Mərdəkan Mədəniyyət Sarayı

Mərdəkan Mədəniyyət Sarayı 1961-ci ildən fəaliyyətdədir. Uzun müddət fəaliyyət göstərdikdən sonra qəzalı vəziyyətə düşən mədəniyyət sarayı Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban xanım Əliyevanın təşəbbüsü və ARDNŞ-in maliyyə vəsaiti hesabına müasir standartlara uyğun olaraq yenidən qurulmuş və mərdəkanlıların istifadəsinə verilmişdir. Ümumi sahəsi 4641 kvadratmetr olan sarayda 374 nəfərlik böyük və 150 nəfərlik kiçik salon, mühazirə və rəqs salonları xalqın istifadəsinə verilmişdir. Videomonitor quraşdırılmış, işıq və səs sistemləri yeniləşdirilmiş, mərkəzləşmiş kondisioner, siqnalizasiya və yanğından mühafizə sistemləri ilə təchiz olunmuşdur.

Sarayın direktoru, ali ixtisas təhsilli və təcrübəli mütəxəssis Əliağa Mirzəyevlə söhbət edərkən o bildirdi ki, sarayda artıq yeni özfəaliyyət kollektivləri, pullu və pulsuz dərnəklər, kurslar fəaliyyətə başlamışdır. Əliağa müəllim qeyd etdi ki, artıq burada dərnək onlarcadır. Qızlar və oğlanlar üçün biçmə-tikmə, rəqs, məktəbəqədər hazırlıq, ilkin tibbi yardım, rəsm, şahmat, gitara, tar, rəqs, qadın bərbəri, kompüter kursları, eləcə də dram dərnəyi, “Retro” instrumental ansamblı, “Lalə” rəqs kollektivləri, “Kam-kam” uşaq studiyası, “Azərbaycan qartalları” rəqs kollektivi, keramika dərnəyi fəaliyyət göstərir. Onu da qeyd etmək lazımdır ki, Azərbaycan Respublikasının əməkdar müəllimi Xanlar Bəşirovun rəhbərlik etdiyi “Qartallar” rəqs kollektivi nəinki Mərdəkanda, eyni zamanda respublikamızda, bir çox xarici ölkələrdə uğurla çıxış etmişdir.

Mərdəkanın kurort qəsəbəsi olmasını nəzərə alaraq burada nəinki rayon, eyni zamanda respublika əhəmiyyətli tədbirlər də keçirilir. Sarayın direktoru Əliağa Mirzəyev söhbət əsnasında qeyd etdi ki, sarayda tarixi günlərə həsr olunmuş tədbirlərə daha çox diqqət yetirilir. Belə ki, Ümumdünya Mülki Müdafiə Günü, qəsəbə sakinləri ilə görüşlər və Novruz şənliyi, Böyük Vətən Müharibəsində alman faşistləri üzrəində qələbənin 71 illiyinə həsr olunmuş tədbir, Respublika gününə, ümummilli liderimiz Heydər Əliyevin 93-cü ildönümünə həsr olunmuş “Bir oğul göstərin Heydərə bənzər” adlı tədbirlər bu qəbildəndir. Maraqlısı odur ki, tədbirlərin əksəriyyəti rayonun ümumtəhsil məktəbləri ilə əlaqəli təşkil olunur. Rayonun 181, 230, 149, 183 saylı məktəblərin müəllim və şagird kollektivləri ilə birgə təşkil olunmuş müxtəlif xarakterli tədbirlər uşaqların daha çox marağına səbəb olmuşdur.

Bakı Şəhər Mədəniyyət və Turizm Baş İdarəsinin Mərdəkan mədəniyyət sarayı təşkil etdiyi 28 May – Respublika Gününə həsr olunmuş tədbir rayon əhalisinin marağına səbəb olmuşdur. Fərəhli haldır ki, bu tədbirdə Azərbaycan və Gürcüstan rəqs kollektivləri birgə rəqs etmişlər. Tədbir dostluq şüarı ilə təşkil olunmuş və burada “Buta Kreativ yaradıcılıq studiyası”, “Cəsurlar” rəqs kollektivi və Gürcüstanın “Orino”, “Lomisa”, “Parxma” və digər kollektivləri də rəngarəng proqramlarla çıxış etmişlər. Sonda iki qardaş ölkənin kollektivləri diplomlarla təltif olunmuşlar.

Uşaqların estetik zövqünü formalaşdırmaq üçün sarayın rəhbərliyi xüsusi plan tərtib etmiş və bir-birindən rəngarəng klub tədbirləri həyata keçmişdir. Belə ki, sarayda təşkil olunmuş “Son zəng” adlı tədbir buna misal ola bilər. Bakı Şəhər Mədəniyyət və Turizm Baş İdarəsinin təşkilatçılığı ilə təşkil olunmuş bu proqram məktəb məzunlarının, müəllim və şagird kollektivinin böyük marağına səbəb olmuşdur. 12 saylı xüsusi internat məktəbində təşkil olunan konsert proqramı da maraqlı keçmişdir. Sarayın fəaliyyətində vətənpərvərlik tədbirləri də xüsusi yer tutur. Sarayda nümayiş olunan “Ümid” adlı film tamaşaçıların alqışları ilə qarşılanmışdır. Qarabağ müharibəsində həlak olan soydaşlarımızın ruhuna minnətdarlıq hissləri daha da yüksəlmişdir.

Sarayın xarici ölkələrlə, onların kollektivləri ilə əlaqələri getdikcə artır. Belə ki, cari ilin iyun ayında Azərbaycan və Gürcüstan folkloruna həsr olunmuş tədbir bunu bir daha sübut edir. Artıq ənənə şəkilini almış belə tədbirlər hər iki xalqın folklorunun, mədəniyyətinin təbliğində böyük rol oynayır. Tədbirdə Mərdəkan Mədəniyyət Sarayının “Lalələr”, “Azərbaycan qartalları” rəqs kollektivləri, “Odlar yurdu”, “Avantaj” qrupu, Gürcüstanın “Opiza”, “Lavra”, “Beso” və digər rəqs kollektivlərinin çıxışları böyük maraqla qarşılanmışdır.

Azərbaycan-Gürcüstan dostluğunun nəticəsidir ki, sarayda “Dostluq körpüsü” festivalı da bir ənənə şəklini almışdır. Bu festival Bakı Şəhər Mədəniyyət və Turizm Baş İdarəsinin dəstəyi ilə həyata keçirilmişdir. Festivalda Gürcüstanın “Pesvebi” və “Salaqobo” ansamblları ilə yanaşı, Azərbaycanın “Odlar yurdu”, “Aysel” və “Lalələr” kollektivləri uğurla çıxış etmiş, hər iki ölkənin kollektivləri diplom və hədiyyələrlə təltif olunmuşlar.

Əliağa müəllimlə söhbət edərkən o, qeyd etdi ki, Mərdəkan Mədəniyyət Sarayı bir çox layihəyə də imza atıb. Bu baxımdan “Retro Bakı” layihəsi çox maraqlıdır. Bu layihə əhalinin asudə vaxtının düzgün təşkili çərçivəsində həyata keçirilmişdir. Layihənin həyata keçirilməsində də sarayın özfəaliyyət kollektivləri böyük uğur qazanmışdır.

“Lalələr”, “İqray, qarmon” rus folklor ansamblı, Xətai rayonunun mədəniyyət mərkəzinin “Səma” rəqs qrupu, “Gitaraçalanlar” ansamblı tamaşaçıların rəğbətini qazanmışdır. Layihənin Bakının “Fəvvarələr” bağında davam etdirilməsi planlaşdırılmışdır.

Fərəhli haldır ki, mədəniyyət sarayında uşaqların rəsmə olan marağını da nəzərə alaraq müxtəlif tədbirlər həyata keçirilir. Burada keçirilən “Rəsm dünyamız” adlı tədbir uğurla həyata keçirilmişdir. Belə ki, Bakı Şəhər Mədəniyyət və Turizm Baş İdarəsinin dəstəyi ilə açıq havada Nofəl Abbasquliyevin rəhbərlik etdiyi “Rəssamlıq” kursunun balaca rəssamların əl işlərindən ibarət sərgi təşkil olunmuşdur. Sərgidə 20-dən çox balaca rəssamın əl işləri nümayiş olunmuşdur. Bu tədbirdə 10 nəfər balaca rəssama diplomlar və hədiyyələr verilmişdir.

Muğamlarımızın təbliğində də sarayın kollektivi böyük işlər görür. Belə ki, avqust ayında “Beynəlxalq muğam günü” adlı tədbir öz orijinallığı ilə diqqət çəkmişdir. Bu tədbirdə Heydər Əliyev Fondunun təşkil etdiyi “Novruz-Bahar” festivalının iştirakçıları və Türkiyənin İstanbul şəhərində keçirilən “23 Nisan Cocuq festivalı”nın laureatları və Şuşa musiqi məktəbinin “Xəmsə” muğam qrupu daha fəal iştirak etmişdir.

Sarayda keçirilən layihələrdən biri də cari ilin avqust ayının 29-da keçirilən “Multikulturalizm və uşaq yaradıcılığı” layihəsidir. Layihə çərçivəsində “Pişiyin evi” nağıl-tamaşa uğurla nümayiş etdirilmişdir.

“Bilik günü”, “Beynəlxalq Turizm Günü” və sair tədbirlər, o cümlədən “N” saylı hərbi hissələrdə keçirilən klub tədbirləri, konsertlər də Mərdəkan Mədəniyyət Sarayının uğurlarından hesab oluna bilər.

Sarayın xarici dövlətlərin kollektivləri ilə əlaqəli fəaliyyəti olduqca təqdirəlayiqdir. Belə ki, sarayın təşkil etdiyi “Türk rəqslərinin gecəsi” adlı tədbir çox böyük marağa səbəb olmuşdur. Bu tədbirə qatılan Tehran və Təbriz rəqqasları milli rəqslərimizi tamaşaçılar qarşısında çox böyük ustalıqla nümayiş etdirdilər. Burada gənc estrada ifaçılarının çıxışı da tədbirə xüsusi rəng qatmışdır.

Zabit CAVADOV,

Respublika.- 24 iyul.- S.7