Müstəqil
Azərbaycan güclü iqtisadiyyata
malik dövlətə çevrilir
Bu iqtisadi inkişafa “Altes Group” şirkəti öz
töhfələrini əsirgəmir
Müstəqil Azərbaycan dövlətində özəl sektorun, sahibkarlığın inkişafına yüksək səviyyədə diqqət və qayğı göstərilir. Məhz bunun sayəsindədir ki, ölkədə yerli sahibkarlıq sürətlə tərəqqi edir. İqtisadiyyatımızın daha da güclənməsinə öz layiqli töhfəsini verir. Bu baxımdan “Altes Group” Azərbaycanda fəaliyyət göstərən yerli şirkətlər içərisində xüsusi çəkiyə malikdir.
“Altes Group”un təsisçilərindən biri Fərid Əliyevlə müsahibəyə keçməzdən əvvəl bildirək ki, bu yaxınlarda Bakıda Moskva Dövlət Beynəlxalq Əlaqələr İnstitutu məzunlarının 1–ci forumu keçirildi. Bu məşhur elm ocağının məzunları arasında dünyanın bir çox ölkələrində yaşayan, yüksək vəzifələr tutan tanınmış insanlar vardı. Bu elm ocağının daha bir məzunu Fərid Əliyevlə tanışlığımız təsadüfən alındı. Öyrəndik ki, o MDBƏİ–nin ilk azərbaycanlı məzunu olub. Hesab edirik ki, bu yaxınlarda 75 illik yubileyini qeyd etmiş bu təcrübəli, insanlarla səmimi təmas quran azərbaycanlı ilə söhbət oxucularımız üçün də maraqlı olacaq.
—Bu yaxınlarda Bakıda keçirilən MDBƏİ–nin məzunları forumunda iştirak etdiniz. Forumun keçirilməsini necə qiymətləndirirsiniz və onun əhəmiyyəti nədir?
—Hesab edirəm ki, MDBƏİ–nin daha bir məzunu — Azərbaycan Prezidenti İlham Əliyev və bu institutun rektoru Anatoli Torkunov Bakıya bu qədər tanınmış simaları toplamaqla əsl möcüzəyə imza atdılar. Bu ənənə onilliklərlə davam edəcək. Hətta foruma qatıla bilməyən xarici diplomatlar, nazirlər — MDBƏİ məzunları belə təbrik teleqramları göndərdilər. Belə bir forumun keçirilməsi həm ölkənin imici, həm də insanlar arasında əlaqələrin bərpası baxımından çox vacibdir. Hərəsi bir vəzifə tutan, bir işlə məşğul olan insanlar bir gündə Bakıda görüşürlər. Məncə, əsas olanı da elə budur.
—Öyrəndik ki, MDBƏİ–nin ilk azərbaycanlı məzunu sizsiniz. Necə oldu ki, məhz bu ali məktəbdə təhsil almaq qərarına gəldiniz?
—Məktəbi bitirəndən sonra Yaroslavl Texnologiya Texnikumuna daxil oldum. Oranı da bitirərək, Azərbaycana qayıtdım və yeni açılan şin zavodunda vulkanizasiya sexində KİP və avtomatika üzrə usta kimi işə başladım. İngilis dilini mükəmməl bilməyim mənə çox kömək etdi. Sexin bütün avadanlığının istifadə qaydası xarici dildə idi, elə bizimlə çalışanlar arasında da xaricilər vardı və mən bu amildən istifadə edərək, işləməyə başladım. Zavodda 1 il işlədikdən sonra instituta qəbul olmaq qərarına gəldim.
O zaman Moskvada
Patris Lumumba adına Xalqlar dostluğu institutu yaranmışdı və mənə
məsləhət gördülər ki, o instituta daxil
olum. Amma biləndə
ki, xarici dili mükəmməl bilirəm, məsləhət
gördülər ki, elə
MDBƏİ–yə da daxil
ola bilərəm. Mən 5 imtahan
verdim və 25 mümkün
baldan 24–nü toplamaqla bu ali
elm ocağının tələbəsi oldum. İmtahanlardan sonra rektor Fyodor
Rıjenko mənə dedi ki,
“Fərid, sən qafqazlısan. Gəl səni beynəlxalq iqtisadiyyat fakültəsinə keçirim”.
Və sonralar məlum oldu
ki, rektor düz deyirmiş.
Bu təhsil ocağında o dövrün reallıqlarını nəzərə alsaq belə, azad fikirli insanlar toplanmışdı. O zaman MDBƏİ SSRİ Təhsil Nazirliyinə deyil, Xarici İşlər Nazirliyinə, konkret olaraq bu qurumun o zaman rəhbəri olan Qromıkoya tabe idi.
O zaman biz xarici tələbələrin də üzvü olduğu inter–klub yaratmışdıq. Rəhbəri də mən idim. Biz orada xarici tələbələrlə birgə xüsusi gecələr keçirirdik: Almaniya gecəsi, Macarıstan gecəsi və sair. Hətta o zaman antisovet fəaliyyətinə görə çıxışlarına heç yerdə icazə verilməyən Vladimir Vısotski də ancaq bizim keçirdiyimiz gecələrdə çıxış edə bilirdi. Azad fikirli Vısotski bizim əhatəmizdə özünü çox sərbəst hiss edirdi.
Rektorumuz Rıjenko gözəl insan idi. İndiki rektor
Tolkunov da bir çox xüsusiyyətlərinə görə
onu xatırladır—xarizmatikdir,
komplekslərdən uzaq
adamdır, istənilən
adamla rahat və tez ünsiyyət
qura bilir.
O zamankı dövrdən maraqlı çox hadisələr yadımda qalıb. Məsələn, MDBƏİ–ni bitirəndən
sonra mən SSRİ Xarici Ticarət Nazirliyinin “Soyuzpromeksport” müəssisəsinə işə
düzəldim. İşlədiyimiz sahədə — “filiz kontoru”nda ən iri müştərilərimiz
Yaponiya və Polşa idi. Mən bu ölkələrə filiz və dəmir
filizi konsentratları ixrac məsələləri
ilə məşğul
idim. Əcnəbilərlə bütün danışıqları
Moskvadakı “Berlin” otelinin
barında keçirirdik.
Görüşlər bitən
kimi, bu barın adətinə görə, SSRİ–ni tərk edəcək qalstukda olan qonaqların qalstukları qayçı ilə kəsilir və barın divarına vurulurdu…
—Moskvada nə qədər işlədiniz
və niyə sonradan Azərbaycana qayıtmaq qərarına gəldiniz?
—Mən Azərbaycana
1973–cü ildə Heydər
Əliyevin məsləhəti
ilə, ailəmə yaxın olmaq üçün qayıtdım. Mən Heydər
Əliyevdən xahiş
etdim ki, mənim SSRİ Xarici Ticarət Nazirliyinin Azərbaycan SSRİ Nazirlər
Kabineti nəzdindəki
nümayəndəliyinə keçməyimə icazə
versin. O etiraz etmədi və beləcə, mən burada müvəffəqiyyətlə
ölkəmə xeyir
verməyə başladım.
Təəssüf ki, 80–ci illərin sonlarından Azərbaycanda
hakimiyyətə elə
insanlar gəlirdi ki, onlarla nəinki
işləmək, heç
normal dialoq aparmaq da mümkün deyildi. Vəzirov, Xalq Cəbhəsi, Mütəllibov…
Odur ki, mən işdən
öz xahişimlə
azad olundum və Leninqrad şəhərinə getdim
və orada bizneslə məşğul
olmağa başladım.
Yalnız ulu öndər
Heydər Əliyevin hakimiyyətə qayıdışından
sonra mən biznes fəaliyyətimi yenidən öz ölkəmizdə davam etmək istədim. İstənilən biznes normal, başa
düşən, situasiyanı
anlayan tərəfdaşlarla
aparılmalıdır. Heydər Əliyev hakimiyyətə
qayıdandan sonra hər şey öz yoluna düşdü.
Biz fəaliyyətə ticarət kompaniyası kimi başladıq. O zaman Azərbaycanda keçmiş
SSRİ respublikaları ilə
əlaqələrin qırılmasına
görə bir çox malların çatışmazlığı yaranmışdı. Biz inkişaf etdik və çox böyük qürur hissi ilə deyə bilərəm ki, Bakıda ilk göydələni məhz
biz tikmişik. Bu bina Nərimanov heykəlinin yaxınlığında
yerləşir. Sonra Beynəlxalq
bankın, daha sonra isə Mərkəzi bankın binalarını da inşa etdik.
2006–cı ildə “Altes
Group” yaratmaq qərarına
gəldik. İndi bizim Londonda,
Rusiyada, Birləşmiş
Ərəb Əmirliklərində
və Qazaxıstanda biznesimiz var.
—”Altes Group”un
Azərbaycanda neçə
layihəsi var?
—Bu gün bizim beş layihəmiz
mövcuddur. Bakıdakı
bu beş
yaşayış komplekslərindən
dördündə işləri
tamamilə başa çatdırmışıq. İyunun
14–də “Altes Plaza”nın açılışını
edəcəyik. Bu layihədə mindən çox insan çalışır.
Qeyd etmək
istəyirəm ki, “Altes Group” ancaq tikinti şirkəti deyil. Biz həm də əczaçılıq
biznesi ilə məşğuluq. Rusiyada,
Qazaxıstanda və Avropada filiallarımız
var. Bir müddət əvvəl biz İsveçrənin
“İvuar” brendini aldıq və indi bu brendin
məhsullarının yayılması
ilə məşğuluq.
Şirkətimiz mindən çox
həmvətənimiz üçün
iş yeri açıb. Bununla yanaşı, biz xeyriyyəçiliklə də
məşğuluq. Qeyd etmək
istəyirəm ki, şirkətimiz Azərbaycanın
ən iri vergi ödəyicilərindən
biridir.
Qısaca olaraq, onu da
qeyd etmək istəyirəm ki, son zamanlar mətbuatda bizim haqqımızda bəzi sifarişli, böhtan xarakteri daşıyan xəbərlər
yayılmışdı. Bizim şirkətin işlərinə
vicdanla yanaşmayan və əliəyriliyə
görə işdən
azad olunan bəzi əməkdaşları
bu tipli həqiqətə uyğun
olmayan məlumatlar yaymaqla “Altes Group”un işgüzar
imicinə xələl
gətirməyə cəhd
etmişdilər. Hazırda onların
işi Respublika Prokurorluğundadır, onlara
qarşı cinayət
işləri açılıb.
Bir məsələni
əminliklə vurğulaya
bilərəm — “Altes
Group” bütün layihərinin
qarantıdır və
bizim üçün
ən önəmli məsələ müştərilərimizin
bizdən razı qalmalarıdır.
—Mətbuatda belə bir məlumat getdi ki, siz
Bakıda fırlanan göydələn tikmək
istəyirsiniz. Bu barədə geniş məlumat verməyinizi xahiş edərdik.
—Bəli, bizim Azərbaycanda belə bir nəhəng layihəni həyata keçirmək fikrimiz
var. Bu göydələnin tikilişi
zamanı ən müasir texnologiyalardan istifadə olunacaq. Təsəvvür edin ki, siz yatmağa gedərkən pəncərənizdən
şəhər görünür,
səhər duranda isə qarşınızda
dənizi görürsünüz.
Biz indi bu
proyekt üçün
yer seçirik. Bu yaxınlarda layihənin
arxitektoru Devid Fişer inşaatçılar
və seysmoloqlardan ibarət komandası ilə birgə Bakıya gələcək.
İndi
Bakının bir neçə simvolu var: Qız qalası,
Flame Towers, Baku Crystal Hall, Heydər Əliyev Mərkəzi və hesab edirəm
ki, bizim “Altes Plaza”nı da bu sırada
saymaq olar. Biz istəyirik ki,
tikəcəyimiz fırlanan
göydələn bu arxitektura möcüzələri
ilə bir cərgədə dayansın.
Ölkə Prezidentinin siyasəti
nəticəsində Azərbaycan
güclü iqtisadiyyata
malik dövlətə
çevrilir. Biz bu iqtisadi dirçəlişə
öz tövfəmizi
vermək istəyirik.
—Söhbətimiz zamanı siz Heydər Əliyevdən bir siyasətçi kimi çox danışdınız.
Bəs sizin üçün Heydər Əliyev işdən kənar münasibətlərdə necə
idi?
—Mən tez–tez onunla görüşər
və söhbət edərdik. Deyə bilərəm ki,
hələ sovet dövründə Heydər
Əliyev ölkədə
baş verən prosesləri və bunların nə ilə yekunlaşacağını
gözəl başa düşürdü. O dəfələrlə
eyham vururdu ki, əgər proseslər belə davam etsə, SSRİ dağılacaq. Mənə isə deyirdi
ki, susum və heç yerdə bu barədə
danışmayım. O, həqiqətən də uzaqgörən, dahi bir şəxsiyyət idi…
Müsahibəni apardı:
Xəlil CABBAROV,
Respublika.-2013.-1 iyun.-S.9.