Mərcanlı elinə həsr olunan yeni kitab

Həsən Təhməzlinin oxuculara təqdim edilən nəfis tərtibatlı yeni kitabı - “Mərcanlılar (İsmayıl uşağı tayfası)” böyük zəhmət və axtarışlar sayəsində işıq üzü görüb. Kitabda müəllifin doğulub boya-başa çatdığı, lakin bu gün isti yuvasından didərgin düşdüyü doğma el-obasına sonsuz sevgisi öz əksini tapıb.

Mərcanlı elinin tarixi keçmişindən, Mərcanlı toponiminin mənasından, tanınmış el adamlarından, mərcanlıların yayılma arealından söhbət açılan nəşrdə bir sıra elm və mədəniyyət xadimlərinin də maraqlı məlumatları yer alıb. Kitabda mərcanlıların qonaqpərvərliyi, mərdliyi, zəhmətsevərliyi xüsusi olaraq diqqətə çatdırılır.

Kitabı hazırlayarkən müəllif bir məqamı da önə çəkib. Bu, gəncliyə ötürülməli, aşılanmalı olan vətənpərvərlik hissidir. Həsən Təhməzli bu işin də öhdəsindən layiqincə gəlib. Belə ki, kitabda Mərcanlı elinin yetirməsi, Azərbaycanın Milli Qəhrəmanı Kazım Ərşad oğlu Məmmədovun Qarabağ döyüşlərində göstərdiyi misilsiz rəşadət və qəhrəmanlıq, döyüşçü dostlarının onun haqqında gənclərə əsl örnək ola biləcək xatirələri əksini tapıb.

Kitab müəllifin bu sözləri ilə açılır: “Mən mərcanlılar haqqında düşünəndə yadıma tarixin ən qədim qatlarında yaşamış bir qövm haqqında deyilmiş müdrik bir deyim düşür: “Əgər tarixdə yaşamaq haqqı qazanmaq istəyirsənsə, fədakar olmalısan”.72 yaşlı müəllifi Vətən, torpaq, yurd sevgisindən yazmağa vadar edən də məhz fədakarlıq duyğusudur. Çünki bu sanballı kitab asanlıqla araya-ərsəyə gəlməyib. Qələmini həm nəsrdə, həm də nəzmdə sınayan və ixtisasca ingilis dili müəllimi olan Həsən Təhməzlinin mənalı ömür yolu onun doğma Vətəninə sonsuz sevgisindən xəbər verir.Əvvəlki əsərlərində olduğu kimi, “Mərcanlılar”da da müəllif böyük elat camaatı olan mərcanlıların keçmişindən, həyat və yaşayış tərzindən, insanlarından, dəyanət və cəngavərliyindən söz açaraq yazır: “Mərcanlıların uzunömürlülüyü, mübarizliyi, dözümlülüyü, inadkarlığı da, heç şübhəsiz, onların genləri, qanları ilə bağlıdır”.

İki hissədən və 400 səhifədən ibarət olan kitabda bu yurdla bağlı fotoşəkillər də yer alıb.

Nəsillər dəyişəcək, insanların belə kitablara hər zaman ehtiyacı olacaq. Həsən Təhməzlinin gördüyü bu iş bütün zamanlarda öz aktuallığını saxlayacaq və tədqiqatçıların araşdırmalarında istinad mənbəyi olacaq. İnanırıq ki, müəllif bundan sonra da dəyərli əsərləri ilə tariximizin qaranlıq səhifələrinə işıq saçacaq və etnik-milli keçmişimizlə bağlı yeni dəyərli əsərlərlə oxucuların görüşünə gələcək.

Ülvü QARAYEV

Respublika.- 2018.- 19 yanvar.- S.6.