Bibiheybət neftçiləri ulu öndərin yubileyini ləyaqətlə qarşılayırlar

Bu gün Azərbaycan iqtisadiyyatı öz inkişafının yeni mərhələsinə qədəm qoyub. Həyata keçirilən irimiqyaslı layihələr, dövlət proqramları ölkəmizin inkişafına təkan verməkdədir.

Azərbaycan Prezidenti möhtərəm İlham Əliyevin sədrliyi ilə Nazirlər Kabinetinin 2013–cü ilin birinci rübünün sosial–iqtisadi inkişafının yekunlarına və qarşıda duran vəzifələrə həsr olunmuş iclasdakı dərin məzmunlu nitqində ölkə başçısı demişdir: “Onu da deməliyəm ki, iqtisadi islahatlar, eyni zamanda mötəbər beynəlxalq qurumlar tərəfindən də qeyd edilir. Azərbaycan o ölkələrdəndir ki, öz daxili imkanlarına söykənir, öz iqtisadi və siyasi inkişafını özü təmin edir. İqtisadi sahədə seçdiyimiz kurs beynəlxalq qurumlar tərəfindən də qiymətləndirilir”.

Heç şübhəsiz ki, bu yüksək qiymət ölkəmizdə dönmədən həyata keçirilməkdə olan möhtəşəm iqtisadi islahatların bəhrəsidir.

Biz neftçilər hesab edirik ki, güclü, qüdrətli Azərbaycan quruculuğunda, iqtisadi inkişafda bizim də payımız var. İdarəmizin neftçiləri ulu öndər Heydər Əliyevin 90 illik yubileyini yüksək göstəricilər, əmək nailiyyətləri ilə qarşılamaq üçün səylərini getdikcə artırır, qüvvələrini səfərbər edirlər.

Neft və qaz hasilatını artıran “qara qızıl” ustalarımız vaxtaşırı iməciliklər keçirir, ağac və gül kolları əkir, ətrafı yaşıllaşdırır, ekologiyaya öz töhfələrini verirlər. Təmizlik, abadlıq, quruculuq işləri geniş vüsət almışdır. Mədən və sexlər, istehsalat sahələri təmir olunur, inzibati binalar yenidən qurulur və ən müasir avadanlıqlarla təmin olunur.

İstehsalatda qazanılan uğurlar da sevindiricidir. Təkcə bu ilin ötən üç ayının yekunları çox nikbin proqnozlara əsas verir.

Qeyd etdiyimiz dövrdə neft və qaz hasilatı və təhvili tapşırıqları artıqlaması ilə yerinə yetirilib. Neft hasilatı planına 105,2 faiz əməl olunub. Üç ayın neft təhvili tapşırıqları da 105,2 faiz yerinə yetirilib. Bu müddət ərzində 1 milyon 140 min kubmetrə qarşı 1 milyon 597 min kub metr qaz hasil olunub. Nəzərdə tutulan 930 min kubmetrə qarşı isə 1 milyon 387 min kubmetrdən çox qaz təhvil verilib.

2013–cü ilin birinci kvartalında nəzərdə tutulan 112 texniki tədbir əvəzində 138 tədbir həyata keçirilmiş və nəticədə xeyli neft hasil olunmuşdur. Geoloji tədbirlərin sayı isə 30 əvəzinə 48–ə çatmış, bundan da xeyli neft əldə edilmişdir.

Ötən müddət ərzində 61 əsaslı təmir, 1313 yeraltı təmir işləri görülmüş, bu da idarə üzrə hasil olunan neft hasilatına öz təsirini göstərmişdir.

Heç şübhəsiz ki, biz bu uğurlara ARDNŞ–in, “Azneft” İstehsalat Birliyinin rəhbərliyinin gündəlik qayğısı, diqqəti sayəsində nail olmuşuq.

Hazırda ARDNŞ–in rəhbərliyi tərəfindən qarşımıza qoyulmuş məsul və şərəfli vəzifələrin yerinə yetirilməsi məqsədilə qüvvələrimizi daha da səfərbər etmişik.

Bu gün idarəmizdə ekoloji sahədə də mühüm işlər görülür.

Azərbaycan Respublikası Prezidenti möhtərəm İlham Əliyevin 28 sentyabr 2006–cı il tarixli 1697 saylı sərəncamı ilə təsdiq edilmiş “Azərbaycan Respublikasında ekoloji vəziyyətin yaxşılaşdırılmasına dair 2006–2010–cu və 2011–2013–cü illər üçün “Kompleks Tədbirlər Planı”na uyğun olaraq Bibiheybət zonasında təmiz ekoloji mühitin yaradılması işləri davam etdirilir.

Mədən ərazisində abadlıq məqsədi ilə ərazidən 380 kubmetr şlam çıxarılmışdır və 2942 kubmetr daxili torpaq daşınmışdır. 0,337 hektar sahə mexaniki rekultivasiya olunmuşdur.

NQÇİ–nin ərazisindən 229,037 ton qara metal “Baku Stell Company” şirkətinə təhvil verilmişdir.

Sahədə əkilmiş ağaclara aqrotexniki qulluq göstərmək məqsədi ilə “Azneft” İstehsalat Birliyi ilə “Ekol Mühəndislik Xidmətləri” QSC arasında müqavilə bağlanmışdır. Müqaviləyə əsasən “Ekol Mühəndislik Xidmətləri” QSC ərazidə əkilmiş 49243 ədəd ağaca, həmçinin çəmənliklərə aqrotexniki qulluq göstərir. Yaşıllıqlara nitrofoska gübrəsi verilib. Onu da qeyd etmək lazımdır ki, salınmış yaşıllıqlar tamamilə damcı suvarma üsulu ilə tətbiq edilir.

Ekologiya İdarəsinin Tullantı Mərkəzinə 126 kq təhlükəli tullantılar (skaner, kartric, printer, surətçıxaran, prosessor) təhvil verilib. Ərazidə aparılan abadlıq, rekultivasiya, yaşıllaşdırma, bir sözlə, təmiz ekoloji mühitin yaradılması üçün işlər davam etdirilir və bu istiqamətdə aparılan tədbirlər idarənin rəhbərliyinin daim diqqət mərkəzindədir.

İdarəmizin kollektivi ulu öndər Heydər Əliyevin 90 illik yubileyi ilə əlaqədar qüvvələrini daha da səfərbər edib, neft və qaz hasilatını daha da artırmaq əzmilə çalışır.

İlqar Həmzəyev,

“Azneft” İB–nin

“Bibiheybətneft” Neft və

Qazçıxarma İdarəsinin rəisi

Respublika.- 2013.- 23 aprel.- S. 10.