Regionlarda İKT sürətlə inkişaf edir

Lerik rabitəsi

Son illər Lerikdə bütün sahələrdə davamlı inkişaf qeydə alınmışdır. Möhtərəm Prezidentimizin tapşırıq və tövsiyələrinə uyğun olaraq rayonda bütün sahələr kimi rabitə və informasiya texnologiyaları sahəsi də sürətlə inkişaf edir. Belə ki, İcra Hakimiyyətinin dəstəyi, Rabitə və İnformasiya Texnologiyaları Nazirliyinin birlik və müəssisələrinin fəaliyyəti nəticəsidə mütəmadi olaraq rayon mərkəzi ilə yanaşı kəndlərdə də müasir elektron ATS-lər və yeni poçt şöbələri tikilərək əhalinin istifadəsinə verilir.

İnformasiya və kommunikasiya texnologiyaları

Lerikdə informasiya və kommunikasiya texnologiyalarının inkişafı nəzərdə tutulmuş tədbirlər planlarına uyğun olaraq uğurla davam edir. Rayonun relyefinin çətin quruluşa malik olması burada bu sahənin istənilən kimi inkişafına mane ola bilməyib. RİTN “Aztelekom” İB-nin daim dəstəyini üzərində hiss edən lerikli rabitəçilərin onların qarşısında qoyulan tapşırığın yüksək səviyyədə icrası nəticəsində bu gün Lerikdə telefonlaşdırılmamış kənd, yaşayış məntəqəsi yoxdur. Hətta iki-üç ailədən ibarət rayonun əlçatmaz yaylaqlarında belə rabitə mövcuddur. Peyk rabitəsinin köməkliyi ilə bu problem birdəfəlik həll olunub. Rayonun peyk rabitəsi ilə telefonlaşmış olan 5 kəndində (Bırkandul, Davaradibin, Hücü, Conu və Vılıq) 16 nömrəlik mini EATS-lər istifadəyə verilmişdir.Vaxtilə telefonlaşdırılması mümkün olmayan radiotelefonla telefonlaşdırılmış yaşayış məntəqəsi kimi sırada duran, ancaq özündə böyük problemləri yaşadan radiotelefonlar çoxdan arxivə verilib.

Lerik TKQ-nin rəisi Kamaddin Məstiyev RİTN “Aztelekom” İB-nin və İcra Hakimiyyətinin onlara göstərdiyi köməklik sayəsində rayonda informasiya və kommunikasiya texnologiyalarının inkişafı istiqamətində bütün imkanların səfərbər olunduğunu dedi.

Qeyd edək ki, rayon mərkəzi ATS-i tamamilə rekonstruksiya olunaraq sakinlərin istifadəsinə verilmişdir. Köhnə ATS yerləşən avtozal otağı yenidən əsaslı təmir olunaraq müasir səviyyədə iş otaqları yaradılmışdır.

Rayonda baş verən təbii fəlakət zamanı qısa zaman kəsiyində kəndlərdə və rayon mərkəzində abunəçilərin telefonlarının fasiləsiz işinin təmin edildiyini bildirən qovşaq rəisi hər an bu hadisələrin təkrarlana biləcəyindən ehtiyat edərək işlərini daha mükəmməl qurduqlarını qeyd etdi. O daha sonra bildirdi ki, tədbirlər planına uyğun olaraq Lerik-Lənkəran magistralı boyunca olan rabitə xətti texniki normalara uyğunlaşdırılıb.

K.Məstiyev rayonda internet istifadəçilərinin də sayının artdığını bildirdi. Abunəçilər Dail-up-la yanaşı, genişzolaqlı internetdən də geniş şəkildə istifadə edirlər. Artıq bu istiqamətdə də aparılan işlər öz bəhrəsini vermişdir.

Qovşaq rəisi kollektivin qarşıda duran bütün layihələrin həlli istiqamətində bütün gücünü topladığını bildirərək bundan sonra da leriklilərə ən mükəmməl rabitə xidməti təqdim edəcəklərini söylədi.

Poçt

Proqnoz və tapşırıqların icrası təmin olunur

Lerikdə poçt rabitəsi sahəsində aparılan islahatlar öz bəhrəsini verir. Bu istiqamətdə aparılan işlərdən əldə olunan nailiyyətlərdən danışan Lerik PF-nin rəisi Baba Tağıyev Filial tərəfindən bir mərkəz və 29 kənd poçt şöbəsi tərəfindən rayonun 162 kəndinin sakinlərinə bütün poçt xidmətəri göstərdiklərini bildirdi. Rəis bildirdi ki, filialın kollektivi tərəfindən bu ilin 8 aylıq plan və tapşırığı artıqlaması ilə yerinə yetirilmişdir.

Ucqar dağ kəndlərinin poçt şöbələrində bank və maliyyə xidmətlərinin göstərilməsi günün tələbidir

B.Tağıyev bildirdi ki, hal-hazırda filialın kollektivi tərəfindən rayon əhalisinə 30-a yaxın xidmət növü üzrə poçt rabitəsi xidmətləri göstərilir. Bu gün rayon əhalisinə poçt şöbələri vasitəsilə bank və maliyyə xidmətlərinin göstərilməsi günün tələbləri səviyyəsində durduğu üçün ilkin mərhələdə filialın tabeçiliyində olan 30 poçt şöbəsindən 20-si vasitəsilə bu xidmətin göstərilməsi planlaşdırılır. Son illərdə RİTN “Azərpoçt”MMC-nin dəstəyi ilə milli üslubda tikilmiş və mebel dəstləri ilə təchiz olunmuş Kələxan, Pirasora, Şingədulan, Qsmalyan, Günəşli, Rvarud, Vistən, Livədirqə, Kirəvud, Vizəzmin kənd poçt şöbələrinin maddi-texniki bazası bank maliyyə xidmətləri göstərməsi üçün bütün tələblərə tam cavab verir. Çyrud poçt şöbəsinin əsaslı təmir olunması üçün sənədlər hazırlanmış və yaxın günlərdə qeyd olunan poçt şöbəsinin əsaslı təmirinə başlanılacaqdır. Bundan başqa bu il ərzində “Azərpoçt” MMC-nin investisiya fondundan ayrılan vəsaitlər hesabına Vei və Züvüç kəndlərində də yeni poçt şöbələrinin tikintisi həyata keçiriləcək.

B.Tağıyev söhbətinə davam edərək bildirdi ki, filialın kollektivi tərəfindən filial üzrə tarif gəlirinin artırılması üçün daim mənbələr axtarılmaqdadır. Filial üzrə əsas gəlir mənbələrindən olan ŞATD, abunə, elektrik enerjisi, qaz, su haqlarının yığımı daim nəzarətdə saxlanılır. Lerik TKQ ilə Lerik PF arasında qurulmuş normal əməkdaşlığın məntiqi nəticəsi olaraq hər ay ŞATD haqları 97-98 faiz yığılaraq təyinatı üzrə köçürülür. Bundan başqa, kommersiya xidmətlərindən, bağlama, qiymətli banderol, moniqram qəbulundan əldə olunan gəlirlərin artırılması üçün işlər davam etdirilir. Daxil olan dövri mətbuatın, poçt göndərişlərinin nəzarət keçid müddətində itkisiz olaraq ünvanları üzrə çatdırılması üçün lazımi tədbirlər görülür. Poçt göndərişlərinin qəbulu və çatdırılması zamanı filialın işçiləri tərəfindən poçtun təhlükəsizlik qaydalarına tam riayət olunduğu üçün poçt göndərişlərinin qəbulu və çatdırılması zamanı heç bir itki və ya oğurluq hallarına yol verilməmişdir.

Rəis kollektivdən çox razılıq etdi və bütün qazanılan nailiyyətlərdə onların əvəzsiz zəhməti olduğunu dedi. O daha sonra əlavə etdi ki, kollektiv “Müştəri həmişə haqlıdır” devizini ön planda tutaraq işlərini bu istiqamətdə qurur. Rabitəçilər tərəfindən nəinki rayonda yaşayan insanlara, eyni zamanda rayona gələn bütün qonaqlara yüksək səviyyəli poçt rabitəsi xidməti göstərilir. Məhz kollektiv tərəfindən vətəndaşlara göstərilən yüksək səviyyəli xidmətlərin məntiqi nəticəsidir ki, hesabat dövründə göstərilən xidmətlərin keyfiyyəti ilə əlaqədar vətəndaşlar tərəfindən istər Ali Hakimiyyət orqanlarına, RİTN-ə, “Azərpoçt” MMC-yə, istərsə də Lerik İcra Hakimiyyətinə və digər rayon təşkilatlarına heç bir ərizə, şikayət, müraciət daxil olmamışdır. Elə Lerikdə olarkən söhbətləşdiyimiz sakinlər də onların işindən razılıq etdilər. Ümumilikdə qeyd etmək olar ki, bu il Lerik PF üçün uğurlu olmuşdur. Son illərdə respublikamızda rabitə sahəsində aparılan əsaslı islahatlar, bu sahənin yenidən qurulması, rabitə xidmətlərinin kəmiyyət və keyfiyyət göstəricilərinin yüksək həddə çatması, Bakı şəhərindən başlamış ucqar dağ kəndlərinə qədər geniş diapazonda milli üslubda, müasir tipli yeni poçt şöbələri binaları tikilərək rabitəçilərin istifadəsinə verilməsi filialın kollektivini sevindirməklə bərabər qarşılarına məsuliyyətli vəzifələr qoymuşdur.

Filialın kollektivi bu ilin ikinci yarımilliyinə böyük ümidlərlə başlamış, əhaliyə yüksək səviyyəli poçt rabitəsi xidmətləri göstərməklə “Maliyyə xidmətlərinin inkişafı” layihəsinə uyğun olaraq rayon əhalisinə bank və maliyyə xidmətlərinin göstərilməsinə başlanmasını planlaşdırır. Bu işlərin yerinə yetirilməsi üçün filialın kollektivinin kifayət qədər gücü vardır.Lerik PF-nin kollektivi 2010-cu ilin qalan dövründə də rayon əhalisinə nümunəvi poçt xidmətləri göstərmək kimi şərəfli işin öhdəsindən gəlmək üçün bütün potensial qüvvələrini səfərbər edərək qarşıya qoyulan vəzifələrin öhdəsindən bundan sonra da ləyaqətlə gələcəkdir.

Rəvan Soltanov

Rabitə dünyası.- 2010.- 17 sentyabr.- S.10.