İTİ-nin İnternet Şurasının növbəti iclası keçirilib

AMEA İnformasiya Texnologiyaları İnstitutunun İnternet Şurasının növbəti iclası keçirilib. İclasda AMEA-nın əsas binasında yerləşən institutların internetlə təmini, İTİ-nin yeni İnternet Mərkəzinin istifadəyə verilməsi istiqamətində görülən işlər, həmçinin institutda internet xidmətlərinin keyfiyyətinin artırılması, informasiya təhlükəsizliyinin təmini üzrə müvafiq tədbirlərin görülməsi, vahid antivirus sisteminin yaradılması və tətbiqi məsələləri müzakirə edilib.

İTİ-nin şöbə müdiri, tex.e.n. Əmiraslan Əliyev AMEA-nın əsas binasındakı lokal kompyuter şəbəkəsinin yeni strukturunun, o cümlədən İTİ-nin yeni İnternet Mərkəzinin istifadəyə verilməsi ilə əlaqədar görülən işlər haqqında məlumat verdi. İnternet Mərkəzinin lazımi texniki və digər avadanlıqlarla təchiz olunduğunu və yaxın günlərdə istifadəyə veriləcəyini bildirib.

İTİ-nin şöbə müdiri, tex.e.n. Yadigar İmamverdiyev institutda şəbəkə monitorinqinin və informasiya təhlükəsizliyinin təmini istiqamətində görülən işlər haqqında məlumat verib. DDoS-hücumlar, kompyuter virusları və digər zərərli proqramlardan mühafizə, konfidensial məlumatların oğurlanması və onlardan qeyri-qanuni məqsədlər üçün istifadə, spamlarla mübarizə vasitələrindən söhbət açaraq, bu kimi problemlərin aradan qaldırılması üçün tətbiq edilən qabaqcıl texnologiyaların, müxtəlif proqram təminatlarının üstünlüklərindən danışıb. Şöbə müdiri müasir dövrdə informasiya təhlükəsizliyinin təmini üçün çoxsaylı vasitələrin mövcud olduğunu bildirərək, xüsusən də Active Directory sistemindən istifadənin daha məqsədəuyğun olduğunu qeyd edib. Bu sistemin üstünlükləri haqqında məlumat verərək, institutun kompyuter şəbəkəsində Microsoft Active Directory sisteminə keçidin zəruriliyini vurğulayıb, sistemin əsas funksiyaları, texniki tələbləri haqqında danışdı. İnformasiya təhlükəsizliyinin təmini məsələlərinin sistemli şəkildə həll edilməli olduğunu bildirən Y.İmamverdiyev qeyd edib ki, müxtəlif mühafizə vasitələri (aparat, proqram, fiziki, təşkilati və s.) mərkəzləşdirilmiş şəkildə idarə edilməlidir. O, həmçinin müxtəlif təşkilatlarda bu kimi proqram təminatlarından geniş istifadə edildiyini bildirib.

Y.İmamverdiyev müasir antivirus texnologiyalarının tətbiqi məsələlərinə də toxunaraq, bu texnologiyaların informasiya təhlükəsizliyinin təminində mühüm əhəmiyyət kəsb etdiyini vurğulayıb. O, hazırda antivirus proqramlarının istehsalı ilə 50-yə yaxın şirkətin məşğul olduğunu bildirərək İT bazarında yüzlərlə antivirus məhsullarının təklif edildiyini də qeyd edib.

İclasda şəbəkə administratorunun vəzifələri, zəruri əməliyyat sistemlərinin tətbiqi, şəbəkə monitorinqinin keyfiyyət göstəricilərinin artırılması, korporativ antivirus sisteminin yaradılması ilə bağlı müvafiq qərarlar qəbul olundu, lazımi tapşırıqlar verilib.

Rabitə dünyası.- 2010.- 19 fevral.- S.14.