 33 ədəd artaraq 72 ədədə çatdırılmışdır. Bundan başqa, şəhərdə “Data Plus” və “Azdatakom” provayderləri də əhaliyə internet xidmətləri təqdim edirlər. Artıq “Data Plus” provayderlərin istifadəçisinin sayı 110 ədədə çatmışdır. Bu rəqəmlərdən aydın görünür ki, 2009-cu il ərzində Şirvan TKQ tərəfindən əhaliyə göstərilən internet xidmətinin səviyyəsi artmışdır. Əhaliyə göstərilən xidmət mədəniyyətinin daha da yüksəldilməsi istiqamətində aparılan davamlı tədbirlərin tərkib hissəsi olaraq qovşaq tərəfindən abunəçilərin telefon borcları barədə fasiləsiz məlumat almaq üçün 156 xidməti yaradılmışdır.

Yeni telefon abunəçilərinin sayı artır

R.Məmmədov daha sonra bildirdi ki, RİTN “Aztelekom”İB-nin dəstəyi ilə qovşaq şəhərin 28 May, S.Zeynalov, M.Ə.Rəsulzadə və Naxçıvan küçələrində əhalinin telefona olan tələbatının ödənilməsi məqsədilə geniş tədbirlər həyata keçirmiş və 600 abunəlik kabel xətti çəkilmişdir. Bu işlərin sırasında şəhərdə bir neçə küçədə paylaşdırıcı kabellərdə əsaslı təmir işləri görülmüş, bütün kabel və telefon xətləri səliqəyə salınmışdır.

Şəhərdə əhalinin telefona olan tələbatının ödənilməsi məqsədilə təxirəsalınmaz tədbirlər davam etdirilmişdir. Belə ki, ötən il 405 ədəd telefon çəkilərək ümumi istifadə tutumu 10370 ədədə çatdırılmışdır.

Qovşaq tərəfində həyata keçirilmiş tədbirlər nəticəsində bu ilin iki ayında tarif gəliri proqnozu 100.5 faiz yerinə yetirilmiş, 61 ədəd telefon çəkilmişdir. Qovşaqda işçilərin nizam-intizamı, işə münasibəti yüksək səviyyədədir.

Sonda qovşaq rəisi R.Məmmədov yaradılan yüksək səviyyədə şərait üçün RİTN-in və “Aztelekom” İB-nin rəhbərliyinə kollektiv adından öz təşəkkürünü bildirərək əminliklə qeyd etdi ki, bundan sonra da var qüvvələri ilə çalışaraq şirvanlılara yüksək səviyyəli rabitə xidməti göstərərək, onları maraqlandıran yeni-yeni əlavə xidmətləri tətbiq edəcəklər.

Poçt

Şirvanda telekommunikasiya və informasiya texnologiyalarının inkişafına paralel olaraq poçt rabitəsi sürətlə inkişaf edir. Ən müasir texnologiyaların poçt rabitəsinə tətbiqi ilə bütün respublikamızda olduğu kimi Şirvanda da müasir poçt rabitəsinin əsası qoyulmuşdur. Ölkənin şəhərləri sırasında duran Şirvanda bu sahədə ən böyük uğurlara imza atılmışdır. Bunun nəticəsidir ki, paytaxtla yanaşı bütün regionlarda, o cümlədən Şirvanda günü-gündən inkişaf edən poçt sektoru ənənəvi xidmətlərin keyfiyyətini artırmaqla yaxın gələcəkdə ən yeni xidmətləri ilə də müştərilərini sevindirəcək.

Xidmət keyfiyyəti ilə yanaşı gəlirlər də artır

Regional Poçt Filialı ötən ilin tarif gəlirləri üzrə illik proqnozu 116.2 min manata qarşı 144.1 min manat , yəni 124 faiz yerinə yetirmişdir. Uğurlar estafetini davam etdirən Şirvan RPF-nin kollektivinin səyi ilə bu nailiyyət davam etdirilərək bu ilin birinci rübü üzrə tarif gəliri proqnozu 110 faiz yerinə yetirilmişdir.

Qazanılan nailiyyətlər, əldə edilən uğurlardan danışan Şirvan RPF-nin rəisi Arif Şahbazov bizimlə söhbətində bildirdi ki, RİTN “Azərpoçt”MMC-nin rəhbərliyi ilə Şirvan Regional Poçt Filialı tərəfindən yeni xidmətlərin yaradılması, əhaliyə yüksək keyfiyyətli xidmət təqdim etmək üçün davamlı tədbirlər həyata keçirilir. Onun sözlərinə görə, filialın poçt şöbələrində əhaliyə, müəssisə və təşkilatlara yüksək səviyyədə xidmət göstərmək üçün bütün şərait yaradılmışdır. Belə ki, bütün poçt şöbələri son illərdə tikilmiş yeni binalarda yerləşir və onlar lazımi avadanlıqlarla, mebellərlə təchiz edilmişdir.

Göstərilən dövr ərzində qəbul edilmiş pul baratları, bağlamalar, teleqramlar ötən ilin müvafiq dövrü ilə müqayisədə xeyli artmışdır.

Ən müasir texnologiyaların tətbiqi

Bu gün poçt göndərişlərinin bir ünvandan digər ünvana göndərilərkən onun hansı gündə, hansı saatda harada olmasını öyrənmək elə də çətin deyil. Elə Şirvan rabitəçiləri üçün də bu çətin olmayacaq. A.Şahbazov bildirdi ki, filialda ən müasir texnologiyalardan yararlanaraq əhaliyə göstərdiyi xidmətin keyfiyyətini daha da artırmaq üçün aparılan işlərin tərkib hissəsi olaraq həm ölkə daxili, həm də beynəlxalq poçt göndərişlərinin ünvan sahibinə çatana qədər hərəkətini izləmək üçün yeni avadanlıq qurulur. Hər bir kəsin marağına səbəb olacaq bu layihənin tətbiqini ümumi poçt rabitəsinin daha bir uğuru hesab etmək olar

A.Şahbazov daha sonra qeyd etdi ki, yaxın gələcəkdə “Azərpoçt”MMC-nin bütün filiallarında, o cümlədən Şirvan Regional Poçt Filialında da müştərilərə bank-maliyyə xidmətlərinin göstərilməsi üçün davamlı tədbirlər həyata keçirildiyini bildirdi. Bunun üçün bütün poçt müəssisələrində islahatlar aparılır və texniki təchizat işləri həyata keçirilir. “Azərpoçt” MMC rəhbərliyi bu möhtəşəm layihəni həyata keçirdikdən sonra bütün poçt müəssisələrinin maliyyə vəziyyəti və işçilərin maddi vəziyyəti müsbət istiqamətdə daha da yaxşılaşacaqdır.

Poçt işçiləri əhaliyə göstərilən bu və ya digər xidmətlər zamanı insan faktorunu həmişə əldə rəhbər tutaraq onlara günün tələbləri səviyyəsində xidmət göstərirlər. Bunun nəticəsidir ki, bu gün Şirvanda bütün sakinlər rabitəçilərdən razılıq edir. Məhz bunun nəticəsidir ki, hesabat dövrü ərzində filialın göstərdiyi xidmətlərə dair heç bir əsaslı şikayət olmamışdır.

Regional poçt filialının rəisi A.Şahbazov bütün bu diqqət və qayğıya görə, RİTN-in və “Azərpoçt” MMC-nin rəhbərliyinə kollektiv adından öz təşəkkürünü bildirərək bundan sonra da bütün kollektivlə verilən plan və tapşırıqların yüksək səviyyədə yerinə yetirilməsi üçün səfərbər olacaqlarını bildirdi.

Rəvan Soltanov

Rabitə dünyası.- 2010.- 9 aprel.- S.5.