MASALLIDA SOSİAL PROBLEMLƏR UĞURLA HƏLL OLUNUR

Masallı iri kənd təsərrüfatı rayonudur. Əhalisi 210 min nəfərdən çoxdur. Rayonun iqtisadiyyatının əsasını əkinçilik və heyvandarlıq təşkil edir. Yerli əhalinin 95 faizinin dolanışığı torpaqla bağlıdır. Aqrar sahəni inkişaf etdirmək, məhsul bolluğu yaratmaq üçün ardıcıl tədbirlər görülür. Torpaq mülkiyyətçiləri əkin strukturuna yenidən baxır, ənənəvi sahələrlə yanaşı təbii iqlim şəraitinə uyğun daha gəlirli bitkilərin əkilməsinə diqqət artırılır.

Son illər rayonda müasir istixanalar salınır, yerli tələbata uyğun məhsul becərilir. Keçən il 2 hektar ərazidə tikilmiş istixana təsərrüfatı genişləndirilərək 11 hektara çatdırılmışdır. Bu, qış mövsümündə hər hektardan 500 min manat ümumi gəlir əldə etməyə imkan verir.

Çayçılığın, tərəvəzçiliyin, heyvandarlığın inkişaf etdirilməsi, yeni anbar kompleksinin tikintisi nəticəsində aqrar sahədə dönüş yaranmış, kənd əməkçilərinin məşğulluğu təmin olunmuşdur.

Qeyri–neft sektorunun inkişafına göstərilən dövlət qayğısı sayəsində rayonda yeni sosial və infrastruktur layihələr həyata keçirilir. Aparılan işlərə bütün maliyyə mənbələri hesabına 300 milyon manat vəsait yönəldilmişdir.

Masallı şəhərinin su–kanalizasiya sistemi əsaslı şəkildə yenidən qurulur, kəndlərə su, qaz xətləri çəkilir, yollar təmir olunur.

Azərbaycan Prezidenti cənab İlham Əliyevin sərəncamı ilə ayrılmış vəsait hesabına 69 min nəfərdən çox əhalinin istifadə etdiyi Ərkivan–Boradigah–Rüdəkəran avtomobil yolu əsaslı şəkildə yenidən qurulmuşdur. Daha 31 kəndi rayon mərkəzi ilə birləşdirən yolun çəkilişinə hazırlıq görülür.

Son illər rayonda 32 yeni məktəb binası tikilib istifadəyə verilmiş, 5 məktəb, 2 uşaq bağçası əsaslı təmir edilmiş, əlil və şəhid ailələri üçün 76 mənzilli 3 yaşayış binası inşa olunmuşdur.

Masallı Rayon İcra Hakimiyyətinin başçısı Rafil Hüseynov şəhər, qəsəbə və kəndlərə yerli əhali ilə müntəzəm görüşərək vəziyyətlə yerindəcə tanış olur, mövcud problemlər birgə müzakirə edilir. Əhalinin irəli sürdüyü təkliflər diqqətlə araşdırılır və həlli üçün müvafiq tədbirlər görülür.

Masallının şəhər, qəsəbə və kənd inzibati ərazi dairəsi nümayəndəliklərinin hesabat yığıncaqlarında ötən il görülümüş işlər geniş təhlil olunmuş, qarşıdakı dövr üçün yeni vəzifələr müəyyənləşdirilmişdir.

Masallı şəhər inzibati ərazi dairəsinin nümayəndəsi Kamal Mazanov hesabat yığıncağında məruzə edərək ötən il şəhərdə aparılmış abadlıq, tikinti və quruculuq işləri barədə məlumat vermişdir.

Bildirmişdir ki, şəhərin Heydər Əliyev prospekti əsaslı şəkildə yenidən qurulmuş, Talışxanov prospektində, akademik Zərifə Əliyeva, Füzuli və I Dadva küçələrində genişləndirmə işləri aparılmış, yeni hasarlar çəkilmiş, Qarabağ küçəsində səkilər müasir üslubda qurulmuş, işıqlandırma sistemi quraşdırılmışdır. Gənclər mərkəzi, rayon mədəniyyət evi, şəhər 3 saylı uşaq bağçası əsaslı təmir edilərək istifadəyə verilmişdir.

Şəhərin Bayraq meydanında xatirə kompleksi ucaldılmışdır. Heydər Əliyev mərkəzinin, Yeni Azərbaycan Partiyası Masallı rayon təşkilatı üçün inzibati binanın tikintisində işlər davam etdirilir.

Ötən ilin iyun ayından başlayaraq şəhərə içməli su və kanalizasiya xətləri çəkilir. Şəhərin ayrı–ayrı küçələrində işlər başa çatdırılmışdır.

Masallı şəhərində 6 tam orta məktəb, lisey və 4 uşaq bağçası fəaliyyət göstərir. Gənc nəslin təhsilinə, vətənpərvərlik tərbiyəsinə xüsusi diqqət göstərilir. Təhsil ocaqlarında keçirilən tədbirlərə ziyalılar, ağsaqqallar, din xadimləri dəvət olunur, gəncliyi düşündürən mövzularda söhbətlər aparılır.

2012–ci ildə Masallı şəhəri Azərbaycanın Folklor Paytaxtı elan olunmuşdur. Folklor ili çərçivəsində Masallı şəhərində Beynəlxalq folklor fetivalı, digər rəngarəng tədbirlər keçirilmişdir.

“İdman ili” çərçivəsində Masallı bir sıra mötəbər yarışlara ev sahibliyi etmiş, rayonun idmançıları yüksək nailiyyətlər qazanmışlar. Şəhərdə boks və taekvando mərkəzlərinin tikintisində son tamamlanma işləri görülür.

Masallı şəhərində yüksək keyfiyyətli məhsulları ilə respublikamızdan kənarda da tanınan “EMBAOOD” mebel fabriki, “Nur–M” konserv, “Fəxrəddin–K” kərpic zavodları və digər istesal sahələri fəaliyyət göstərir.

Regionların sosial–iqtisadi inkişafı Dövlət Proqramı çərçivəsində Masallı şəhərində 1,2 min tonluq soyuducu anbar və istixana kompleksləri tikilmişdir.

Hesabat yığıncağında ziyalılardan Ələşrəf Niftiyev, Namiq Zeynallı, ağsaqqallardan Rafiq Bağırov, Gənci Bağışov, şəhər 1 saylı tam orta məktəbin direktoru Mirqabil Hüseynov, mərkəzi xəstəxananın baş həkimi Cəlil Nəzərov və başqaları çıxış edərək masallılıların dövlətimizin başçısı cənab İlham Əliyevin uğurlu daxili və xarici siyasətini dəstəklədiklərini, Masallı şəhərinin inkişafına, müstəqil Azərbaycanın daha da çiçəklənməsinə öz layiqli töhfələrini verəcəklərini bildirmişlər.

Yığıncaqda Azərbaycan Prezidenti Administrasiyasının məsul işçisi Vəfadar Bağırov çıxış etmiş, ümummilli liderin siyasi kursunun möhtərəm Prezidentimiz cənab İlham Əliyev tərəfindən uğurla həyata keçirildiyini, bütün sahələrdə yüksək nailiyyətlərin əldə olunduğunu diqqətə çatdırmış, rayonun icra orqanları qarşısında duran vəzifələrdən danışmışdır.

Masallı Rayon İcra Hakimiyyətinin başçısı Rafil Hüseynov yığıncaq iştirakçıları qarşısında çıxış edərək aparılmış genişmiqyaslı tikinti, quruculuq işlərindən söhbət açmış, qarşıda mühüm vəzifələrin durduğunu, həmin vəzifələrin icrası üçün bütün qüvvələrin səfərbər ediləcəyini, Masallının yeni uğurlara imza atacağını bildirmişdir.

Boradigah qəsəbə inzibati ərazi dairəsi Boradigah qəsəbəsini, Mollaoba və Babaser kəndlərini birləşdirir. Ərazidə əhalini narahat edən sosial problemlərin həlli sürətləndirilmişdir.

Boradigah çayında qazma işləri aparılmış, Babaser kəndi ərazisində suötürücü kanallar təmizlənmişdir.

Qəsəbə inzibati ərazi dairəsinin nümayəndəsi Nəcməddin Quliyev hesabat məruzəsində bildirmişdir ki, qəsəbədə 3 tam orta məktəb, xəstəxana fəaliyyət göstərir. Ərazi nümyəndəliyi tərəfindən tədrisin keyfiyyətinə, şagirdlərin dərsə davamiyyətinə nəzarət olunur.

Ötən dərs ilində məzunlardan 22 nəfər ali məktəblərə, 18 nəfər isə orta ixtisas məktəblərinə qəbul olunmuşdur. Boradigah qəsəbə 1 saylı tam orta məktəbin nailiyyətləri daha sevindiricidir. Məktəin 12 nəfər məzunu ali məktəb tələbəsi adını qazanmışdır.

Qəsəbə xəstəxanası 32 yaşayış məntəqəsinin əhalisinə xidmət göstərir. Xəstəxanada müasir tibbi avadanlıqlar quraşdırılmış, xəstələrin müalicəsi üçün lazımi şərait yaradılmışdır.

Boradigah qəsəbəsində Şəhidlər abidə kompleksi yenidən qurulmuş, iki istirahət mərkəzinin tikintisinə başlanılmışdır. Boradigah–Qumbaşı yolu boyunca küknar ağacları əkilmiş, yaşıllıqlar salınmışdır.

Mollaoba və Babaser kəndlərində küçələrə asfalt döşənmiş, işıq dirəkləri, qaz, su, kanalizasiya xətləri dəyişdirilmişdir.

Artıq iki ildir ki, qəsəbədə sərbəst güləş üzrə idman klubu fəaliyyət göstərir. Hazırda qəsəbədə müasir üslubda idman məktəbi inşa olunur.

Ərazidə müəyyən problemlər də mövcuddur. Təzə salınmış yaşayış massivində əhalinin içməli su ilə təhcizatı öz həllini gözləyir. Qəsəbə xəstəxanasının, 2 saylı tam orta məktəbin əsaslı təmirə ehtiyacı vardır.

Ərkivan qəsəbəsi rayonun iri yaşayış məntəqələrindən sayılır. Ərazidə 16 min nəfərdən çox əhali yaşayır.

Qəsəbə inzibati ərazi dairəsi üzrə nümayəndə Sadiq Cahangirov hesabat məruzəsində ərazidə sahibkarlığın inkişafına xüsusi diqqət yetirildiyini, 2 kərpic zavodunun, 70–ə yaxın ticarət, istehsal sahələrinin fəaliyyət göstərdiyini bildirmişdir. Qəsəbədə dulusçuluq, xarratlıq və digər qədim sənət növləri ilə məşğul olanlar üçün lazımi şəraitin yaradıldığı qeyd olunmuşdur.

Ötən il Ərkivan qəsəbəsində xeyli tikinti, abadlıq işləri görülmüşdür. Qəsəbədaxili küçələrdə 5482 kvadrat metr əraziyə asfalt döşənmiş, 1,5 kilometr uzunluğunda yol cari təmir olunmuşdur. Şəhidlər parkındakı abidə əsaslı təmir olunmuş, burada veteranlar üçün çay evi tikilib istifadəyə verilmişdir.

Qəsəbə təbii qazla təchiz edilmişdir. Bəzi məhəllələrdə qaz təchizatını yaxşılaşdırmaq üçün yeni layihə həyata keçirilir.

Cari ildə 1 və 3 saylı tam orta məktəblərin, mədəniyyət evinin əsaslı təmiri, güləş idman mərkəzinin tikilməsi, qəsəbədaxili yolların təmiri və küçələrin işıqlandırılması nəzərdə tutulmuşdur.

Rayonun 36 inzibati ərazi dairəsi üzrə nümayəndəliklərin hesabat yığıncaqlarında görülmüş işlərlə əlaqədar işgüzar müzakirələr aparılmış, yerlərdə yeni iş yerlərinin yaradılmasının, sosial problemlərin həllinin sürətləndirilməsinin, insan amilinə diqqətin artırılmasının vacibliyi qeyd olunmuşdur.

Əlisəfa Həsənov

Respublika.- 2013.- 23 fevral.- S. 6.