Uğurlu göstəricilərlə

Son dövrlər Azərbaycanın nəqliyyat kompleksi - dəmir yolu, avtomobil, mülki hava nəqliyyatı yolları sahəsində gedən quruculuq işləri ölkəmizin son illərdə əldə etdiyi möhtəşəm iqtisadi nailiyyətlərin bəhrəsi kimi diqqəti cəlb edir. Hazırda müasir dünya standartlarına cavab verən dəmir yolu, avtomobil yollarının, yeni aeroportların tikilməsi, yenidən qurulması, əsaslı təmiri üçün mühüm tədbirlər uğurla həyata keçirilir.

Ümummilli liderimiz Heydər Əliyevin əsasını qoyduğu, formalaşdırdığı və müəyyənləşdirdiyi daxili və xarici siyasət kursu bu gün ölkə Prezidenti cənab İlham Əliyev tərəfindən uğurla və qətiyyətlə həyata keçirilir. Son yeddi il Azərbaycanın iqtisadi-sosial həyatında görünməmiş, dünyada analoqu olmayan sıçrayışlı inkişafla müşayiət olunur. Ölkə başçısının şəxsi qayğısı və rəhbərliyi ilə müstəqil Azərbaycan dövlətinin hərtərəfli və davamlı inkişafı üçün genişmiqyaslı işlər, dövlət proqramları və islahatlar böyük uğurla icra olunur.

Azərbaycan Prezidenti İlham Əliyev 6 iyul 2010-cu ildə ölkənin sosial-iqtisadi həyatında mühüm əhəmiyyət kəsb edən dəmir yolu nəqliyyat sisteminin daha da inkişaf etdirilməsi, ölkə əhalisinin bu nəqliyyat növünə olan tələbatının tam ödənilməsini, daşımaların təhlükəsizliyini, onun infrastrukturunun yeniləşdirilməsini, tranzit daşımaların həcminin artırılmasını və dəmir yolu sahəsi üçün bilikli kadr potensialının hazırlanmasını təmin etmək məqsədilə "Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı"nın təsdiq edilməsi haqqında sərəncam imzalamışdır. Bu sərəncam dəmir yolu təsərrüfatının inkişafını təmin edəcək ən mükəmməl sənəddir. Dövlət Proqramının əsas məqsədi əhalinin və iqtisadiyyatın dəmir yolu xidmətlərinə artan tələbatının təmin olunması, dəmir yolu nəqliyyatında xidmətlərin səviyyəsinin yüksəldilməsi, sərnişin və yükdaşımalarında nəqliyyat xərclərinin artırılması yolu ilə nəqliyyat kompleksinin səmərəli fəaliyyətini və onun ölkənin sosial-iqtisadi tərəqqisində daha fəal iştirakını təmin etməkdir.

Ümumiyyətlə, Dövlət Proqramında 2010-2014-cü illərdə dəmir yolunda bir sıra vacib məsələlərin həlli öz əksini tapıb. Bunlardan: Bakı-Tbilisi-Qars yeni dəmir yolu xəttinin istismara buraxılması nəticəsində Asiya ölkələrini Avropa ilə birləşdirən birbaşa dəmir yolu dəhlizində artacaq beynəlxalq tranzit yük axınlarının fasiləsiz nəql edilməsinin təmin olunması, sərnişin və yükdaşımaların keyfiyyətinin artırılması və təhlükəsizliyinin təmin edilməsi; yeni elmi-texniki nailiyyətlərin, texnologiyaların bu sahədə tətbiq edilməsi; dəmir yolu nəqliyyatında sərnişin daşımalarının keyfiyyətinin və gəlirlərinin artırılmasını təşkil edərək strategiyanın müəyyən edilməsi və s.

Bundan başqa, ölkə başçısı tərəfindən Dövlət Proqramının imzalanması dəmir yolunda aparılan islahatların sürətlə başa çatdırılmasına geniş imkanlar açır. Proqramda nəqliyyat sisteminin əsas və aparıcı sahələrindən biri olan dəmir yolunun bütün təsərrüfatlarının inkişaf etdirilməsi, modernləşdirilməsi nəzərdə tutulub.

Dəmir yolunun yenidən qurulmasını həyata keçirmək üçün beynəlxalq maliyyə qurumları ilə danışıqlar öz bəhrəsini verib. Ölkə başçısının dəstəyi sayəsində dəmir yolunun inkişafına, idarəetmənin və infrastrukturun təkmilləşdirilməsinə yönəlmiş "Dəmir yolu ticarətinin və nəqliyyatının dəstəklənməsi" məqsədilə Beynəlxalq Yenidənqurma və İnkişaf Bankı (Dünya Bankı) ilə 450 milyon ABŞ dolları məbləğində və Çexiyanın "İxrac" bankı ilə 215 milyon avro məbləğində kredit sazişi imzalanmışdır. Bütün bunlar göstərir ki, Dövlət Proqramının həyata keçirilməsi nəticəsində Azərbaycanda bu nəqliyyat xidmətlərinə olan tələbatın tam ödənilməsi təmin olunacaqdır.

Qeyd olunduğu kimi, dövlətimizin və iqtisadiyyatımızın dinamik inkişafında dəmir yolu nəqliyyatı mühüm əhəmiyyətə malikdir. Nəqliyyat naziri Ziya Məmmədovun və "Azərbaycan Dəmir Yolları" Qapalı Səhmdar Cəmiyyəti rəhbərliyinin bu sahəyə göstərdikləri diqqət və qayğı sayəsində son illər böyük uğurlar qazanılıb. Bu uğurlarda dəmir yolu sektorunda fəaliyyət göstərən müəssisələrin də rolu əvəzsizdir. Belə müəssisələrdən biri də rəhbərlik etdiyim Bakı Sərnişin Stansiyasıdır. Quru nəqliyyatı ilə Bakının əsas giriş qapısı olan Bakı Sərnişin Stansiyasının əmək kollektivi də səylə çalışır, sərnişinlərə xidmətin səviyyəsini müasir tələblərə uyğunlaşdırır. Onu da qeyd edim ki, son zamanlar hərəkətin təhlükəsizliyi, etibarlılıq və sərnişinlərə göstərilən xidmətin keyfiyyətinin nəzərəçarpacaq dərəcədə yüksəldilməsi və digər müsbət keyfiyyətlər bu sahəyə olan marağı daha da artırmışdır. Təsadüfi deyil ki, istər sərnişindaşımada, istərsə də yükdaşımada daşımaların həcmi xeyli artmış, respublikadaxili və şəhərlərarası qatarlarda xidmət müasir standartlara çatdırılmışdır.

Bakı Sərnişin Stansiyasının kollektivi 2010-cu ilin ötən dövrü ərzində qatarların fasiləsiz və təhlükəsiz hərəkətini təmin etmişdir. Bu dövrdə yolda heç bir xoşagəlməz hadisə baş verməmişdir. Stansiyanın əsəs istehsalat göstəricisi olan yola salınmış sərnişinlər planı 2010-cu ilin 9 ayı ərzində 100,7 faiz yerinə yetirilmiş, yəni 1659,0 min sərnişin plana qarşı 1670,0 min sərnişin yola salınmışdır. İkinci əsas göstərici olan yerli gəlir planı da 110,1 faiz yerinə yetirilmişdir. Sərnişinlərin ayrı-ayrı istiqamətlər üzrə yola salınması da uğurla yerinə yetirilmişdir. Belə ki, birbaşa istiqamətdə plan 101,8 faiz, yerli istiqamətdə 100,7 faiz, şəhərətrafı istiqamətdə 100,5 faiz icra olunmuşdur. Əhalinin rahatlığının təmin edilməsi üçün Qərb istiqamətində Gəncə, Böyük-Kəsik, Qazax və s. istiqamətlərdə hərəkət edən qatarlara bilet satışı hər iki başa təşkil edilib. Bundan əlavə, vağzalda aviabiletlərin satışını da həyata keçirmək nəzərdə tutulub. Əhalinin sıxlığını nəzərə alaraq, yerli istiqamətdə hərəkət edən qatarlara əlavə vaqonlar qoşulur. Onu da qeyd edim ki, dəmiryolçuların peşə bayramı günü ilə əlaqədar bukletlər hazırlanıb. Bu bukletlərdə Azərbaycan dəmir yolunun tarixi, qatarların hərəkət cədvəli və s. məlumatlar yer alacaq. Hər bir bilet alan vətəndaşa bu bukletlər paylanacaqdır.

Nizaməddin EMİNOV

Respublika.- 2010.- 13 oktyabr.- S. 6.