Azərbaycan Heydər Əliyev yolu ilə yeni zirvələrə doğru addımlayır

“Heydər Əliyev bütün ömrü boyu xalqına, vətəninə sədaqətlə xidmət etmişdir. Müasir Azərbaycanın tarixinin bütün səhifələrində, istər iqtisadiyyat, istər xarici siyasət, istər elm və mədəniyyətdə onun silinməz izlərini görürük. Ölkəmizin bugünkü uğurları, bugünkü nailiyyətləri, müstəqilliyimizin güclənməsi Heydər Əliyev yolunun, Heydər Əliyev azərbaycançılıq ideyasının davamıdır”.

İlham Əliyev,

Azərbaycan Respublikasının Prezidenti.

Xalqımız bugünkü nailiyyətləri əldə edənədək çətin, mürəkkəb, ancaq şərəfli bir yol keçmişdir. Tarixən bu yolda onun çoxsaylı bələdçiləri, sərkərdə və liderləri olmuş, onu öz milli ideallarına çatdırmaq üçün hünər və fədakarlıqlar göstərmişlər. XX–XXI əsrlərin qovuşuğunda Azərbaycanın gələcəyini müəyyən etmək, xalqı öz dühasının və qəlbinin işığı ilə azadlıq və müstəqillik yoluna çıxararaq bu yolda zəfərdən–zəfərə doğru addımlamağa ruhlandırmaq, bu yolda onun öndəri olmaq kimi qəhrəmanlıq missiyasını Uca Tanrı müqəddəs adı ilə hər zaman öyündüyümüz Heydər Əliyevə nəsib etmişdir.

Xalqa öndərlik, yola bələdçilik —həm ağıl, təcrübə, uzaqgörənlik, həm də böyük ürək, cəsarət, igidlik tələb edir. Məhz güclü və qüdrətli liderin olmaması səbəbindən xalqımız tarixin bəzi məqamlarında ciddi bəlalarla üzləşmiş, mərhumiyyət və itkilərə məruz qalmışdır. Heç uzağa getməyək: iyirminci əsrin son onilliyi başlarkən öz müstəqil dövlətçiliyini bərpa etmək imkanı qazanmış Azərbaycanın bu baxımdan hansı bəlalarla üzləşdiyini yada salaq. Nəhəng imperiyanın—İttifaq dövlətinin siyasi–ideoloji süqutu nəticəsində müstəqillik yoluna çıxmış xalqımız çox çətin vəziyyətdə qalmışdı. Həmin vaxt respublikanın əldən–ələ keçən rəhbərliyindəki milli inkişaf strategiyasına malik olmayan, gələcəyi görməyən, siyasi cəhətdən yetkinləşməmiş, idarəçiliyi bacarmayan şəxslər nəinki Azərbaycanın müstəqillik yoluna bələdçilik etmək iqtidarında deyildilər, üstəlik bu yolun əsasını qoymuş, bu yolda misilsiz fədakarlıqlar göstərmiş dahi şəxsiyyət Heydər Əliyevə qarşı bədxah mövqe tuturdular. Amma xalqımızın iradəsi, öz qəhrəman oğluna məhəbbəti, onu Azərbaycanın müstəqillik yolunun yenilməz öndəri və bələdçisi görmək istəyi qısa bir vaxtda tarixi haqq–ədaləti bərqərar etdi. Məhz Heydər Əliyev müstəqil dövlətimizi sabaha aparan çətin, mürəkkəb, kəşməkəşli, ancaq aydın, işıqlı yola çıxardı…

Tarixi haqq–ədalət bunda idi ki, hələ 1969–82–ci illərdə respublikaya rəhbərlik etdiyi, 1982–87–ci illərdə keçmiş İttifaq dövlətində ali vəzifə tutduğu dövrdə ulu öndər Heydər Əliyev Azərbaycanın gələcək müstəqilliyinin möhkəm bünövrəsini qoymuş, xalqımızın həyatının bütün sahələrində böyük tərəqqiyə, həmçinin milli şüurun oyanışına nail olmuşdu. Amma bu on səkkiz illik quruculuq, yaradıcılıq salnaməsinin hər səhifəsi ulu öndərimizin fitri təşkilatçılıq istedadı, müdrik və uzaqgörən siyasəti, misilsiz əmək şücaəti, qətiyyəti, cəsarəti, qəhrəmanlığı sayəsində yazılmışdır.

“Qətiyyətlə bildirmək olar ki, 60–cı illərdə respublika iqtisadiyyatı bütövlükdə dərin və uzunmüddətli böhran mərhələsinə qədəm qoymuşdu. Yaranmış ağır vəziyyətdən çıxış yolu tapılmalı, iqtisadiyyatın inkişafı üçün prinsipial cəhətdən yeni konseptual yanaşma yolları işlənib hazırlanmalı, xalq təsərrüfatında köklü struktur dəyişiklikləri aparılmalı, təsərrüfatçılıq və iqtisadi həvəsləndirmədə təzə metodlar tətbiq edilməli idi”. Bu sözləri ulu öndərimiz Azərbaycana ilk dəfə rəhbər seçildiyi dövrü və həmin dövrdə qarşıda duran vəzifələri səciyyələndirərkən demişdir. Sosial–iqtisadi durumuna və əhalisinin yaşayış səviyyəsinə görə keçmiş İttifaqın geridə qalmış respublikalarından sayılan Azərbaycanda rəhbərliyə Heydər Əliyev kimi xüsusi xidmət orqanında çox gərəkli iş təcrübəsi qazanmış, cəmiyyət həyatının ən dərin qatlarına və siyasi–ideoloji idarəçilik prinsiplərinə yaxşı bələd olan, cavan, təşəbbüskar, iradəli şəxsin seçilməsi xalqımıza Uca Tanrının ən böyük hədiyyəsi oldu. Bu, əsarətdə saxladığı millətlərin azadlıq arzusunu hər an boğmağa çalışan imperiya ilə qan yaddaşında müstəqillik ideyasını yaşadan xalqın istək və məqsədinin üst–üstə düşdüyü bəlkə də nadir, bənzəri olmayan bir hadisə idi. Azərbaycanda hakimiyyət sükanının millətini, xalqını tükənməz bir məhəbbətlə sevən və bu sevgini bər–bəzəkli sözlərlə, gəlişigözəl şüarlarla deyil, əməli fəaliyyəti, işi ilə əyani şəkildə sübuta yetirən güclü, xarizmatik bir şəxsiyyətin əlində olması çox tezliklə öz nəticəsini verdi.

Heydər Əliyev respublikanın iqtisadi strukturunda köklü dəyişiklik etmək, onu İttifaq dövlətinin xammal istehsalçısından müasir texnika və texnologiya ilə təchiz olunmuş sənaye bazasına çevirmək, aqrar sahəni dirçəltmək, neft mədənlərinin çirkləndirdiyi paytaxt Bakını təmiz, abad və yaşıllıqlarla əhatələnmiş gözəl bir şəhər kimi tanıtmaq, xalqın güzəranını yaxşılaşdırmaq, səhiyyəni, mədəniyyəti, təhsili sürətlə inkişaf etdirmək, ən başlıcası, milli–mənəvi ruhu yüksəltmək kimi titanik səy və misilsiz bacarıq tələb edən çox böyük vəzifələri cəsarətlə yerinə yetirdi.

Azərbaycana rəhbərliyinin birinci dövründə ulu öndərimizin apardığı vüsətli quruculuq işləri, sosial–mədəni islahatlar xalqımızın milli mənlik şüurunu oyatdı, totalitar rejimin təzyiqlərinə baxmayaraq, azərbaycançılıq məfkurəsinin bir milli ideologiyaya çevrilməsinə münbit zəmin yaratdı. Sovetlər Birliyində Heydər Əliyevin rəhbərliyi dövründə Azərbaycanın aparıcı mövqeyə çıxıb nüfuz qazanması hər bir soydaşımız üçün qürur mənbəyi oldu və ürəklərdə azadlıq, müstəqillik arzusunun baş qaldırmasına rəvac verdi. İstiqlal tariximizdən danışarkən bu faktorun nə qədər əhəmiyyətli olduğunu xüsusi qeyd etmək lazımdır. Məhz elə həmin vaxtdan Heydər Əliyev öz xalqının lideri, millət fədaisi və öndəri olduğunu əməli fəaliyyəti ilə göstərdi və Azərbaycanın gələcək müstəqilliyi üçün möhkəm bünövrə qoydu.

Təhlilçilər tarixi faktlar əsasında sübuta yetirmişlər ki, dünya sosializm sisteminin və İttifaq dövlətinin süqutu zamanı müttəfiq respublikalar arasında Azərbaycan öz iqtisadi potensialı ilə müstəqil yaşamağa qadir ola biləcək ikinci respublika idi. 1991–ci il oktyabrın 18–də Dövlət müstəqilliyi haqqında Konstitusiya Aktı qəbul olunarkən Azərbaycanın müstəqil bir dövlət kimi bütün maddi resursları vardı.

Heydər Əliyev İttifaq dövlətinin rəhbərliyində işlədiyi beş il ərzində dünya siyasətinin ən nüfuzlu nümayəndələri sırasında özünə möhkəm yer tutdu, vətənimizin və xalqımızın adını və şərəfini misilsiz bir yüksəkliyə qaldırdı. Bu, Azərbaycanın qüdrətli oğlunun tarixin yaddaşına əbədi yazılmış fatehlik manifesti idi. Böyük siyasətdə olmadığı və haqsız təqiblərə məruz qaldığı dövrdə belə Heydər Əliyevin adı təkcə öz xalqının deyil, keçmiş İttifaq hüdudlarında yaşayan yüzlərlə xalqın əfsanəvi qəhrəmanı, əsl xilaskarı kimi iftixarla çəkilirdi.

Doğma xalqının tükənməz sevgisini, məhəbbətini qazanmış, dünya siyasətinin görkəmli simalarından biri kimi böyük nüfuza malik Heydər Əliyevi İttifaq dövlətinin rəhbərliyində tutduğu yüksək vəzifədən uzaqlaşdırandan sonra ermənipərəst və imperiyaçı qüvvələr, onların başında duran Qorbaçov Azərbaycan torpaqlarını bölmək, parçalamaq niyyətlərini həyata keçirməyə çalışırdılar.

Möhtərəm Prezidentimiz cənab İlham Əliyev öz çıxışlarının birində həmin dövrü səciyyələndirərkən demişdir: “1987–ci ildə Heydər Əliyev Sovet İttifaqının siyasi rəhbərliyindən uzaqlaşdırılandan sonra Azərbaycanın problemləri başlamışdır. Ondan iki həftə sonra erməni lobbisi tərəfindən başlanmış kampaniya nəticəsində Dağlıq Qarabağı Azərbaycandan ayırıb Ermənistana birləşdirmək ideyası ortaya qoyulmuşdur. Bu ideya ətrafında Ermənistan və onun havadarları Azərbaycana qarşı işğalçı siyasətini başlamışdır. Heydər Əliyev amili, onun gücü imkan vermirdi ki, belə iddialar ortaya qoyulsun. Onun istefasından iki həftə sonra bu planlar reallaşmağa başlamışdır”.

1988–ci ilin fevralında Sumqayıtda erməni millətçiləri tərəfindən törədilən təxribat, azərbaycanlıların öz tarixi ərazilərindən qovulub çıxarılması, 1990–cı ilin yanvarında xalqımıza qarşı edilən amansız təcavüz, 1992–ci ildə Xocalıda soydaşlarımızın məruz qaldığı genosid, az sonra Şuşanın, Laçının, Kəlbəcərin işğal altına düşməsi və beləliklə, Dağlıq Qarabağ ilə Ermənistan arasında coğrafi bağlantının yaranması—bütün bunları və digər saysız–hesabsız bəlaları xalqımız məhz Heydər Əliyevin görünməmiş təzyiqlərlə siyasi hakimiyyətdən uzaqlaşdırılmasından sonra üzləşmişdir.

Ulu öndərimizin qanlı Yanvar faciəsi ilə bağlı verdiyi kəskin bəyanat artıq Azərbaycan tarixində yeni siyasi dövrün başlandığını bildirirdi. O, Kommunist Partiyası sıralarından çıxmasına dair ərizəsində kommunist rejiminin ölkəni uçuruma apardığını, SSRİ–nin dağılmasının labüdlüyünü açıq bəyan etmişdi. Ulu öndərimizin Azərbaycan parlamentindəki çıxışları, Naxçıvan Muxtar Respublikası Ali Məclisinin sədri olarkən qəbul etdiyi qərarlar və Naxçıvan Ali Məclisinin binası üzərində üçrəngli bayrağımızı ucaltması suverenliyin qazanılması istiqamətində atılmış ilk addımlardandır.

Xoşbəxtlikdən Azərbaycan xalqı müdriklik göstərərək 1993–cü ildə vətəndaş müharibəsi gedə–gedə ulu öndəri siyasi rəhbərliyə dəvət etmiş, gənc müstəqil dövləti düşdüyü böhrandan, ağır və çətin vəziyyətdən çıxarmaq üçün bütün ümidlərini ona bağlamışdır.

“Azərbaycan xalqının ümummilli lideri Heydər Əliyevin 90 illik yubileyi haqqında” Azərbaycan Respublikası Prezidentinin sərəncamında qeyd olunduğu kimi, dahi Heydər Əliyev şəxsiyyətinin Azərbaycan dövlətçilik tarixində müstəsna yeri vardır. Azərbaycançılıq məfkurəsinin parlaq daşıyıcısı kimi Heydər Əliyev öz müdrik siyasəti, dönməz əqidəsi və tarixi uzaqgörənliyi sayəsində milli dövlətçilik ideyasının gerçəkləşdirilməsinə, müasir Azərbaycan dövlətinin qurulmasına və xalqımızın müstəqillik arzusuna çatmasına nail olmuşdur. Məhz Heydər Əliyevin fəaliyyəti nəticəsində Azərbaycan özünün geostrateji, iqtisadi və mədəni potensialından istifadə edərək Şərqlə Qərb arasında etibarlı körpü rolunu oynamağa başlamış və dünyanın ən dinamik inkişaf edən ölkələrindən birinə çevrilmişdir.

Tənəzzülə uğrayan iqtisadiyyat, sürətlə artan inflyasiya, işsizlik, ümidsizlik mühiti və digər neqativ hallarla üz–üzə qalmış Azərbaycanı Heydər Əliyev qısa bir zamanda iqtisadi və mədəni yüksəliş yolu tutan, xarici sərmayələrə açıq olan və böyük beynəlxalq layihələrə qoşulan ölkəyə çevirə bildi.

Ulu öndərin müstəqil dövlətimizə rəhbərlik etdiyi on ildə Azərbaycanda bir neçə on illərin işi görüldü. Cəmiyyətimizin demokratikləşməsi prosesi başlandı, söz və mətubat azadlığı bərqərar oldu, azad iqtisadiyyatın təməli qoyuldu, sosial tərəqqi üçün əsaslar müəyyənləşdirildi, ən başlıcası, Qarabağ münaqişəsinin sülh yolu ilə və xalqımızın mənafeyinə uyğun həlli üçün şərait yarandı. Ulu öndərimizin qurduğu müasir, müstəqil Azərbaycan dövləti dünya birliyində öz yerini tutdu və mövqelərini möhkəmlətdi.

Heydər Əliyevin qurub–yaratdığı və bizə əmanət etdiyi müasir, müstəqil Azərbaycan indiki inkişaf səviyyəsinə gəlib çıxanadək çox çətin və mürəkkəb bir yol keçmişdir. Dövlət müstəqilliyinin bərpası ərəfəsində və istiqlaliyyətin qazanıldığı ilk illərdə ölkəmizin hansı bəlalarla üzləşdiyini xatırladıqca, bugünkü nailiyyətlərimizin hansı ağır zəhmət, hünər və cəsarət, müdriklik və uzaqgörənlik hesabına başa gəldiyini daha yaxşı dərk edirik. Heydər Əliyevin qurduğu dövlətin iqtisadi siyasəti əhalinin sosial müdafiəsini daim diqqət mərkəzində saxlamaqla sosial yönümü ilə səciyyələnirdi.

Ulu öndərimizin yaratdığı möhkəm təməl üzərində zəngin, qüdrətli və daim çiçəklənən bir dövlət qurmaq möhtərəm Prezidentimiz cənab İlham Əliyevin qətiyyət və ardıcıllıqla apardığı daxili və xarici siyasətin başlıca məqsədidir. Dəqiq işlənmiş, mükəmməl proqramlar əsasında həyata keçirilən islahatlar və genişmiqyaslı quruculuq işləri bu məqsədin gerçəkləşməsinə imkan verir.

Bu gün Azərbaycan nüfuzlu vətəndaş cəmiyyətinin əsaslarının qurulduğu, müxtəlif siyasi partiyaların sərbəst fəaliyyət göstərdiyi, yüzlərlə senzurasız qəzet və jurnalın nəşr olunduğu, eləcə də çox sayda özəl telekanalların yayımlandığı və internet şəbəkəsi istifadəçilərinin sayının sürətlə artdığı bir ölkədir.

Öz siyasi dühası ilə Azərbaycanın müasir simasını müəyyənləşdirən, xalqımızın taleyində silinməz izlər qoyan ulu öndər Heydər Əliyevin siyasəti nəticəsində əldə olunan misilsiz nailiyyətlər respublikamızın şəhər və rayonlarının daim yeniləşməsində və sürətlə modernləşməsində, iqtisadiyyat və elmdə, təhsil, mədəniyyət və səhiyyədə, eləcə də ictimai–siyasi həyatımızda parlaq şəkildə öz əksini tapmışdır.

Ölkə həyatının bütün sahələrində qazanılan mühüm nailiyyətlər xalqımızın yaşayış səviyyəsinin durmadan yüksəlməsinə, demokratik inkişafa, dövlətimizin regional lider kimi beynəlxalq aləmdə nüfuzunun artmasına xidmət edir.

Ulu öndərdən sonra müstəqil dövlətimizin sükanının etibarlı əllərdə olması xalqımızın ən ülvi arzusu idi və möhtərəm Prezident cənab İlham Əliyevin coşqun və vüsətli quruculuq fəaliyyətinin misilsiz bəhrələri bu arzuların doğrulduğunu aydın bir şəkildə göstərir. “Biz—ulu öndərin davamçıları elə etməliyik ki, onun siyasi xətti Azərbaycanda daim üstünlük təşkil etsin. Mən buna şübhə etmirəm. Son doqquz ilin təcrübəsi göstərir ki, biz bu siyasətə sadiqik. Heydər Əliyevin siyasi vəsiyyətinə sadiqik. Çünki 2003–cü ilin sonlarında o demişdir ki, mənim tərəfimdən başlanan işlərə mənim davamçılarım yekun vuracaqdır”—möhtərəm İlham Əliyevin bu sözləri ulu öndərin layiqli davamçılarının həyat manifestidir.

Azərbaycan Prezidenti vəzifəsində fəaliyyətə başlayarkən bəyan etdiyi ideya və məqsədləri uğurla gerçəkləşdirən möhtərəm İlham Əliyev qısa müddətdə sosial–iqtisadi inkişafın sürətləndirilməsinə nail olmuşdur. Ulu öndərin başladığı işlərin davam etdirilməsi, xüsusən, yeni neft strategiyasının həyata keçirilməsi və Bakı–Tbilisi–Ceyhan neft kəmərinin istismara verilməsi ölkəmizin qarşısında geniş inkişaf perspektivləri açmışdır. Dövlətimizin başçısı xalqın milli sərvəti olan neftdən əldə edilən gəlirlərin qeyri–neft sektorunun, sahibkarlığın və iqtisadiyyatın digər sahələrinin inkişafına, sosial problemlərinin həllinə, təhsil və mədəniyyətin yüksəlişinə, infrastruktur sahələrinin sürətlə yeniləşməsinə yönəltmişdir.

Möhtərəm Prezidentin təşəbbüsü və rəhbərliyi ilə işlənib hazırlanmış dövlət proqramlarının icrası bütün sahələrdə misilsiz bir canlanma, işgüzarlıq ovqatı yaratmışdır. Bu vüsətli quruculuq əhval–ruhiyyəsi yol–nəqliyyat kompleksində, xüsusilə də avtomobil nəqliyyatı və yolları sahəsində özünü xüsusilə aydın şəkildə göstərir.

“Yol olmayan yerdə inkişaf da yoxdur”,—deyən möhtərəm Prezidetimiz infrastruktur sahələrində, o cümlədən yol təsərrüfatında aparılan quruculuq işlərini ölkəmizin və onun regionlarının inkişafının birinci şərti kimi dəyərləndirir. Dövlətimizin başçısının təşəbbüsü və birbaşa rəhbərliyi ilə Azərbaycanı üç qonşu ölkə ilə birləşdirən magistral yolların tikintisi və bərpası sürətlə davam etdirilir. Üstəlik, daxili yolların yenidən qurulması sahəsində də fəal iş aparılır.

Respublikamızın şəhərlərini birləşdirəcək yeni yolların layihələri hazırlanır, paytaxtımızın yol–nəqliyyat infrastrukturu yeniləşdirilir və təkmilləşdirilir. Özü də möhtərəm Prezidentimizin tələbi ilə görülən bütün işlərin beynəlxalq standartlara cavab verməsi təmin olunur.

Nazirlər Kabinetinin 2012–ci ilin sosial–iqtisadi inkişafının yekunlarına və 2013–cü ildə qarşıda duran vəzifələrə həsr olunmuş iclasında möhtərəm Prezident cənab İlham Əliyev son illərdə yol infrastrukturunun yeniləşdirilməsi sahəsində çox işlər görüldüyünü vurğulayaraq demişdir: “…Magistral yollarımızı böyük dərəcədə bərpa edə bilmişik və yeni yollar salınıbdır. İndi bütün magistral yollarda işlər gedir və bu işlər artıq tamamlanır. Bununla bərabər, şəhərlərarası yolların çəkilişi də gedir. Bu sahəyə də bu il vəsait qoyulacaqdır. Biz artıq bir neçə ildir ki, kənd yollarının çəkilişi ilə çox ciddi məşğul olmağa başlamışıq. Bütün rayonlarda bu layihələr icra edilir. Bu layihələrin icrası rayonlardan gəlmiş sifarişlər, əhalidən gələn müraciətlər əsasında təşkil edilibdir. İlk növbədə, biz çalışmışıq ki, əhalinin ən çox məskunlaşdığı kəndlərimizi yeni yollarla təmin edək. Kəndlərarası yolların çəkilişi geniş vüsət almışdır. Keçən il bu məqsədlər üçün həm dövlət büdcəsindən, həm Prezidentin ehtiyat fondundan yüz milyon manatdan artıq vəsait ayrılmışdır. Bu il də bu məbləğ ondan az olmamalıdır. Çalışmalıyıq ki, yaxın illərdə bütün kənd yollarını tikək”.

2006–2015–ci illər ərzində respublika əhəmiyyətli 3578 kilometr, yerli əhəmiyyətli 5928 kilometr avtomobil yolunun yenidən qurulması və əsaslı təmiri, Bakı şəhərində nəqliyyat tıxaclarının aradan qaldırılması və əhaliyə göstərilən nəqliyyat xidmətlərinin səviyyəsinin yüksəldilməsi məqsədi ilə müxtəlif yol qovşaqlarında yol ötürücülərinin (körpülərin) və keçidlərinin tikintisi nəzərdə tutulmuşdur və hazırda bu işlər uğurla həyata keçirilməkdədir.

Təkcə ötən 2012–ci ildə ümumi istifadədə olan 537,2 kilometr avtomobil yolu tikilmiş və təmir olunmuşdur. Bundan da 134,6 kilometr respublika, 402,6 kilometr yerli əhəmiyyətli avtomobil yoludur. İl ərzində 25 körpü istismara verilmişdir. Yeni yolların və körpülərin açılış mərasimlərində möhtərəm Prezident cənab İlham Əliyevin şəxsən iştirak etməsi dövlətimizin başçısının bu sahəyə xüsusi diqqət və qayğısının, yol inşaatçılarının və istismarçılarının zəhmətinə verdiyi yüksək dəyərin bariz ifadəsidir.

Ulu öndərimiz Heydər Əliyev deyirdi: “Yol iqtisadi inkişafın əsas amillərindən biridir. Əgər müasir infrastruktur, yol olmasa, iqtisadiyyat inkişaf edə bilməz”. Bu gün Azərbaycan dövləti və onun qətiyyətli rəhbəri respublikada yolların inkişafı ilə bağlı məsələlərin həllinə daim böyük önəm verir. Bu gün ölkəmizin təkcə avtomobil yollarında görülmüş işlərə və sürətlə həyata keçirilən tikinti–quruculuq işlərinin həcminə və miqyasına nəzər yetirməklə Azərbaycan dövlətinin durmadan artan iqtisadi qüdrətini bütün möhtəşəmliyi ilə göz önünə gətirmək mümkündür. Dünya birliyini heyran qoyan, dostlarımızı sevindirən, düşmənlərimizi məyus edən bu misilsiz tərəqqiyə bizi ulu öndər Heydər Əliyevin dühası ilə işıqlanan, nurlanan milli birlik və inkişaf yolu çatdırmışdır. Bu yolda bizi bitib–tükənməyən uğurlar, nailiyyətlər gözləyir.

Cavid QURBANOV

Respublika.-2013.-8 may.-S.11.