Dövlət Xəzər Dəniz Gəmiçiliyi işçilərinin təntənəli yığıncağı

Mayın 7–də Xəzər Dəniz gəmiçilərinin mədəniyyət sarayında ümummilli lider Heydər Əliyevin anadan olmasının 90 illiyi ilə əlaqədar təntənəli yığıncaq keçirilmişdir.

Gəmiçiliyin rəisi Aydın Bəşirov əvvəlcə ulu öndərin mədəniyyət sarayındakı büstü önünə tər gül çələngi qoydu. Sonra o, yığıncaq iştirakçılarını salamlayaraq tədbiri açıq elan etdi və dedi:

XX yüzillikdə xalqımız dahi bir şəxsiyyət yetirdi. O, dünyanın tarixi simaları sırasında öz layiqli yerini tutdu. Xalqına, vətəninə olan tükənməyən sonsuz sevgisi onu bütün dünyaya tanıtmışdır. Bu sevgi, məhəbbət 35 ildən artıq bir mərhələni əhatə edən, milli mənafeyi hər şeydən üstün tutan, böyük siyasi xadim, iqtisadi və siyasi müstəqilliyimizin banisi Heydər Əliyevin fəaliyyəti ilə bağlıdır.

Bütün varlığı ilə xalqın gələcək taleyini düşünən ulu öndər həmişə çalışırdı ki, respublikamız həm iqtisadi, həm də siyasi cəhətdən dünyanın ən inkişaf etmiş ölkələri sırasında olsun. A.Bəşirov çıxışında xüsusi olaraq qeyd etdi ki, ulu öndər ölkə iqtisadiyyatının çoxşaxəli şəkildə inkişaf etməsinə, onun müasir infrastrukturunun yaradılmasına və gücləndirilməsi işinə hələ sovetlər dövründə respublikaya rəhbər təyin olunandan sonra başlamışdı.

Ölkəmizin sənaye potensialının gücləndirilməsi, o cümlədən nəqliyyat şəbəkəsinin formalaşdırılması da elə həmin illərdə vüsət almışdır. Natiq yığıncaq iştirakçılarının diqqətinə çatdırdı ki, 1969–cu ildə Heydər Əliyev ölkə rəhbərliyinə təyin olunduqdan sonra onun həyata keçirdiyi tədbirlər sayəsində Xəzərdə acınacaqlı vəziyyətdə olan yük daşımalarında böyük canlanma baş verdi. Bundan sonra yeni gəmilər almaq üçün böyük imkanlar yarandı.

Hamınıza məlumdur ki, ulu öndərimiz ağır peşə sahibi olan dənizçilərimizin əməyini həmişə yüksək qiymətləndirmişdir. Məhz onun təşəbbüsü ilə ötən əsrin 70–80–ci illərində iyirmiyə yaxın dənizçi yüksək vəzifələrə irəli çəkilmişdir. Ulu öndərin dənizçilərə qayğısından danışarkən fəxrlə deyə bilərəm ki, 2003–cü ilin iyul ayında imzaladığı fərmanla dörd dənizçi “Şöhrət” ordeni ilə, 14–ü isə tərəqqi medalı ilə təltif olunmuşdur.

Gəmiçiliyin rəisi A.Bəşirov çıxışının sonunda bildirdi ki, bu gün iqtisadiyyatımızın önəmli sahəsi olan nəqliyyat donanmasına, dənizçilərimizə göstərdiyi diqqətə gəmiçiliyin son 40–45 illik tarixi fəaliyyətinə, varlığına görə xalqımızın böyük oğlu, ümummilli liderimiz Heydər Əliyevə minnətdarıq. Bütün bunlar deməyə əsas verir ki, Dövlət Xəzər Dəniz Gəmiçiliyi, qədirbilən dənizçilərimiz ulu öndər Heydər Əliyevin parlaq ideyalarının gerçəkləşməsində bundan sonra da daha əzmlə çalışacaqlar.

Sonra söz “Şuşa” tankerinin kapitanı Seymur Bayramova verildi.

S.Bayramov çıxışında bildirdi ki, ulu öndərin respublikamıza rəhbərlik etdiyi dövrlər tariximizə böyük siyasi dönüşlər və yeni mərhələlərin başlanğıcı kimi yazılıb.

Ümummilli liderin siyasi, iqtisadi, ictimai və mədəni həyatın bütün sahələrində həyata keçirdiyi planlar artıq gerçəkliyə çevrilmişdir.

Onun fəaliyyəti də, şəxsiyyəti də Azərbaycan tarixinin ayrılmaz bir hissəsini təşkil edir. S.Bayramov onu da vurğuladı ki, müstəqil Azərbaycanın iqtisadi yüksəlişinə, əhalinin güzəranının yaxşılaşdırılmasına və sosial problemlərin həllinə güclü təkan verən amillərdən ən başlıcası məhz ulu öndərin böyük bacarıq və uzaqgörənliklə həyata keçirdiyi iqtisadi islahatlardır. Respublikada aparılan ardıcıl və sistemli islahatların mühüm nəticələrindən biri də iqtisadiyyatın inkişaf etdirilməsi və əhalinin həyat səviyyəsinin yüksəldilməsi olmuşdur.

Ölkəmizin sosial–iqtisadi yüksəlişinə zəmin yaratmış “Əsrin müqaviləsi”nin imzalanması ilə əsası qoyulmuş bu uğur strategiyası Azərbaycanın çağdaş tarixinin ən şərəfli, parlaq səhifələrindən birini təşkil edir.

İndi mən böyük qürur və fərəh hissi keçirirəm. Çünki ümummilli lider Heydər Əliyevin adı bizim donanmamızda da əbədiləşib. Bu, böyük etimad, böyük məsuliyyətdir. Prezident Heydər Əliyev tankeri milli donammamızın flaqmanıdır. Təbii ki, belə bir donanmada çalışmaq hər bir dənizçi üçün şərəflidir. Bizə göstərilən etimadı öz işimizlə doğrultmağa çalışacaq, əzmlə, var gücümüzlə işləyəcəyik.

Azərbaycan Dövlət Xəzər Dəniz Gəmiçiliyinin baş dispetçeri Nəzakət Pənahova ümummilli liderimiz Heydər Əliyevin uzun illər keçsə də ürəklərdə əbədi yaşayacağından, dövlətimizin bugünkü mövcudluğunda ulu öndərin qətiyyət və iradə gücündən danışdı. N.Pənahova qeyd etdi ki, bütün sahələr üçün liderlərin hazırlanmasına və bu sırada qadınların olmasına ulu öndərimiz böyük önəm verirdi. Azərbaycan qadınının iradəsi, alicənablığı, ləyaqəti tarixən xalqımızın milli–mənəvi dəyərlər sisteminin formalaşmasında, cəmiyyətimizin həyatında böyük rol oynadığını nümunə göstərən dövlət başçımız qadınlarımızın cəmiyyətdəki rolunun artmasına çalışırdı.

Yüzlərlə azərbaycanlı məhz onun yaratdığı əlverişli şərait nəticəsində fərdi bacarıqlarını nümayiş etdirməyə, müxtəlif idarəetmə orqanlarında rəhbər vəzifələrdə çalışmağa müvəffəq olmuş, öz zəkaları, mənəvi keyfiyyətləri və işgüzarlıqları ilə cəmiyyətdə nüfuz və hörmət qazanmışdır. Çox fərəhli haldır ki, ulu öndərin müəyyən etdiyi siyasət möhtərəm Prezidentimiz İlham Əliyev tərəfindən uğurla davam etdirilir.

Kamal İBADOV

Respublika.-2013.-8 may.-S.9.