Nəsillərə nümunə
Azərbaycanın ictimai-siyasi həyatında
xüsusi rol oynamış, bacarığı və intellektual
səviyyəsi ilə diqqət mərkəzində durmuş
görkəmli ictimai xadim Bəndalı Əbdülhüseyn
oğlu Mehdiyev əslən Bakının Türkan kəndindəndir.
Sonralar atası Əbdülhüseyn kişi Keşləyə
köçmüş, Səkinə adlı bir qızla həyat
qurmuş və onların bu izdivacdan iki oğlan övladı
dünyaya gəlmişdir.
Keşlə kəndinin əsl adı
Qışladır. Deyildiyinə görə Bakı
xanlarının qaramalı, atları və qoyun-quzu
sürüləri burada saxlanılırdı. Bakı
xanları sürülərinə baş çəkmək
üçün tez-tez buralara gələrdilər. Keşlənin
də görünür əvvəlki “Qışla” adı
buradan götürülmüşdür. Bunun nəticəsi
idi ki, bir kəsi tələsən görəndə el
arasında deyərdilər: “Haraya tələsirsən,
Keşləyə xan gəlir?” Sonralar burada insanlar daimi məskunlaşmağa
başlamış, nəticədə də böyük və
sürətlə inkişaf etmiş bir qəsəbəyə
çevrilmişdi. Qəsəbədə XVII əsrdə
inşa edilmiş məscid tarixi bir abidə kimi qorunub
saxlanmaqdadır.
Bəndalı Mehdiyev 1899-cu il may ayında neft
Bakısında, fəhlə ailəsində dünyaya göz
açıb. Dörd nəfərdən ibarət
olan bir ailənin ağırlığı yalnız atası
Əbdülhüseyn kişinin çiyinlərinə
düşmüşdü. O da bu ailənin
yaşayışını təmin etməkdən
ötrü gecə-gündüz işləməli olurdu.
Əbdülhüseyn kişi Bakının karxanasında
fəhlə işləməklə yanaşı, bənnalıqla
da məşğul olardı. Zəhmətkeş, halal insan
olduğuna görə o, Bakı və ətraf kəndlərdə
gözəl bir usta kimi də ad qazanmışdır. Bunun nəticəsi
idi ki, bir çoxları, xüsusilə də kəndin
kasıb təbəqəsi bənnalıq işlərini ona
gördürərdi. O bu qazancdan bir hissəsini
ailəsinə, bir hissəsini isə kasıblara, uşaq evlərinə
paylayardı. O “əl tutmaq Əlidən qalıb” ifadəsini
tez-tez işlədər və bu sözlərə əməl
etməyi ömrünün sonuna qədər hamıya
tövsiyə edərdi. Əbdülhüseyn kişi zəhmət haqqını sifarişçinin
yaşayış tərzinə uyğun razılaşardı.
Bunun nəticəsi idi ki, Əbdülhüseyn kişinin
müştəriləri çox olardı. O,
ömrünün son gününə qədər öz
peşəsindən ayrılmamışdı.
Əbdülhüseyn kişi keçən əsrin ikinci
qərinəsinin başlanğıcında
dünyasını dəyişir. Bəndalı müəllim
də məhz belə zəhmətkeş kişinin ailəsində
dünyaya göz açmışdı...
XIX əsrdən indiyə qədər Bakı
öz nefti ilə bir çox dövlətlərin yuxusuna haram
qatıb. Həmin illərdə əksər xarici dövlətlərin
şirkətləri yenicə dirçəlməkdə olan bu
“qara qızılı” istismar etməyə cəhd edirdilər.
Məhz bunun nəticəsi idi ki, Bakıya gələn bir
çox xarici dövlətlərin şirkətləri Azərbaycanın
bu qiymətli sərvətini hərisliklə xaricə
daşıyırdılar. Hələ XIX əsrin sonlarına
qədər Bakıdakı neft mədənlərini və
zavodlarını ələ keçirmək üçün
onlarla ingilis kapitalistləri bura gəlmişdilər. Hətta
Amerikanın məşhur milyonçuları da bura maraq
göstərdiyindən öz nümayəndələrini Bakıya
yollamışdılar. Bunların arasında xarici şirkətlərdən
ən güclüsü İsveçdən gəlmiş,
vaxtilə Rusiyada zavod açıb silah istehsalı ilə məşğul
olan Nobel qardaşları olmuşdur. Yazılanlara inansaq Nobel
qardaşlarının “Nobel” adlı şəxsi şirkətində
otuz minə qədər insan işləyirmiş.
1917-ci ildə Bakının Qara şəhər
deyilən yerində Nobel qardaşlarına məxsus şəxsi
müəssisəsində Bəndalı Mehdiyev iki il fəhlə
işləyib. Ağır iş şəraiti orada
çalışanların əksəriyyətini müxtəlif
xəstəliklərə düşməsinə səbəb
olurdu. Məhz bunun nəticəsi idi ki, 1919-cu ilin aprelindən
1920-ci ilin may ayına qədər ağır şəraitdə
işləyən Bəndalı Mehdiyev yatalaq xəstəliyinə
tutulur. Bu ağır xəstəlikdən
qalxandan bir müddət işsiz qalsa da, lakin gənclər
arasında öz mədəniyyəti, alicənablığı,
işgüzarlığı ilə seçilən B.Mehdiyev
yeni yaranmış hökumət nümayəndəsinin diqqətini
cəlb etmiş və onun göndərişi ilə Keşlə
kəndində Mənzil İstismar Sahəsinə müdir təyin
edilmişdir.
Qeyd edək ki, 1922-23-cü illərdə
ölkədə yeni yaranmış hökumətə
qarşı etiraz edənlər olsa da, lakin onlara rəğbət
bəsləyənlər də tapılırdı.
Bolşeviklər özlərini “fəhlə-kəndli”
hökuməti olduğunu bəyan etdirməklə kasıb
xalqın nümayəndələrinin qəlbinə yol
tapmağa müvəffəq olmuşdular. Onlar nəyin
bahasına olur-olsun xalqın etimadını doğrultmağa
çalışır, özbaşınalığın,
qisasçılığın qarşısını
almağa səy göstərirdilər. Lakin yeni hökumət
nümayəndələrinin arasında öz şəxsi
qisasçılığını yaddan çıxarmayanlar
da tapılırdı. Nəticədə xalqın nümayəndələri
arasında narazılıqlar əmələ gəlirdi. Həmin narazılıqların nəticəsi idi ki,
nəinki kapitalistlərin şirkətində işləyən
fəhlə və qulluqçular, hətta şair Əhməd
Cavad, yazıçı Seyid Hüseyn Sadıqzadə, dramaturq
Cəfər Cabbarlı kimi böyük sənətkarlar da
nahaqdan həbs edilmişdilər. Həmin
qarmaqarışıqlıq vaxtlarda hər bir insan təsadüfən
də olsa haqsızlıqlarla üzləşirdi. Bu
özbaşınalığın “tamını dadan” B.Mehdiyev
həbs olunmasa da, bir müddət işsiz qalmış,
sonralar “Caparidze” zavodunda (sonralar Ə.Qarayev adına zavodla birləşib,
indiki Azneftyağ) fəhlə, rektifikator işinə cəlb
edilmişdir.
Öz bacarığı, işinin öhdəsindən
vicdanla gələn, qoyulan planları artıqlaması ilə
yerinə yetirən, bilik-bacarığı ilə
yoldaşlarından seçilən B.Mehdiyev 1930-cu ildə
“Andreyev” adına zavoda növbətçi mühəndis vəzifəsinə
təyin olunur. Beş ay burada işlədikdən sonra
vaxtaşırı yeni səmərələşdirici təkliflərinə
görə zavodun rəhbərliyinin diqqətini cəlb edir və
onun ixtisasını artırmaq üçün Amerika Birləşmiş
Ştatlarına ezam edilməsi məsləhət bilinir. Qeyd
edək ki, burada keçirilən kurslar tam məxfi xarakterli
olduğu üçün oradakı məruzələri
yazmağa və çəkilmiş çertyojların
üzünü çıxarmağa qəti qadağa
qoyulmuşdu. B.Mehdiyev güclü qavramaq qabiliyyətinə
malik olduğu üçün həmin sənədləri
özü ilə “gətirməyə” nail olur. Altı
aylıq ezamiyyətdən sonra o zavodda sex rəisi köməkçisi
vəzifəsinə təyin olunur.
1936-1937-ci illərdə B.Mehdiyev S.M.Kirov
adına Azərbaycan Sənaye Akademiyasında təhsil
alır və oranı müvəffəqiyyətlə bitirdikdən
sonra işlədiyi zavodda mühəndis-təşkilatçı
vəzifəsinə irəli çəkilir.
1937-ci ilin noyabr ayında artıq
B.Mehdiyevin bilik və bacarığının nəticəsi
idi ki, ona yüksək vəzifələri etimad göstərdilər.
İlk ciddi etimad “Stalin”
adına zavoda direktor müavini, on ay sonra isə “Caparidze”
adına zavoda direktor təyin olunması idi. İşinin
öhdəsindən bacarıqla gələn B.Mehdiyev Azərbaycan
Kommunist (bolşeviklər) Partiyası Mərkəzi Komitəsinin
katibi Mir Cəfər Bağırovun diqqətini cəlb edir.
O,
1940-cı ilin fevral ayında respublika rəhbərinin təklifi
ilə Şaumyan (indiki Xətai) rayonuna ikinci katib vəzifəsinə
təyin edilir. Lakin bir neçə ay sonra “xüsusi
adamların” səyi nəticəsində rayonda yerləşən
61 saylı məktəbdə təlim-tərbiyə işinin
guya zəif olması və vaxtında tədbir görülmədiyi
əsas gətirilərək Şaumyan (indiki Xətai) rayon
partiya komitəsinin II katibi B.Mehdiyevə xəbərdarlıq
edilməsi üçün həmin rayon Kommunist (bolşeviklər)
Partiyası Mərkəzi Komitəsi qarşısında məsələ
qaldırılır. Sual olunur məktəbin
direktoru, rayon və Bakı şəhər təhsil
şöbəsinin müdirləri, o məktəbə təhkim
olunan təhsil idarələrinin inspektorları olduğu halda
rayon partiya komitəsinin II katibinə belə qərar
çıxarmaq nə qədər düzgün idi. Qərarda
göstərilir ki, əmək intizamını pozduğuna,
Bakı şəhər Kommunist (bolşeviklər) Partiyası
Mərkəzi Komitəsinin iyul plenumunun qərarlarını
vaxtında yerinə yetirmədiyinə və kommunistlərin
işdən yayınmalarına qarşı liberallıq
göstərdiyinə görə B.Mehdiyevə xəbərdarlıq
elan edilsin.
Maraqlıdır həmin vəzifədə bir neçə
ay fəaliyyət göstərən katibə qarşı
haqsızlıq haradan “qidalanırdı?”
SSRİ Böyük Vətən müharibəsi ərəfəsində
idi. Stalinə aydın idi ki, artıq müharibə
qaçılmazdır. Ona görə
bütün müttəfiq respublikaların müharibəyə
hazırlanması üçün göstərişlər
verilmişdi. Xüsusilə Azərbaycan
diqqət mərkəzində idi. Onun
üzərinə çox böyük və ağır vəzifələr
düşürdü. Müharibə
dövrlərində cəbhəni yanacaqla təmin etmək məhz
bu respublikanın neft sənayesində çalışan
insanların üzərinə düşürdü. Bu çox böyük bir məsuliyyət tələb
edirdi. Neft sənayesinin
inkişafını artırmaq, cəbhəni “qara
qızılla” təmin etməkdən ötrü ilk növbədə
bu sahəyə təcrübəli, səriştəli rəhbər
işçi cəlb edilməli idi. Bu sahəni
idarə etmək üçün Azərbaycan Respublikası
Bakı şəhər Kommunist (bolşeviklər)
Partiyasına katib vəzifəsinə təyin etmək
üçün respublikanın rəhbərinə o qədər
də vaxt lazım olmadı. Həmin çətin,
ağır sahənin idarə olunmasını müəyyən
etmək üçün o, vaxtilə Azərbaycan K(b)P MK tərəfindən
“xəbərdarlıq” almış B.Mehdiyevin adının
üzərində dayandı və onun bu vəzifənin
öhdəsindən gələcəyini əminliklə
bildirdi. Çünki M.C.Bağırova
yaxşı məlum idi ki, B.Mehdiyevin “xəbərdarlığı”
üçün “canfəşanlıq” edən həmin vəzifədə
çalışmış erməni əsilli katib imiş.
Ona görə də respublikanın rəhbəri
əminliklə B.Mehdiyevi qeyd-şərtsiz namizəd kimi təqdim
edəndə büro bu təklifi yekdilliklə qəbul edir.
Müharibə dövrlərində bütün
respublikalarda olduğu kimi Azərbaycanda da “hər şey vətən
üçün, hər şey cəbhə üçün”
şüarı hər bir insanı yaxşı işləməyə
ruhlandırırdı. Məhz bunun nəticəsi idi ki, Bəndalı
müəllim bu məsuliyyətli vəzifəyə təyin
olunandan sonra onun rəhbərliyi altında cəbhənin
yanacağının 80 faizini Azərbaycan verməyə
başladı.
Unutmaq olmaz ki, M.C.Bağırovun etimadını qazanmaq
heç də asan məsələ deyildi. Uzun müddət
vicdanla işləyən mütəxəssisin hər hansı
bir səhvinin M.C.Bağırov tərəfindən
bağışlanması mümkün deyildi. Buna görə də bu dövrlərdə işləmək,
tez bir zamanda inam qazanmaq hər bir insandan şücaət və
məsuliyyət tələb edirdi.
B.Mehdiyevin
ali təhsil alandan sonra ən çox
çalışdığı iş yeri Bakı şəhər
partiya komitəsində neft emalı üzrə katib vəzifəsi
olub. O bu vəzifədə üç ildən çox
işləyib. Bu illər ərzində Bəndalı
müəllimin tez-tez daha yüksək vəzifələrə
keçməsinə əsas səbəb, bacarığı,
intellektual səviyyəyə malik olması, insanlara
qayğı göstərməsi ilə yanaşı, onlara
qarşı həm də tələbkarlığı idi.
Sadə insanlar ona müraciət etməkdən,
ağır, çətin vəziyyətlərini onunla
bölüşməkdən çəkinmirdilər. Bəndalı müəllim də onlara qayğı
ilə yanaşır, istəklərini yerinə yetirmək
üçün əlindən gələni əsirgəmirdi.
Çox zaman məvacibi az olan
işçilərə müəyyən yollarla mükafatlar
da ayırardı. Bəndalı müəllimin
yanına gələn işçilər heç zaman
naümid yola salınmazdı. İstəklərini
yerinə yetirmək imkanı olmayanda şirin və məzəli
sözləri ilə onları ovundurmağa
çalışardı.
Nəql edirlər ki, bir gün Bakıda keçirilən
nümayişdə Azərbaycanın Mərkəzi Komitəsinin
katibi Mir Cəfər Bağırov tribunaya çıxıb zəhmətkeşləri
salamlayırdı. Həmin salamlayanlar arasında Bəndalı
Mehdiyev də var imiş. Bu zaman Quba zəhmətkeşləri
tribunanın önündən keçəndə Bəndalı
müəllim üzünü M.C.Bağırova tutub “Qubadan gələnlərdir”
deyir. Katib heç nə demir. Bu zaman
Bakının Keşlə qəsəbəsindən gələn
zəhmətkeşlər tribunanın önündən
keçəndə M.C.Bağırov Bəndalı müəllimin
Keşlə qəsəbəsindən olduğunu bildiyi
üçün üzünü ona tutub özünəməxsus
yumorla “keşləlilərdir ha...” deyib gülümsəyir.
Vətən müharibəsi illərində SSRİ (MDB)
məkanını təmsil etmək üçün
İranın Ərdəbil şəhərində olan
konsulluğa katib vəzifəsində işləmək
üçün Moskvadan Azərbaycanın rəhbərinə
müraciət edilir. O illərdə ictimai-siyasi vəziyyət ağır
olduğu üçün təsadüfi şəxsi həmin
vəzifəyə göndərmək mümkün deyildi. Çünki bu çətin, ağır, məsuliyyətli
vəzifəni yerinə yetirmək üçün o
bütün sınaqlardan keçməli idi. Respublikanın başçısı bu yerə
öz bilik və bacarığı ilə seçilən,
tapşırılan işin öhdəsindən gələcəyinə
əmin olan B.Mehdiyevin namizədliyini irəli sürür.
B.Mehdiyev İranda iki ilə yaxın öz ölkəsinin
mənafeyini qoruyur. O zaman İrandan vətənimizə 6000-dən çox
fədainin sərhəddi keçməsinə şəxsən
B.Mehdiyev başçılıq edənlərdən biri olub. Şaxtalı günlərdə fədailəri
ölümün pəncəsindən qurtarmaq
üçün B.Mehdiyev gecə-gündüz işləməli
olmuş və nəticədə ağır xəstələnmişdi.
Həmin xəstəlikdən o, dörd ay
müalicə alır.
Müalicədən sonra B.Mehdiyev Əzizbəyov rayon
(indiki Xəzər) “Azneftzavod” birliyinə direktor təyin
edilir. 1949-cu ildə isə B.Mehdiyev Moskvaya Ali mühəndislər
kursuna göndərilir. Kursu müvəffəqiyyətlə
başa vurandan sonra “Ozero” adına kimyəvi
zavoda direktor vəzifəsinə təyin olunur. 1956-cı
ildə xəstəliyinə görə təqaüdə
çıxmalı olur.
Bəndalı
Mehdiyevin əməyi hökumət tərəfindən
yüksək qiymətləndirilmiş və dəfələrlə
qurultaya nümayəndə, Bakı şəhər partiya
komitəsinin plenumuna üzv seçilmiş,
“Qırmızı Əmək Bayrağı”, “Şöhrət”
ordeni və bir çox medallarla təltif olunmuşdur.
Azərbaycanın
ictimai-siyasi həyatında öz yeri olan, uzun müddət
onun inkişafında xüsusi xidmətlər göstərən
Bəndalı Əbdülhüseyn oğlu Mehdiyev 1969-cu il avqust ayının 21-də, 70 yaşında
dünyasını dəyişir. Azərbaycan
xalqının vətənpərvər oğlu, təvazökar
insan Bəndalı Əbdülhüseyn oğlu Mehdiyevin
ölümündən bizi yarım əsrlik bir vaxt
ayırır. Lakin təəssüflə qeyd edək ki,
onun adını əbədiləşdirməkdən
ötrü hələ də bir iş görülməyib. Axı xalqımız qədirbiləndir. Biz inanırıq ki, böyük vətənpərvər,
qayğıkeş insan olan B.Mehdiyev qədirbilən
xalqımız qarşısında gördüyü işlərə
görə öz layiqli qiymətini alacaq. Bizə
elə gəlir ki, buna onun haqqı da var.
Aslan KƏNAN
Respublika.- 2019.- 19
iyul.- S.6