Sizə xidmət edən “Orli Service”

Azərbaycan müstəqillik əldə etdikdən sonra ölkəmizin sosial–iqtisadi vəziyyəti olduqca ağır idi. Ötən əsrin 90–cı illərinin əvvəllərində bir yandan torpaqlarımızın bütövlüyü uğrunda aparılan mübarizə, digər tərəfdən, dövlət strukturları arasındakı daxili çəkişmələr vəziyyəti gündən–günə daha da ağırlaşdırmış, Azərbaycanı məhv olmaq təhlükəsi ilə üz–üzə qoymuşdu. Belə bir ağır məqamda xalqın son ümid yeri olan ümummilli lider Heydər Əliyev ikinci dəfə hakimiyyətə gəldi. Qısa müddətdə uzaqgörənliklə, ölkənin gələcək inkişafına nəzərdə tutulan iqtisadi islahatlara start verildi. Aparılan gərgin və məqsədyönlü işlər nəticəsində iqtisadi sahədəki tənəzzülün qarşısı alındı. Ordu quruculuğuna xüsusi diqqət yetirildi. Sahibkarlığın inkişafına yaradılan şərait yeni–yeni müəssisələrin, xidmət obyeklərinin işə salınmasına rəvac verdi.

Azərbaycan Prezidenti İlham Əliyev 2003–cü ildə ilk dəfə dövlət rəhbəri seçildikdən sonra Heydər Əliyev siyasi kursunu ləyaqətlə davam etdirdi. Ötən 10 ildə qəbul edilmiş regionların sosial–iqtisadi inkişafı dövlət proqramları, eləcə də müxtəlif sahələrin inkişaf etdirilməsi ilə bağlı qəbul edilmiş qanun və sərəncamların uğurla icrası ölkəmizin böyük nailiyyətlər qazanmasına şərait yaratmışdı. Təsadüfü deyil ki, qazanılmış sosial–iqtisadi nailiyyətlər nüfuzlu beynəlxalq reytinq agentliklərinin hesabatlarında da öz əksini tapmış, “Doing Business–2013″ hesabatında mövqeyimiz yaxşılaşmışdır. Dünya İqtisadi Forumunun hesabatında Azərbaycan dünyanın 50 ən rəqabətqabiliyyətli iqtisadiyyatları qrupuna daxil olmuş və son üç ildə olduğu kimi MDB ölkələri arasında birincilik mövqeyini qoruyub saxlamışdır

Azərbaycanda sahibkarlığa göstərilən dövlət qayğısından yararlanaraq fəaliyyətə başlayan xidmət sahələrindən biri də 1999–cu ildə yaradılmış “Orli Service” şirkətidır. 14 ildən artıqdır ki, “Orli Service” yerli bazarda ən tələbkar müştərilərin tələbatına uyğun uğurla fəaliyyət göstərir. Şirkətimiz müxtəlif səpkili tədbirlər təşkil etməkdə geniş təcrübəyə malikdir. Bu gün “Orli” şirkətlər qrupuna “Orli Tekstil” və “Orli Flowers” kimi şöbələr də daxildir.

Şirkətin əsas fəaliyyəti təşkilatçılıq və bütün növ tədbirlərin tərtibatıdır. Buraya təqdimatlar, ictimai və dövlət müəssisə və təşkilatlarının, alış–veriş mərkəzlərinin və butiklərin açılışlarının ən yüksək səviyyədə təşkil edilməsi, toy, ad günləri, ildönümlər, uşaq ad günləri, korporativ ziyafətlər, konfranslar, təlimlər, gəzintilər və başqa bu kimi mərasimlərin zövqlə tərtibatı, təşkili və həyata keçirilməsi daxildir. Biz həyata keçirdiyimiz bütün işlərə var qüvvəmizi sərf edirik ki, həmin hadisələr insanlarda gələcəkdə ən xoş xatirələrindən birinə çevrilsin.

Fəaliyyətinin 14 ili ərzində bizim şirkət özünü ciddi, peşəkar və mobil tərəfdaş kimi tanıda bildi. Məhz bu keyfiyyətlərinə görə, şirkətimiz 2011–ci ildə Mədəniyyət və Turizm Nazirliyi tərəfindən “İlin şirkəti” adına, 2012–ci ildə “Milli Ugur mükafatı”na layiq görülüb və “Qrand–2011″ nominasıyasında “Yaxşıların yaxşısı”, 2013–cü ildə “Caspian energy Award”ın təqdimatında tədbirlərin təşkili üzrə “İlin şirkəti” kimi tanınıb. Bu gün əminliklə deyə bilərik ki, “Orli”nin əməkdaşları müxtəlif həcmli istənilən tədbirlərin həyata keçirilməsinə təminat verir.

Təsadüfi deyil ki, neçə–neçə dövlət əhəmiyyətli obyeklərin açılış mərasimlərinin təşkili məhz bizim şirkətə etibar edilmişdir. Quba, Qazax, Zaqatala, Qusar və Şamaxıda Olimpiya komplekslərinin açılışları, həmçinin 9 sentyabr 2012–ci ildə Şəkidə Heydər Əliyev Mərkəzinin və İcra Hakimiyyəti binasının təməlqoyma mərasimi, konserv və kərpic zavodlarının, Zaqatala şəhər stadionunun, Qazaxdakı sement zavodunun açılışları, Qubada keçirilən voleybol üzrə Avropa çempionatının hazırlıq mərasimləri şirkətimiz tərəfindən yüksək səviyyədə həyata keçirilmişdir. Bütün tədbirlərdə səhnələrin xüsusu tərtibatı, hava şarları və iri şarlarla bəzədilməsi, lazer şoular və başqa rəngarəng elementlərdən istifadə etmişik.

Sirr deyil ki, toy mərasimləri həyatımızın ən yaddaqalan anlarından biridir. Bizim şırkət bu sahədə böyük təcrübəyə malikdir və toy mərasimlərinin təşkili maraqlı yaradıcılıq prosesidir. “Orli”nin əməkdaşları sifarişçilərin zövqünə uyğun ssenarilərin hazırlanması, dəbdəbəli məclislərin, tortların, eləcə də ən kiçik nüansların yaddan çıxarılmaması üçün bütün lazımi hazırlıqları həyata keçirir. Var qüvvəmizlə çalışırıq ki, bu əlamətdar gün yeni ailə quran gənclərin, cütlüklərin həyatında unikal bir xatirə kimi əbədi yaşasın.

Daha bir xidmətimiz isə ad günləri və yubileylərin təşkil edilməsidir. Ad günü və ya illik yubileylərdə hər şey sizin üçün və yalnız sizin üçün nəzərdə tutulur. Çalışırıq ki, həmin günün əsas qəhrəmanı olaraq tədbir iştirakçılarının diqqəti yalnız sizə yönəlsin.

İnsan həyatında elə anlar olur ki, həmin günün xüsusilə yaddaqalan olmasını istəyir. Şirkətimizin işçiləri böyüklər üçün ad günlərini elə təşkil edir ki, gözləmədiyiniz, əlçatmaz saydıqlarınız belə gerçəkləşir. Ad günü münasibətilə sizi təbrik edənlər müxtəlif hədiyyələr alaraq gözəl anlar yaşatmağa çalışırlar. Həmin gün həyatdan zövq almaq istədiyin vaxt, bir yandan da hazırlıq işləri ilə məşğul olmaq, doğrudan da, sizə əlavə yük və qayğılar yaradır. Bizim təklif etdiyimiz xidmətlər isə bayram təşkilinə əlavə vaxt ayırmaqdan sizi qurtarar, həyatınızın ən gözəl günlərindən birini şən və qayğısız keçirməyə şərait yaradar.

Uşaq bayramlarının, onların ad günlərinin təşkili daha çox diqqət tələb edir. Uşaqların nəyi daha çox sevməsi, hər şeyi onların istəyinə uyğun hazırlamaq heç də asan məsələ deyil. Elə buna görə də biz uşaqların ad günü mərasimlərini təşkil edərkən müxtəlif ssenarilər hazırlayır, nağıl qəhrəmanları ilə görüşlər, onların fərdi istəkləri nəzərdən keçirilir.

Bizim kollektivimiz uşaq doğum günlərindən başqa onların uşaq bağçası və ya məktəbi bitirmələri, sifarişçinin istəyinə uyğun digər əlamətdar hadisələrin təşkilini də yüksək peşəkarlıqla tamamlamağa təminat verir. Nağıl qəhrəmanları, klounlar, sehrbazlar, kukla teatrının aktyorlarının ifasında maraqlı səhnəciklər, dəniz quldurları və neçə–neçə sürprizlər xidmətlərimizə xüsusi bir şirinlik qatır.

Təqdimatların təşkili sizin şirkətin öz məhsul və xidmətlərini təqdim etmək üçün əlverişli bir şansdır. Təqdimatlar və konfranslar olduqca ciddi bir işdir və bu sahədə peşəkarların köməyi olmadan uğur qazanmaq asan deyil. Bizim şirkətin belə tədbirlərin təşkili işində də təcrübəsi böyükdür. Şirkətimiz müştərilər qarşısında götürdüyü öhdəliklərə həmişə məsuliyyətlə yanaşır.

“Orli Service”in strukturuna daxil olan “Orli Flowers” restoran, ofis, ticarət zalları, toy karvanlarının çiçəklərlə bəzədilməsini həyata keçirir. Obyektlərin çiçəklərlə bəzədilməsi bir bayram ovqatı yaradır, onun zərif forma və rəngləri, bir–birindən fərqli ətri toplaşanlara xüsusi zövq verir.

Toy mərasimlərinin çiçəkli dizaynı haqqında xüsusi danışmaq istəyirəm. Otaq təntənəli, parlaq, unikal şəkildə gül ilə bəzədilir. Ümumilikdə istənilən obyektlərin çiçəklərlə bəzədilməsi xidmətlərimizdə xüsusi bir yer tutur.

“Orli Service”in strukturuna daxil olan qurumlardan digəri isə “Orli Tekstil”dir. İstənilən şirkət əməkdaşları üçün geyim formaları, gödəkçələr tikən bizim işçilər öncə iş şəraiti, brendin dizaynı, ofisin rənglənməsi və digər faktorlara diqqət yetirirlər. Yalnız bundan sonra geyimlərin forması və rəngi sifarişçi ilə razılaşdırılaraq geyimlər hazırlanır.

Bundan başqa, ofis və şirkətlər üçün xüsusi dizayna malik yaraşıqlı pərdələr, restoranlar üçün stol örtükləri, xidməti işçilərin geyimlərini zövqlə hazırlayırıq.

Azərbaycan bu gün sürətlə inkişaf edir. Bütün sahələrdə hiss edilən bu inkişaf insanların həyat səviyyəsinə də müsbət təsir göstərir. Bu baxımdan bizim təklif etdiyimiz xidmətlərdən gələcəkdə əhalinin böyük bir qisminin istifadə etməsi gözlənilir. Bundan sonra da işimizi hər an təkmilləşdirərək tətbiq etdiyimiz yeniliklərlə xalqımıza göstərdiyimiz xidmətlərin çeşidini artırmaq niyyətindəyik.

Lali Palaqaşvili,

“Orli Service” şirkətinin Baş direktoru

Respublika.- 2013.- 14 aprel.- S. 8.