Tarixi həqiqətləri üzə
çıxarmaq borcumuzdur
Tarixin daş
yaddaşında nə qədər qatı
açılmamış sirlər, gizlinlər yatır. Azərbaycanın minilliklərdən boylanan
əsl tarixini zaman–zaman saxtalaşdıranlar, təhrif olunmuş şəkildə bizə təqdim
edənlər, xalqımızı öz kökündən,
öz soyundan ayrı salmaq istəyənlər düşünmədilər
ki, hər gecənin bir
gündüzü var,
əsl həqiqətləri üzə çıxaran,
xalqını, millətini sevən alimlərimiz,
işıqlı zəka sahiblərimiz, aydınlarımız var. Yasamal rayonu,
E.Məmmədov adına 21 saylı tam orta məktəbin direktoru,
gənc, istedadlı alim Ceyhun
Bayramlı məhz belə insanlardan biridir. Onun son
illərdə apardığı unikal
araşdırmalar böyük marağa səbəb olub.
Əməkdaşımız gənc alimlə görüşüb
gördüyü işlər barədə
oxuculara məlumat verməsini xahiş etmişdir. Ceyhun Bayramlı demişdir:
—Məni daha çox Azərbaycanın tarixi keçmişi maraqlandırır. Tariximizin ayrı–ayrı dönəmləri ilə bağlı araşdırmaları çox sevirəm. Bu işin nəticəsi olaraq kitablar çap etdirmişəm. Bilirsiniz, hər bir vətənsevər insan milli–mənəvi dəyərlərimizi göz bəbəyi kimi qorumağa borcludur. Tarixin dərin qatlarına endikcə gücümüz, qüdrətimiz artır, vətənin sınırları daha aydın görünür.
2003–cü ildə “4 anonim mənbə” adlı kitab çap etdirmişəm. Bu mənbələr indiyə qədər dilimizə tərcümə olunmamış mənbələr idi. Azərbaycan tarixinin müxtəlif dövrləri ilə bağlı məlumatları özündə əks etdirən bu mənbələri araşdırmaq nə qədər zəngin məlumatlar əldə etməyə imkan yaratdı.
2005–ci ildə “Hanı dediyim bəy ərənlər” adlı publisistik düşüncələrim işıq üzü görüb. Kitabda Azərbaycanda bəyliyin, əsilzadəliyin tarixi ilə bağlı araşdırmalarım yer alıb.
2010–cu ildə çıxan “Dastan ədəbiyyatımızda ictimai təsirlər” kitabımda da məni narahat edən bir çox problemlərə toxunmuşam.
Kitabda Azərbaycan dastanlarına Sovet dövründə edilmiş artıq və əlavə dəyişikliklər, saxta, quraşdırma obrazlar, epizodlarla bağlı fikirlərim, duyğu və düşüncələrim yer alıb. Mən bu məsələlərə daha çox milli dövlətçilik mənafeyindən yanaşmışam. Çünki şifahi xalq ədəbiyyatı birbaşa xalqın tarixini, kəşməkəşli dövrlərini özündə əks elətdirən bir sahədi. Və o sahələrlə bağlı gərək heç bir əlavələr, süni dəyişikliklər, saxtakarlıqlar olmaya. Xalqın yaradıcılığı necədirsə, eləcə də ortaya qoyulmalıdır.
Kitabı hazırlayarkən mən çalışdım ki, müxtəlif mənbələrdən istifadə edim. Dastanların ilk nəşr variantlarına daha çox istinad etməyə çalışdım. Bir çox maraqlı şeylər ortaya çıxdı.
Daha sonra, 2006–cı ildən üzərində çalışdığım bir mövzunu genişləndirərək tamamladım. Bu araşdırmanı Babək hərəkatı, Xürrəmilər hərəkatı ilə bağlı tarixə yeni baxış bucağı da adlandırmaq olar. Əsər “Babək və xürrəmilik, yalanlar və gerçəklər” adlanır. Çox qəribə təsadüfdür, 2011–ci ilin sentyabr ayında Prezident İlham Əliyevin Babəkə heykəl qoyulması barədə fərmanı imzalaması kitabın çap olunması ilə eyni vaxta düşdü.
“Babək və xürrəmilik” müxtəlif ərəb və fars mənbələrinin məlumatları əsasında Babək hərəkatının yenidən təhlili idi.
Sovet İttifaqı dövründə tarixçilərin qarşısına xüsusi konsepsiya qoyulmuşdu. O konsepsiyaya görə, Azərbaycanın tarixi qəhrəmanları üzərində eksperimentlər aparılmalıydı. O eksperimentlərin biri də Babəklə bağlı olub. Babəklə bağlı araşdırmalardan bəlli oldu ki, bu xalq qəhrəmanı haqqında son illərin konsepsiyası əslində həmin tarixi dövrü müasir insanın gözündə əyri güzgüdə göstərmək məqsədi daşımışdır, yəni hər şey dövrün insanlarının qəlbində Babək haqqında çaşqınlıq doğuran yanlış məlumatlar, təəssüratlar yaratmağa hesablanmışdı.
Bütün bu saxtalaşdırmalar Babəkin guya utopik kommunist
olduğunu ifadə eləməli idi. Onun atəşpərəst, ateist,
dinə, Allaha inanmayan bir adam olduğunu bildirməliydi. Həm də xalqın milli soykökündən uzaq bir adam olduğunu bildirməliydi.
Babəkin özünü, ailəsini,
onun ətrafında cəm olmuş xürrəmiləri təhrif
edən məlumatlar çox olub.
Amma hər şeyin bir geci–tezi var. Həqiqətin
üstünə bir gün doğması var.
Babəklə bağlı araşdırmalarda
çalışdım ki,
obyektivliyə arxalanım. Nə varsa,
ortaya çıxardaq.
Aydın
oldu ki, heç də sovetlərin söylədiyi
kimi Babək nə utopik kommunist, nə ateist, nə də öz soykökündən uzaq birisi olmayıb. Tam əksinə, Babək
və xürrəmilər
imanlı insanlar olub. Allaha, onun müqəddəs
kitabına iman gətirmiş insanlar olub.
Təxminən 50–yə yaxın mənbədən
müxtəlif tərcümə
variantlarından əldə
etdiyim məlumatlar kitabda öz əksini tapdı. Həddən artıq maraqlı məlumatlar ortaya çıxdı. Məlum
oldu ki, Babək əslində əsasını qoyduğu
müstəqil bir dövlətin—Xürrəmilər dövlətinin 22 il keşiyində dayanıb. Halbuki, tarix elmində
müsəlman türklərinin
qurduğu ilk dövlət
olaraq Sacoğulları,
yəni Sacilər dövləti qəbul olunur. Özü də Babəkdən 50 il sonra.
Amma əslində Babəkin 22 il ərzində Azərbaycanda
idarəetmə mexanizminə
malik bir qüvvə kimi formalaşması Xürrəmilər
hərəkatının, milli
azadlıq hərəkatının
məntiqi nəticəsi
olaraq bir Xürrəmilər dövlətinin
ortaya çıxması,
araya–ərsəyə gəlməsi
demək idi. Babəkin həm konkret paytaxt şəhəri olub, həm də ordusu olub. Həm bayrağı olub,
həm konkret hərbi şura adlı idarəetmə orqanı olub. Hətta mənbələr Babəkin
20–yə yaxın cəlladının
olduğunu göstərir
ki, bu da
konkret məhkəmə
və cəza mexanizminin olması deməkdir. Təbii ki, bir qala sahibinin 20 cəlladının olması
absurd bir düşüncədir.
Demək
bütün Azərbaycan
ərazisində mövcud
məhkəmə sistemi
fəaliyyətdə imiş.
Bütün bunlar bizə əsas verir ki, Babəkə bu günə qədər yanaşıldığı
tərzdə, yəni
üsyan başçısı
kimi yox, hökmdar kimi yanaşmaq lazımdır. Bizim bədbəxtliyimiz
onda olub ki, öz qəhrəmanlarımıza
yad, yabancı mənbələrin gözü
ilə qiymət verməyə çalışmışıq.
Babəkin öz oğluna bir məktubu var. Bəzz qalası süqut etdikdən sonra o, Araz vadisindəki
bir meşəlikdə
gizlənir. Oğlundan gələn məktuba
cavab yazır və deyir ki,
harda mənim barəmdə kimin nə deməsindən asılı olmayaraq mən hökmdar olmuşam və hökmdar olaraq da qalacağam. Biz istəsək də,
istəməsək də,
ərəb mənbələri
onu üsyançı
kimi görsə də, istənilən halda bizim qəhrəmanımız
Babək özünü
müstəqil dövlətin
hökmdarı kimi görüb. Biz də onu özünün
gördüyü ampluada
görməliyik. Yəni azərbaycanlılara
Sovet dövründə
Babək milli, müstəqil bir dövlətin hökmdarı
kimi təqdim edilə bilməzdi. Sovetlər onu adi, başıpozuq
bir kütlənin üsyan başçısı
kimi təqdim etməli idi. Bunlar ən çox ərəb mənbələrinə,
Abbasi Xilafətinin saray tarixçilərinə
istinad ediblər.
Hazırda bir neçə
çox ciddi araşdırmalar üzərində
iş gedir. Yaxın illərdə onları kitab kimi çap
etdirmək fikrindəyəm.
Bu mövzulardan biri həm elmi araşdırıcıların,
həm də əhalinin böyük marağına səbəb
ola biləcək.
“Quran ayələrində Azərbaycan” mövzusudur.
Bayrağımızda türklük,
müasirlik, islam
təfəkkürü, düşüncəsi
var. Amma islamın Azərbaycanla nə dərəcədə əlaqəli
olmağı bu günə qədər elmi səviyyələrdə
araşdırılmayıb. Çünki İslamın əsas
kitabı Qurandı, buna daha çox
ərəb düşüncəsi
ilə yanaşılıb.
İslama daha çox
ərəb dini olaraq baxış sərgilənib. Burda, təbii
ki, dini camiənin də müəyyən nöqsanlı
baxış bucağı
da var. Ancaq biz bir dünyəvi insanlar olaraq, bir elmi araşdırmaçı
olaraq çalışmalıyıq
ki, bu məsələdə
də Azərbaycanla bağlı həqiqətləri
ortaya qoyaq.
İlk araşdırmalar
artıq göstərir
ki, Quranın 100–dən
çox ayəsi Azərbaycanla, Azərbaycan
tarixinin müxtəlif
dövrləri ilə
bağlıdır. Və Azərbaycan, həqiqətən,
islamda göründüyündən
də qat–qat mühüm yer tutmalıdır, necə ki, tutur. Sadəcə bu yüksək məqamı, yeri olduğu kimi tədqiq edib ortaya qoymaq lazımdır.
Bu baxımdan düşündüm ki, belə bir araşdırmaya
ehtiyac var. Özü də sırf elmi əsaslarla, elmi təməllərlə,
hər hansı dini təmayüllərə
meyillənmədən.
Quran ayələrində Azərbaycanı tədqiq
eləmək, mənim
fikrimcə, milli dövlətçiliyimizin də,
islami və dini dünyagörüşümüzün
də xeyrinədir, dini maariflənmə baxımından da Azərbaycan əhalisinə
böyük töhfələr
verə bilər.
Daha bir neçə tarixi araşdırmalarla da məşğulam. Onları da kitab halında çap etdirməyi düşünürəm.
Bunlardan biri “Qızılbaşlığın
milli ideoloji tərəfi və Azərbaycan milli dövlətçilik tarixində
yeri və rolu” adlanır. Bu, Şah İsmayıl
Xətai ilə bağlı olan bir mövzudur.
Yeri gəlmişkən,
mən Babəklə bağlı kitabımda onu da aydınlaşdırdım
ki, Babək hərəkatı əslində
Qızılbaşlığın 6 əsr əvvəlki rüşeymləridir. Yəni XVI əsrdə
Qızılbaşların qoyduğu
ideoloji tezislər tamamilə Babəkin və xürrəmilərin
qoyduğu tezislərin
davamıdır, bunlar
bir–birini tamamlayır.
Mənbə məlumatlarından bunları üzə çıxarmaq mümkündür
və mən kitabımda onu göstərməyə çalışmışam.
İndi növbəti dalğa olaraq milli dövlətçilik
tariximizdəki ideoloji
tərəfə diqqət
yetirərkən xürrəmilikdən
sonrakı dalğa olaraq Qızılbaşlığı
da tədqiq etmək fikrindəyəm.
Mənim fikrimcə, bu cərəyanların Azərbaycan
milli dövlətçilik
tarixində və ideoloji sahədə böyük rolu və əhəmiyyəti
var. Və əhalimizin
həm dini, həm də dünyəvi dünyagörüşünün
formalaşmasında bu
cərəyanların ideoloji
prinsiplərinin böyük
rolu olub.
Azərbaycanla, Azərbaycan tarixi ilə bağlı əsl həqiqətləri
ortaya qoymaq bu sahə ilə
məşğul olan hər bir alimin
vicdani borcu, vətəndaşlıq borcu
olmalıdır. Bu, həm
də minilliklərin
o tayından boy verən
tariximizə, əcdadlarımıza,
onların narahat olan ruhuna sayqımızdır.
Söhbəti yazdı: Zülfüqar
ŞAHSEVƏNLİ
Respublika.- 2013.- 22 fevral.- S. 7.