BİLƏSUVAR: BOL MƏHSUL SUVARMADAN ASILIDIR

Torpaqların suvarılması və meliorasiyası sahəsində Prezident cənab İlham Əliyevin gördüyü tədbirlər son illər sistematik xarakter almışdır və bu, ulu öndər Heydər Əliyevin təməlini qoyduğu islahatlar sistemində mühüm yerlərdən birini tutur. Dövlət başçısının tədbirləri meliorasiya və suvarma işçilərinin də dərin razılığına səbəb olmuşdur.

Biləsuvar Suvarma Sistemləri İdarəsinin kollektivi bu sahədə öz işlərini müasir tələblər səviyyəsində qurmağa çalışır. Ölkənin ərzaq təhlükəsizliyinə layiqli töhfələr verən Suvarma İdarəsi 1963–cü ildə yaradılmışdır və onun əsas vəzifəsi əkin sahələrinin meliorativ cəhətdən yaxşılaşdırılmasını, sahələrin suvarma suyu ilə etibarlı şəkildə təminatını təşkil etməkdən ibarətdir.

Son illərdə rayonda torpaqların meliorativ cəhətdən yaxşılaşdırılması, münbitliyin artırılması, şoranlaşmanın qarşısının alınması və təsərrüfatların suvarma suyu ilə təminatının yüksəldilməsi istiqamətində xeyli iş görülmüş, təsirli tədbirlər həyata keçirilmişdir. Dövlət başçısının meliorasiya və suvarma işlərinə ciddi münasibəti işçilərin ruh yüksəkliyini xeyli artırmışdır və bu fəallığı indi hər yerdə, rayonun ən ucqar ərazilərində gecə–gündüz növbədə dayanan suçuların işində müşahidə etmək mümkündür. Kollektivin rəhbəri Ədalət Babayev uzun illərdir ki, burada çalışır, böyük iş təcrübəsi vardır. O, söhbət zamanı dedi:

– Ulu öndər Heydər Əliyevin meliorasiya və irriqasiya, suvarma obyektlərinin təşkili sahəsində islahatlarından sonra keçən dövr bizim kollektiv üçün həmişə uğurlu olmuşdur. Başqa cür ola da bilməz, kifayət qədər təcrübəmiz vardır, doğma işə öyrəncəliyik, üz–gözümüz torpağa öyrəşib.

Qeyd etmək istərdim ki, suvarma tədbirləri birbaşa kənd təsərrüfatı məhsulları istehsalının yüksəldilməsinə xidmət edir. Bu işdə meliorasiya və suvarma işçilərinin əməyi böyükdür, ən yaxşı göstəricilər məhz suvarmanın geniş tətbiq olunduğu sahələrdə əldə edilir. Mövcud su ehtiyatlarının idarə olunmasına və onlardan maksimum səmərə ilə istifadə edilməsinə, suvarma suyunun kifayət qədər verilməsinə xüsusi diqqət yetirilir, su itkiyə yol verilmədən sahələrə çatdırılır. Bu tədbirlər sayəsində rayonda aqrar bölmə sürətlə inkişaf edir, xüsusilə ərzaqlıq məhsul istehsalının artımında inkişaf templəri yüksəkdir.

Kollektivimiz suvarılan əkin sahələrinə xidmət edir. Burada 63 nasos stansiyası, xeyli hidrotexniki qurğu fasiləsiz fəaliyyətdədir. Son vaxtlar görülmüş ciddi tədbirlər sayəsində nasos aqreqatlarının hamısı saz hala gətirilmişdir. Hazırda bütün hidrotexniki qurğular, elektrik mühərrikləri işlək vəziyyətdədir.

Rayonda 2012–ci ildə 44129 hektar ərazidə əkinlərin mütəşəkkilliklə suvarılması üçün mühüm tədbirlər görülmüşdür. Bu ərazilərin 38909 hektarı dövriyyədə olan suvarılan torpaqlardır. Təsərrüfatlarda 18500 hektar taxıl, 4689 hektar pambıq, 2363 hektar bostan–tərəvəz, 1010 hektar günəbaxan, 9743 hektar yem bitkiləri, 404 hektarlıq nar bağı, habelə 2200 hektar həyətyanı sahə suvarmaya cəlb olunmuşdur. Əsas su mənbəyi olan Bəhramtəpə su qovşağından kifayət qədər su alınmış, taxıl sahələri 2,3 dəfə, pambıq əkinləri 3,5 dəfə, yem bitkiləri 3,7 dəfə, bostan–tərəvəz sahələri 4,5 dəfə, nar bağları 3,1 dəfə, həyətyanı sahələr 4,5 dəfə suvarılmışdır. Cari ildə isə 19078 hektar taxıl, 5783 hektar pambıq, 7992 hektar yem bitkiləri, 2446 hektar bostan–tərəvəz, 1006 hektar günəbaxan sahələri, nar bağları, həyətyanı sahələr bir neçə dəfə keyfiyyətlə suvarılmışdır.

Ərazilərdə yeni nasos stansiyaları tikilib istifadəyə verilmiş, 7 nasos stansiyası, 6 nasosxana binası bərpa edilmiş, dizellər quraşdırılmış, mövcud suvarma kanalları, habelə təsərrüfatlararası və təsərrüfatdaxili suvarma şəbəkəsi lildən təmizlənmiş, hidrotexniki qurğular əsaslı təmir olunmuşdur. Bu il isə daha 7 nasosxanada təmir–bərpa işləri aparmaq nəzərdə tutulmuşdur.

Əsas vəzifələrdən biri kollektor–drenaj şəbəkəsinin lildən təmizlənməsi, iş rejiminin daimi saxlanılmasından ibarətdir. Cari ildə qısa müddət ərzində xeyli ərazidə kompleks meliorasiya işləri başa çatdırılmış, həmin ərazilərdən keçən suvarma kanallarında 278 min kubmetr lildən təmizlənmə aparılmış, sistemə daxil olan hidrotexniki qurğular, nasos stansiyaları və aqreqatları, elektrik avadanlığı əsaslı və cari təmir olunmuşdur. Yüksək məhsuldarlıq əldə etməkdən ötrü şoran torpaqların yararlı vəziyyətə gətirilməsi üçün xeyli tədbir görülmüşdür və bu işdə podratçı təşkilatlarla yanaşı, Biləsuvar Suvarma Sistemləri İdarəsi də yaxından iştirak etmişdir. Gələcəkdə suvarma şəbəkəsi daha da genişləndiriləcək, yeni suvarma qurğuları quraşdırılacaqdır.

İşlərin görülməsini maşın və mexanizmlərsiz təsəvvür etmək mümkün deyildir. İdarədə maşın–texnika parkının komplektləşdirilməsinə diqqət gücləndirilmişdir. Ədalət Babayev bizə məlumat verdi ki, hazırda idarənin balansında 49 ədəd nəqliyyat vasitəsi, 32 maşın–mexanizm vardır. Müxtəlif qoşqular, müasir ekskavatorlar, kanalqazanlar, güclü buldozerlər, yük və minik avtomaşınları, digər texnika növbəli iş rejimi üzrə fəaliyyətdədir. İşçilər tədbirlərin yüksək səviyyədə və kənd əməkçilərinin arzusunca həyata keçirilməsində rayon rəhbərliyinin, Respublika Meliorasiya və Su Təsərrüfatı ASC–nin göstərdikləri daimi köməyi yüksək qiymətləndirirlər.

İdarənin rəhbəri vurğuladı ki, melioratorların sırasında ali və orta ixtisas, habelə müvafiq peşə təhsilli kadrlar yetərincədir. Onlar daim iş üstündədirlər, şərəfli suçu peşəsinin qədrini bilirlər, ümümi iş üçün əllərindən gələni əsirgəmirlər, suvarma işlərinin genişləndirilməsinin, yeni suvarma şəbəkələrinin yaradılmasının müasir şəraitdə mühüm əhəmiyyət kəsb etdiyini yaxşı dərk edərək bu sahədə həyata keçiriləcək tədbirlərdə fəal iştirak edirlər.

Hazırda son dərəcə məsul bir dövr, yəni yay mövsümü yaxınlaşır. Bu dövrdə meliorasiya kollektivinin qayğıları daha da artır. Mühüm hazırlıq işləri gedir. İşçilərin boş vaxtı, demək olar ki, yoxdur, növbəli iş sistemi tətbiq olunur. Buna əsaslanaraq qəti əminliklə deyə bilərəm ki, üzərimizə düşən vəzifələri uğurla həyata keçirəcək, sosial–iqtisadi inkişafa dair yeni Dövlət Proqramının yerinə yetirilməsinə layiqli töhfələr verəcək, meliorasiya tədbirlərini daha yüksək səviyyədə aparacaq, aqrar sahəni inkişaf etdirmək və əhalinin ərzaq məhsulları ilə təminatını daha da yaxşılaşdırmaq işinə daha böyük kömək göstərəcəyik.

Melioratorların fəaliyyəti ilə tanışlıq həm də göstərdi ki, görülmüş işlər son hədd deyildir, dövlət başçısının qarşıya qoyduğu məsul vəzifələr, rayon rəhbərliyinin hazırlayıb həyata keçirdiyi planların yerinə yetirilməsi ardıcıl olaraq davam etdirilməlidir. Onlar həmişə çalışırlar ki, torpaq üzərində hər cür əziyyətlərə qatlaşan insanlar su sarıdan narazı qalmasınlar. Bu yüksək fəallığa əsaslanaraq qəti əminliklə deyə bilərik ki, məhz belə də olacaq, suvarma işçiləri əl–ələ verib bütün çətinlikləri dəf edəcək, ölkəmizdə gedən quruculuq işlərinə sanballı kömək göstərəcək, doğma vətəni yeni–yeni əmək nailiyyətləri ilə sevindirəcəklər.

Sabir MUSTAFAYEV

Respublika.-2013.-24 may.-S.6.