LƏNKƏRANDA
REGİONAL KONFRANS KEÇİRİLMİŞDİR
Lənkəran
şəhərində Azərbaycan Respublikasının Dini Qurumlarla iş üzrə Dövlət Komitəsi və
İslam Konfransı Gənclər Forumu Avrasiya Regional Mərkəzinin təşkilatçılığı
və Lənkəran Şəhər İcra
Hakimiyyətinin dəstəyilə respublikanın cənub
bölgəsində fəaliyyət göstərən dini icma sədrləri, axundlar,
eləcə də fəal dindar və
ilahiyyatçılar üçün
“Dövlət–din münasibətləri və maarifləndirmə
işi” mövzusunda iki günlük regional konfrans işə
başlamışdır.
Konfrans
iştirakçıları əvvəl Lənkəran şəhərində
ümummilli lider Heydər Əliyevin adını
daşıyan mərkəzdə ulu öndərin abidəsi
önünə əklil qoymuş, sonra Şəhidlər
Xiyabanını ziyarət etmişlər.
Regional
konfrans “Şah” sarayında öz işinə
başlamşdır. Əvvəl Azərbaycanın Dövlət
Himni səsləndirilmişdir.
Tədbiri
Dini Qurumlarla iş üzrə Dövlət Komitəsinin sədri
Elşad İskəndərov giriş sözü ilə
açaraq ölkəmizdə dövlət–din münasibətlərindən
ətraflı danışmışdır. Komitə sədri
müstəqillik əldə etdikdən sonra ölkəmizdə
milli–mənəvi dəyərlərə
qayıdışın sürətləndiyini, ümummilli
lider Heydər Əliyevin bu sahədə müstəsna xidmətlər
göstərdiyini və ölkə Prezidenti cənab İlham Əliyevin
milli–mənəvi və dini dəyərlərimizin qorunub
inkişaf etdirilməsinə xüsusi önəm verdiyini
bildirmişdir.
Komitə
sədri E. İskəndərov demişdir: “Bu gün ölkəmizdə
dinlərarası münasibətlər ən yüksək səviyyədədir.
Hər kəsin dini etiqad azadlığı var. Bununla
yanaşı azərbaycançılıq məfkurəsinin tərkib
hissəsi olan milli–mənəvi dəyərlərimiz sahəsində
maarifləndirmə işi prioritet məsələlərdəndir.
Dini maarifləndirmə işinə daha diqqətlə
yanaşılmalıdır. Dövlət Komitəsi olaraq bu
iş üçün lazımi şərait yaradırıq.
Dini icmalar əsrlərin süzgəcindən keçərək
müasir dövrümüzədək qoruyub
saxladığımız milli–mənəvi, dini adət–ənənələrimizi
yaşatmalı və onları düzgün şəkildə
insanlara çatdırmalıdırlar.”
Qafqaz
Müsəlmanları İdarəsinin sədri
Şeyxülislam Hacı Allahşükür Paşazadə
konfransda çıxış edərək bu cür tədbirlərin
dindarların maarifləndirilməsi işində mühüm
rol oynayacağını bildirmiş, ölkəmizdə
mövcud sabitliyi pozmaq istəyən və xarici qüvvələrin
təsiri altında hərəkət edən bir sıra siyasi
qrupların dini icmalardan və dindarlardan istifadə etməyə
çalışdıqlarını, lakin dini icmaların bu
cür siyasi oyunların iştirakçılarına
çevrilməyəcəklərini, müstəqilliyimizin,
dövlətçiliyimizin möhkəmləndirilməsinə
öz layiqli töhfələrini verəcəklərini əminliklə
qeyd etmişdir.
Lənkəran
Şəhər İcra Hakimiyyətinin
başçısı Taleh Qaraşov
çıxışında keçirilən tədbirin
dövlətimizin bu sahəyə yüksək diqqət və
qayğısının təzahürü kimi qiymətləndirmiş,
ötən əsrin 90–cı illərinin əvvəllərində
həyatımızın bütün sahələrində
olduğu kimi din sahəsində də xaos, hərc–mərclik
hökm sürdüyünü, yalnız ümummilli lider Heydər
Əliyevin xalqın təkidilə siyasi hakimiyyətə
qayıdışından sonra bu sahədə əsaslı
dönüşə nail olunduğunu qeyd etmişdir.
İcra
başçısı möhtərəm Prezidentimiz cənab
İlham Əliyevin ulu öndərin siyasi kursunu çox ləyaqətlə,
uğurla davam və inkişaf etdirdiyini, respublikamızda dini
tolerantlığın hökm sürdüyünü
bildirmişdir.
Rayonda
77 məscidin, 10 ziyarətgahın fəaliyyət göstərdiyini,
56 dini icmadan 28–nin dövlət qeydiyyatından keçdiyini
diqqətə çatdıran icra başçısı Lənkəranda
qarma–qarışıqlıq yaratmaq, təxribat törətmək
istəyən qüvvələrə qarşı
dindarların, ziyalıların və ictimaiyyətin nümayəndələrinin
birgə fəaliyyət göstərdiyini qeyd etmişdir.
Konfransın
işində iştirak edən Azərbaycan
Prezidenti
Administrasiyasının ictimai–siyasi məsələlər
şöbəsinin milli azlıqlar və dini qurumlarla iş
sektorunun müdiri Müzəffər Talıblı dövlət–din
münasibətləri sahəsində həyata keçirilən
tədbirlərdən, dinlərarası dialoqun
inkişafından, Azərbaycanın tolerant dövlət
olmasından və digər vacib məsələlərdən
danışmışdır.
Akademik
Vasim Məmmədəliyev və digər natiqlər də
çıxışlarında din sahəsində maarifləndirmə
işinin müasir tələblərə uyğun
aparılmasında regional konfransların rolundan və əhəmiyyətindən
söz açmışlar.
Sonra konfrans öz işini plenar iclaslarda davam etdirmişdir. “Milli–mənəvi
dəyərlərə baxış:
tarixilik və müasirlik” mövzusunda birinci plenar iclasda İslam Konfransı Gənclər Forumu Avrasiya Regional Mərkəzinin rəhbəri
Elçin Əsgərov
“Azərbaycanda ənənəvi
islam və
xarici təsirlər” mövzusunda çıxış
etmişdir. Natiq bildirmişdir ki,
ölkəmizdə dinlərarası
münasibətlər əsrlərlə
sağlam şəkildə
formalaşıb. Lakin sovet
imperiyasının 70 illik
hakimiyyəti dövründə
ənənələrin qırılması
müşahidə olunub.
Nəticədə xaricdə formalaşan
cərəyanlar Azərbaycan
ənənələrinə zidd ənənələri
bura gətirməyə
çalışıblar. Azərbaycan dindarları qarşısında
duran əsas vəzifə öz dini ənənələrini
öyrənmək və
bərpa etmək, zərərli xarici təsirləri rədd etməkdən ibarətdir,
– deyə mərkəzin
rəhbəri bildirmişdir.
Dini Qurumlarla iş üzrə Dövlət Komitəsi sədrinin birinci müavini Səyyad Salahlı “Dindarlıq və vətəndaşlıq mövqeyi”
mövzusunda çıxışında
dinindən asılı
olmayaraq hər bir vətəndaşın
qarşısında duran
vəzifələrdən danışmışdır.
Bildirmişdir ki, dindarlar ölkənin sosial–iqtisadi
quruculuğunda, müdafiəsində,
cəmiyyətin mənəvi–ruhi
tarazlığının saxlanmasında
böyük rola malikdirlər. ümummilli məsələlərdə
hər bir Azərbaycan vətəndaşı
birlik nümayiş etdirməli, ölkəmizin
inkişafı naminə
çalışmalıdır.
“Dini radikalizm və onunla mübarizə üsulları”
adlı ikinci plenar iclasda Komitənin dinşünaslıq
ekspertizası, ictimai məsələlər və
analitik təhlil şöbəsinin müdiri
Aqil Şirinov “İslamın radikalizmə
və ifratçılığa
qarşı münasibəti”
(Qurani–Kərim və hədislər işığında),
Komitənin dini qurumlarla iş üzrə şöbəsinin
müdiri Əliheydər
Zülfüqarov “Dini radikalizm və ifratçılıqla mübarizənin
metodologiyası” mövzularında
məruzə ermişlər.
Məruzələrdə qeyd olunmuşdur ki, bu gün dünyada
islam dinini
radikalizmə çevirmək
cəhdləri geniş
vüsət alıb. Azərbaycanda bu səhədə
ciddi problemlər olmasa da müəyyən
nöqsanlar vardır.
Natiqlər dini radikalizmə
və ifrata qarşı mübarizədə
maarifçiliyin əsas
silah olduğunu diqqətə çatdırmış,
dini maarifləndirmənin
gücləndirliməsinin, dinimizin düzgün şəkildə insanlara çatdırılmasının vacibliyindən danışmışlar.
Dini Qurumlarla iş üzrə Dövlət Komitəsi sədrinin müavini Gündüz İsmayılov “Dini icmalar: problemlər, reallıqlar və gözləntilər” mövzusunda
çıxış edərək
dini icmaların fəaliyyətində meydana
çıxan problemlərdən,
icma üzvlərinin vəzifələrindən ətraflı
söhbət açmışdır.
Lənkəran rayonunun Şağlaser
kənd məscidinin dini icmasının sədri Ruhulla Ruhullayev “Nümunəvi dini icma modeli”,
Masallı rayonunun Türkoba kənd məscidinin dini icmasının sədri Vüqar İbrahimov “Dini icmalar və
gənclər: zərərli
vərdişlərə qarşı
birgə mübarizə”
mövzularında çıxış
edərək icmaların
fəaliyyətinin təkmilləşdirilməsi
metodlarına dair fikirlərini bölüşmüş,
gənclərin tərbiyəsində
dini icmaların üzərinə düşən
vəzifələrdən danışmışlar.
Dövlət Komitəsinin mətbuat katibi Orxan Əli
“Dini icmalar və yeni media” mövzusunda çıxışında
müasir dövrdə
yeni medianın, sosial şəbəkələrin
əhəmiyyətindən söhbət açmış
və Dövlət Komitəsinin yeni saytını konfrans iştirakçılarına təqdim
etmişdir.
Konfransın ikinci günü “İslam və sağlam ailə” mövzusunda keçirilən
plenar iclasda “Gənc qadınların ictimai fəallığının
artırılmasında dini
icmaların rolu” layihəsi təqdim olunmuşdur. Layihənin koordinatoru Günel Səfərova, Dövlət
Komitəsinin şöbə
müdirinin müavini
Nahid Məmmədov, Astaradan Laləzar Qurbanova islamda ailə modeli və müasir cəmiyyət, islam əxlaqında ailəyə
verilən önəm
və ailənin əhəmiyyəti barədə
danışmışlar.
Qafqaz Müsəlmanları
İdarəsinin sədrinin
cənub bölgəsi
üzrə səlahiyyətli
nümayəndəsi Qəni
Axundzadə “Din xadimləri
islamda orta yolun təbliğatçısı
və təşviqatçısı
kimi” mövzusunda çıxış edərək
bölgədə aparılan
işlər barədə
məlumat vermişdir. Lənkəran rayonunun Ləj kənd məscidinin dini icmasının üzvü, AMEA–nın dissertantı Samid Quliyev “Cənub bölgəsində ənənəvi
dindarlıq və islamda orta yol”
mövzusunda çıxışında
Azərbaycanda, o cümlədən
cənub bölgəsində
ənənəvi dindarlığın
əsrlərlə mövcudluğunu
və islamda orta yolun qorunub
saxlanıldığını qeyd etmişdir.
Daha sonra Rafiz Manafovun “Vəhdət naminə məzhəblərarası dialoq”
mövzusunda məruzəsi
dinlənilmişdir. O, Azərbaycanda
ənənəvi olaraq
müxtəlif din və
məzhəblərin ardıcıllarının
əmin–amanlıq şəraitində
yaşadıqlarını vurğulamış,
bu tarixi dəyərin qorunmasının
vacibliyini diqqətə
çatdırmışdır.
Dialoq və Əməkdaşlıq uğrunda
İslam Konfransı Gənclər Forumunun Proqram meneceri Nicat Məmmədlinin “Vətənpərvərlik milli
dəyər kimi” mövzusunda məruzəsi
maraqla qarşılanmışdır.
Plenar iclasda Azərbaycanın Milli Qəhrəmanı Mübariz
İbrahimov haqqında
sənədli film nümayiş
etdirilmişdir.
Konfransı Dini Qurumlarla iş üzrə Dövlət Komitəsinin
sədri Elşad İskəndərov yekunlaşdırmış,
şəhid Mübarizin
timsalında hər bir Azərbaycan vətəndaşının işğal
olunmuş torpaqların
geri qaytarılmasına
hər an hazır olmasının vacibliyindən,
dini icmaların maarifləndirmə sahəsində
cəmiyyətin aparıcı
qüvvəsinə çevrilməsinin
əhəmiyyətindən danışmış, din xadimlərini
üzərlərinə düşən
məsuliyyətli vəzifələri
şərəflə yerinə
yetirmək üçün
bütün imkanlarını
səfərbər etməyə
çağırmışdır.
Regional konfransda bölgə
üçün birgə
fəaliyyət planı
qəbul edilmişdir. Sənəddə ölkə Prezidenti cənab İlham Əliyevin dövlət–din
sahəsində siyasətinin
dəstəkləndiyi, milli–mənəvi
dəyərlərin qorunması
istiqamətində görülən
işlərin yüksək
qiymətləndirildiyi, maarifləndirmə
işinin davamlı və intensiv həyata keçirilməsi
və dini icmaların bölgələrdə
sosial–mədəni inkişaf
prosesində daha müasir formada iştiraklarının vacibliyi
qeyd olunmuşdur.
Əlisəfa Həsənov
Respublika.- 2013.- 17
fevral.- S. 7.