Ulu öndər bir daha anıldı…

Hər bir xalq məhz özünün milli–mənəvi dəyərlərini qoruyub onu inkişaf etdirməklə həmişə hörmət qazana bilir. Xalqımızın milli–mənəvi dəyərlərinin qorunmasında, onun dövlətçiliyin ayrılmaz tərkib hissəsinə və dövlət siyasətinin aparıcı qoluna çevrilməsində ulu öndərimiz Heydər Əliyevin müstəsna xidmətləri olmuşdur. Onun fəaliyyətinin, əməllərinin əsasında əsas bir ideya–Azərbaycançılıq fəlsəfəsi dayanırdı. “Mən fəxr edirəm ki, azərbaycanlıyam”–deyən Heydər Əliyev milli–mənəvi sərvətimizin qorunması və inkişafı yolunda, verdiyi fərman və sərəncamlarla yanaşı, özünün şəxsi nümunəsi ilə də əvəzsiz rol oynamışdır. Bu dahi şəxsiyyət respublikaya rəhbərliyinin bütün dövrlərində yazıçıların, yaradıcı insanların, alimlərin rolunu xüsusi vurğulayır, onların yaradıcılığına hörmətlə yanaşır, ziyalıların normal fəaliyyəti üçün əlindən gələni edirdi. Keçirilən yubileylər, sərgilər, görüşlər, verilən fəxri adlar, ayrılan prezident təqaüdləri bu istiqamətdə atılan addımların bir qismidir…

Xətai rayonunun Ukrayna dairəsindəki Heydər Əliyev parkında yenə qələbəlik var idi. Dahi şəxsiyyət Heydər Əliyevin 90 illik yubileyi münasibətilə keçirilən silsilə tədbirlərdən biri Xətai Rayon İcra Hakimyyəti və Bakı şəhər Mədəniyyət və Turizm İdarəsi ilə birgə təşkil olunmuşdu.

İlk öncə tədbir iştirakçıları ulu öndərin abidəsi önünə gül dəstələri qoyub xatirəsini bir dəqiqəlik sükutla yad etdilər. Sonra rayonun mədəniyyət müəssisələrinin, musiqi məktəbləri, yaradıcılıq mərkəzinin təşkil etdiyi əl işləri, kitab sərgisi ilə tanışlıq başladı.

Xətai Rayon İcra Hakimiyyətinin başçısı Razim Məmmədov, Bakı şəhər mədəniyyət və turizm idarəsinin rəisi Əlikram Əliyev, rayon ictimaiyyətinin nümayəndələri Xətai rayonundakı 13 saylı musiqi məktəbinin şagirdi Nicat Allahverdiyevin ifasında “Qarabağ” mahnısını maraqla dinlədilər. Kiçik Nicatın məlahətli səsi, ifa tərzi hər kəsdə kövrək hisslər oyatdı.

Xətai rayonundakı Səməd Vurğun adına Mərkəzi Kitabxana Sisteminin təşkil etdiyi ümummilli lider Heydər Əliyevə həsr olunmuş kitablardan ibarət sərgi də böyük marağa səbəb oldu. “Zamana sığmayan ömür”, “Dahi şəxsiyyət, əbədiyaşar lider” və s. adlı stendlərdə nümayiş etdirilən ulu öndərin həyat və fəaliyyətini əks etdirən kitablar xalqımızın bu böyük oğluna sevginin açıq təcəssümü idi. Kitabxananın baş kitabxanaçısı Yeganə Quliyeva tədbirdə kitab sərgisinin təşkil edilməsinin təsadüfi olmadığını diqqətə çatdıraraq dedi ki, ümummilli liderimiz Heydər Əliyevin Azərbaycan tarixindəki rolu böyükdür. Ötən əsrin 50–ci illərindən başlayaraq bu gün Azərbaycan dövlətinin əsaslandığı milli dövlətçilik fəlsəfəsini, müstəqil yaşamaq haqqına sahib Azərbaycan xalqının inkişafı, tərəqqisi üçün zəruri olan istiqamətləri formalaşdırmış, müstəqil dövlətimizi qurub yaratmışdır. Ulu öndər mədəniyyətimizin hamisi idi, o, kitaba, mütaliəyə həmişə üstünlük verir, özünü həyatda qazandıqlarına görə kitablara borclu bilirdi.

Azərbaycan Rəssamlar İttifaqının üzvü, tikməçi–rəssam Mehriban Əliyeva–Xəlilzadənin parça üzərində ipək saplarla işlədiyi, təkalduz, Xovlu məxmərtel və c. tikmə növlərindən ibarət əl işləri onunla tanış olan hər kəsdə maraq oyatmaqla yanaşı, həmçinin bu qədim el sənətini yaşadanlara minnətdarlıq hissi aşılayırdı.

Rayonun İdman və Gənclər İdarəsinin rəhbərliyi ilə təşkil olunmuş ayrı–ayrı idman növləri üzrə nümunəvi çıxışlar, rəqs qruplarının milli rəqsləri, musiqi məktəbləri şagirdlərinin xor qrupunun bir–birindən maraqlı ifası yubiley tədbirinin iştirakçılarında xoş ovqat, yüksək əhvali–ruhiyyə yaradırdı.

Bütün bunlar isə milli–mənəvi dəyərlərimizin bu gün də qoruna–qoruna yaşandığının təsdiqi, ulu öndərimizin dönə–dönə təkrarladığı tövsiyələrinin əməldə öz təsdiqini tapmasının nümayişi idi. Bu bir daha onu göstərirdi ki, ulu öndər nəsillərin qəlbində öz əməlləri, ölməz ideyaları ilə daim yaşayacaqdır…

Zümrüd Qurbanqızı

Respublika.- 2013.- 1 may.- S. 9.