Mədəniyyət Mərkəzi inkişaf yolundadır

Bakının Yasamal rayonu ərazisində 1984–cü ildən fəaliyyət göstərən A.M.Şərifzadə adına mədəniyyət evi nümunəvi tərbiyə ocaqlarından biridir.

Bu mərkəz fəaliyyətinin ilk günlərindən tez–tez əhali arasında, ələlxüsus uşaq və gənclər arasında olur, yeni–yeni özfəaliyyət kollektivləri yaratmaq üçün əlindən gələni edir. Elə bunun nəticəsidir ki, bu gün mərkəzdə müxtəlif istiqamətli bədii özfəaliyyət kollektivləri və dərnəklər fəaliyyət göstərir. Mərkəzin direktoru, təcrübəli mədəniyyət işçisi Zivər Əhmədova ilə söhbət edərkən bildirdi ki, “2011–2013–cü illərdə Bakı şəhərinin və onun qəsəbələrinin inkişafına dair Dövlət Proqramı”na uyğun olaraq mərkəz əsaslı təmir edilmiş və əhalinin istifadəsinə verilmişdir.

İndi bura daha çox istedadlar cəlb olunur. Əhalinin asudə vaxtını düzgün təşkil etmək üçün yeni kollektivlər, dərnəklər və xalq kollektivi fəaliyyətə başlamışdır. Rayonun gəncləri və yeniyetmələri bacarıq və qabiliyyətlərinə görə müxtəlif dərnəklərdə məşğul olurlar. Mərkəzdə “Xudafərin” xalq instrumental ansamblı, poeziya klubu, “Şəms” rəqs qrupu, rəssamlıq, dram, “İlkin tibbi yardım” dərnəkləri, “Arzu” xalq çalğı alətləri ansamblı, “Nur” muğam üçlüyü ilə yanaşı, müxtəlif kurslar fəaliyyət göstərir.

Həmin kollektivlərin üzvləri rayonun yaşayış massivləri, məktəbləri, orta və ali təhsil ocaqları ilə yanaşı, respublika tədbirlərində də yaxından iştirak edirlər.

Rəssamlıq dərnəyinin üzvləri Azərbaycan Dövlət İncəsənət muzeyində, Rəssamlıq Akademiyasında olmuş, yaradıcılıq işləri burada nümayiş etdirilmiş, tədbirlər “Space”, “AzTV”, “Lider TV” tərəfindən işıqlandırılmışdır.

Mərkəzin dram dərnəyinin üzvləri Xocalı faciəsi ilə əlaqədar keçirilən müxtəlif tədbirlərdə iştirak etmişlər. “Xudafərin” xalq instrumental ansamblı rayonun 52 və 53 saylı orta məktəbləri “Arzu” və “Şəms” kollektivlərinin Milli Parkda keçirilən “Gül” bayramı, Novruz bayramı, Türkiyədə keçirilən “Uşaq bayramı”ndakı çıxışı da dərin iz buraxmışdır. “Nur” muğam üçlüyündə çıxışları daim dinləyicilər tərəfindən rəğbətlə qarşılanır. Belə ki, bu üçlüyün üzvləri bədii özfəaliyyət kollektivlərini baxış müsabiqəsindəki fəaliyyətinə görə xüsusi diploma layiq görülmüşdür.

Özfəaliyyət kollektivi üzvlərindən Səidə Orucova, Yadigar Nəzərli, Sona Həsənova, Xəyal Məmmədov, “Nur” ansamblının rəhbəri Tuqay İsmayılovun çıxışları hər kəsin zövqünü oxşayır.

A.M.Şərifzadə adına Mədəniyyət Mərkəzinin kollektivi çalışqanlığı və əməksevərliyi nəticəsində respublikamızın ən qabaqcıl mədəni–maarif müəssisələri sırasına çıxarmışdır.

Zabit CAVADOV

Respublika.- 2013.- 17 aprel.- S. 16.