“İnklüziv təhsil:
nəzəriyyə və praktikanın vəhdəti”
AMİ-nin
Mingəçevir filialında inklüziv təhsilə həsr
olunmuş elmi-praktik konfransın mövzusu belə
adlanırdı. Məlumdur ki, hər bir insanın yetişməsində,
dünyagörüşünün artmasında, cəmiyyətə
yararlı fərd olmasında təhsilin böyük rolu var.
“Biz maddi dəyərlərimizi, iqtisadi potensialımızı
insan kapitalına çevirməliyik” müddəasını əsaslandıran
Azərbaycan Respublikasının Prezidenti cənab İlham
Əliyevin dediyi kimi, “təhsil əsri” elan edilən XXI əsrdə
yüksək intellektə malik insan kapitalının
formalaşması və güclü iqtisadiyyatın
qurulmasında təhsilin rolu hec vaxt indiki qədər aktual
olmamışdır. Təcrübə göstərir ki, hər
hansı bir dövlətin inkişafını təbii sərvətlərin
bolluğu deyil, bu sərvətlərin yüksək səviyyədə
insan kapitalına çevrilməsi təmin edir. Təhsil
sosial proseslərə təsir göstərən mühüm
faktorlardan biri kimi, şəxsiyyəti şərtləndirən
keyfiyyətlərin və dəyərlərin
formalaşmasına xidmət edir. Demokratik təhsil cəmiyyətin
bütün üzvlərinin – istər sağlam, istərsə
də sağlamlıq imkanları məhdud insanların bərabər
təhsil alma hüquqlarını təmin edir. Bu, cəmiyyətdə
sosial bərabərliyin qorunmasına şərait
yaratmış olur. Belə bir imkanı isə yalnız
inklüziv təhsil yarada bilər. Azərbaycan xalqının
ümummilli lideri Heydər Əliyevin hakimiyyətdə
olduğu bütün dövrlərdə ölkədə təhsil
dövlət siyasətinin prioritet istiqamətlərindən
biri olub və hazırda da Azərbaycan Respublikasının
Prezidenti, Heydər Əliyev siyasi məktəbinin layiqli
davamçısı cənab İlham Əliyevin diqqət mərkəzindədir.
Azərbaycan
təhsilinin dünya təhsil sisteminə inteqrasiyası bu sahədə
bir sıra mühüm addımların atılmasını
şərtləndirmişdir. Aparılan məqsədyönlü
islahatlar sırasında inklüziv təhsil sahəsində
görülən işləri uğurlu hesab etmək olar.
Sağlamlıq imkanları məhdud olan şəxslərin təhsili
demokratik cəmiyyətin vacib tələblərindən
biridir. Xüsusi təhsilin əsas məqsədi
sağlamlıq imkanları məhdud şəxslərə həyat
üçün zəruri olan bilik, bacarıq və vərdişlər
aşılamaq, onların cəmiyyətə
qovuşmalarını təmin etmək, özünə xidmət
bacarıqlarını formalaşdırmaq, yaradıcı əmək
fəaliyyətinə və ailə həyatına
hazırlamaqdan ibarətdir. Bunun üçün bir sıra
mühüm qərarlar qəbul edilmiş və qanunvericilik
bazası yaradılmışdır. Respublikamızda
müvafıq qanunvericilik bazasının yaradılması nəticəsində
“Xüsusi qayğıya ehtiyacı olan uşaqların təhsili”nin
təşkilinə əlverişli zəmin
yaradılmışdır. Belə ki, 2001-ci ilin iyulunda ulu
öndər Heydər Əliyev tərəfindən
imzalanmış “Sağlamlıq imkanları məhdud şəxslərin
təhsili (xüsusi təhsil) haqqında” Azərbaycan
Respublikasının Qanunu qəbul edilmişdir. Qanunda
xüsusi təhsil sahəsində dövlətin vəzifələri
müəyyənləşdirilmiş, sağlamlıq
imkanları məhdud uşaqların, onların valideynlərinin
və ya valideynlərini əvəz edən şəxslərin
xüsusi təhsil sahəsində hüquq və vəzifələri
öz əksini tapmış, xüsusi təhsilin təşkili
və idarə olunması təsbit olunmuşdur. Qanunun
icrasının təmin edilməsi məqsədilə Azərbaycan
Respublikası Nazirlər Kabineti tərəfindən müxtəlif
təyinatlı 9 qərar, o cümlədən “İnteqrasiya təlimli
təhsil müəssisələrində təhsilin təşkili
Qaydaları haqqında” qərar qəbul edilmişdir. Qaydalarda
təsbit olunduğu kimi, inteqrasiya təlimli təhsil müəssisəsi
sağlamlıq imkanları məhdud şəxslərin birgə
təhsil alması üçün xüsusi şərait
yaradılmış ümumtəhsil müəssisəsidir.
“İnklüziv
təhsil: nəzəriyyə və praktikanın vəhdəti”
mövzusunda keçirilən elmi-praktik kofrans inklüziv təhsil
sahəsində görülən işlərə bir daha diqqəti
yönəltmək və pedaqoji kadr hazırlığı ilə
məşğul olan ali təhsil müəssisələrində
bu təhsillə bağlı ortaya çıxan problemlərin
həlli yollarının araşdırılması məsələlərinə
həsr edilmişdir. Konfransda Azərbaycan Respublikası Təhsil
Nazirliyinin De-institutlaşma və Uşaqların Müdafiəsi
İdarəsinin rəis müavini Həbib Kərimov, Mingəçevir
Şəhər İcra Hakimiyyəti
başçısının I müavini İlham
İsmayılov, Mingəçevir Şəhər Təhsil
Şöbəsinin müdiri Sahib Əliyev, Mingəçevir
Politexnik İnstitutunun rektoru Akif Hacıyev, Mingəçevir
Şəhər Gənclər və İdman İdarəsinin
rəisi Kamal Nəcəfli, “Uşaq və ailələrə
dəstək mərkəzi”nin direktoru Aygün Fərruxova, həmin
mərkəzin eksperti Dilşad İlyasova, Mingəçevir
şəhərinin orta məktəblərinin direktorları və
uşaq bağçalarının müdirləri, Mingəçevir
şəhərinin ümumtəhsil orta məktəblərində
inklüziv təhsili həyata keçirən məktəb
müəllimləri, Goranboy rayonunda yerləşən mərkəzin
rəhbərliyi, həmçinin Ağcabədidə fəaliyyət
göstərən “Gün ərzi” qayğı mərkəzindən
nümayəndələr iştirak etmişlər.
Konfransı
giriş sözü ilə açan filialın direktoru dosent
Rasim Şükürov konfransın məqsədi haqqında
geniş məlumat verərək bildirdi ki, bir ölkənin təhsilinin
güclü olması, onun gələcəyinin uğuru deməkdir.
Bir millətin gələcəyi isə onun təhsilindən
asılıdır. Təhsil almaq hüququ ölkəmizdə
yaşayan bütün vətəndaşlara şamil olunur. Azərbaycan
Respublikasının Təhsil haqqında Qanununda qeyd olunur ki, cəmiyyətin
bütün üzvlərinin – istər sağlam, istərsə
də sağlamlıq imkanları məhdud insanların bərabər
təhsil alma hüquqları vardır. Əsası
ümummilli lider Heydər Əliyev tərəfindən qoyulan
təhsil siyasətində bütün vətəndaşlarımıza
bərabər imkanlar yaradılmışdır.
İnklüziv təhsil sahəsində son illərdə
aparılan məqsədyönlü işlər, qəbul edilən
qərarlar bu sahədə böyük nailiyyətlər əldə
etməyə imkan vermişdir. Söz yoxdur ki, bütün bu
uğurlar ölkə başçısı cənab Prezident
İlham Əliyevin təhsilə, xüsusilə
sağlamlıq imkanları məhdud olan insanların təhsilinə
göstərdiyi qayğının nəticəsində
mümkün olmuşdur. Azərbaycan Müəllimlər
İnstitutunda İnklüziv Təhsil Mərkəzinin
yaradılması məhz həyata keçirilən uğurlu tədbirlərdən
biridir.
Sonra
məruzələr dinlənilmişdir. Filialın “İctimai
və təbiət fənləri” kafedrasının müdiri,
dosent Zenfıra Əzizova “Xüsusi qayğıya ehtiyacı
olan uşaqların cəmiyyətə inteqrasiyası” ,
Müasir Təhsil-Tədrisə Yardımı Mərkəzinin
eksperti Dilşad İlyasova “Uşaq və Ailələrə Dəstək
Mərkəzində inklüziv təhsilin təşkili”, Mingəçevir
şəhər 6 nömrəli məktəbin köməkçi-müəllimi
İlahə Məhərrəmova “Orta məktəbdə
inklüziv təhsilin təşkili”, Uşaq və Ailələrə
Dəstək Mərkəzinin tərbiyəçisi Vəfa
Abdullayeva “Azərbaycanda fəaliyyət göstərən
Uşaq və Ailələrə Dəstək mərkəzlərinin
problemli ailələrin həyatında rolu” mövzularında
çıxış etmişlər.
Məruzələrdən
sonra çıxış adənlər konfransın aktual bir
mövzuya həsr edildiyini bildirərək, bu cür tədbirlərin
keçirilməsini təqdir etmişlər. Mingəçevir
şəhər Uşaq və ailələrə dəstək
mərkəzinin məzunlarının və onların valideynlərinin
çıxışları isə daha yaddaqalan olmuşdur.
Plenar iclasdan sonra konfrans isrirakçıları
sağlamlıq imkanları məhdud olan uşaqların əl
işlərindən ibarət sərgiyə baxdırlar. Sərgi
tədbir iştirakçılarında xoş ovqat yaratdı.
Həqiqət Qədimova,
AMİ Mingəçevir
filialının filologiya və təhsildə psixoloji xidmət
fakültəsinin dekanı, dosent.
Respublika.- 2015.- 7 yanvar.- S. 3.