QARAGAĞ RAYONU: SOSİAL–İQTİSADİ İNKİŞAFİN YENİ MƏRHƏLƏSİ

2012–ci il müstəqil Azərbaycan dövlətinin daha da inkişafı ilə, dünyadakı nüfuzunun güclənməsi və möhkəmlənməsi, bir sözlə daxili və xarici siyasətdə böyük uğurlarla müşayət olundu. Qlobal regional layihələrin həyata keçirilməsi, iqtisadiyyatımızın şaxələndirilməsi və sahibkarlığa dövlət dəstəyi yolu ilə qeyri–neft sektorunun davamlı inkişafı ölkəmizin hərtərəfli tərəqqisini tam şəkildə təmin edib. Əldə edilmiş möhtəşəm nailiyyətlər dövlətimizin başçısı cənab İlham Əliyevin son illər milli maraqlarımızın tam təmin olunması kontekstində davamlı şəkildə və qətiyyətlə yürütdüyü uğurlu siyasi kursun bəhrəsidir.

Qazanılan möhtəşəm nailiyyətlərdə Azərbaycanın ən iri sənaye mərkəzlərindən biri olan, ölkənin neft–qaz və qeyri–neft sektorunun inkişafında mühüm rol oynayan Qaradağ rayonu sanballı paya malikdir. Ərazicə Abşeron yarımadasının böyük bir hissəsində yerləşən, istər sosial–iqtisadi, istərsə də mədəni inkişaf baxımından son illər çox sürətlə tərəqqi edən Qaradağ Rayonu İcra Hakimiyyətinin başçısı Süleyman Mikayılovun rəhbərliyi ilə günü–gündən dəyişir, daha da gözəlləşir, müasirləşir, insanların həyat səviyyəsi yüksəlir.

Qaradağ rayonu Azərbaycanın ən iri neft–qaz sənaye müəssisələrinin yerləşdiyi məkanlardandır. Ulu öndərimiz Heydər Əliyevin neft strategiyasının reallaşmasında Bakının Qaradağ rayonunun da müstəsna rolu var. Hələ ötən əsrin 80–ci illərində məhz Heydər Əliyevin uzaqgörənliyi sayəsində Qaradağ rayonunda regionda analoqu olmayan və bu gün haqlı olaraq ulu öndərimizin adını daşıyan Dərin Dəniz Özülləri zavodunun istismara verilməsi, digər neft sənayesi müəssisələrinin inşası bu gün milli neft strategiyasını uğurla reallaşdırmağa imkan verir. Rayonun sosial–iqtisadi inkişafında ulu öndərimizin ən layiqli siyasi varisi və davamçısı, Azərbaycanın və regionumuzun yeni parlaq lideri, Prezident İlham Əliyevin də müstəsna xidmətləri var. Cənab İlham Əliyev hələ Qaradağ rayonunda millət vəkili kimi fəaliyyəti dövründə çox böyük işlər görüb və rayon sakinlərinin hədsiz məhəbbətini qazanıb. Onun möhtəşəm fəaliyyəti, xeyirxahlığı bu gün də sakinlər tərəfindən razılıqla xatırlanır. Hazırda Prezident İlham Əliyevin rəhbərliyi ilə Azərbaycanın hər bir güşəsində olduğu kimi, Qaradağ rayonunda da böyük quruculuq və abadlıq işləri geniş vüsət alıb. Təsadüfi deyil ki, Azərbaycan Prezidenti onun üçün hər zaman doğma olan Qaradağ rayonuna təkcə 2012–ci ildə üç dəfə səfər edib. Dövlət başçısı Sahil qəsəbəsində müasir standartlar səviyyəsində inşa olunan “Holcim–Azərbaycan” ASC–nin yeni sement zavodunun, Qaradağ metal konstruksiyalar zavodunun, Ələt qəsəbəsindəki 32 saylı poliklinikanın, Qobustan qəsəbəsində 330 saylı orta məktəbinin, Müşfiqabad qəsəbəsində 67 saylı körpələr evi–uşaq bağçasının, qaçqınlar üçün salınmış yeni yaşayış məhəlləsinin açılışlarında şəxsən iştirak etməklə, Sahil qəsəbəsində aparılan quruculuq abadlıq işləri ilə yerində tanış olmağı ilə rayon əhalisinə hədsiz sevinc bəxş etmişdir. Cənab Prezident son dövrlərdə Qaradağ rayonunda həyata keçirilən genişmiqyaslı quruculuq və abadlıq işlərini yüksək qiymətləndirmiş və sürətli sosial–iqtisadi inkişafın sayəsində rayonun Azərbaycanın güclü sənaye mərkəzinə çevrildiyini vurğulamışdır.

Dövlətimizin başçısının Qaradağ rayonuna böyük önəm verməsi həm onun bu rayonla, onun sakinləri ilə hələ ötən əsrin 90–cı illərinin ortalarında sıx təmasda olması, rayonun daxili imkanları, təlabatı və problemləri ilə şəxsən tanışlığı və gələcəkdə Qaradağın Azərbaycanın inkişafındakı yerini düzgün müəyyənləşdirməsi, bir sözlə bu yerlərə döğma münasibəti ilə bağlıdır. Onu da xüsusi vurğulayaq ki, hələ 90–cı illərin ortalarında cənab İlham Əliyevin təşəbbüsü və köməyi ilə ilk dəfə məhz “Qaradağın sosial–iqtisadi inkişafı” proqramı qəbul edilib və uğurla icra olunub. “Holcim–Azərbaycan” ASC–nin yeni sement zavodunun açılışındakı çıxışında dövlətimizin başçısı həm Qaradağın, həm də bu zavodun ölkəmiz üçün çox böyük əhəmiyyət daşıdığını vurğulayıb: “Zavodun Qaradağ rayonunun ərazisində yerləşməsi, əlbəttə ki, təbii səbəblər əsasında mümkün olubdur. Çünki burada, yaxında zavodun məhsul istehsalı üçün lazım olan xammal yataqları vardır. Sovet dövründə bu zavod burada tikilmişdir. Əlbəttə, Qaradağ rayonunun gələcək sənaye inkişafı ilə bağlı bizim konkret fikirlərimiz vardır. Mən dəfələrlə demişəm ki, Azərbaycanın yeni sənaye mərkəzlərindən biri də Qaradağ rayonu olmalıdır. Qaradağ rayonu inkişaf edir. Burada həm güclü sənaye potensialı yaradılır, eyni zamanda, turizm obyektlərinin yaradılması, tikintisi məsələləri də gündəlikdədir”.

Prezident İlham Əliyevin 2012–ci il dekabrın 29–da imzaladığı “Azərbaycan 2020: gələcəyə baxış” İnkişaf Konsepsiyası ölkə həyatının bütün sahələrində inkişaf siyasətinin əsas strateji hədəflərini özündə ehtiva edir və onun həyata keçirilməsi məqsədli dövlət proqramları vasitəsi ilə gerçəkləşdiriləcəkdir. Təsadüfi deyil ki, “Azərbaycan 2020: gələcəyə baxış” İnkişaf Konsepsiyasının uğurla reallaşmasında Qaradağ rayonu da mühüm rola malikdir. Qaradağ rayonunda Neft–Qaz və Neft–Kimya Kompleksinin yaradılması qlobal layihədir. 2013–cü ildə başlanacaq layihə 2020–ci ilin dekabrında neft emalı zavodunun tikintisi ilə sona çatacaqdır. Bu nəhəng layihə təxminən 14 milyard dollara başa gələcəkdir.

Bu nailyyətlərin əldə olunması icra başçısı Süleyman Mikayılovun rəhbərliyi ilə Qaradağ Rayon İcra Hakimiyyətinin, onun yerli icra strukturlarının gündəlik səmərəli fəaliyyəti, görülən işlərə daimi nəzarəti, qayğı və diqqəti ilə bilavasitə bağlıdır. Məhz bu diqqət və qayğının, fəaliyyətin sayəsində Qaradağ rayonu son illər çox böyük uğurlara imza atıb, öz inkişafının keyfiyyətcə yeni, daha sürətli mərhələsinə daxil olub. Ötən il rayonda həm də sahibkarlığın inkişafı, əlverişli biznes mühitinin yaradılması, yeni istehsal müəssisələrinin tikintisi və iş yerlərinin açılması istiqamətlərində də xeyli işlər görülmüşdür. Belə ki, Putada “Xəzər–Boru” şirkətinin İstehsalat Bazasının və Metanol zavodunun, Səngəçalda “AAC” MMC–nin Qazobeton blokları və “As Kompani” MMC–nin Əhəng istehsalı müəssisələrinin tikintisi başa çatdırılmışdır. Sahil qəsəbəsinin inzibati ərazisində Azərbaycan İnvestisiya Şirkətinin iştirakı ilə “Holcim–Azərbaycan” ASC–nin yeni Sement Zavodunun və Qaradağ Metal Konstruksiyalar Zavodunun işə düşməsi ilə 350–yə yaxın yeni iş yeri açılmışdır. Bütövlükdə 2012–ci il ərzində 1310 yeni iş yeri açılmışdır.

Yaxın illərdə Ələtdə Beynəlxalq Dəniz Limanının, Sahildə Gəmiqayırma zavodunun inşası kimi nəhəng layihələrin icrası nəticəsində rayonda yüzlərlə yeni iş yerləri açılacaqdır. Bu rayonun sənaye potensialını gücləndirməklə yanaşı, onun mühüm tranzit əhəmiyyətini artıracaqdır. Ümumilikdə, ötən ildə rayonun sənayesində 567 milyon 774,1 min manatlıq və ya əvvəlki 2011–ci illə müqayisədə 16,5 faiz çox sənaye məhsulu istehsal edilmişdir. İqtisadiyyatın aparıcı sahəsini təşkil edən neft və qaz sənayesi müəssisələrində 411,6 min ton xam neft və 349,9 milyon kub metr təbii qaz hasil olunmuşdur. Rayon üzrə 1 milyon 558,2 min ton sement istehsal edilmişdir.

2012–ci il ərzində rayon əhalisinin asudə vaxtının səmərəli təşkili, mədəni–məişət şəraitinin yaxşılaşdırılması üçün mövcud park, xiyaban, məhəllədaxili ərazilərdə, uşaq meydançalarında və avtomobil yollarında geniş abadlıq və quruculuq işləri aparılmışdır.

Bakı–Astara magistral avtomobil yolunun rayon ərazisindən keçən sol və sağ hissələrinin kənarlarında nəzərdə tutulmuş istinad divarlarının tikintisi aparılmışdır. Hasarların qarşısında tamet döşənmiş, bordür düzülmüş, divarlar müasir işıqlandırma sistemi ilə təchiz edilmişdir. Həmin ərazidə ağac və bəzək kolları əkilmişdir.

Azərbaycan dövlətinin siyasətində sosial məsələlər həmişə prioritet istiqamətdir. Son illər, xüsusən də ötən il bu istiqamətdə həyata keçirilən genişmiqyaslı proqram və layihələr, görülən işlər insanların yaşayış səviyyəsinin yüksəlməsinə, işsizlik probleminin aradan qaldırılmasına, inflyasiyanın minimum səviyyəyə endirilməsinə imkan verib. Azərbaycanın sosial–iqtisadi inkişafı artıq dönməz xarakter alıb və yalnız neft amilindən asılı deyil. Təsadüfi deyil ki, nəhəng neft–qaz layihələrinin həyata keçirilməsi ilə yanaşı, indi daha çox qeyri–neft sektorunun, özəl bölmənin və sahibkarlığın inkişafı dövlətimizin xüsusi diqqət mərkəzindədir. Qeyri–neft sektorunun davamlı inkişafı, yerlərdə enerji, su və qaz problemlərinin aradan qaldırılması, regionlarımızın sürətli tərəqqisi, müasir infrastrukturun formalaşdırılması, yeni iş yerlərinin açılması, elm, təhsil, səhiyyə, rabitə, nəqliyyat, idman və digər sahələrin yüksəlişinə göstərilən dövlət qayğısı nəticədə, insanların daha yaxşı yaşamasına, onları narahat edən problemlərin həllinə gətirib çıxarıb. Son illər ölkəmizdə ən yeni texnologiyalarla təchiz olunmuş minlərlə sənaye və emal müəssisələri, dünya standartlarına cavab verən və internetə çıxışı olan müasir təhsil və səhiyyə ocaqları tikilib istifadəyə verilib. Əhaliyə xidmət sahələrinin sayı durmadan artır, keyfiyyəti yüksəlir. İnformasiya – kommunikasiya texnologiyaları cəmiyyətimizə geniş yol açıb, sosial sferada müasir idarəetmə üsullarının tətbiqinə başlanılıb.

Qaradağ rayonun timsalında da biz bunun əyani əksini görürük. Rayonun sosial–iqtisadi sahələrinin inkişafına ötən il 369 milyon 093,1 min manat investisiya qoyulmuşdur. İstifadə edilmiş investisiyaların 246 milyon 876,5 min manatı tikinti–quraşdırma işlərinə sərf edilmişdir. Müvafiq Dövlət Proqramına uyğun olaraq rayonun bütün qəsəbələrində müasir texnologiyalar əsasında ATS–lərin nömrə tutumlarının, internet xidmətlərinin artırılması işləri aparılır. Qobustanda yeni ATS, Ələt qəsəbəsinin Şixlar yaşayış məntəqəsində poçt şöbəsi inşa edilib. Korgöz qəsəbəsində yeni poçt şöbəsi tikilib əhalinin istifadəsinə verilmişdir.

Fərəhli haldır ki, Qaradağ rayonunda orta əmək haqqı ümumrespublika göstəricilərindən yüksəkdir. Belə ki, hesabat ilində rayonda orta aylıq əmək haqqı 2011–ci ilin müvafiq dövrü ilə müqayisədə 18,7 faiz artaraq 731,6 manata, sənayedə çalışanların isə 21,6 faiz artaraq 966,4 manata çatmışdır. Ötən il ərzində 1087 ailəyə orta hesabla 127,67 manat məbləğində ünvanlı sosial yardım verilmiş, əhalinin aztəminatlı təbəqələrinə müxtəlif pensiyalar və müavinətlər ödənilmişdir.

2012–ci ildə rayon əhalisinin və sosial obyektlərin enerji daşıyıcıları və kommunal xidmətlərlə təminatının yaxşılaşdırılması istiqamətlərində də xeyli işlər görülmüşdür.

Ötən il əhalinin təbii qaz, elektrik və istilik enerjisi, içməli su ilə təchizatının və kanalizasiya xidməti ilə təminatının normallaşdırılması üçün bir sıra işlər görülmüşdür. Cənab Prezidentin imzaladığı müvafiq Dövlət Proqramının aparıcı istiqamətlərdən birini təşkil edən paytaxtətrafı qəsəbələrin su və kanalizasiya təchizatı sistemlərinin əsaslı şəkildə yenidənqurulması işlərinə başlanması 2013–cü ilədək Qaradağ rayonunun da bu sahələrdə mövcud olan problemlərin böyük əksəriyyətinin həll olunması ilə nəticələnəcəkdir.

Hazırda rayonda 15663 nəfər və ya 3614 məcburi köçkün və qaçqın ailəsi məskunlaşıb. Onların yaşayış şəraitinin yaxşılaşdırılması və sosial problemlərinin həlli rayon rəhbərliyinin daimi diqqətindədir. Ötən il Ümid qəsəbəsində kottec tipli fərdi yaşayış evlərinə qaz xətlərinin çəkilişi, xeyir–şər evinin əsaslı təmiri başa çatdırılmışdır. Qəsəbə ərazisində “Holcim” Azərbaycan ASC tərəfindən Gənclərin İnkişaf Mərkəzinin inşasına başlanmışdır. Ötən dövr ərzində 195 məcburi köçkün ailəsi ünvanlı sosial yardımla təmin olunmuşdur. Qaradağ rayonunun Müşfiqabad qəsəbəsində 1440 məcburi köçkün ailəsi üçün yeni salınmış məhəllə istifadəyə verilmişdir. Cənab Prezidentin təşəbbüsü ilə yaradılmış “Qaradağ rayonunun sosial–iqtisadi inkişafına yardım fondu” tərəfindən 3800 məcburi köçkün, qaçqın, şəhid, əlil və aztəminatlı ailələrə Novruz Bayramı münasibəti ilə təxminən 15 ton müxtəlif növ ərzaq məhsullarından ibarət yardımlar paylanmışdır.

Son illərdə olduğu kimi, 2012–ci ildə də humanitar sahələrdə dövlət siyasətinin layiqincə həyata keçirilməsi, rayonun təhsil, səhiyyə, mədəni–maarif müəssisələrinin tikintisi və təmiri ilə bağlı xeyli işlər görülüb. Dövlətimizin başçısının “Bakı şəhəri Qaradağ rayonunun Ələt və Qobustan qəsəbələrinin sosial–iqtisadi inkişafının sürətləndirilməsi ilə bağlı tədbirlər haqqında” 6 aprel 2011–ci il tarixli 1417 saylı sərəncamına uyğun olaraq Qobustan qəsəbəsində 800 şagird yerlik 330 nömrəli yeni müasir tipli ümumtəhsil məktəb binasının tikintisi başa çatmışdır. Dekabr ayının 27–də Müşfiqabad qəsəbəsindəki 67 nömrəli körpələr evi–uşaq bağçası əsaslı təmir olunduqdan sonra körpələrin istifadəsinə verilmişdir. Ümumi sahəsi 2.389 kvadratmetr olan, 220 yerlik bağçada körpələrin təlim–tərbiyəsi üçün hər cür şərait nəzərə alınmışdır. Burada yeməkxana, həkim, musiqi və digər otaqlar vardır. Bağçanın ətrafında geniş abadlıq işləri görülmüş, uşaqların istirahəti üçün müxtəlif attraksionlar quraşdırılmışdır.

Dövlət Proqramına əsasən 2013–cü ildə Qızıldaş qəsəbəsindəki 180 nömrəli orta məktəb üçün 15 əlavə sinif otağının tikintisi, Sahil qəsəbəsindəki 253 və 273, Lökbatan qəsəbəsindəki 233 nömrəli orta məktəblərin, Sahil qəsəbəsindəki 301 nömrəli körpələr evi–uşaq bağçasının əsaslı təmiri, eyni zamanda Lökbatan qəsəbəsində şagird sıxlığına görə 960 şagird yerlik yeni məktəb binasının, Ümid, Qızıldaş, Müşfiqabad və Lökbatan qəsəbələrində hər biri 120 yerlik olmaqla yeni uşaq bağçalarının tikintisi nəzərdə tutulmuşdur. “2011–2013–cü illərdə Bakı şəhərinin və onun qəsəbələrinin sosial–iqtisadi inkişafına dair Dövlət Proqramı”nın Əlavə Tədbirlər Planı”na əsasən 2013–cü ildə Qaradağ rayonu üzrə 16 təhsil müəssisəsinin əsaslı təmiri və ya yenidən inşası nəzərdə tutulmuşdur.

“2011–2013–cü illərdə Bakı şəhərinin və onun qəsəbələrinin sosial–iqtisadi inkişafına dair Dövlət Proqramı”nda Qaradağ rayonunun səhiyyə sahəsini əhatə edən 7 konkret tədbir nəzərdə tutulmuş və bunların 3–ü uğurla həyata keçirilmişdir. Qalan səhiyyə müəssisələrində təmir–tikinti işləri davam etdirilir. Son illərdə bir çox tibb müəssisələrində, o cümlədən 4 nömrəli Doğum evində, 39 nömrəli Kardiorevmotoloji Uşaq sanatoriyasında, 9 nömrəli Birləşmiş Şəhər Xəstəxanasının poliklinika şöbəsində, 15 və 20 nömrəli Təcili Tibbi Yardım stansiyalarında, 23 nömrəli Birləşmiş Şəhər Xəstəxanasının stasionar şöbəsində, həmçinin bu tibb müəssisəsinin Səngəçal qəsəbəsində yerləşən ambulator şöbəsində əsaslı təmir və yenidənqurma işləri aparılmaqla yeni, müasir tibbi avadanlıqlarla təchiz olunaraq istifadəyə verilmişdir.

Prezidentin “Bakı şəhəri Qaradağ rayonunun Ələt və Qobustan qəsəbələrinin sosial–iqtisadi inkişafının sürətləndirilməsi ilə bağlı tədbirlər haqqında” sərəncamına uyğun olaraq Ələt qəsəbəsindəki 32 nömrəli köhnə poliklinika binası sökülərək, yerində müasir standartlara cavab verən, yeni avadanlıqlarla təchiz olunmuş iki mərtəbəli, sahəsi 1572 kvadratmetr olan 47 otaqdan ibarət, müasir işıq, istilik və yanğından mühafizə sistemi, su anbarı ilə təmin olunmuş yeni bina inşa edilmişdir. Əhaliyə göstərilən tibbi xidmətin keyfiyyətini yaxşılaşdırmaq üçün Çeyildağ qəsəbəsində Təcili Tibbi Yardım stansiyası və ümid qəsəbəsində tibb məntəqəsi tikilib istifadəyə verilmişdir. Ötən ilin dekabr ayında Korgöz qəsəbəsində Dövlət proqramına uyğun olaraq tibb məntəqəsi tikilib istifadəyə verilmişdir. Hazırda Dövlət Proqramına uyğun olaraq Müşfiqabad qəsəbəsində yerləşən 13 nömrəli şəhər Poliklinikasında və Lökbatan qəsəbəsindəki 19 nömrəli Birləşmiş Şəhər Xəstəxanasında əsaslı təmir və yenidənqurma işləri yekunlaşmaq üzrədir. Eyni zamanda Qobustan qəsəbəsindəki 17 nömrəli Birləşmiş Şəhər Xəstəxanası üçün yeni binanın inşası davam etdirilir. Bununla yanaşı Lökbatan qəsəbəsindəki 200 çarpayılıq Müasir xəstəxana binasının inşası davam etdirilir. Təmir olunan və ya yenidən inşa edilən tibb müəssisələrinin işinin təşkili istiqamətində rayon İcra hakimiyyəti rəhbərliyinin köməkliyi ilə müvafiq tədbirlər görülmüş, həmin tibb müəssisələri rayonun müxtəlif müəssisələrində müvəqqəti yerləşdirilərək, əhaliyə tibbi xidmətin göstərilməsini davam etdirir.

Rayon icra hakimiyyətinin başçı tərəfindən vətəndaşların qəbulu və müraciətlərinə baxılması yüksək səviyyədə təşkil olunur

Cari işlərdə müasir üslub və metodlardan istifadə edilməsi, yeni informasiya və kommunikasiya texnologiyalarının tətbiqi və dövlət qulluğu ilə bağlı son qanunvericilik aktlarının icrasının təmin olunması Qaradağ Rayon İcra Hakimiyyətinin fəaliyyətinin əsas istiqamətlərindən birini təşkil edir. 2012–ci ildə rayon icra hakimiyyəti başçısının yanında Şuranın 12 iclası keçirilib. Şurada ölkə başçısının aidiyyəti üzrə sərəncamlarının, müvafiq dövlət proqramlarının rayonda icra vəziyyəti, rayonun sosial–iqtisadi inkişafı, 40 məsələ müzakirə olunub və müvafiq qərarlar qəbul edilib.

2012–ci ildə rayon icra hakimiyyəti başçısı aparatına vətəndaşlardan 1532 ədəd yazılı müraciət daxil olmuşdur. Rayon icra hakimiyyəti başçısının qəbulunda 690 vətəndaş qəbul edilmiş, onlardan 385 nəfəri rayon icra hakimiyyətində, 305 nəfəri isə yerlərdə görüşlər zamanı səyyar qəbul edilmişlər.

Qaradağ rayonunun hazırda Azərbaycanın ən dinamik və sürətlə inkişaf edən rayonunlarından olduğunu desək, heç də səhv etmərik. Burada aparılan abadlıq–quruculuq işlərinin vüsəti, istifadəyə verilən və inşasına başlanılan sosiai–sənaye obyektlərinin miqyası o qədər böyükdür ki, bunların hamısını bir yazıda qeyd etmək mümkünsüzdür. Əminik ki, yaxın illərdə bu proses daha da güclənəcək və Qaradağ ölkəmizin ən aparıcı, ən inkişaf etmiş müasir diyarına çevriləcəkdir. Qaradağlılar bu ilə daha yüksək nailiyyətlər qazanmaq əzmi ilə qədəm qoyub, qısa vaxt əezində başlanan işlər də bunu təsdiqləyir. Nazirlər Kabinetinin 2012–ci ilin sosial–iqtisadi inkişafının yekunlarına və 2013–cü ildə qarşıda duran vəzifələrə həsr olunmuş iclasındakı yekun nitqində Prezident İlham Əliyev deyib:”Hesab edirəm ki, 2013–cü ildə sənaye istehsalı ilə bağlı, çox ciddi addımlar atılacaqdır. Bütün hazırlıq işləri görülüb. Nəinki hazırlıq işləri görülüb, eyni zamanda…böyük sənaye müəssisələri işə düşüb. Onların bir hissəsi dövlət, böyük hissəsi isə özəl sektor tərəfindən icra edilib. Əvvəlki illərdə qeyd etdiyim kimi, Azərbaycanda bir neçə sənaye mərkəzi yaradılır. Gəncədə, Sumqayıtda, Bakının Qaradağ rayonunda, digər yerlərdə böyük sənaye obyektləri tikilir və 2013–cü ildə bu istiqamətdə daha da böyük işlər görüləcəkdir. Xüsusilə sənaye istehsalının təşviqi üçün yeni qaydaların tətbiq edilməsi, texnoparkların fəaliyyətinin gücləndirilməsi və bu fəaliyyəti gücləndirmək üçün əlavə tədbirlərin görülməsi, güzəştlərin verilməsi məsələləri nəzərdə tutulub”.

Xəlil CABBAROV

Respublika.- 2013.- 8 fevral.- S. 4.