Gənclər Təşkilatlarının IV Milli Konqresi işə başlayıb

Mayın 1-də onlayn formatda Gənclər Təşkilatlarının IV Milli Konqresinin açılış mərasimi keçirilib. Bu barədə AZƏRTAC-a Gənclər və İdman Nazirliyinin mətbuat xidmətindən bildiriblər.  

Gənclər və İdman nazirinin müavini İntiqam Babayev tədbirdə çıxış edərək koronavirus (COVİD-19) pandemiyası zamanı hər bir dövlətin gücünün və imkanlarının sınağa çəkildiyini diqqətə çatdırıb. Nazir müavini qeyd edib ki, Prezident İlham Əliyev tərəfindən irəli sürülən qabaqlayıcı tədbirlər nəticəsində əhalinin sağlamlığının və sosial rifahının qorunması istiqamətində böyük işlər görülür. Hətta pandemiya dövründə də bir çox layihələri icra etmək mümkün oldu, heç bir xəstəlik gənclər siyasətinin inkişafına təsirini göstərə bilmədi. Koronavirus pandemiyası zamanı dövlətlə yanaşı, cəmiyyət də sınağa çəkildi. İ.Babayev nazirliyin həyata keçirdiyi “Heydər Əliyev siyasi məktəbini öyrənirik -  2020”, “İdeya var”, “Tələbə baharı”, “Evdə addımla”, “Evdə qal, təbliğatdan qalma” və digər layihələr haqqında məlumat verib.

Azərbaycan Respublikası Gənclər Fondunun icraçı direktoru Fərid Cəfərov çıxışında pandemiya dövründə rəhbərlik etdiyi təşkilatın fəaliyyəti, o cümlədən Fond tərəfindən gənclər üçün həyata keçirilən “İdeyanı reallaşdır” fərdi qrant müsabiqəsi, Gənc Fondu və BMT-nin Uşaq Fondunun birgə gerçəkləşdirdikləri koronavirus infeksiyası ilə bağlı ictimai maarifləndirmə layihəsi və digər tədbirlər haqqında danışıb. İcraçı direktor dövlət tərəfindən atılan addımların gənclər təşkilatları və gənclər tərəfindən dəstəkləndiyini vurğulayıb. Fərid Cəfərov Prezident İlham Əliyevin çağırışına cavab olaraq koronavirusla mübarizədə dövlət tərəfindən atılan bütün zəruri addımlara, xüsusilə əhalinin maarifləndirilməsi və qayğıya ehtiyacı olan insanlara sosial xidmətlərin göstərilməsi istiqamətində həyata keçirilən tədbirlərə töhfə vermək məqsədilə ölkənin bütün könüllü təşkilatlarının birləşdiyi Azərbaycan Könüllülərinin Əlaqələndirmə Mərkəzinin fəaliyyətindən də bəhs edib. O, gəncləri və gənclər təşkilatlarını dövlət tərəfindən görülən işlərə töhfə verməyə çağırıb.

BMT-nin Azərbaycandakı rezident əlaqələndiricisi Qulam İshaqzai Azərbaycan dövlətinin pandemiya dövründə atdığı mühüm addımlardan danışıb, gənclərin ehtiyacı olan insanlara təmənnasız yardımını xüsusi olaraq diqqətə çatdırıb. Rezident əlaqələndirici gənclərin bu dönəmdə sosial mediadan istifadəsi zamanı çox diqqətli olmalarının, yalnız etibarlı informasiyaları bölüşmələrinin vacibliyini bildirib.

Prezident Administrasiyasının Gənclər siyasəti və idman məsələləri şöbəsinin sektor müdiri Həmid Nəsibov pandemiya dövründə Azərbaycanda əhalinin ölkə başçısının rəhbərliyi ilə atılan addımları dəstəklədiyini, məhz bu tədbirlərin və həmrəyliyin nəticəsində ölkəmizin pandemiya ilə mübarizədə bir uğur hekayəsi yazmaqda olduğunu bildirib. Sektor müdiri mübarizənin hələ başa çatmadığını, maarifləndirmənin davam etdirilməli olduğunu, bu xüsusda gənclər təşkilatlarının üzərinə önəmli vəzifə düşdüyünü qeyd edib. Həmid Nəsibov postpandemiya dövrünə hazırlıqların artıq indidən başlanılmalı olduğunu deyib. O vurğulayıb ki, pandemiyanın ziyan vurduğu bir sıra sahələrdə çalışan insanlar arasında gənclər də az deyil. Prezident Administrasiyasının nümayəndəsi region gənclərinin inkişafı, onların müasir bacarıqlara yiyələnməsi, eləcə də qızların bilik və bacarıqlarının artırılması və bu xüsusda virtual məkanda təlimlərin təşkilinin vacibliyi barədə də danışaraq, bu istiqamətdə də bir sıra mühüm addımların atılmasının vacibliyini diqqətə çatdırıb.

Azərbaycan Respublikası Gənclər Təşkilatları Milli Şurasının sədri Məryəm Məcidova isə son iki ildə görülən işlərlə bağlı təqdimatla çıxış edərək, bu müddətdə 25 tədbir keçirdiklərini, bu tədbirlərdə 120 gənclər təşkilatlarının, ümumilikdə 4500 gəncin iştirakını təmin etdiklərini bildirib.

Mayın 2-dək davam edəcək konqresin ikinci günündə “Pandemiyanın yaratdığı yeni çağırışlar və yeni imkanlar”, “Gənclər təşkilatlarının keyfiyyət əmsalı” mövzuları ətrafında panel müzakirələr olacaq. Eləcə də rəqəmsal öyrətmə və öyrənmənin üstünlükləri, gənclər təşkilatlarının fəaliyyət mexanizmlərinin təkmilləşdirilməsi və onlayn fəaliyyətinin strukturlaşdırılması, onlayn platformalara inteqrasiyası, qiymətləndirilmə mexanizmləri, gənclər təşkilatları tərəfindən gənclərimiz üçün göstərilən xidmətlər, təlimçilərlə işin təşkili mövzuları ətrafında fikir mübadiləsi aparılacaq.

Xatırladaq ki, konqresin keçirilmə təşəbbüsü ilk dəfə 2012-ci ilin noyabrında Gənclər Təşkilatlarının IV Respublika Sərgisində Prezident İlham Əliyevin sərgini ziyarəti zamanı irəli sürülüb. Gənclər Təşkilatlarının Milli Konqresi ilk dəfə 2013-cü ildə, daha sonra 2015-ci və 2017-ci illərdə gənclər təşkilatlarının, eləcə də beynəlxalq qurumların nümayəndələrinin iştirakı ilə təşkil edilib.

AZƏRTAC

Respublika.- 2020.- 3 may.- S.4.