Yumruq kimi birləşən Azərbaycan qalib gələcək!

Bizim Qarabağı azad edirsən,

Sevincdən az qalır qələmim çaşa,

Sağ ol, bundan artıq nə deyim sənə,

Cənab Baş Komandan səni yüz yaşa!

Göründüyü kimi, bu bir bənd şeir ölkə Prezidenti, Ali Baş Komandan cənab İlham Əliyevə ünvanlanıb. Bu günlər ölkəmizdə misilsiz coşqu var. Hamı otuz ilə yaxın Ermənistanın quldur dəstələri tərəfindən təcavüzə məruz qalmış torpaqlarımızın nəhayət, işğaldan azad edilməsini bayram əhval-ruhiyyəsi ilə qarşılayır. Buna tamamilə haqqımız var. Mən də Vətənin bir övladı kimi belə gözəl bayramı bizə bəxş edən ölkə Prezidenti cənab İlham Əliyevi, müzəffər Azərbaycan Ordusunu və xalqımızı ürəkdən təbrik edirəm.

Bildiyimiz kimi, rəşadətli ordumuz hər gün erməni quldurlarının xarabazara çevirdiyi kənd və şəhərlərimizi yağı düşmən tapdağından qurtarır. Təəssüflə qeyd edirəm ki, iki yüz ildən bəri ermənilər tərəfindən ələ keçirilmiş ərazilərimiz geri qaytarılmayıb və bundan ruhlanan hibrid dövlətin rəhbərləri işğalı davam etdirmək, yeni ərazilərimizi zəbt etmək iştahasına düşmüşdülər. Ermənistanın baş naziri Nikol Paşinyanın “Azərbaycana bir qarış da olsa torpaq qaytarmayacağıq” və müdafiə naziri David Tonoyanın “yeni ərazilər üçün yeni müharibə” kimi həyasız bəyanat və hədələri onların xəbis niyyətlərini açıq göstərdi. Ancaq bu dəfə hər şey onların düşündüyü kimi olmadı. 1988-ci ildən başlayan erməni təcavüzü nəhayət, məntiqi sonluğuna yaxınlaşır, yəni qoşunlarımızın uğurlu döyüş əməliyyatları nəticəsində artıq Cəbrayıl, Füzuli, Qubadlı və Zəngilan rayonları murdar ermənilərdən təmizlənib və qalibiyyətli hücumlarımız davam edir.

Azərbaycan Prezidenti, Ali Baş Komandan İlham Əliyev hər dəfə yeni ərazilərin azad edilməsi müjdəsini verəndə və “twitter” yazılarında bir fikri xüsusi vurğulayır. Prezidentimiz xalqla iqtidarın, ordunun birliyini və bu birliyin sarsılmaz olduğunu məmnunluqla qeyd edir. Əlbəttə, keçən iki yüz ildə düşmənlərimiz birliyimizə əngəllər törətsə də, bu dəfə bacarmadı. Təcavüzkar Ermənistan istər siyasətdə, istər beynəlxalq arenada, istərsə də döyüş meydanında bu birlik qarşısında tab gətirmədi. Hamımız şahidik ki, bu gün hər bir Azərbaycan vətəndaşı və xaricdə yaşayan həmvətənlərimiz Prezident İlham Əliyevə haqq işimizdə onun yanında olduğunu, ətrafında sıx birləşdiyini bildirir. Hətta döyüşlərdə bir oğlu şəhid olan ata-analar “təki Vətən sağ olsun” deyir, ikinci, üçüncü oğullarını da ordu sıralarına göndərirlər. Qısaca deyək ki, qələbə qazanılması üçün heç kəs əlindən gələni əsirgəmir. Mübaliğədən tamamilə kənardır ki, indi Azərbaycan xalqının ürəyi öz ordusunun ürəyi ilə birgə döyünür.

Məğlubiyyətdən daha da azğınlaşan Ermənistanın hərbi rəhbərliyi döyüş zonasından on kilometrlərlə aralı Bərdə, Yevlax, Goranboy, Ağcabədi rayonlarına, Mingəçevir və Gəncə şəhərlərinə, hətta Bakı yaxınlığındakı Xızı rayonuna raket zərbələri endirir. Tərtər rayonunun mərkəzi və yaşayış məntəqələri düşmənin artilleriya atəşləri ilə ciddi dağıntılara məruz qalsa da, heç bir ailə öz evini tərk etmir, düşmənlərə öz qəzəb və nifrətlərini bildirir, mərdlik nümayiş etdirirlər.

ABŞ Müdafiə Nazirliyi Baş Qərargahının rəisi, general Mak Konvill Azərbaycanın apardığı azadlıq mübarizəsini yüksək qiymətləndirərək bildirib ki, biz dronlarla müharibə aparmağı Azərbaycandan öyrənməli və öz oprdumuza tətbiq etməliyik, Azərbaycan az itki verməklə qələbə qazanan bir müasir müharibə aparır. Bu sözlər bizim qəlbimizi qürur hissi ilə doldurur və gücümüzün nəyə qadir olduğunun göstəricilərindən biridir.

Biz qürurla deyə bilərik ki, ermənilərin əsrlərlə davam edən işğalına layiqli cavab veririk. Gücümüzün nüvəsində isə dediyimiz kimi, Azərbaycan xalqının sarsılmaz birliyi dayanır. Şübhəsizdir ki, şanlı Ordumuz terrorçu Ermənistanı diz çökdürəcək, torpaqlarımızı erməni quldurlarından təmizləyəcək. Əminliklə demək olar ki, yaxın müddətdə Laçınımız, Şuşamız, Xocalımız, Kəlbəcərimiz və o cümlədən, bütün torpaqlarımız azad ediləcək. Biz tezliklə qalib gələcəyik. Erməni işğalçılarını qovub çıxaracağıq, Qarabağ torpağı da su kimi murdarlıq götürməyəcək.

Zəhra MURADOVA,

pedaqogika üzrə elmlər doktoru.

Respublika.- 2020.- 1 noyabr.- S.7.