Ümummilli lider Heydər
Əliyev müstəqil Azərbaycanın ilk
Konstitusiyasının müəllifidir
1917-ci ildə baş vermiş Oktyabr çevrilişindən sonra (köhnə anlamda Böyük Oktyabr Sosialist İnqilabı nəzərdə tutulur-İ.A.) Petroqrada gedə bilməyən Rusiyanın Müəssislər Məclisinə Azərbaycandan seçilmiş deputatlar 28 may 1918-ci ildə Tiflisdə Qafqaz canişininin iqamətgahında toplaşaraq Azərbaycanın idarə olunmasını öz üzərlərinə götürmək məqsədilə doktor Həsən bəy Ağayevin sədrliyi ilə Azərbaycan Milli İslam Şurasının yaradıldığını elan edirlər. Elə həmin gün bitərəf deputat Fətəli Xan Xoyski başda olmaqla Azərbaycan Xalq Cümhuriyyətinin ilk Müvəqqəti Hökuməti-Nazirlər Şurası yaradılır. Bu Şərqdə ilk parlamentli respublika idi.
Ümummilli lider Heydər Əliyev demişdir: “...Bu tarixi gün Azərbaycan xalqının həyatına böyük və əlamətdar hadisə kimi daxil olmuşdur. Şərqdə ilk demokratik dövlət quruluşunu yaratmış Azərbaycan Xalq Cümhuriyyəti istiqlaliyyətimizi elan edərək xalqımızın müstəqillik əzmini nümayiş etdirmişdir.
Azərbaycan Xalq Cümhuriyyəti ölkənin daxilində və xaricində yaranmış gərgin və mürəkkəb ictimai-siyasi şəraitdə fəaliyyət göstərmişdir. Bu dövlətin qısa bir müddətdə həyata keçirdiyi tədbirlər xalqımızın tarixində böyük iz buraxmışdır”.
Çox təəssüflər olsun ki, Azərbaycan Xalq Cümhuriyyəti cəmisi 23 ay yaşamışdır. Belə ki, 1920-ci il aprelin 27-dən 28-nə keçən gecə RSFSR beynəlxalq hüquq normalarını kobudcasına pozaraq müharibə elan etmədən öz silahlı qüvvələrini Azərbaycana yeritmiş, suveren Azərbaycan Xalq Cümhuriyyətinin ərazisini işğal etmiş, qanuni seçilmiş hakimiyyət orqanlarını zorakılıqla devirərək Azərbaycan xalqının çox böyük qurbanlar bahasına qazandığı müstəqilliyinə son qoymuşdur.
Fəaliyyəti dövründə Azərbaycan Cümhuriyyəti Parlamentinin müzakirəsinə 270-dən yuxarı qanun layihəsi çıxarılmışdır ki, onlardan da 230-a yaxın təsdiq edilmişdir. Lakin Azərbaycan Xalq Cümhuriyyəti dövründə müstəqil respublikanın Konstitusiyasını qəbul etmək mümkün olmamışdı. Ancaq Xalq Cümhuriyyəti hökuməti fəaliyyət göstərdiyi dövrdə Konstitusiya xarakteri daşıyan bir neçə aktlar, qərarlar qəbul etmiş və onların əsasında işləmişdir. Ona görə də onları, demək olar ki, müəyyən mənada Konstitusiya quruculuğunun başlanğıcı kimi qiymətləndirmək olar. Belə ki, Azərbaycan Xalq Cümhuriyyətinin Nazirlər Şurası 27 iyun 1918-ci ildə dövlət dili haqqında, 9 noyabr 1918-ci il tarixdə isə dövlətin zəruri atributu olan dövlət bayrağı (yaşıl, qırmızı və mavi rənglərdən, ağ aypara və səkkizbucaq ulduzdan ibarət olmuşdur) haqqında qərarlar qəbul etmişdir. Bu ondan irəli gəlirdi ki, həmin vaxtlar Azərbyacan Milli İslam Şurası buraxılmışdı və Parlament isə hələ təşkil olunmamışdı. Həmçinin həmin dövrdə qanunvericilik texnikası kifayət qədər inkişaf etmədiyindən dövlət dili, dövlət bayrağı haqqında qərarları hökumət qəbul etmişdir.
Azərbaycan xalqı yalnız 18 oktyabr 1991-ci ildə öz tarixi dövlət müstəqilliyini bərpa etdikdən sonra Konstitusiyasını qəbul etmək imkanı əldə etdi. Bundan sonra Konstitusiya layihəsini hazırlamaq üçün 2 komissiya yaradılmış, komissiyanın tərkibi genişləndirilsə də, həmin komissiyalar tərəfindən faktiki olaraq heç bir iş görülməmişdi.
Yalnız ümummilli lider Heydər Əliyevin 15 iyun 1993-cü ildə hakimiyyətə qayıdışından sonra konstitusiya quruculuğu sahəsində də böyük işlər görülmüşdür.
Ümummilli lider Heydər Əliyevin sədrliyilə layihəsi hazırlanmış və 12 noyabr 1995-ci ildə ümumxalq səsverməsi (referendum) yolu ilə müstəqil Azərbaycan dövlətinin ilk Konstitusiyasının qəbul edilməsi xalqımızın tarixində ən parlaq səhifələrdən biri olmuşdur.
Konstitusiya latın sözü olmaqla, “quruluş, təsisat” mənasını verir. Konstitusiya hər hansı ölkənin ictimai və iqtisadi quruluşunun əsasını, idarəetmə formasını və dövlət quruluşunun formasını, şəxsiyyətin hüquqi vəziyyətini, mərkəzdə və yerlərdə hakimiyyət və idarəetmə orqanlarının təşkili qaydasını və səlahiyyətini, ədalət mühakiməsinin, seçki sisteminin təşkilini, əsas prinsiplərini və digər bu kimi məsələləri müəyyənləşdirən ən yüksək hüquqi qüvvəyə malik qanundur.
Dövlətin əsaslarını, əsas insan və vətəndaş hüquqlarını, vəzifələrini, qanunvericilik, icra və məhkəmə hakimiyyətini, dövlət quruluşunu, mülkiyyət formalarını və dövlət həyatının digər bu kimi məsələlərini müəyyənləşdirən Konstitusiyanın qəbul edilməsi hər bir dövlətin həyatında mühüm ictimai-siyasi hadisədir.
12 noyabr 1995-ci ildə ümumxalq səsverməsi (referendum) yolu ilə müstəqil Azərbaycan dövlətinin ilk Konstitusiyasının qəbul edilməsi xalqımızın tarixində ən parlaq səhifələrdən biri olmuşdur.
Konstitusiyanın preambulasında (girişində-İ.A.)
bəyan edilir ki,
- Azərbaycan dövlətinin
müstəqilliyini, suverenliyini
və ərazi bütövlüyünü qorumaq;
- Konstitusiya çərçivəsində
demokratik quruluşa təminat vermək;
- vətəndaş cəmiyyətinin bərqərar
edilməsinə nail olaraq;
- xalqın iradəsinin
ifadəsi kimi, qanunların aliliyini təmin edən hüquqi, dünyəvi dövlət qurmaq;
- ədalətli iqtisadi və sosial qaydalara uyğun olaraq, hamının layiqli həyat səviyyəsini təmin etmək;
- ümumbəşəri dəyərlərə sadiq
olaraq bütün dünya xalqları ilə dostluq, sülh və əmin-amanlıq şəraitində
yaşamaq və bu məqsədlə qarşılıqlı fəaliyyət
göstərməkdir.
Azərbaycan Respublikası Konstitusiyasının
12-ci maddəsinin I hissəsində
göstərilir: “İnsan
və vətəndaş
hüquqlarının və
azadlıqlarının, Azərbaycan
Respublikasının vətəndaşlarına
layiqli həyat səviyyəsinin təmin
edilməsi dövlətin
ali məqsədidir”.
Təsadüfi deyildir ki, Konstitusiyanın
158 maddəsindən 48-i, başqa
sözlə, üçdə
biri insan və vətəndaş hüquqları və azadlıqlarına həsr
edilmişdir.
Müstəqil dövlətimizin ilk Konstitusiyasının 1-ci maddəsinin
I bəndində deyilir:
“Azərbaycan Respublikasında
dövlət hakimiyyətinin
yeganə mənbəyi
Azərbaycan xalqıdır”.
Konstitusiyanın 4-cü maddəsində göstərilir
ki, xalqın seçdiyi səlahiyyətli
nümayəndələrindən başqa heç kəsin xalqı təmsil etmək, xalqın adından danışmaq və xalqın adından müraciət etmək hüququ yoxdur.
Müstəqil Azərbaycan dövlətinin
ilk Konstitusiyası respublikamızın
əvvəlki, Sovet dövründə qəbul
edilmiş konstitusiyalardan
prinsipcə köklü
surətdə fərqlənir. Əlbəttə, bu tamamilə təbiidir. Belə ki, əvvəlki
konstitusiyalar sosializm quruluşunun konstitusiyaları
idi və əvvəlki konstitusiyalarda
sivil dövlət quruculuğunda əsas institut olan hakimiyyətin
bölgüsü prinsipindən
imtina edilmişdi.
Lakin yeni Konstitusiyada bu tarixi və
metodoloji səhv aradan qaldırılmış,
ilk dəfə dövlət
hakimiyyətin qanunverici,
icra və məhkəmə hakimiyyətindən
ibarət bölgüsü
aparılmışdır.
Azərbaycan Respublikası Konstitusiyasının
7-ci maddəsinin IV hissəsində
Konstitusiyanın müddəalarına
əsasən qanunvericilik,
icra və məhkəmə hakimiyyətlərinin
qarşılıqlı fəaliyyət
göstərdiyi və
öz səlahiyyətləri
çərçivəsində müstəqilliyi öz əksini tapıb.
Azərbaycan Respublikasının Konstitusiyası
Azərbaycan Respublikasında
ən yüksək hüquqi qüvvəyə
malikdir. Bu o deməkdir
ki, Konstitusiya ən yüksək hüquqi qüvvəyə
malik olmaqla, Azərbaycan Respublikasında
birbaşa hüquqi qüvvədədir və
bütün qanunvericilik
aktları Konstitusiyanın
müddəalarına uyğun
qəbul edilməlidir.
Lakin Konstitusiyaya da ehkam kimi baxmaq
olmaz və heç bir qanun doqma kimi
qəbul edilməməlidir.
Dünya təcrübəsi göstərir
ki, Konstitusiya bir qayda olaraq,
uzun müddət üçün qəbul olunur. Lakin həyatın
irəli sürdüyü
tələblər, ictimai-siyasi
münasibətlərin inkişafı
yeni-yeni məsələlərin
tənzimlənməsi üçün
hər bir qanunvericilikdə, o cümlədən
ölkəmizin ali qanunu olan Konstitusiyada da dəyişiklikləri zəruri edir.
Azərbaycan xalqının ümummilli
lideri Heydər Əliyevin “Azərbaycan Respublikasının Konstitusiyasında
dəyişikliklər edilməsi
məqsədi ilə ümumxalq səsverməsi
(referendum) keçirilməsi haqqında” 22 iyun 2002-ci il tarixli
fərmanı ilə
24 avqust 2002-cü il tarixdə keçirilmiş
referendum nəticəsində Konstitusiyanın 24 maddəsinə
38 əlavə və dəyişikliklər edilmişdir.
Ölkə başçısı cənab İlham Əliyev demişdir: “Azərbaycan artıq müasir ölkədir. Ancaq müasirləşmə prosesinin
limiti, hüdudları
yoxdur. Bu əbədi bir prosesdir. Bu gün
Azərbaycan demokratik ölkədir. Amma demokratiyanın
da sonu yoxdur.
Bu sonsuz bir
prosesdir. Biz növbəti illərdə
ölkəmizin müasirləşməsi
ilə bağlı əlavə tədbirlər
görəcəyik”.
Təsadüfi deyildir ki, Milli Məclisin 26 dekabr 2008-ci il
tarixdə “Azərbaycan
Respublikasının Konstitusiyasına
əlavələr və
dəyişikliklər edilməsinə
dair ümumxalq səsverməsinin (referendumun)
keçirilməsi haqqında”
qərar qəbul etmiş və 2009-cu il martın 18-nə referendum
keçirilmişdir.
Referendum aktına əsasən
Konstitusiyanın 29 maddəsinə
11 dəyişiklik, 39 əlavə
edilmişdir. Konstitusiyaya edilmiş 11 dəyişikliyin,
39 əlavənin, müvafiq
olaraq, 5 dəyişikliyi
və 22 əlavəsi
Konstitusiyanın III fəslinə-Əsas
insanvətəndaş hüquqları
və azadlıqları
fəslinə aid olmuşdur.
Hazırda müstəqil Azərbaycan
Respublikasının əsas
problemlərindən biri
Ermənistan-Azərbaycan, Dağlıq
Qarabağ münaqişəsinin
ədalətli həllidir. Belə
ki, Azərbaycan torpaqlarının 20 faizi bədnam qonşumuz Ermənistanın silahlı
qüvvələri tərəfındən
işğal olunmuş,
respublikamıza təxminən
60 milyard ABŞ dollarından
artıq məbləğində
ziyan dəymişdir.
Ümummilli lider Heydər Əliyev 15 iyun 1993-cü ildə hakimiyyətə qayıdışından sonra
bütün fəaliyyəti
boyu bu problemi
sülh yolu ilə, beynəlxalq hüquq normalarına uyğun ədalətli həllinə çalışmışdır. Lakin heç
kəsdən gizli deyildir ki, dünyada
ikili standartlar mövcuddur.
Əgər belə olmasaydı, dünyanın ən mötəbər qurumu olan Birləşmiş Millətlər Təşkilatı
Təhlükəsizlik Şurasının
işğal olunmuş
Azərbaycan ərazilərindən
işğalçı erməni
silahlı qüvvələrinin
dərhal çıxarılması
barədə 4 qətnaməsi
çoxdan icra olunardı.
Ümummilli lider Heydər Əliyev 15 iyun 1993-cü ildə ölkə rəhbərliyinə qayıdışından
sonra xaricə bütün səfərlərində
Qarabağ həqiqətlərini
bütün dünya ictimaiyyətinə olduğu
kimi çatdırmaq üçün var qüvvəsi ilə çalışmışdır. Ümummilli
lider bu səfərlərdə istər
dövlət başçıları
ilə, istərsə
də həmin ölkələrdə olan
Azərbaycan diasporunun
nümayəndələri ilə,
iş adamları ilə, qeyri-hökumət
təşkilatlarının nümayəndələri ilə
görüşlərində, bir sözlə, bütün auditoriyalarda xəritə ilə əyani surətdə Dağlıq Qarabağın
Azərbaycan Respublikasının
ayrılmaz tərkib hissəsi olması fikrini əsaslandırmış
və buna nail olmuşdu.
Ölkə başçısı cənab İlham Əliyev çıxışlarında
dəfələrlə bəyan
etmişdir ki, Dağlıq Qarabağ münaqişəsi yalnız
və yalnız Azərbaycanın ərazilərinin
bütövlüyü çərçivəsində
həll edilə bilər: “Dağlıq Qarabağ əzəli Azərbaycan torpağıdır
və biz Azərbaycanın
ərazi bütövlüyünün
bərpa olunması üçün bütün
səyləri göstərəcəyik.
Həm siyasi, həm diplomatik və lazım gələrsə,
hərbi üsullardan da istifadə etmək olar. Bu haqq bizdə
var. Beynəlxalq hüquq
bunu təmin edir”.
Azərbaycanın ayrılmaz hissəsi olan Dağlıq Qarabağın, beynəlxalq
hüquq normalarına
müvafiq olaraq dinc yolla erməni
işğalından azad
edilməsi mümkün
olmazsa, bu torpaqların silah gücünə azad edilməsi bizim təbii, ayrılmaz, konstitusion hüququmuzdur.
İlham ABBASOV,
Ədliyyə Nazirliyi ƏdliyyəAkademiyasının
prorektoru-hüquq
üzrə fəlsəfə doktoru,
Baş ədliyyə müşaviri, prokurorluğun
fəxri işçisi.
Respublika.-2013.- 8 noyabr.- S.4.