ERMƏNİLƏRİN
AZƏRBAYCAN XALQINA QARŞI ƏRAZİ İDDİALARI,
SOYQIRIMLARI VƏ DEPORTASİYALAR
Dünyanın
fövqəlgüc dövlətlərinin himayəsi
altında olan “Şərq məsələsi”
və onun əsas tərkib hissəsi kimi “erməni məsələsi”nin
yaranmasından iki əsrdən artıq zaman keçsə də, siyasi–hərbi təzyiq
vasitəsi olaraq beynəlxalq münasibətlər sistemində öz
təsir gücünü saxlamaqda,
həm Türkiyə, həm də Azərbaycana yeni–yeni problemlər
doğurmaqdadır.
Hazırda
neoimperialist mövzuda
yazılan qərəzli yazılar və söylənilən riyakar fikirlər tarixi həqiqətlərə,
arxiv sənədlərinə deyil, müəyyən dairələrin
maraqlarına və zərərli ideologiyaların təbliğatına
əsaslanmışdır. Buna görə də “Şərq məsələsi”nin,
o cümlədən də “erməni məsələsi”nin
əsl mahiyyətini tarixi həqiqətlərə,
arxiv sənədlərinə əsasən
şərh etmək və beynəlxalq ictimaiyyətə
çatdırmaq Azərbaycan
tarixşünaslığının əsas vəzifələrindəndir.
Tarix elmləri doktoru
Ataxan Paşayevin “Ermənilərin
Azərbaycan xalqına qarşı ərazi iddiaları,
soyqırımları və deportasiyalar
(XIX–XX əsrlər)” adlı tədqiqatı bu
baxımdan çox əhəmiyyətlidir.
Kitab 20
ildən artıqdır ki, beynəlxalq
münasibətlər sisteminin gündəliyində
olan, lakin ikili standartlar və qərəzli
yanaşmalarla “tənzimləndirilməyə”
çalışılan Qarabağ probleminin, 20 Yanvar faciəsinin,
Xocalı soyqırımının, Azərbaycan ərazisinin
20 faizinin işğalının, bir milyondan artıq qaçqın–köçkün probleminin
əsl səbəblərini, bu hadisələr
zamanı törədilən vəhşilikləri, cinayətləri
ortaya qoymaqla
yanaşı, son Qarabağ
hadisələrinə qədər də Azərbaycana və azərbaycanlılara
qarşı törədilmiş soyqırım və
deportasiyaların real mənzərəsini
göstərmişdir.
Bu kitab “erməni məsələsi”lə
bağlı Azərbaycan həqiqətlərini yaymaq, Ermənistan–Azərbaycan Dağlıq Qarabağ münaqişəsinin mahiyyətini
təhrif edənlərə elmi ədəbiyyat
və arxiv sənədlərindən
istifadə etməklə tutarlı cavab
vermək baxımından təqdirəlayiqdir.
Mövzunun aktuallığını nəzərə
alaraq əsəri oxuculara
təqdim edirik.
Allahşükür QURBANOV,
Respublika.
(əvvəli
12, 13 və 15 fevral tarixli saylarımızda)
1918–ci
ilin mayında Zaqafqaziya Seymi və hökuməti süqut edərək
üç müstəqil Güney Qafqaz Respublikaları
yarandığı zaman Ermənistan Respublikasının ərazisi
faktiki olaraq 400 min əhalisi olan iki qəzadan–İrəvan və
Eçmiədzin qəzalarından ibarət idi ki, onların
da yarıdan çoxu müsəlmanlar idi.
1918–ci
il iyunun ortalarına qədər, yəni türk ordusu Azərbaycana
gələnə qədər əhalinin silahsız
olmasından istifadə edən ermənilər Güney Qafqazda
türk–müsəlman kəndlərini tutaraq
dağıdır, əhalisini isə qırır və
qovurdular. Türk ordusunun bu ərazilərə gəlməsi və
azərbaycanlılarla birlikdə Qafqaz İslam ordusunun
yaradılması və onun əməliyyatları, demək
olar ki, 1918–ci ilin iyunundan oktyabrına, yəni Böyük
Britaniya ilə Osmanlı hökuməti arasında Mudros
sazişi bağlanana qədər türk–müsəlman əhalisi
Güney Qafqazda ermənilərin ciddi hücumları ilə
üzləşmir. 1918–ci ilin oktyabrında türk ordusunun
Güney Qafqazdan çıxarılması ermənilərin əl–qolunu
açdı və yenidən onların təcavüzünə
səbəb oldu.
Arxiv
sənədləri 1918–1920–ci illərdə erməni
daşnaklarından ibarət quldur dəstələrinin təkcə
Ermənistan ərazisində deyil, həm də Azərbaycan ərazilərində
törətdikləri görünməmiş vəhşilikləri
təkzibedilməz faktlarla sübut edir. Azərbaycan Xalq
Cümhuriyyəti Parlamenti və hökumətinə İrəvan,
Zəngəzur, Naxçıvan, Ordubad və başqa yerlərdən
gələn yüzlərlə şikayət məktubları,
ərizə və teleqramlar erməni quldur dəstələrinin
türk–müsəlman əhaliyə qarşı törətdikləri
vəhşiliklər, onların başlarına
açdıqları müsibətlər barədə ətraflı
məlumat verirdi. İrəvan quberniyası müsəlman əhalisi
adından T.Makinski 1919–cu il 4 yanvar tarixli məktubunda
yazırdı: “1917–ci ilin dekabrından 1918–ci ilin iyununa qədər
İrəvan quberniyasında erməni qoşun hissələri
tərəfindən 200–dən çox müsəlman kəndi
dağıdılmış, yandırılmış, əhalisinin
bir hissəsi məhv edilmiş, bir hissəsi isə dağlara
qaçaraq orada aclıqdan və soyuqdan
qırılmışdır. Hazırda erməni qoşun hissələri
müsəlmanlar yaşayan Sürməli qəzasını
tamamilə, İrəvan, Eçmiədzin və Şərur
qəzalarının bir hissəsini tutaraq Naxçıvana
doğru hərəkət edirlər. Günahsız müsəlman
əhali ya qılıncdan keçirilir, ya da öz kəndlərindən
qovularaq, dağlardan keçərək İrana
qaçırlar ki, bu da onları labüd ölümlə hədələyir.
Zorla boşaldılmış ərazilərə isə
Türkiyədən qaçmış ermənilər yerləşdirilir”.
Arxivlərimizdəki
sənəd və materiallardakı çoxlu faktlar erməni
vandallarının türk–müsəlman əhalisinə
qarşı yeritdiyi soyqırımı siyasətini ifşa
edir. Ermənilərin bu hərəkətlərinə
qarşı Azərbaycan Cümhuriyyəti hökumətinin
verdiyi notaları erməni daşnak hökuməti təkzib edərək,
guya Ermənistanda türk–müsəlmanlara qarşı
heç bir ayrı–seçkiliyin, təqiblərin
olmadığını, bu cür hərəkətlərə
yalnız hər hansı məsuliyyətsiz şəxslərin
yol verə biləcəyini sübut etməyə
çalışırdı. Belə ki, 1919–cu il fevralın
12–də A.Ziyadxanov Ermənistan Respublikası Xarici İşlər
Nazirliyinə nota verərək Göyçə gölü
sahillərində Azərbaycan sərhədlərini keçən
erməni silahlı dəstələrinin Qızıl Vəng,
Subatan, Zağalı, Şahab və b. müsəlman kəndlərini
dağıdaraq kişilərini qırdığını,
qadınlarını isə təhqirə məruz qoyduğunu
bildirir. O, bildirirdi ki, Şahab kənd sakini olan qaçqın
qadının verdiyi məlumata görə, həmin kənddən
olan “bütün kişilər doğranmış, uşaqlar
təndirdə yandırılmışlar. Kənd
qadınlarından 8 nəfəri seçilərək təhqir
edilmiş və zorlandıqdan sonra buraxılmışlar”.
A.Ziyadxanov öz notasında bildirirdi ki, “həmin hərəkətlər
məsuliyyətsiz şəxslər tərəfindən deyil,
hərbi hissələr tərəfindən törədilmişdir”.
Bütün
bu notalar bir nəticə vermədiyindən 1919–cu il
fevralın 24–də A.Ziyadxanov müttəfiqlər ordusunun
Bakıdakı komandanı general V.Tomsona məktubunda erməni
hərbi hissələrinin Yeni Bayazit qəzasında azərbaycanlı
əhaliyə qarşı təhqiramiz hərəkətləri
və Azərbaycan ərazisinin bir hissəsini tutması barədə
məlumat verirdi. Məktubda V.Tomsondan xahiş olunurdu ki, o, tələb
etsin ki, Ermənistan hökuməti güclə tutduğu Azərbaycan
torpaqları olan Göyçə gölünün cənub–qərb
hissəsini, habelə Yeni Bayazit və Qazax qəzalarının
bir hissəsini azad etsin.
Erməni
vandallarının hərəkətlərini ifşa edən
Yeni Bayazit qəzası 26 azərbaycanlı kəndi sakininin
1919–cu il martın 26–da keçirdiyi ümumi
yığıncağının Azərbaycan Cümhuriyyəti
hökuməti və xalqına ünvanladığı
müraciətini həyəcansız oxumaq mümkün deyil.
Orada deyilirdi: “Ararat Respublikasının qoşunları, yerli
ermənilər, onlarla bərabər erməni şovinist və
daşnak quldur dəstələri tərəfindən dəfələrlə
dinc müsəlman kəndlərinə hücumlar olunaraq kəndlər
dağıdılır, sakinlərinin başına eşidilməmiş
müsibətlər gətirilir və qeyri–insani hərəkətlərlə
təhqir olunurlar. 270–dən çox müsəlman kəndi
dağıdılmış, başlıca məqsəd isə
İrəvan quberniyasında qalan müsəlman əhalisini
oradan sıxışdırıb tamamilə qovmaqdır.
Müsəlman qardaşlar! Axırıncı dəfə sizə
müraciət edirik, ümidsiz vəziyyətimizi nəzərə
alın, nə ilə kömək etmək
mümkündürsə, bizə kömək edin ki, İrəvan
quberniyası ərazisində qalan 60 minlik bədbəxt
müsəlman əhalisinin tiran, şovinist və
daşnaksakanlar tərəfindən məhv edilməsinə
yol verməyin”.
1919–cu
il aprelin 22–də Gəncə quberniyası 5–ci sahə
pristavı Gəncə qəza rəisinə məlumatında
yazırdı: “Nizami erməni ordusu aprelin 13–dən 21–nə qədər
Göyçədə dinc müsəlman əhalisi üzərinə
hücum edərək 60 minə yaxın əhalisi olan 21 kəndi
dağıtmış, qadın və uşaqlara belə aman
vermədən top gülləsi ilə qəddarcasına
qırmışlar… Cavanşir qəzasından başlayaraq
Qazax qəzasına qədər Azərbaycanla həmsərhəd
olan qarlı aşırımlar boyu dəhşətli mənzərə
yaranmışdır. Bu ərazi Yeni Bayazit qəzasından
qaçmış və erməni orduları tərəfindən
təqib olunan zavallı, alçaldılmış, təhqir
olunmuş və var–yoxları talanmış adamların meyitlərilə
və yaralılarla doludur…”.
Bu məsələlər
haqqında Azərbaycan Cümhuriyyəti hökuməti Xarici
İşlər Nazirliyinin Tiflisdəki müttəfiq
qoşunlarının ali komandanlığına məlumat verməsi,
Azərbaycan Cümhuriyyəti hökumətinin Ermənistandakı
diplomatik nümayəndəsi M.Təkinskinin dəfələrlə
Ermənistan hökumətinə notalarına baxmayaraq, Ermənistanın
daşnak hökuməti öz ərazisində olan
türk–müsəlman əhalisini qırmaq və qovmaq barəsindəki
məlumatları tamamilə təkzib etməsinə baxmayaraq,
bu işləri ardıcıl surətdə davam etdirdiyi barədə
sənədlər və materiallar əsasında əlimizdə
külli miqdarda məlumatlar var. Ermənistan hökuməti hətta
müttəfiq qoşunlarının bu barədəki
sorğularını də təkzib edir, həyasızlıqla
bunları Azərbaycan Cümhuriyyəti hökumətinin
uydurmaları adlandırırdı.
1919–cu
il avqustun 17–31–i arasında qısa bir vaxtda Ermənistan inzibati
idarə orqanları Eçmiədzin, Sürməli, İrəvan
və Yeni Bayazit qəzalarının 50–yə yaxın müsəlman
kəndlərini çapıb talayaraq əhalisini
qırmışlar. Erməni inzibati idarə
orqanlarının bu vəhşiliyi hətta ermənilərin
özlərini, xüsusilə sosial–inqilabçı partiyadan
olan Ermənistan parlamentinin üzvlərini də məcbur edir
ki, parlamentə aşağıdakı məzmunda sorğu
versinlər: “Cənab parlamentin sədri! Xahiş edirik daxili
işlər nazirinə bu sualları verəsiniz. Cənab nazirə
məlumdurmu ki, son üç həftə ərzində Ermənistan
Respublikası ərazisində İrəvan, Eçmiədzin,
Sürməli qəzalarında, bir sıra tatar (azərbaycanlı
– A.P.) kəndlərində, məsələn Paşakənd,
Dəllər, Purpur, Əlibəy, Arazkənd istiqamətindən,
Canfida, Kərimarx, Ağcar, İydəli, Qarxun, Kolanı və
bir sıra başqa kəndlər “tatar” (azərbaycanlı –
A.P.) əhalisindən təmizlənib, soyulub,
qırğına məruz qalmışdır”.
Sorğuda
sonra deyilirdi: “Yerli inzibati idarə orqanları nəinki buna
mane olmayıb, hətta özləri bu soyğunçuluq və
dağıdıcılıq hərəkətlərində
iştirak ediblər. Bu hadisələr yerli əhali
arasında çox ağır təəssürat yaradıb.
Onlar bu soyğunçuluq və ya–ramazlıqlara qarşı
nifrətlə baxır, öz qonşuları ilə sülh
şəraitində yaşamaq istəyir və cəzasız
qalmış günahkarların məhkəməyə cəlb
edilmələri və lazımi cəzalarına
çatmalarını tələb edirlər”.
Lakin
“Daşnaksütyun” partiyasının idarə etdiyi Ermənistan
hökuməti öz süqutuna qədər Ararat
Respublikası ərazisində Azərbaycan türklərinə
qarşı axıra qədər özünün
“yandırılmış torpaq” – “etnik təmizləmə”
siyasətindən əl çəkməmişdir. Ermənistanda
daşnak hökuməti süqut edib Sovet hakimiyyəti
qurulduqdan sonrakı illərdə isə bu siyasəti gizli
şəkildə kommunist cildinə girmiş erməni
daşnakları yerinə yetirirdilər.
c)
Bakı qırğınları
1918–1920–ci
illərdə Güney Qafqazda, o cümlədən Azərbaycanın
bütün ərazisində ermənilər azərbaycanlılara
qarşı geniş surətdə qırğınlar,
talanlar, zorakılıqlar və terror əməliyyatları həyata
keçirmişlər. 1905–ci ildə olduğu kimi 1918–ci ildə
də bu işə, bu əməliyyata yenə də
Bakıdan başladılar.
1917–ci
ilin oktyabrında Rusiyada bolşeviklərin hakimiyyəti ələ
alaraq birinci dünya müharibəsində iştirakdan imtina
etməsi nəticəsində Rusiyanın Qafqaz cəbhəsində
Rusiya tərəfində müharibədə iştirak edən
erməni əsgər və zabitləri külli miqdarda
silah–sursatla Güney Qafqaza qayıdaraq proletar Bakısına
doluşurlar. Bu vaxt V.Lenin tərəfindən Zaqafqaziya
komissarı təyin olunmuş daşnak xislətli S.Şaumyan
da Bakıya gələrək hakimiyyəti öz əlinə
keçirir. Məhz S.Şaumyanın
başçılığı ilə 1918–ci ilin martında
Bakı kommunasının və cəbhədən qayıdaraq
Bakıda toplanmış erməni silahlı dəstələri
tərəfindən xalqımıza qarşı törədilən
qırğınlar sonralar bütün Azərbaycanı
bürüyür.
Üç
gün müddətində (30, 31 mart və 1 aprel) S.Şaumyan
və onun bolşevik cildinə girmiş daşnak
silahdaşlarının fitvası ilə Bakıda törədilmiş
qırğınlar barədə həmin il aprelin 13–də onun
Moskvaya Xalq Komissarları Sovetinə yazdığı məktubunda
o, qırğınların səbəbinin ermənilərin azərbaycanlılara
qarşı milli ədavəti nəticəsində deyil, guya
ki, onların Sovet hakimiyyətinə sədaqətlərindən
irəli gəldiyini sübut etməyə
çalışır. O, yazırdı: “Bir tərəfdən
sovet qırmızı qvardiyası, bizim təşkil etdiyimiz
beynəlmiləl qırmızı ordu, qısa müddətdə
yenidən qura bildiyimiz qırmızı donanma və erməni
milli hissələri (A.P.), digər tərəfdən
“Müsavat” partiyasının başçılıq etdiyi və
daxilində çoxlu rus zabiti olan müsəlman dikaya
diviziyası və silahlı müsəlman quldur dəstələri
(A.P.) vuruşurdular”.
(davamı növbəti
saylarımızda)
Respublika.- 2013.- 16 fevral.- S. 6.