Azərbaycanda turizmin inkişafı üçün potensial imkanlar genişdir

Azərbaycanın coğrafi mövqeyi, flora və faunasının zənginliyi, gözəl təbiəti, mədəni–tarixi irsi ölkəmizdə turizmin inkişafı üçün böyük perspektivlər açır. 2001–ci ildə ümummilli lider Heydər Əliyevin təşəbbüsü ilə müstəqil respublikamızın Ümumdünya Turizm Təşkilatına tamhüquqlu üzv qəbul olunması ölkəmizin beynəlxalq sərgilərdə iştirakını və eləcə də belə tədbirlərə ev sahibliyi etməsini təmin etmişdir. Son illər ərzində turizm sektorunun inkişafı və bu sahədə işlərin tənzimlənməsinə imkan verən hüquqi baza yaradılmış, “Turizm haqqında”, “Turizmin təşviqi haqqında” və sair hüquqi–normativ sənədlər qəbul edilmişdir. Azərbaycanda əldə olunmuş sosial–iqtisadi irəliləyişlər, əsası ulu öndərimiz tərəfindən qoyulmuş strategiyanın Prezident İlham Əliyev tərəfindən uğurla həyata keçirilməsi turizm sənayesini iqtisadiyyatın aparıcı sahələrindən birinə çevirmişdir. Qazanılmış nəticələr onu göstərir ki, turizm iqtisadi əhəmiyyətinə görə qeyri–neft bölməsi arasında aparıcı mövqeyə malikdir. Dövlət başçımız son nitqlərinin birində demişdir: “Turizm sektoru Azərbaycanın iqtisadi potensialında mühüm yer tutacaq. İnkişaf etmiş, xüsusən də zəngin təbiətə malik olan ölkələrin iqtisadiyyatında turizm mühüm yer tutur. Azərbaycan zəngin ölkədir, turizmin inkişafı üçün gözəl yerlər vardır və biz bu imkanlardan istifadə etməliyik”.

Xüsusi vurğulamaq lazımdır ki, “Azərbaycan Respublikasında 2010–2014–cü illərdə turizmin inkişafına dair Dövlət Proqramı”nın uğurlu icrası və ölkə başçımızın 2011–ci ili “Turizm ili” elan etməsi, bu sahədə digər layihələrin həyata keçirilməsi məhz bu sektora dövlət qayğısından xəbər verir.

Bu sahədə ixtisaslı kadrların çalışması da bir neçə ildir ki, diqqət mərkəzindədir. 2006–cı ildən respublika Mədəniyyət və Turizm Nazirliyinin nəzdində Azərbaycan Turizm İnstitutu fəaliyyətə göstərir, artıq bu təhsil ocağının məzunları şirkətlərdə işləməyə başlamışlar. Həmçinin Azərbaycan Turizm İnstitutunun nəzdində Bakı Turizm Peşə Məktəbi açlımış, burada oxuyanların sayı bu ildən 400–ə çatdırılmışdır.

Statistik rəqəmlər göstərir ki, Odlar diyarı adlanan ölkəmizə gələn turistlərin sayı ilbəil artır. “Turizm ili” elan edilən 2011–ci ildə bu sahədə daha yüksək göstəricilər qazanılmışdır. Məsələn, ötən il Azərbaycana ilk dəfə 2 milyondan çox, daha dəqiq 2 milyon 239 min nəfər əcnəbi gəlib. Bu, 2010–cu illə müqayisədə 14 faiz çoxdur. Respublikamıza gələn xarici turist qaldığı müddətdə ən azı 700 dollar xərcləyirsə, deməli, ümumilikdə bu sahədən 1,5 milyarddan çox gəlir götürülür.

Qeyd edək ki, beş il əvvəl ölkəmizdə fəaliyyət göstərən mehmanxanaların sayı 300–ə yaxın idisə, indi paytaxtda və bölgələrdə 500–dən çox mehmanxana fəaliyyət göstərir. Hazırda ölkə ərazisində 50–dən çox mehmanxana inşa edilir. Təhlillər göstərir ki, mehmanxana və bu tipli obyektlərdə istirahət edənlərin 50 faizdən çoxu xarici ölkə vətəndaşlarıdır. Turistlərin çoxalması ilə bağlı turizm şirkətlərinin də sayı artaraq 170–ə çatıb. Bu işlə məşğul olan firmalar arasında rəqabət də genişlənib. Öz işlərini qura bilməyən şirkətlər fəaliyyətlərini dayandırırlar.

Ölkəmizə gələn əcnəbi vətəndaşların sayının çoxalmasına bir sıra amillər müsbət təsir göstərir. Bunlardan biri respublikamızda keçirilən beynəlxalq tədbirlər, festivallar, müsabiqələr və idman yarışlarıdır. Məsələn, “Eurovision–2012″ mahnı müsabiqəsi bu il ölkəmizə gələn turistlərin artımında mühüm rol oynayıb. Belə ki, müsabiqə ərəfəsində respublikamıza gələnlərin sayı 100 mini keçmişdir. Hazırda 16 ölkənin qatıldığı qadınlar arasında futbol üzrə dünya çempionatının Bakıda keçirilməsi də bu baxımdan az əhəmiyyət daşımır. Ümumiyyətlə, turizm üzrə mütəxəssis kimi deyə bilərəm ki, bu qəbildən olan beynəlxalq səviyyəli möhtəşəm tədbirlərin növbəti illərdə də Azərbaycanda keçirilməsi ölkəmizə turist axınının çoxalmasına təkan verəcəkdir.

Artıq ölkəmizdə ənənəvi yay turizmi yekunlaşmaq üzrədir. Azərbaycandan xeyli yerli vətəndaşlar xaricə üz tutduğu kimi, ölkəmizə də kifayət qədər turist axını olub. Mədəniyyət və turizm naziri Əbülfəs Qarayevin dediyi kimi, turizm sahəsində bu il ölkəmizdə keçən illə müqayisədə 7 faiz artım vardır. Bu, beynəlxalq standartlara cavab verən yeni mehmanxanaların açılması və beynəlxalq tədbirlərin sayəsində mümkün olub.

Statistik rəqəmlər də indidən bu il turizm sahəsində göstəricilərin yüksək olacağından xəbər verir. Belə ki, 2012–ci ilin təkcə 6 ayı ərzində Azərbaycana gələn əcnəbi vətəndaşların sayı 1.088.823 nəfər olub. Bu da ötən ilin müvafiq dövrü ilə müqayisədə 72.264 nəfər çoxdur. Eyni zamanda, 2011–ci ilin müvafiq dövrü ilə müqayisədə 2012–ci ilin birinci yarımili ərzində xarici ölkələrə gedən vətəndaşlarımızın sayı 90.875 nəfər çoxdur. Respublikamıza gələnlər sırasında ən çox artım Gürcüstan, Rusiya, Türkiyə, Almaniya, Özbəkistan, Ukrayna, Böyük Britaniya, İran, Yaponiya, Koreya və sair ölkələrdən müşahidə olunub.

Onu da demək lazımdır ki, yaxın gələcəkdə Qusar rayonundakı “Şahdağ” qış turizm kompleksi istifadəyə veriləndən sonra bu sahədə irəliləyişin olacağı şübhəsizdir. Çünki yerli əhali ilə yanaşı, qış turizmi xarici vətəndaşları da özünə cəlb edəcəkdir.

Əlbəttə, dövlət başçımızın Bakıda və bölgələrdə yeni mehmanxanaların açılışında iştirak etməsi, kənd turizminin inkişafına diqqət yetirməsi Azərbaycana qarşıdakı illərdə turist axınının daha da yüksəlməsinə müsbət təsir göstərəcəkdir.

Bu gün həm də Ümumdünya Turizm Günüdür. Bu peşə bayramı hər il sentyabrın 27–də Azərbaycanda da qeyd edilir. Bütün həmkarlarımı bu münasibətlə təbrik edir, onlara işlərində uğurlar arzulayıram.

Ağalar HACIYEV,

Bakı Səyahətlər və Ekskursiyalar

Bürosunun direktoru

Respublika .- 2012.- 27 sentyabr.- S. 5.