“MÜASİR ELMİN AKTUAL PROBLEMLƏRİ” MÖVZUSUNDA KONFRANS

Lənkəran Dövlət Universitetində ümummilli lider Heydər Əliyevin anadan olmasının 90 illiyinə həsr edilmiş “Müasir elmin aktual problemləri” mövzusunda konfrans keçirilmişdir.

Tədbir iştirakçıları əvvəl ümummilli lider Heydər Əliyevin büstünün önünə gül dəstələri düzmüş, ulu öndərin parlaq xatirəsini ehtiramla yad etmişlər.

Universitetin rektoru, fizika–riyaziyyat elmləri doktoru, əməkdar elm xadimi, professor Asəf İsgəndərov konfransı giriş sözü ilə açaraq onun işinə uğurlar arzulamışdır.

Sonra görkəmli dövlət xadimi Heydər Əliyevin mənalı ömür yolu və şərəfli dövlətçilik fəaliyyəti haqqında film nümayiş etdirilmişdir.

Plenar iclasda universitetin rektoru, professor Asəf İsgəndərovun “Heydər Əliyev siyasətinin uğurlu davamı” mövzusunda məruzəsi dinlənilmişdir. Rektor ümummilli liderin dövlət quruculuğu, siyasi, iqtisadi, sosial və mədəni sahələrin inkişafına göstərdiyi misilsiz qayğıdan, onun sabitliyə, sosial inkişafa, tərəqqiyə xidmət edən siyasi kursunun dövlətimizin başçısı cənab İlham Əliyevin rəhbərliyilə uğurla davam etdirilməsindən ətraflı danışmışdır.

Ümummilli liderin hakimiyyətdə olduğu hər iki dövrdə elmin və təhsilin inkişafına yüksək diqqət və qayğı göstərdiyini vurğulayan rektor bu gün ölkəmizdə elmin və təhsilin özünün zəngin, mütərəqqi ənənələrinə, mənəvi və ümumbəşəri dəyərlərə, beynəlxalq təcrübəyə əsaslanaraq sürətlə inkişaf etdiyini bildirmişdir.

Müasir elmin aktual problemlərindən, ölkəmizin dayanıqlı inkişafında elmin rolundan söhbət açan natiqlər universitetdə 20 istiqamət üzrə elmi tədqiqatların aparıldığını, təhsil ocağında Heydər Əliyev Muzeyinin və İdarəçilik Məktəbinin fəaliyyət göstərdiyini qeyd etmişlər.

Sonra ümummilli liderin anadan olmasının 90 illiyinə həsr edilmiş ən yaxşı yazı müsabiqəsinin qalibləri mükafatlandırılmışlar. Qaliblərdən Aytən Ağazadə, Ülviyyə Məmmədli, Aysel Rzayeva, Lalə Babayeva və Leyla Mirzəcanzadə çıxış edərək Heydər Əliyev ideyalarına həmişə sadiq qalacaqlarını, uğurlarını daha da artıracaqlarını bildirmişlər.

Konfransda universitetin bədii özfəaliyyət kollektivi konsert proqramı ilə çıxış etmişdir.

Konfrans ayrı–ayrı bölmələrdə işini davam etdirmişdir.

Əlisəfa HƏSƏNOV

Respublika.-2013.-15 may.-S.9.