Səbail rayonu “Son zəng” tədbirləri məktəblərdə

xüsusi təntənə ilə keçirilmişdir

“Son zəng” tədbirləri ənənəvi olaraq Səbail rayonunun 18 orta məktəbinin hamısında təntənəli şəkildə qeyd olunmuşdur. Tədbirlərin keçirilməsi üçün məktəb kollektivləri tərəfindən böyük hazırlıq işləri aparılmış, bilik bayramının yüksək səviyyədə, bütün məzunların və iştirakçıların uzun illər ərzində yadında qalan əlamətdar bir hadisəyə çevrilməsi üçün əllərindən gələni etmişlər.

Paytaxtımızın mərkəzindəki 132–134 saylı Təhsil Kompleksində keçirilən “son zəng” tədbiri çox yaddaqalan və maraqlı təşkil olunmuşdur. Bu il 150 yaşı tamam olan, böyük ənənələrə malik 132–134 saylı Təhsil Kompleksində hazırda 77 sinifdə 2300 şagird təhsil alır. Məktəbi 105 məzun bitirir ki, onlardan 5 nəfəri “Qızıl medal”a namizəddir. Son 2 il ərzində isə məktəbin məzunlarından 5 nəfər “Qızıl” və 1 nəfər “Gümüş” medala layiq görülmüşdür.

“İlin ən yaxşı məktəbi” müsabiqəsinin qalibi olmuş kompleksdə bu gün 300 nəfər işçi çalışır ki, onların 197–si müəllimdir. Pedaqoji işçilərin 2–si elmlər namizədi, 6 nəfəri əməkdar müəllimdir. Kompleksin 11 müəllimi “Ən yaxşı müəllim” müsabiqəsinin qaliblərindəndir. 2012–2013–cü tədris ilində 20 nəfər şəhər, respublika və beynəlxalq miqyaslı olimpiadalarda, 8 şagird idman yarışlarında və 6 şagird isə müxtəlif müsabiqələrdə qaliblər arasında olmuşlar.

“Son zəng” tədbirində məzunları və birinciləri, onların valideynlərini və çoxsaylı qonaqları salamlayan 132–134 saylı Təhsil Kompleksinin direktoru, əməkdar müəllim Sara Xanlarova çıxışını ümummilli liderimiz Heydər Əliyevin “Təhsil millətin gələcəyidir” sözləri ilə başladı. Ulu öndərin Azərbaycan təhsilinin inkişafındakı əvəzsiz xidmətlərindən, bu gün ölkə rəhbərliyi tərəfindən təhsil sahəsində aparılan siyasətdən danışdı, son vaxtlarda məktəb kollektivinin qazandığı uğurlar barədə məlumat verdi və builki məzunlara müstəqil həyatda atacaqları addımlarda uğurlar arzuladı.

Tədbir məktəblilərin musiqili–bədii çıxışları ilə davam etdi, müəllimlər, valideynlər, çoxsaylı qonaqlar məzunlara öz ürək sözlərini çatdıraraq onlara müstəqil həyatda uğurlar arzuladılar.

Səbail rayonunun qocaman və tanınmış məktəblərindən olan, 190 saylı məktəbi bu il özünün 66–cı buraxılışını keçirir. Məktəbdə hazırda 1105 şagird təhsil alır, burada 115 pedaqoji və 22 texniki işçi çalışır. Bu il 4 sinifdə 88 şagird təhsili başa vurur və onların 2–si “Qızıl medal”a namizəddir.

Tədbirə toplaşan çoxsaylı şagird və qonaqların qarşısında çıxış edən 190 saylı orta məktəbin direktoru, əməkdar müəllim Afət Bakıxanova bu il 11–ci sinfi bitirən məzunlara uğurlar arzuladı, məktəbi əla qiymətlərlə bitirmiş, həmçinin müxtəlif miqyaslı fənn olimpiadalarının qalibi olmuş bir qrup məzuna Fəxri fərmanlar və hədiyyələr təqdim etdi, məzunların böyük əksəriyyətinin məktəbi əla və yaxşı qiymətlərlə bitirdiklərini xüsusi vurğuladı.

Qeyd etdi ki, 190 saylı məktəb 2009–cu ildə “Ən yaxşı ümumtəhsil məktəbi” adını qazanmış, məktəbin 5 müəllimi “Ən yaxşı müəllim” müsabiqəsinin qalibləri sırasında olmuşdur. Məktəbdə 3 elmlər namizədi, 1 əməkdar müəllim çalışır.

190 saylı orta məktəb ötən tədris ilində Bakı şəhəri üzrə Təhsil İdarəsi tərəfindən keçirilən “tarix aylığı”nın yekunlarına görə 1–ci yerə layiq görülmüşdür. Şagirdlərdən 7 nəfər Bakı şəhəri üzrə keçirilən bilik olimpiadalarında 1–ci yerə çıxmış, məktəbin 2 müəllimi isə “Ən yaxşı müəllim” müsabiqəsində iştirak edir. Bakı Slavyan Universitetində 190 saylı orta məktəbin pedaqoji kollektivi ilə birgə yaradılmış Ali və orta təhsilin koordinasiyası kafedrası fəaliyyət göstərir ki, keçən tədris ilində kafedra tərəfindən məktəbdə 2 ustad dərsi və 2 görüş keçirilmişdir.

Tədbirdə məktəbin 1–ci və 11–ci sinif şagirdlərinin hazırladıqları şeir, mahnı və rəqslərdən ibarət çıxışları iştirakçıların çox xoşuna gəldi. Məktəb həyatına əlvida deyən məzunlar doğma məktəbə və onlara dərs deyən müəllimlərə minnətdarlıqlarını çatdırdılar və tədbir böyük bədii proqramla başa çatdırıldı.

Məktəblərdə keçirilən tədbirdə iştirak edən Səbail Rayon İcra Hakimiyyətinin başçısı Asif Əsgərov Azərbaycan Respublikasının Prezidenti cənab İlham Əliyev tərəfindən ölkədə təhsilin səviyyəsinin artırılması, təhsil müəssisələrinin əsaslı təmiri, yenilərinin tikintisi, onların bütün ləvazimatlarla təminatı və təhsil işçilərinə olan diqqətin artırılması istiqamətində görülən işlər, ölkənin birinci xanımı, Heydər Əliyev Fondunun prezidenti, millət vəkili Mehriban xanım Əliyevanın da təhsilin inkişafı istiqamətindəki fəailiyyəti barədə danışmışdır.

Həmçinin qeyd olunmuşdur ki, dövlət başçısı tərəfindən xalqımızın gələcəyi olan uşaqlara göstərilən diqqət və qayğı, onların sağlam və bilikli böyüməsi istiqamətində həyata keçirilən işlər Səbail rayonunda da öz əksini tapmışdır. Son bir neçə il ərzində rayonda aparılan geniş miqyaslı abadlıq–quruculuq işləri çərçivəsində 1 yeni məktəb və uşaq bağçası, 2 orta məktəb üçün əlavə tədris korpusu tikilmiş, 2 məktəb sökülərək yenidən tikilmiş, 10 orta təhsil müəssisəsi, 1 peşə məktəbi, 10 uşaq bağçası, 3 uşaq musiqi məktəbi, 2 uşaq texniki yaradıcılıq mərkəzi, 2 idman məktəbi, 1 uşaq poliklinikası əsaslı təmir olunmuş, bu müəssisələr bütün lazımi avadanlıqlarla təchiz olunmuşdur. Hazırda rayonda daha 2 məktəbin və 1 uşaq bağçasının əsaslı, 1 məktəbin isə idman və akt zallarının təmiri aparılır.

Asif Əsgərov müstəqil həyatın astanasında duran məzunlara uğurlar, ölkəmiz və xalqımız üçün layiqli övlad olmalarını arzulamış, ölkə rəhbərliyi tərəfindən respublikamızda təhsil sahəsində aparılan işlər və bu qəbildən Səbail rayonunda həyata keçirilən layihələr barədə ətraflı məlumat vermiş, məktəblərin pedaqoji kollektivlərinə gələcək işlərində uğurlar arzulamışdır.

Tədbirlərdə iştirak edən digər qonaqlar müstəqil həyatın astanasında duran məzunlara uğurlar, ölkəmiz və xalqımız üçün layiqli övlad olmalarını arzuladılar.

Səbail rayonunun digər məktəblərində də “son zəng” tədbirləri yüksək təşkilatçılıqla keçmiş və məzunların həyatında yaddaqalan bir günə çevrilmişdir.

Ənənəvi olaraq orta məktəblərdə keçirilən “son zəng” tədbirlərində Səbail Rayon İcra Hakimiyyətinin və ictimaiyyətin nümayəndələri, ağsaqqallar, mədəniyyət xadimləri iştirak etmişlər.

Məhəmməd VƏLİYEV,

Respublika.-2013.-1 iyun.-S.10.