Azərbaycan hərbi qüdrəti artır

Azərbaycan Silahlı Qüvvələri hər an torpaqlarımızı işğaldan azad etməyə qadirdir

“Azərbaycanın artıq güclü ordusu vardır. Bütün silahlı qüvvələr bu gün istənilən vəzifəni—ölkəmizin bütün maraqlarını müdafiə etmək üçün hazırdırlar, buna qadirdilər. Dağlıq Qarabağda və işğal edilmiş torpaqlarda Azərbaycanın suverenliyini bərpa etməyə hazırdırlar. Sadəcə olaraq biz istəyirik ki, bunu qan tökülmədən, sülh, danışıqlar yolu ilə edək və hər an, hər gün biz qələbəyə yaxınlaşırıq. Hər gün Ermənistan daha da böyük tənəzzülə uğrayır. Azərbaycan daha da güclənir. Biz hər gün qələbə gününü yaxınlaşdırırıq. Gün gələcək Azərbaycan bayrağı Xankəndidə və Şuşada dalğalancaqdır”.

İlham Əliyev,

Azərbaycan Respublikasının Prezidenti.

Bu gün Azərbaycan Silahlı Qüvvələrinin yaradılmasının 95–ci ildönümüdür. 1918–ci il iyunun 26–da yaradılmış Azərbaycan Silahlı Qüvvələrinin şanlı tarixi var. Müstəqillik illərində 1993–cü ildən başlayaraq ulu öndər Heydər Əliyevin böyük səyləri sayəsində Azərbaycan ordusunun müasirləşdirilməsi, inkişafı istiqamətində çox mühüm işlər görülmüşdür. Hazırda Azərbaycan Prezidenti İlham Əliyev ordumuzun daha da güclənməsinə böyük diqqət və qayğı göstərir.

Azərbaycanın müdafiə qabiliyyəti ölkənin milli maraqlarının təmin edilməsində əsas amillərdən biridir. Azərbaycan Respublikasının Silahlı Qüvvələri ölkənin müdafiə qabiliyyətinin əsasını təşkil edir, Azərbaycanın milli müdafiə siyasətinin əsas istiqamətləri—bütün ölkələrlə dinc yanaşı yaşama, digər dövlətlərin süverenliyinə və müstəqilliyinə hörmət və onların daxili işlərinə qarışmama, mövcud dövlət sərhədlərinin bütövlüyü və onların dəyişməzliyi, beynəlxalq təhlükəsizliyin möhkəmləndirilməsi və hərbi quruculuqda konkret qüvvələr nisbətini nəzərə almaqla zəruri müdafiə qabiliyyətinin təmin olunmasıdır.

Tarixi keçmişini, təhlükəsizlik vəziyyətini, demokratik dövlət quruculuğunun əsas vəzifələrini və ərazisinin bir hissəsinin Ermənistan tərəfindən işğal olunması faktını nəzərə alan Azərbaycanın apardığı milli müdafiə siyasətinin əsas məqsədləri ölkəmizin müstəqilliyinin və suverenliyinin qorunması, ərazi bütövlüyünün bərpa edilməsi və bütün əraziləri üzərində nəzarətin təmin olunması, xarici hərbi təcavüzün qarşısının alınması və dəf edilməsi üçün Azərbaycan Respublikası Silahlı Qüvvələrinin döyüşə və səfərbərliyə hazırlıq səviyyəsində saxlanılması, NATO–nun “Sülh naminə tərəfdaşlıq” Proqramının müvafiq mexanizmlərində iştirakının davam etdirilməsi, NATO dövlətləri və digər tərəfdaş ölkələrlə qarşılıqlı faydalı əsaslara söykənən ikitərəfli və çoxtərəfli hərbi əməkdaşlığın həyata keçirilməsi, ölkəmizin müdafiə sahəsində öz üzərinə götürdüyü beynəlxalq hüquq öhdəliklərinin yerinə yetirilməsi, eləcə də müvafiq tədbirlərin həyata keçirilməsi yolu ilə beynəlxalq təhlükəsizliyə töhfə verməkdən ibarətdir.

Hərbi sahədə milli təhlükəsizliyin etibarlı təmin edilməsi məqsədilə müdafiə sahəsində dövlətin praktiki fəaliyyəti mühüm hərbi vəzifələri, ehtimal olunan müharibə və hərbi münaqişələrinin xüsusiyyət və məqsədlərin qiymətləndirilməsi, mümkün təhlükənin miqyası, ölkənin hərbi sahədə təhlükəsizliyinə təhdid olan hərbi və siyasi qüvvələrin və digər amillərin yeri, silahlı qüvvələrin təşkili prinsipləri və s. müəyyən edilmişdir.

Müstəqil Azərbaycan dövlətinin hərtərəfli və sürətli inkişafını müəyyən edən amillər içərisində möhkəm iqtisadi potensial, insanların yaxşı şəraitdə yaşaması və güclü ordunun mövcudluğu prioritet məsələlərdir. Müasir milli ordumuz həm də müstəqilliyimizin qorunmasında və möhkəmlənməsində, ölkəmizin bölgədə geopolitik güc mərkəzi kimi özünü təsdiqləməsində önəmli rol oynayır. XX əsrin 60–cı illərinin sonlarından başlayaraq Azərbaycanda milli ordu quruculuğu prosesi, onun formalaşması və inkişafı dünya şöhrətli siyasətçi və dövlət xadimi, müasir dövlətimizin banisi ulu öndərimiz Heydər Əliyevin adı və misilsiz fəaliyyəti ilə bağlıdır. Xalqımızın ümummilli lideri Heydər Əliyev Azərbaycana rəhbərlik etdiyi bütün dövrlərdə ordu quruculuğu, milli zabit kadrlarının hazırlığı məsələlərini daim önə çəkib.

Ötən əsrdə iki dəfə müstəqilliyini əldə etmiş Azərbaycanda milli ordu quruculuğu prosesi çox çətin və mürəkkəb mərhələlərdən keçib. Hələ Xalq Cümhuriyyətinin mövcud olduğu 1918–1920–ci illərdə Azərbaycanın görkəmli generalları və peşəkar hərbçilərinin rəhbərliyi altında yüksək intizama və hərbi hazırlığa malik ordu hissələri formalaşdırılıb. Lakin Azərbaycanın 1920–ci ildə bolşeviklər tərəfindən işğalından sonra müstəqilliyin ən mühüm atributu olan milli ordu hissələri ləğv edilib və azərbaycanlılar Sovet silahlı qüvvələri sıralarında xidmətə cəlb ediliblər. Azərbaycan keçmiş İttifaqın tərkibində olduğu illərdə isə milli zabit korpusunun formalaşmasına, azərbaycanlıların yüksək hərbi vəzifələrə irəli çəkilməsinə daim müxtəlif süni maneələr yaradılıb.

Yalnız 1969–cu ildə xalqımızın böyük oğlu Heydər Əliyevin Azərbaycanda rəhbərliyə gəlişindən sonra, bütün sahələrdə olduğu kimi, bu mühüm sahədə də ciddi dönüş yaranıb, yeni inkişaf mərhələsi başlanıb. Həqiqətən də, istər keçmiş İttifaq dönəmində, istərsə də müstəqil dövlətimizin milli ordusunun formalaşması, yüksək hərbi hazırlığa malik olmasında ulu öndərimizin xidmətləri danılmazdır. Məhz ötən əsrin 70–ci illərində ümummilli liderimiz Heydər Əliyevin təşəbbüsü və gərgin səyləri nəticəsində Azərbaycanda ilk milli hərbi kadrlar yetişdirən C.Naxçıvanski adına Hərbi Məktəb fəaliyyətə başlayıb. Sevindirici haldır ki, bu hərbi məktəbin yetirmələri bu gün Azərbaycanın milli ordusunda peşəkar zabitlər kimi çox şərəflə və ləyaqətlə xidmət edirlər.

Təsadüfi deyil ki, 1993–cü ilin iyununda xalqımızın təkidi və xahişi ilə yenidən Azərbaycan rəhbərliyinə qayıdan Heydər Əliyev, ilk növbədə ordu quruculuğu ilə məşğul olmağa başladı. Həmin vaxt erməni işğalçılarının yeni–yeni ərazilərimizi zəbt etmək cəhdləri Azərbaycanın müstəqilliyinə ən böyük təhlükə idi. Ümummilli liderimizin səyi nəticəsində bu cəhdlərin, ölkəmizin ərazi bütövlüyünə qarşı yönəlmiş məkrli planların qarşısı qətiyyətlə alındı, Azərbaycan həqiqətləri dünya ölkələri və ictimaiyyətinə çatdırıldı. Azərbaycan ordusu NATO standartları səviyyəsində yenidən quruldu və ən yeni hərbi texnologiyalarla təchiz edildi. Ulu öndərimiz Heydər Əliyevin 22 may 1998–ci il tarixli sərəncamına əsasən, Əlahiddə Azərbaycan Korpusunun yarandığı gün —26 iyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir.

Hazırda ulu öndərimizin siyasi kursu onun ən layiqli siyasi varisi, Prezident İlham Əliyev tərəfindən qloballaşan dünyanın tələbinə uyğun olaraq yeni məzmun və keyfiyyətdə uğurla davam etdirilir. Azərbaycanın hərbi qüdrətinin və müdafiə qabiliyyətinin gücləndirilməsi dövlətimizin başçısının xüsusi diqqət və qayğısı ilə əhatə olunub. Qısa müddətdə ölkəmizdə ordu quruculuğu və müdafiə sənayesinin inkişafında ciddi dönüş yaranıb. Hazırda ölkəmizin hərtərəfli inkişafı naminə konkret Dövlət proqramları, irimiqyaslı infrastruktur layihələri uğurla reallaşdırılır. Azərbaycan son illər öz iqtisadi gücünü böyük dərəcədə artıra bilib və bu proses bütün sahələri əhatə etməkdədir. Daim artan iqtisadi qüdrətimiz indiki halda ölkəmiz üçün çox vacib olan hərbi sənayemizin inkişafına da güclü təkan verib. Azərbaycanda ordu quruculuğu və müdafiə sənayesi sahəsində işlərin uğurla davam etdirildiyini önə çəkən Prezident İlham Əliyev deyib: “Ölkəmizdə hərbi sənaye potensialı sürətlə inkişaf edir. Mən bu sahəni xüsusilə qeyd etmək istəyirəm. Çünki bu, həm sənaye sahəsidir, eyni zamanda, xüsusi bir sahədir. Burada hər iki məqsəd güdülür. Biz, ilk növbədə, Azərbaycanın hərbi potensialını daxili imkanlar hesabına gücləndirməliyik. Vaxtilə Müdafiə Sənayesi Nazirliyi məhz bu məqsədlə yaradılmışdır. Digər tərəfdən, bu, yeni bir sənaye sahəsidir. Minlərlə yeni iş yeri açılmışdır, yüksək maaşlar verilir və Azərbaycanda müasir hərbi sənaye məhsulları istehsal olunur. Hazırda Azərbaycanda 430 adda məhsul istehsal edilir. Məqsədimiz ondan ibarətdir ki, biz bu sahədəki işləri ən müasir texnologiyalar əsasında quraq. Mən onların arasında pilotsuz təyyarələrin istehsalını xüsusi qeyd etmək istəyirəm. Bu, ən inkişaf etmiş ölkələrə xas olan istehsal sahələridir. Azərbaycan artıq öz imkanları ilə pilotsuz təyyarələrin ən yüksək səviyyədə istehsalına başlamışdır və bu, bizim hərbi gücümüzü böyük dərəcədə artıracaqdır”.

Regionun lider dövlətinə çevrilən Azərbaycanın qarşısında duran yeganə problem Ermənistan–Azərbaycan, Dağlıq Qarabağ münaqişəsinin həlli məsələsidir. Bu məsələdə ölkəmizin mövqeyi həmişə konstruktiv olub və danışıqlar prosesinə sadiqik. Bunun əksinə olaraq, Ermənistan öz təcavüzkar siyasətini yeritməkdə, Azərbaycan torpaqlarını hələ də işğal altında saxlamaqdadır. Bütün dünyaya məlumdur ki, sülh danışıqları məhz Ermənistanın qeyri–konstruktiv mövqeyi üzündən heç bir nəticə vermir. Təcavüzkar Ermənistan BMT–nin məlum qətnamələrini, beynəlxalq təşkilatların təkliflərini də qulaqardına vurur və bununla da bütün dünyaya meydan oxuyur. Artıq BMT də, Avropa Birliyi və Avropa Şurası da Ermənistanı rəsmi şəkildə təcavüzkar dövlət kimi tanıyıb. Bununla belə, beynəlxalq təşkilatların reallığı, ədaləti, beynəlxalq hüquq norma və prinsiplərini əks etdirən qərarları, qətnamələri icra olunmur. Prezident İlham Əliyev dəfələrlə bəyan edib ki, biz bu vəziyyətlə, torpaqlarımızın itirilməsi ilə heç vaxt barışa bilmərik: “Dağlıq Qarabağın Azərbaycandan ayrılmasına heç vaxt icazə vermərik və bu, danışıqlar mövzusu deyildir…

Bütün dünya Dağlıq Qarabağı Azərbaycanın ayrılmaz hissəsi kimi tanıyır və eyni zamnada, tarixi, hüquqi, siyasi baxımdan, bütün başqa tərəflərdən də bu, belədir. Ona görə danışıqlar predmeti yalnız və yalnız Azərbaycanın ərazi bütövlüyünün bərpası olmalıdır. Bölgədə yaşayan bütün xalqların təhlükəsizliyinin təmin edilməsi olmalıdır. Bundan kənarda heç bir razılaşma mümkün deyildir”.

Təbii ki, Ermənistanın tutduğu qeyri–konstruktiv mövqe Azərbaycanı öz siyasətinə müəyyən düzəlişlər etməyə vadar edir. Dövlətimizin başçısının dəfələrlə vurğuladığı kimi, bizim səbrimiz tükənməz deyildir. Azərbaycan ya sülh yolu ilə, ya da hərbi yolla öz ərazi bütövlüyünü bərpa edəcəkdir. Bu gün Ermənistan istər iqtisadi, istər siyasi, istərsə də hərbi cəhətdən Azərbaycanla rəqabət aparmaq iqtidarında deyil. Azərbaycan inkişaf etdikcə, bu fərq daha da artır və artacaqdır. Çünki Ermənistanın inkişaf etməsi üçün heç bir imkanı yoxdur. Onlar bütün beynəlxalq regional layihələrdən təcrid olunmuşlar. Əhali Ermənsitanı tərk edir, canlı qüvvəsi çatşımadığından hətta təmas xəttinin qorunmasında da çətinlik çəkirlər. Tam müstəqil siyasət yürüdən Azərbaycan isə dünyanın ən aparıcı, qüdrətli dövlətlərindən birinə çevrilib. Bütün bunlar ölkəmizin hər cəhətdən üstün olduğunun əyani təsdiqidir.

Azərbaycanda bu gün ən müasir silahlar, döyüş sürsatları və hərbi texnika istehsal olunur və proses daim təkmilləşdirilməkdədir. Azərbaycan istehsalı olan “İstiqlal” tipli snayper tüfəngi, atıcı silahlar üçün müxtəlif növ döyüş sursatları, artilleriya minaları və optik cihazlar xarici ölkələrin hərbi mütəxəssislərində belə xüsusi maraq doğurmuşdur.

Bu gün Qafqazda ən müasir ordu hesab olunan Azərbaycan Milli Ordusu Hərbi Hava və Hava Hücumundan Müdafiə, Hərbi Dəniz və Quru qoşunlarından ibarətdir. Bu qoşun növləri potensial rəqiblə effektiv mübarizə aparmaq iqtidarındadır. MDB çərçivəsində Azərbaycan hava hücumundan müdafiə qüvvələrinə malik ən güclü ölkələrdən sayılır. Büdcə vəsaiti ildən–ilə artırılan Azərbaycan Silahlı Qüvvələrinin buna müvafiq olaraq hərbi imkanları da genişlənir. Təsadüfi deyil ki, bu gün Azərbaycanın hərbi xərcləri Ermənsitanın dövlət büdcəsini ikiqat üstələyir. Bununla bərabər, Azərbaycanın özünün silah, sursat və müasir hərbi texnika istehsal etməyi ölkəmizin hərbi və döyüş gücünü daha da artırır. Ermənistan nəhayət başa düşməlidir ki, o bizimlə hərbi sahədə də duruş gətirməyə qadir deyil. Bakıda keçirilən və müstəqilliyimizin 20–ci ildönümünə həsr olunmuş hərbi parad Azərbaycanın hərbi gücünü və müdafiə potensialını bütün dünyaya nümayiş etdirdi. Silahlı Qüvvələrin 93–cü ildönümü münasibəti ilə Bakıda keçirilən təntənəli hərbi paraddakı nitqində Prezident İlham Əliyev ordumuzun maddi–texniki bazasının möhkəmləndirilməsi sahəsində böyük işər görüldüyünü xüsusi vurğulayıb: “Bu gün keçirilən paradda hərbi potensialımızın kiçik bir hissəsi nümayiş etdiriləcəkdir. Biz müasir silahlar, sursatlar, hərbi texnika alırıq və bu proses davam etdiriləcəkdir. Son illər ərzində hərbi potensialımız yüksək dərəcədə artmışdır. Biz müasir tipli döyüş təyyarələri, döyüş və hərbi nəqliyyat helikopterlərii alırıq. Artilleriya qurğuları, zirehli texnika, rabitə vasitələri, pilotsuz təyyarələr alınır və ordumuzun hərbi gücü artır… Güclü dövlətin güclü ordusu olmalıdır. Azərbaycan güclü dövlətdir və Azərbaycanın güclü ordusu vardır!.

Hazırda Azərbaycanda çox güclü ordu yaradılmışdır və bu ordu qarşıda duran bütün məsələlri həll etməyə qadirdir. Ordumuzun maddi–texniki bazası möhkəmlənmiş, əsgər və zabitlərin peşəkarlığı artmışdır.

Ölkəmizin Silahlı Qüvvələri regionun ən güclü ordusu olmaqla yanaşı, NATO standartlarına uyğun inkişaf edir. 95 yaşı olan Azərbaycan ordusu bu gün öz gücü və hərbi qüdrəti ilə seçilir.

Preziednt İlham Əliyev ölkəmizdə ordu quruculuğu prosesinə daim böyük diqqət yetirildiyini önə çəkərək deyib: “Ordunun möhkəmləndirilməsi hər bir vətəndaşın borcudur. İlk növbədə, dövlət öz diqqətini əsirgəməməlidir. Biz bütün sahələrdə orduda gedən proseslərin inkişafına çalışırıq…

Son illər ərzində maddi–texniki bazanın möhkəmləndirilməsində böyük işlər görülmüşdür, çoxlu texniki avadanlıq, müasir silahlar alınmışdır və beləliklə, Azərbaycan ordusu xeyli dərəcədə güclənmişdir. Biz bu prosesi davam etdirəcəyik”. Bu gun Bakıda keçirilən hərbi parad Azərbaycanın hərbi gücünün və ən müasir texnikasının parlaq nümayişi olacaqdır.

Xəlil CABBAROV

Respublika.- 2013.- 26 iyun.- S. 6.