Nəriman Nərimanovun “Müstəqil
Sovet Azərbaycanı quruculuğu”
(1920-1921-ci illər)
Nəriman Nərimanov əqidəli, iradəli
və təcrübəli siyasi xadim idi. O,
Bakıda şərəfli, məsuliyyətli işdə
böyük çətinliklərlə üzləşəcəyini
bilirdi. Şərq ölkələrinin, doğma Azərbaycanın
nicatı, azadlığı və xoşbəxt gələcəyi
üçün bu tarixi fürsəti həyatı
bahasına olsa da, yerinə yetirəcəyini qət
etmişdi. Müqəddəs borc bildiyi vəzifəni
yerinə yetirəcəyinə inanırdı. Bakıya yola
düşməzdən əvvəl V.İ.Leninlə
görüşündə səmimi söhbətləri bu
inamı möhkəmləndirmişdi. Lakin N.Nərimanov
Bakı fəaliyyətinin ilk günlərindən onu duman kimi
bürüyəcək “bolşevik şovinizmi” kabusundan xəbərsiz
idi.
Azərbaycanda aprel çevrilişinin ilk
günlərindən iqtisadiyyat və dövlət
quruculuğunda yerli şəraiti nəzərə almadan Sovet
Rusiyası üsul idarəçiliyinin tətbiqi - totalitar
rejimin əsasları qoyulurdu.
1920-ci ilin mayından Azərbaycan
İnqilab Komitəsinin Rusiyada olduğu kimi, torpaq üzərində
xüsusi mülkiyyət hüququnu ləğv etməklə
torpağı milliləşdirməsi, meşələrin,
suyun və yerin təkinin milliləşdirilməsi, istehsalat
üzərində fəhlə nəzarətinin qoyulması,
neft sənayesini milliləşdirməsi və sairə sovet
totalitar rejimin əsaslarını bərqərar
edilirdi (Bax: Azərbaycan iclaslarının protokolları
(1920-1922-ci illər). Bakı, 2009, səh.6).
Ölkənin idarə edilməsində
inzibati işləri Azərbaycan Xalq Daxili İşlər
Komissarlığı həyata keçirirdi. Ölkədaxili
bütün qəzalarda, şəhərlərdə
İnqilab komitələri və İcraiyyə komitələrinin
qəbul etdikləri qərar və əmrləri Xalq Daxili
İşlər Komissarlığı təsdiq edirdi.
Birinci Ümumazərbaycan Sovetlər
qurultayında (16-18 may 1921-ci il) geniş xalq kütlələri
arasında narazılığın artmasının səbəbləri
barədə çıxış edən nümayəndələr
N.Nərimanovdan soruşurdular ki, əgər Azərbaycan
deyildiyi kimi həqiqətən müstəqildirsə və
Rusiya Federasiyası ilə bərabər hüquqlu
respublikadırsa, onda nəyə görə Sovet Rusiyası Azərbaycanın
daxili işlərinə istədiyi kimi müdaxilə edir? Niyə
Azərbaycan öz neftinin həqiqi sahibi deyil və ondan istədiyi
kimi istifadə edə bilmir? Soruşulur ki, nəyə
görə yaxın vaxtlarda Azərbaycanın xarici işlər
və hərbi komissarlıqlarının ləğv ediləcəyi
və Azərbaycanın xarici ticarətinin RSFSR xarici ticarəti
ilə birləşdiriləcəyi haqqında söhbətlər
gedir. Zaqafqaziya yollarının respublikamızın
yolları ilə birləşdirilməsini necə izah etmək
olar?..
N.Nərimanov suallara cavabında
Sovet respublikalarının bəzi məsələlərdə
ümumi bir mərkəzdən idarə olunmasına haqq
qazandırır və bunun sosializmin təbiətindən irəli
gəldiyini sübut etməyə
çalışırdı. Öz cavabında o, bildirirdi ki,
bunun üçün “biz ilk növbədə Sovet
hakimiyyətinin mahiyyətini” başa düşməliyik. Biz
deyirik ki, nə qədər düşmənlərimiz məhv
edilməyib sosialist respublikaları vahid bir küll təşkil
edəcək, hər yerdə və həmişə vahid cəbhədə
çıxış edəcəklər. Belə bir vaxtda hər hansı Sovet
Sosialist Respublikası tam suverendir, ya yox söhbəti ola bilməz. Əgər onlar hər
biri öz küncünə çəkilirsə və hərə
öz mühasibat hesabını apararsa, onda biz hamımız
məhv olarıq.
“Lenin milli siyasəti”nə və “Rusiyanın və
Şərqin bütün müsəlman zəhmətkeşlərinə!”
müraciətinə N.Nərimanov dərin inam bəsləyirdi. V.İ.Leninin “Milli siyasəti”nin elan olunmuş prinsiplərində deyilirdi:
“Rusiya xalqlarının bərabərliyi və suverenliyi;
Rusiya xalqlarının azad surətdə öz müqəddəratlarını
təyin etməsi (ayrılmaq və müstəqil dövət
yaratmağa qədər); bütün milli və milli-dini
imtiyaz və məhdudiyyətlərin ləğvi; Rusiyada
azlıqda qalan xalq və etnik qrupların müstəqil
inkişafı” (Dekretı Sovetskoy vlasti, tom I, M.1957, səh.113).
Azərbaycan
Müvəqqəti İnqilab Komitəsi 1920-ci il
aprelin 27-də yaranmışdı. Həmin il
aprelin 29-da İnqilab Komitəsinin keçirilən ilk
iclası protokolundan məlum olur ki, bu Komitə “həqiqətən
tam hakimiyyətə sahib deyildi” (Bax: “Azərbaycan İnqilab
Komitəsinin Xalq Komissarları Sovetinin protokolları”
(1920-1922-ci illər), Bakı, 2019, səh.12).
1920-ci il
mayın 27-dək Azərbaycan K(b)P
MK-nın qəbul etdiyi bir sıra qərar əsasında
İnqilab Komitəsində tədbirlər həyata
keçirilmişdir. İnqilab Komitəsində müzakirə
edilmiş, təcili rəsmi arxiv sənədlərindən
göründüyü kimi, Azərbaycan K(b)P MK-nın
bütün qərarları İnqilab Komitəsi tərəfindən
təcili icra edilmişdir: Hətta ölkədə olan xarici
valyuta təcili olaraq “beynəlxalq təbliğatın
ehtiyaclarını təmin etmək məqsədi ilə”
Moskvaya göndərilmişdir;
Torpaqların milliləşdirilməsi haqqında dekret layihəsi
təsdiq edilmişdir. Səməd Ağamalı oğlu Xalq Torpaq Komissarı,
Q.Musabəyov isə Xalq Ərzaq Komissarı, Azərbaycan Xalq
Təsərrüfatı Şurası yaradılaraq N.Sovolyov
onun sədri (Tez-Qazaryan, M.Hacinski, N.Tyuxtenev və Q.Pılayev
kollegiya üzvləri), S.Yaqubov Azərbaycan SSR Xalq Əmək
Komissarı, Koval, Apryatkin və Sapunov həmin
komissarlığın kollegiya üzvləri təyin olunur. Azərbaycanın bütün qəzalarında təcili
olaraq Qəza İnqilab komitələrinin yaradılması qərara
alınır. Həmin qərarla Baba
Əliyev, A.Yusifzadə, M.Ağayev, B.Cəfərov və
İsrafilovdan ibarət Bakı Qəza İnqilab Komitəsi
yaradılır. Bakı şəhər rəisliyi
Bakı İnqilab Komitəsinə tabe edilir.
Məlum
olduğu kimi, Azərbaycanda sovet hakimiyətinin
yarandığı 20-ci illərdə Xalq Komissarları Soveti
formalaşdırılsa da, ali hakimiyyəti,
həm də icra işlərini Azərbaycan İnqilab Komitəsi
yerinə yetirirdi.
Birinci
Ümumazərbaycan Sovetlər Qurultayında (6-18 may 1921-ci ildə)
Azərbaycan SSR-in ilk konstitusiyası qəbul edildikdən sonra
Azərbaycanda Mərkəzi İcraiyyə Komitəsi (MİK)
Ali hakimiyyət, Xalq Komissarları Soveti (XKS) isə ali icraedici orqan kimi fəaliyyət göstərməyə
başladı.
İnqilab
Komitəsinin 1920-ci il mayın 12-də
keçirilən iclasında Azərbaycan ərazisində
fövqəladə komissarların təyin edilməsi barədə
qərar qəbul edilir. Azərbaycan K(b)P MK-nın qərarına
əsasən keçmiş Gəncə quberniyasına
H.Sultanovu komissar, Y.Kvantaliani və V.Xutulaşvili onun
müavinləri; Qarabağa D.Bünyadzadə fövqəladə
komissar, A.Karakozov isə erməni hissəsi üzrə ona
müavin; Quba qəzasına isə A.Qoqoberidze komissar təyin
olunur; Azərbaycan SSR-də keçmiş Məhkəmə
institutları ləğv olunaraq Xalq məhkəmələrinin
yaradılması haqqında Əsasnamə təsdiq olunur.
Oğurluq və digər sui-istifadə hallarına
qarşı mübarizə məsələləri müzakirə
edilərək fabrik, zavod, mədən, gəmi və
emalatxanalarda xüsusi fəhlə nəzarəti qoymaq barədə
qərar qəbul edilmişdir (səh.12).
Azərbaycan
Müvəqqəti İnqilab Komitəsi “İnqilab Komitəsinin
yaradılması haqqında” Bakı şəhəri və Azərbaycan
əhalisinə 28 aprel 1920-ci il tarixli
müraciətində Azərbaycan zəhmətkeş kütlələri
içərisində fəhlə-kəndli hakimiyyətinin
yaranması məqamında hamını köməyə
çağırır. Bildirir ki, Azərbaycanın
yenidən yaranmış əsl müstəqilliyini daha da
möhkəmləndirmək, onu qorumaq üçün
Qırmızı Ordu köməyə gəlir. “Azərbaycan Sovet Respublikası adından İnqilab
Komitəsi Rusiya Federativ Sovet Respublikası ilə
qarşılıqlı etimad və tanınmaya əsaslanan
sıx, qardaşlıq ittifaqı təklif edir.
Sovet Rusiyası və Sovet Azərbaycanı fəhlə
kəndlilərinin qüvvələri birliyi və
qarşılıqlı köməyi Qafqazda və Şərqdə
fəhlə inqilabı qələbəsinin etibarlı rəhnidir”
(Orada).
Belə
bir məqamda İnqilab Komitəsi “qanlı vətəndaş
müharibəsi” istəmədiyinə, “bütün vətəndaşların
tam toxunulmazlığına” təminat verir, həmvətənlərini
“əməkçi Azərbaycanın azadlığı
uğrunda” birlikdə mübarizə aparmaq üçün Nəriman
Nərimanovun da imzası ilə müraciət yayması
böyük təsir qüvvəsinə malik idi.
Çünki Azərbaycan fəhlə-kəndliləri Nəriman
Nərimanova inanır, ona böyük etimad bəsləyirdilər.
N.Nərimanov
Bakıya gəlişinin ertəsi gün (17 may 1920-ci il) Azərbaycan İnqilab Komitəsinin ilk
iclasında sədrlik etmiş, Bakı və Lənkəran
inqilab komitələrinin bir aylıq fəaliyyəti, ölkədəki
ictimai-siyasi və iqtisadi vəziyyəti barədə məruzələri
dinləmişdir.
Nəriman Nərimanovun Bakıya gəlişinə qədər
XI Qırmızı Ordu tərəfindən Azərbaycanın
işğalı başa çatmışdı. Bu müddət
ərzində XI Qırmızı Ordunun kəndlərdə bəy-xan
mülklərini talan etməsi,
özbaşınalığı barədə iclasda eşidilən
söz-söhbət N.Nərimanovu narahat etmişdi.
1920-1922-ci illərdə N.Nərimanovun Azərbaycan
İnqilab Komitəsi və Xalq Komissarları Sovetinin
yığıncaqlarında sədrlik etdiyi iclasların
protokollarından göründüyü kimi ölkənin elə
bir taleyüklü məsələsi olmamışdır ki,
bu iclaslarda müzakirə edilməmiş olsun. Burada təcili
tədbirlərin həyata keçirilməsi qərara
alınırdı. Həmin tarixi sənədlərdə
zəhmətlə dolu həyatın ritmi
döyünürdü. Görüləcək
işlərin mərkəzində Nəriman Nərimanov
dayanmışdı. O, həmişə fikirli,
qayğılı olurdu. Dumanlı Şərq
dünyasına pəncərə açmaq üçün
Azərbaycanda nümunəvi respublika yaratmaq son dərəcə
çətin, məsuliyətli vəzifə idi.
Mötəbər mənbələrdən
göründüyü kimi, Sovet Azərbaycanı dövlətinin
tərkibi əsasən milli kadrlardan təşkil olunsa da
hakimiyyət sükanını özgə millət nümayəndələri
Kirov, O.Kaminski, S.Orconikidze, A.Mikoyan idarə edirdi.
1920-ci ilin mayından Azərbaycanda ilk quruculuq işlərinin
bütün sahələrində sovet totalitar rejimi hakim kəsilmişdi.
Yeni
hakimiyyət strukturunun bərqərar olması, idarəçilik,
iqtisadiyyat, siyasi və ideoloji iş Sovet Rusiyasında
olduğu kimi öz “etibarlı” adamlarına
tapşırılmışdı. Bolşeviklər
bütün işləri “demokratik mərkəziyyət
prinsipi” əsasında idarə etməyə
çalışırdılar.
“Ölkədə
bütün hakimiyyət tam şəkildə bolşeviklər
partiyasının mərkəzi komitəsindən
başlayaraq, getdikcə şaxələnən yerli partiya təşkilatlarlarının
əlində cəmləşdirilirdi (Tarixin gərdişi
sübut etdi ki, Xalq Komissarları Sovetinin sədri V.Lenin və
Milli İşlər üzrə Xalq komissarı İ.Stalin
“Rusiya xalqlarının hüquq bəyannaməsində” və
“Rusiyanın və Şərqin bütün müsəlman zəhmətkeşlərinə”
(1917) müraciətlərində verdikləri vədlər
yalan və riyakarlıqdan başqa bir şey deyilmiş. Onların bəlağətli, təntənəli
sözləri ilə əməlləri arasında uçurum
olmuşdur).
N.Nərimanov
“dumanlı” ictimai-siyasi mühitdə əqidəli, prinsipial
dövlət xadimi kimi qarşısına məqsəd
qoymuşdu: Xalq Cümhuriyyətinin
dağıdılmış, talan olmuş xalq təsərrüfatı
məkanında bütün Şərq ölkələrinin həsəd
apara biləcəyi nümunəvi müstəqil sovet Azərbaycanı
yaratmaq. Şərq ölkələrinin
azadlığı naminə istedad və
bacarığını, təcrübəsini bu müqəddəs
işə həsr etmək.
Azərbaycanda Sovet hakimiyyətinin ilk illərində ən
mühüm problemlərdən biri - ərzaq təchizatı
problemi idi. Ölkədə aclığı aradan qaldırmaq
üçün təcili tədbirlər görülməli
idi. Cavanşir, Qubadlı, Gəncə, Şamxor, Qazax,
Tovuz və Şuşa qəzalarında
aclıq hökm sürürdü. 1921-ci ilin iyulunda Azərbaycan
Xalq Komissarları ərzaq (çanaq) toplamaq məqsədilə
qəzalara təhkimçilər göndərilməsi, Azərbaycan
Aclara Kömək Mərkəzi Komitəsinin 10 milyard manat
kredit ayırması, Azərbaycan Xalq Komissarları Sovetinin təklifi
ilə Azərbaycan Neft Komitəsinin sədri A.Serebrovskiyə
təcili 75 min pud ağ nefti bazarda satdırıb aclara kömək
üçün sərf etməsi, taxıl məhsullarının
Bakıya məneəsiz gətirilməsi, Bakı
Gömrük İdarəsinin yığdığı
rüsumların tam yarısının aclar üçün
göndərilməsi, Dövlət Qiymətli Əşyalar
Fondunun 50 min manatlıq qiymətli əşyalar
ayırması ərzaq təchizatı problemini həll etdi.
Azərbaycan Neft Komitəsinin vəsaiti ilə Türkiyənin
“Hacı Paşazadə qardaşları” tiracət evindən
Azərbaycan əhalisinə manufaktura, ayaqqabı, paltar,
kağız və başqa mallar göndərildi. Nəriman Nərimanov
Azərbaycan İnqilab Komitəsinin növbəti iclasında
(4 oktyabr 1920-ci ildə) ehtiyacı olan Anadolu türklərinə
valyuta ilə təcili yardım göndərmək məsələsini
müzakirəyə çıxarmışdır.
İclasda qəbul olunmuş qərarda deyilir:
“Anadolu
inqilabçılarının briliant, qızıl və
xalça kimi qiymətli valyuta ilə təmin edilməsinin
vacibliyini nəzərə alaraq, Xalq Xarici İşlər
Komissarlığına təklif olunsun ki, Anadoluya göndəriləcək
valyutanın təchizi və göndərilməsi barədə
müvafiq layihə təqdim etsin” (səh.16).
Arxiv sənədlərindən göründüyü
kimi, N.Nərimanov Türkiyə xalqının lideri Mustafa
Kamal Atatürkün rəhbərliyi ilə xarici
işğalçılara qarşı mübarizəsində
onlara qardaşlıq köməyini əsirgəməmişdir.
1921-ci
ilin mayında N.Nərimanov XI Qırmızı Ordu rəhbərliyinin
Qafqaz cəbhəsi komandanının Qarakilsədə
Türkiyə ordusunun komandanı Qarabəkir Paşa ilə
görüşü zamanı türk ordusuna hədiyyə
olaraq 30 sistern ağ neft və benzin göndərmək
xahişini yerinə yetirmiş, bundan sonra müntəzəm
davamlı qardaşlıq yardımını əsirgəməmişdir
(səh.20).
N.Nərimanovun
məlumatı əsasında 1921-ci il
iyunun 13-də Azərbaycan Xalq Komissarlarının növbədənkənar
iclası keçirilmişdir. Azərbaycan Xalq
Cümhuriyyətinin və xarici ölkələrdə təhsil
almağa göndərdiyi tələbələrə maddi
kömək göstərilməsi barədə təklif
müzakirə olunmuşdur.
Nəriman
Nərimanov 1920-ci il mayın 17-dən
İnqilab Komitəsinin iclaslarına sədrlik etmişdir. O,
yeni hakimiyyətin quruculuğu ilə ciddi məşğul
olmağa başlamışdır. Xalq təsərrüfatı
dağılmış ölkədə həlli çətin
problemləri həll etmək, sosial-iqtisadi, mədəni
dirçəlişə nail olmaqdan ötrü fövqəladə
bacarıq, dərin bilik və dözüm tələb
olunurdu. Məqsəd ölkəni təkcə
xaos vəziyyətdən çıxarıb dirçəltməkdən
ibarət deyildi. Onun məqsədi Azərbaycanı
bütün Şərq İslam dünyasını cəlb edən
nümunəvi ölkəyə çevirmək idi.
Nəriman Nərimanovu gecə-gündüz
düşündürən Azərbaycanı türk kökənli
millətin ölkəsi kimi dirçəltmək,
bütün Şərqə nümunə olan, dünyada
tanınan dini, dili, milli mənsubiyyəti inkişaf etmiş məmləkət
görmək istəyirdi.
Nəriman Nərimanov Şura Rusiyası hökumətinin
qanun-qaydaları çərçivəsində, yerli şəraiti
nəzərə almaqla müdrik dövlət
başçısı kimi Azərbaycanda quruculuq işinə
başlamışdı. Şura Rusiyası Xalq Komissarları
Sovetinin sədri Vladimir İliç Lenin ona inanırdı,
nümunəvi müstəqil Azərbaycan yaratmaq niyyətinə
xeyir-dua vermişdi.
Arxiv sənədləri, dekret protokolları, müqavilələr
və rəsmi yazışmalar Nəriman Nərimanovun dövlət
başçısı kimi ictimai-siyasi fəaliyyətinin
ağlasığmaz miqyası, yorulmaz əməyi, mübarizəsi
heyrət doğurur.
Xalq təsərrüfatı dağılmış
ölkədə bərpa işləri, qayda-qanun yaratmaq elə
şəraitdə baş verirdi ki, menşevik Gürcüstan
və daşnak Ermənistan hərbi hissələri Azərbaycan
sərhədlərində təxribat törədir, torpaq
iddiası ilə kəndlərə hücum edirdilər.
Müvəqqəti İnqilab Komitəsi N.Nərimanovun
başçılığı ilə düşmən
qoşunlarının təcavüzkarlıq hücumlarının
qarşısını almaqla yanaşı, Gürcüstan və
Ermənistan hökumətləri ilə danışıqlar
aparmalı olurdu. Bu danışıqlarda N.Nərimanov
dövlət başçısı kimi Azərbaycanın
mövqeyini müdafiə edirdi. Belə ki,
N.Nərimanov İnqilab Komitəsində menşevik
Gürcüstan və daşnak Ermənistanla
danışıqlar haqqında məruzəsində Rusiya Sovet
hökumətinin Ermənistandakı nümayəndəsi
Leqranın bağladığı müqaviləni tamamilə
qəbuledilməz hesab edir.
Qərarda bildirilir ki, “Ermənistanın daşnak
hökuməti ilə bu cür müqavilənin
bağlanması Şərq siyasətindən imtina etmək
deməkdir. Habelə bu Azərbaycanın daşnaklar tərəfindən
dağıdılmasına şərait yaradır. Buna görə də Azərbaycan SSR hökuməti
təkidlə təklif edir ki, bu müqavilənin
imzalanmasından imtina edilsin” (səh.17).
1921-ci il mayın 23-də Bakıda Azərbaycan SSR
Xalq Komissarları Sovetinin ilk iclası N.Nərimanovun sədrliyi
ilə keçdi. Həmin iclasda AK(b)P
MK-nın qərarı əsasında banditlərlə və
qaçaq-quldura qarşı mübarizə aparmaq
üçün xüsusi fövqəladə
üçlük yaradıldı. Fövqəladə
üçlük müəyyən etdiyi bandalara və
qaçaq-quldurlara ən ağır cəzanı Azərbaycan
İnqilab Tribunalı tətbiq edə bilərdi. Ümumiyyətlə, dövlət strukturları
Sovet Rusiyasındakı qaydaya müvafiq göstərişlə
yerinə yetirildi (səh.21).
Müstəqilliklə əlaqəli vəzifələrin
məhdudlaşdırılması müşahidə olunsa da
N.Nərimanov öz səlahiyyətləri çərçivəsində
Azərbaycan xalq təsərrüfatının
inkişafını, əhalinin sosial vəziyyətinin
yaxşılaşdırılmasını və ən zəruri
məsələlərin həyata keçirilməsini diqqət
mərkəzində saxlayırdı.
1920-ci
ilin yayında Sovet Rusiyası Azərbaycanın torpaqları -
Naxçıvan, Zəngəzur, Şərur-Dərələyəz
uğrunda Ermənistan daşnak hökuməti ilə hərbi
döyüşlər apardığı məqamda Azərbaycanın
iştirakı olmadan onun mübahisəsiz torpaqlarının
Ermənistana verilməsi məsələsi barədə gizli
siyasi və diplomatik danışıqlar aparırdı. Bundan
xəbər tutan N.Nərimanov V.İ.Leninə yazırdı:
“Dəhşətli vəziyyət yaranmışdı. Mərkəz Gürcüstan və Ermənistanın
müstəqilliyini, Azərbaycanın isə istiqlaliyyətini
tanımış, lakin eyni zamanda mərkəz Azərbaycanın
tamamilə mübahisəsiz ərazilərini Ermənistana
verir”.
Azərbaycanın əyalətlərində əksinqilabçıların
ixtişaş və üsyan törətməsi də ciddi təhlükə
yaradırdı. İnqilab Komitəsində Gəncədən
göndərilən teleqram təcili müzakirə edilir.
Teleqramda həyəcanla deyilirdi:
“Səhiyyə köməyinə böyük ehtiyac var.
Belə ki, Gəncənin küçələrində bu
günə qədər külli miqdarda ölülər
atılıb qalır. Bu da kütləvi epidemiyanın yayılmasına səbəb
ola bilər. Şəhərin bütün
müsəlman hissəsi top atəşindən güclü
dağıntıya məruz qalıb. Şəhər
yoxsulları arasında ərzağa böyük ehtiyac var. Gəncəyə
20 nəfər təcrübəli partiyalı yoldaşlar
göndərmək lazımdır. Onlarsız ola bilsin ki, üsyan yenidən
qızışdırılsın”.
İnqilab
Komitəsinin qərarı ilə Xalq Səhiyyə və
Ərzaq komissarları müsəlman işçi qrupunun
müşayiəti ilə Gəncə zəhmətkeşlərinə
“həkim dəstəsi, medikament, 20 vaqon düyü, 5 vaqon
kişmiş, 50 milyon manat nağd pul göndərmişdir”.
Mayın 26-da keçirilən həmin iclasda İnqilab
Komitəsinin qərarı ilə Azərbaycan Sovet Fəhlə-Kəndli
Müdafiə Şurası yaradılır.
N.Nərimanov sovet hökumətinin xalq kütlələrinə
azadlıq və firavanlıq ruhunda car çəkdiyi Lenin
siyasi kursu istiqamətində Azərbaycanda daxili imkanlardan
istifadə edərək, ictimai-siyasi və iqtisadi sahələrdə
dönüş yaradırdı.
N.Nərimanovun Azərbaycanda Xalq Komissarları Sovetinin sədri
işlədiyi müddətdə böyük nüfuz və səlahiyyətləri
çərçivəsində olduqca faydalı işlər
həyata keçirirdi ki, bu da Sovet hökumətinin gizli siyasətini
təmsil edən mənsəbpərəst məmurları
qıcıqlandırırdı.
N.Nərimanov Müstəqil Sovet Azərbaycanının
Ordusunun yaradılması istiqamətində real tədbirlər
həyata keçirirdi. İnqilab Komitəsinin 1921-ci il
martın 27-də keçirilən iclasında Azərbaycan
ordusuna xidmət edən 6-cı xüsusi şöbə
yaradılması qərara alınmışdı. Qərarda
deyilir: “Azərbaycan ordusu müstəqil strukturdur və onun
idarəsi bütövlükdə Azərbaycan SSR Xalq Hərbi
Dəniz Komissarlığının sərəncamına
verilir...”.
Azərbaycan İnqilab Komitəsi müstəqil Azərbaycan
Ordusunun yaradılması məqamında RSFSR Xalq
Komissarları Sovetinə rəsmi müraciətində Azərbaycan
SSR-dən göndərilmiş türk mənşəli
bütün zabitləri və məşhur generallar
S.A.Mehmandarov və Ə.A.Şıxlinskini də Bakıya,
geriyə göndərməsi xahiş edilirdi. Həmin
iclasda ordunun hərbi mükəlləfiyyət yolu ilə təşkil
edilməsi də təklif olunur (səh.20).
1920-ci il noyabr ayının 10-da
çağırılan iclasda Azərbaycan İnqilab Komitəsi
tərkibində və iş prinsipində dəyişiklik etməyi
qərara alır və oradaca rəyasət heyəti
yaradılır. Üç gündən sonra
İnqilab Komitəsi Rəyasət Heyətinin sədri olan N.Nərimanov
Xalq Komissarlarının tərkibini elan edir. Həmin iclasda ölkənin bütün daxili və
xarici təsərrüfat siyasətini həyata keçirən
Ali İqtisadi Şuranın təşkili qərara
alınır.
Banditizmin
ləğvi və cinayətkarların cəzalandırılması
işində özbaşınalığı aradan
qaldırmaq məqsədi ilə İnqilab Komitəsinin 1921-ci
il yanvarın 14-də keçirilən iclasında Azərbaycan
SSR Ali İnqilab Tribunalı ilə Azərbaycan SSR Hərbi Səhra
Tribunalının birləşdirilməsi haqda dekret layihəsi
müzakirə edilərkən “Hökmlər Azərbaycan SSR
İnqilab Komitəsi tərəfindən təsdiq olunur” əlavəsi
ilə qəbul edilmişdir (səh.18).
N.Nərimanov
ölkə başçısı kimi Milli mədəniyyəti,
maarif və səhiyyəni günün tələbi səviyyəsinə
çatdırmağa təxirəsalınmaz vacib vəzifə
kimi baxırdı: kənd və şəhərlərdə
savadsızlığın ləğvi, ixtisas kursları, məktəblərin,
tibb məntəqələrinin, xəstəxanaların
açılması kütləvi hal almışdı. Bakıda Ali-bədii emalatxana, teatr və mədəniyyət
ocaqları yaradılmışdır. N.Nərimanovun
təşəbbüsü ilə şair Mirzə Ələkbər
Sabirin vəfatının 10 illiyi ərəfəsində əsərləri
nəşr edilmiş, “İslamiyyə” binası yanında (25
dekabr 1922-ci ildə) abidəsi ucaldılmışdı.
İnqilab Komitəsi (7 fevral 1921-ci ildə)
Hacı Zeynalabdin Tağıyev teatrının təmiri
üçün 303 milyon vəsait ayırmışdı.
Azərbaycan Xalq Cümhuriyyəti yüksəkixtisaslı
kadrların hazırlanması üçün Fransa,
İtaliya, İngiltərə, Almaniya və Türkiyəyə
təhsil almağa yüz istedadlı gənc göndərmişdi. Aprel
çevrilişindən sonra təqaüdləri kəsilən
tələbələrin maddi vəziyyəti son dərəcə
ağırlaşmışdı. Səkkiz aydan sonra Azərbaycan
Tələbə Mərkəzinin Berlin Komitəsindən tələbə
Hilal Munşiyevin yazıb göndərdiyi həyəcanlı
məktubunda deyilirdi: “Paramız tükəndiyindən təkcə
təhsilimiz deyil, güzəranımız da böhranlı vəziyyətdədir.
9 aydır ki, qeyri-müəyyən və
müşkül halda bulunmaqdayıq. Belə
getsə dolanacağımız fənalaşacaq və təhsilimiz
yarımçıq qalacaqdır”.
Rəsmi
arxiv sənədlərindən göründüyü kimi, tələbələrin
acınacaqlı vəziyyətini təlaşla xəbər
verən məktubla tanış olan N.Nərimanov
dərkənarda yazır: “T.Əliyev və Tağıyev
yoldaşlara. Təcili icra edilsin. Tələbə
komitəsinə yüz min marka göndərilsin” (Bax: R.Qəhrəmanova.
Nəriman Nərimanov. Dünən, bu gün, sabah,
Bakı, Vektor, 2013, səh.68).
Həmin
iclasda N.Nərimanovun təklifi ilə Bəhram Axundov xaricdə
təhsil alan azərbaycanlı tələbələrin
işləri üzrə xüsusi müvəkkil təyin edilməsi
qərara alınır (Bəhram Axundov Azərbaycan Xalq
Cümhuriyyətinin Parlament üzvü olmuşdu. 1919-cu ildə
M.Ə.Rəsulzadənin təklifi və parlamentin qərarı
ilə xaricdə təhsil alan azərbaycanlı tələbələrin
təhsili, maddi təminatı ilə məşğul idi).
1921-ci il iyul ayının əvvəllərindən
1922-ci ilin yanvarına qədər Avropada ezamiyyətə
göndərilən Bəhram Axundov Almaniya, Fransa, İtaliya və
Türkiyə şəhərlərinin ali məktəblərində
təhsil alan azərbaycanlı tələbələrlə
görüşür, yardım edir, onları böhranlı vəziyyətdən
çıxarır. Bəhram Axundov Bakıya qayıtdıqdan
sonra, 1922-ci il mart ayının 2-də “N.Nərimanova
ətraflı hesabat təqdim edir. Beləliklə,
Nəriman Nərimanovun şəxsi göstərişi ilə
xaricdəki azərbaycanlı tələbələrə təhsillərini
müvəffəqiyyətlə davam etdirmələrinə
şərait yaradılması işi təşkil olunur.
1922-ci
ilin axırlarında N.Nərimanov Moskvaya işə göndərildikdən
sonra xaricdə təhsil alan azərbaycanlı
tələbələrə münasibət yenidən dəyişilir
(Bax: Azərbaycan iclaslarının protokolları (1920-1922-ci
illər. Bakı, 2009, səh.6).
Zaqafqaziya respublikalarında sovet hakimiyyəti bərqərar
olunduqdan dərhal sonra üç ölkə - Azərbaycan,
Gürcüstan və Ermənistan arasında narahatlıq
doğuran, münaqişələrə səbəb olan sərhədlərin
tənzimlənməsi təxirəsalınmadan həll
olunmalı idi.
Ona görə də Azərbaycan Xalq Komissarları Sovetinin
1921-ci il 13 iyunda keçirdiyi iclasda Tiflisə
sərhəd məsələlərini müəyyənləşdirən
komissiyaya nümayəndə heyəti göndərilməsi məsələsi
müzakirə olunur. Üç gündən
sonra növbədənkənar iclasda Azərbaycan SSR Xarici
İşlər Komissarı Ə.H.Qarayevin Naxçıvan
bölgəsi və Dağlıq Qarabağ səfəri
haqqında məruzəsi dinlənir. Məlum
olur ki, Ermənistan SSR hakimiyyəti, Dağlıq
Qarabağı ələ keçirmək iddiasında olan erməni
bolşevikləri daşnak siyasətini davam etdirir, hətta
A.Muravyanı Şuşaya xüsusi müvəkkil kimi təyin
etmişlər. N.Nərimanovun təklifilə ərazi məsələləri
həll edilənə qədər A.Mravyanın
Qarabağdakı səlahiyyəti ləğv olunur:
Ş.Orconikidzeyə, Ermənistan İnqilab Komitəsinin sədri
A.Myasnikyana və Azərbaycan Hərbi Dəniz
Komissarlığına etiraz teleqramı göndərilir. Həmin
məsələyə AK(b)P MK siyasi və
təşkilat bürosunda baxıldıqdan sonra N.Nərimanov
Tiflisə RKP MK-nın Qafqaz bürosuna dəvət olunur (səh.
22-23).
1921-ci il iyul ayının 4-də Qafqaz bürosu
plenumunun axşam iclasında RKP MK üzvü Stalinin və
büro üzvlərinin (Orconikidze, Maxaradze, Myasnikov,
Nazarapetyan, Oraxelaşvili və Fiqatnerin) iştirakı ilə
müzakirə edilir. Burada Qarabağ məsələsinə
iki baxış: 1) Qarabağı Azərbaycan hüdudunda
saxlamaq; Bütün əhalinin, erməni və azərbaycanlıların
iştirakı ilə Qarabağda sorğu keçirmək.
2) Qarabağın Dağlıq hissəsini Ermənistan tərkibinə
daxil etmək; sonra sorğunu ancaq Dağlıq Qarabağda
keçirmək səsə qoyulur.
Plenumda
meydana çıxan iki baxışa
iştirakçıların səsverməsindən sonra, nəticədə
qərara alınır: “Dağlıq Qarabağı Ermənistan
SSR-in tərkibinə daxil etmək, sorğunu ancaq
Dağlıq Qarabağda keçirmək”.
N.Nərimanov
qərarla razılaşmır, bəyənatla
çıxış edərək deyir: “Azərbaycan
üçün Qarabağ məsələsinin zəruriliyini
nəzərə alaraq onun RKP MK-nın qəti qərarına
keçirilməsini vacib hesab edirəm”. (Sov.
İKP MK yanında... Azərbaycan filialının Partiya
arxivi, fond 64, siyahı 2, iş 1. Vərəq
118).
Ertəsi günü, 5 iyul. 1921-ci ildə RKP MK Qafqaz bürosu
plenumu iclasında eyni tərkibli iştirakçılar
Qarabağ məsələsini müzakirə edir, səsvermənin
nəticəsi olaraq qərara alınır: “Müsəlmanlar
və ermənilər arasında milli (sülhün)
asayişin vacibliyinin və Yuxarı, həm Aşağı
Qarabağın Azərbaycanla daimi olan Şuşa şəhəri
inzibati mərkəz olmaqla Dağlıq Qarabağa geniş
vilayət muxtariyyatı verilməklə, o, Azərbaycan SSR-in
hüdudlarında saxlanılsın.
N.Nərimanovun
bəyanatına inam və etimadla yanaşan V.İ.Leninin
göstərişi ilə Dağlıq Qarabağın Azərbaycanın
tərkibində saxlanılması haqqında 5 iyul 1921-ci il tarixli qərarda Şuşa şəhəri
inzibati mərkəz olmaqla Dağlıq Qarabağa geniş
vilayət muxtariyyatı verilməsi” Qafqaz bürosu
iştirakçılarının əksəriyyətinin
xristian təəssübkeşliyinin, yerli müsəlman
xalqına xəyanətinin göstəricisi idi.
Erməniliyin fürsət düşən kimi
Dağlıq Qarabağ münaqişəsinə “bəhanə”
imkanı verən bu mürtəce fikrin qəsdən ortaya
atılması niyyətini bu gün tarix sübut edir.
Səfalı Qarabağ Azərbaycanın əzəli və
əbədi torpağıdır. Məhz ona görə
də N.Nərimanov o zaman Azərbaycanın KP Mərkəzi
Komitəsində yuva salmış Sarkis, Mirzoyan kimi
düşmənlərin, Orconikidze və Kirov kimi ermənipərəstlərin
xəyanətini başa düşürdü. Ona görə, Bakıda rəhbərlikdə
olduğu müddətdə Qafqaz bürosunun xəyanətkar
siyasətinin reallaşmasına imkan vermədi. Onun Azərbaycandan uzaqlaşdırılmasından
sonra Dağlıq Qarabağa vilayət statusu verildi.
N.Nərimanov
özü bu barədə sonralar yazırdı: “... Dağlıq Qarabağ Mirzoyanın güclü təsiri
altında muxtar vilayət elan edilmişdir. Mənim vaxtımda bu mümkün
olmamışdır, ona görə yox ki, mən bu muxtariyyətin
əleyhinə idim, sadəcə olaraq ona görə ki, erməni
kəndlilərinin özləri bunu istəmirdilər. Mirzoyan bu müddət ərzində erməni müəllimlərinin
köməyi ilə zəmin hazırladı və məsələni
Zaqafqaziya Diyar Komitəsində keçirdi” (Nəriman Nərimanov.
Məktublar və Qarabağ məsələsinə
dair məktublar. Bakı, Nurlar, 2016, səh.75).
1920-1922-ci illər Azərbaycanda ümumxalq işinə,
camaatın maddi rifah halının
yaxşılaşdırılmasına, maarif və mədəniyyətin
tərəqqisinə, ölkənin hərtərəfli
inkişafına bütün qüvvəsini və
bacarığını əsirgəməyən N.Nərimanov
saf əqidəli, mütəfəkkir ictimai xadim kimi
tanınırdı.
Fanatik bolşevik məmurları N.Nərimanovun ədalətli,
doğru-düzgün sərbəst əməli işində
millətçi təmayülçülük
görürdülər. N.Nərimanov gənclik dövründən
bədii əsərlərində və publisistikasında beynəlmiləlçilik,
dostluq, birlik təbliğ etmişdir. O, ömrü boyu
türk xalqlarının birliyi, Şərq xalqlarının
azadlığı uğrunda mübarizə
aparmışdır.
Çar Rusiyasının müstəmləkəçilik
ənənəsini davam etdirən şovinist bolşevik rəhbərliyi
Nəriman Nərimanovun obyektiv, qərəzsiz islahatlarından
xoşlanmır, cidd-cəhdlə onun səlahiyyətlərini
məhdudlaşdırmağa, qara yaxmağa
çalışırdılar. N.Nərimanov təkləndi,
ciddi hücumlara məruz qaldı. O, ilk illərdəcə
anladı ki, Sovet Rusiyasının yaratdığı “məqsədə
müvafiq ittifaq forması” Çar Rusiyasının
ucqarları mərkəzə birləşdirmək siyasətindən
başqa bir şey deyildir. Sovet Rusiyasının Qafqaza can atmaqda başlıca məqsədi neftə və
Asiyanın dərinliyinə aparan ən mühüm yollardan
istifadə etmək idi. Stalin
açıq-açığına deyirdi: “Qafqazın inqilab
üçün mühüm əhəmiyyəti onun
yalnız xammal, yanacaq və ərzaq mənbəyi olması ilə”,
həm də onun Avropa, Asiya və Türkiyə
arasındakı mövqeyi “Mühüm iqtisadi yollara malik
olması” ilə müəyyən olunur. (Bax: İ.V.Stalin. Əsərləri, IV cild, s.108).
Ölkədə böhranlı ictimai-siyasi və iqtisadi
vəziyyətə baxmayaraq, vahid çoxmillətli dövlət
yaratmaq niyyətində olan bolşeviklər bu istiqamətdə
məqsədyönlü tədbirlər həyata
keçirirdilər. “Müstəqil” respublikalar arasında
federal əlaqələr yaradılır, əks-inqilabi
qüvvələrlə mübarizə aparmaq üçün
dostluq və əməkdaşlıq haqqında ikitərəfli
müqavilələr bağlanırdı. “Bütün
bunlar Azərbaycan SSR-in Rusiya Federasiyasından iqtisadi, siyasi və
hərbi asılılığını artırır, onu tədricən
Rusiyadan asılı vəziyyətə salır və
keçmiş Rusiya imperiyasını fəhlə-kəndli
hökuməti adı ilə yeni Sovet imperiyasına çevirmək
üçün yol açırdı (səh.26).
Ölkədə respublikaları vahid bir məcraya salmaq
istiqamətində hazırlıq gedirdi. Bu məqamda Cənubi
Qafqazda ilk növbədə Azərbaycan, Gürcüstan və
Ermənistan arasında ərazi, iqtisadi, kommunikasiya cəhətdən
bir-biri ilə əlaqədə olması. Vahid
dəmiryolçuların hər üç respublikaya xidmət
etməsi nəzərə alınmaqla Zaqafqaziya Federasiyası
yaradıldı.
Bu ilk addımlar keçmiş Rusiya imperiyası ərazisində
yaşayan xalqları Sovetlər Birliyi adı ilə totalitarizm
cəmiyyət toruna salmağa doğru aparırdı. Stalin müstəqil
respublikalarla RSFSR arasında federativ əsaslarla vahid sosialist
dövləti yaratmaq layihəsini təklif etsə də Lenin
1922-ci ildə Siyasi Büro üzvlərinə göndərdiyi
tənqidi məktubunda “çox cazibəli ideya” -
respublikaların “bərabər ittifaqı” əsasında yeni
dövlət qurumu SSRİ-ni yaratmaq ideyasını ortaya
atdı (səh.11).
Nəhayət,
1922-ci il dekabrın 30-da Moskvada keçirilən
I Ümumittifaq Sovetlər qurultayında SSRİ
yaradıldı.
N.Nərimanov Azərbaycanda Xalq Komissarları Sovetinin sədri
işlədiyi müddətdə böyük nüfuz və səlahiyyətləri
çərçivəsində olduqca faydalı işlər
həyata keçirirdi ki, bu da sovet hökumətinin gizli siyasətini
təmsil edən mənsəbpərəst məmurları
qıcıqlandırırdı. Nəriman Nərimanovu
bəhanə ilə Azərbaycana rəhbərlikdən
uzaqlaşdırmaqla onun Şərqdə nümunəvi,
demokratik, xalq hakimiyyəti - “Müstəqil Sovet Azərbaycanı”
(V.İ.Lenin) yaratmasına imkan vermədilər.
Rus şovinizm azarına yoluxmuş bolşevik məmurları
xalqını, vətənini sevən, bütün Şərq
xalqlarını xristian dünyasının əsarətindən
xilas etməyə çalışan N.Nərimanovu millətçi-təmayülçü
adlandırıb, onun ictimai-siyasi fəaliyyətini, şəxsiyyətini,
bəşəri xidmətlərini unutdurmuşdu. Lakin doğma
xalqı Nəriman Nərimanovu unutmadı. Ulu öndər Heydər Əliyev Türk
dünyasının böyük oğlunu qədirbilən
xalqına qovuşdurdu. Paytaxtımız
Bakının bağrında yüksələn Nəriman Nərimanovun
əzəmətli heykəli sanki müstəqil Azərbaycandan
öz bəxtiyar, xoşbəxt günləri uğrunda
mübarizə aparan Şərq ölkələrinin gələcəyinə
böyük ümid və inamla boylanır.
Teymur ƏHMƏDOV.
Respublika.- 2019.- 27
oktyabr.- S.7