Ürəklərdə yaşayan insan

Bu gün ölkəmiz gözəl günlərini yaşayır. Hər tərəfdə geniş quruculuq, abadlıq işləri görülür, yollar çəkilir, körpülər salınır, şəhər və kəndlər öz simasını dəyişir, insanların güzəranı günü-gündən yaxşılaşır. Bu tərəqqini, yüksəlişi görəndə istər-istəməz doxsanıncı illəri xatırlayıram. Ölkə idarəolunmaz vəziyyətə düşmüşdü. Özbaşınalıq, anarxiya, vətəndaş qarşıdurması son həddə çatmışdı. Belə bir vaxtda - 1993-cü ilin iyun ayının 15-də Heydər Əliyevin Azərbaycan Respublikası Ali Sovetinin sədri seçilməsi ölkəmizin həyatında mühüm tarixi, ictimai-siyasi hadisəyə çevrildi. Ulu öndərimiz xilaskarlıq missiyasını öz üzərinə götürdü və doğma xalqının köməyi ilə onu bəlalardan xilas etdi.

Ümummilli lider özünün böyük təcrübəsinə, güclü iradə və nüfuzuna arxalanaraq, ən mürəkkəb dövrlərdə belə dəqiq qərarlar qəbul edərək xalqımızın gələcək yoluna sönməyən bir məşəl yandırdı. Ulu öndər xalqın uzun illər formalaşmış milli dəyərlərini, dövlətçilik təfəkkürünü daha da inkişaf etdirərək, optimal dövlət modelini yaratmağa nail oldu, Azərbaycanı bütün bəlalardan qorudu, tərəqqi yoluna çıxmasından ötrü güclü iradə və uzaqgörənlik nümayiş etdirdi. Onun məqsədyönlü siyasəti nəticəsində qısa zaman kəsiyində ölkəmiz sürətlə tərəqqi etdi, dünyanın sivil dövlətləri arasında özünə layiqli yer tutmağa başladı. Bu baxımdan Azərbaycanın yeni neft strategiyasının işlənib hazırlanması və mərhələ— mərhələ həyata keçirilməsi güclü iqtisadiyyatın yaradılmasına, iş yerlərinin açılmasına, xalqın maddi rifahının yaxşılaşmasına səbəb oldu. "Əsrin müqaviləsi"nin imzalanması dünya dövlətlərinin diqqətini Cənubi Qafqaz regionuna cəlb etməklə yanaşı, həm də Azərbəycanın iqtisadi cəhətdən dünya birliyinə inteqrasiyasının başlanğıcı oldu. Buna görə də indi ölkəmiz iqtisadi cəhətdən inkişaf edən ən qüdrətli bir diyara çevrilmişdir.

Heydər Əliyevin siyasi, iqtisadi, ictimai və mədəni həyatın bütün sahələrini əhatə edən planları bu gün uğurla həyata keçirilir, yurdumuzu çiçəkləndirir, insanları daha yaxşı işləməyə, qurub-yaratmağa ruhlandırır.

Ulu öndər hər bir azərbaycanlının yaxşı yaşamasının qeydinə qalırdı. Çalışırdı ki, insanlar daim dövlətin qayğısı ilə əhatə olunsunlar, onların mənzil-məişət şəraitindəki problemlər vaxtında aradan qaldırılsın, qocalar, əlillər rahat evlərdə yaşasınlar, işıq, qaz və su ödənişlərində onlara müəyyən güzəştlər verilsin.

Ulu öndərimizin siyasi kursu bu gün uğurla davam etdirilir. Azərbaycan Prezidenti İlham Əliyevin insanlara qayğı və hörmət prinsipinin nəticələri göz qabağındadır. Bu gün hər bir vətəndaşın əmək hüququ qorunub təmin edilir, yeni iş yerləri açılır, müharibə və əmək veteranlarına sonsuz qayğı göstərilir. Vaxtilə çadır şəhərciklərindd min bir problemlə üzləşən, toz-torpaq içində yaşayan ailələr üçün yeni şəhərciklər saiınmış, hər cür şəraiti olan yaraşıqlı mənzillər onların istifadəsinə verilmişdir. Məcburi köçkünlər, doğma el-obasından didərgin düşmüş qaçqınlar, Qarabağ müharibəsi əlilləri onlar üçün yaradılmış bu gözə şəraitə görə ölkə Prezidentinə dərin minnətdarlıqlarını bildirir, ulu öndərin arzularının, dönmədən həyata keçməsini məmnuniyyətlə vurğulayırlar. Onlar dövlətimizin həyata keçirdiyi daxili və xarici siyasəti ürəkdən dəstəkləyir və əmin olduqlarını bildirirlər ki, Dağlıq Qarabağ məsələsi tezliklə həll olunacaq, onlar doğma yurd-yuvalarına qayıdacaqlar.

Bu gün müstəqil Azərbaycanımız ulu öndər Heydər Əliyevin müəyyənləşdirdiyi yolla inamla irəliləyir, ölkə Prezidenti İlham Əliyevin ətrafinda daha sıx birləşərək yeni-yeni uğurlara imza atır. İqtisadi inkişaf, qazanılan hər bir qələbə deməyə əsas verir ki, qəlbimizdə yaşayan, adı hər bir azərbaycanlının dilinin əzbəri olan ulu öndərin bütün arzuları həyata keçəcəkdir.

Azər QULİYEV

Respublika.- 2010.- 9 may.- S. 11.