Göyçay: Bayraq Muzeyi - zəfər, qürur ünvanı
Bayraq muzeylərinin və Bayraq meydanlarının yaradılması Azərbaycanın dövlət atributlarına ən yüksək səviyyədə göstərilən diqqətdir. Gənc nəslin Azərbaycan bayrağına hörmət ruhunda, əsl vətənpərvər kimi böyüməsində Bayraq muzeylərinin xüsusi əhəmiyyəti var.
Göyçay şəhərinin mərkəzində, ümummilli lider Heydər Əliyevin adını daşıyan meydanın ərazisində yerləşən Bayraq Muzeyinin inşasına 2018-ci ildə başlanılmış və təxminən bir il ərzində tikinti başa çatmışdır. Muzeyin 360 kvadratmetrlik ümumi ərazisinə sərgi zalı, inzibati və yardımçı otaqlar daxildir. Sərgi zalında Azərbaycanın xanlıqlar dövrünün xəritəsi, orta əsrlərə aid döyüşçüləri əks etdirən manekenlər, xanlıqların istifadə etdiyi bayraqlar, XIX əsr Azərbaycan şəhərlərinin gerbləri, qədim metal sikkələr, kağız pullar, Azərbaycan Xalq Cümhuriyyəti, Azərbaycan SSR və müstəqillik dövrlərində qəbul edilmiş gerblər, bayraqlar, Azərbaycanın müxtəlif dövrlərdə qəbul edilmiş konstitusiyaları, Silahlı Qüvvələrimizin müxtəlif qoşun birləşmələrinin geyim formaları, poçt markaları, orden və medallar nümayiş etdirilir.
“Göyçay sakinləri ulu öndər Heydər Əliyevin və ölkə başçısı İlham Əliyevin bayrağımıza olan həssas münasibətindən ağızdolusu danışır”-deyə Göyçay rayon Ağsaqqallar Şurasının sədri Xəlil Orucov bildirdi ki, göyçaylılar həmişə dövlətin və dövlət başçısının yanında olmaqdan qürur duyublar.
Bir mərtəbədən ibarət olan muzeyin ətrafında əkilmiş möhtəşəm çinarlara, dekorativ ağac və gül kollarına nəzər salırıq. Yazın gəlişi ilə gözəl təbiəti olan Göyçay yaşıl libasa bürünüb. Göyçay Bayraq Muzeyinin rəhbəri Nicat Mahmudov bildirdi ki, 2017, 2018-ci illər ərzində Göyçay Rayon İcra Hakimiyyətinin başçısı Mehdi Səlimzadə tərəfindən muzeyin inşa olunmasına başlanılarkən məhz bu əraziyə üstünlük verildi. Tikinti işləri 2019-cu ildə tam olaraq başa çatdı. Həmin ilin 9 noyabr tarixində, yəni, Dövlət Bayrağı Günündə muzeyin açılışı oldu. Açılış tarixi həm də Göyçayda hər il keçirilən Nar bayramına təsadüf edirdi. Məhz bu səbəbdən də buraya gələn yerli qonaqlar, həm də xarici ölkələrdən olan turistlər muzeylə yaxından tanış olublar.
Qeyd edək ki, muzeyin binası müasir standartlara uyğun tikilib. XVIII əsrin II yarısına aid olan xəritə tablosu muzeyin daxilində qabarıq əks etdirilir ki, bu da muzeyə gələn məktəblilərə və tələbə-gənclərə keçmişdə Azərbaycana məxsus ərazilərin xəritəsi ilə yaxından tanış olmağa imkan yaradır.
Maarif RZAYEV
Respublika.- 2021.- 6 may.- S.8.