İstanbulda 20 Yanvar faciəsinin ildönümü ilə bağlı anım mərasimləri təşkil edilib

Azərbaycan xalqının tarixinə Qanlı Yanvar faciəsi kimi daxil olmuş 1990-cı ilin 20 Yanvar hadisələrindən artıq 31 il keçir. Keçmiş sovet dövlətinin hərb maşınının həmin gün Azərbaycan xalqına qarşı həyata keçirdiyi hərbi təcavüz insanlığa qarşı törədilmiş ən ağır cinayətlərdən biri kimi qalacaqdır. Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucaldılar. Böyük itkilərlə, günahsız insanların qətli ilə nəticələnən 20 Yanvar faciəsi Mixail Qorbaçov başda olmaqla cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan Azərbaycan xalqının həm də mübarizliyini, əyilməzliyini, məğrurluğunu nümayiş etdirdi.

Bu qanlı cinayət insanların azadlıq eşqini söndürə bilmədi, xalqımız qanı bahasına olsa da, öz dövlət müstəqilliyinə qovuşa bildi. Aradan illər keçməsinə baxmayaraq, bu tarixi gün dünyanın harasında yaşamasından asılı olmayaraq hər bir azərbaycanlının qan yaddaşına əbədi həkk olunub. Hər il 20 Yanvar günü torpaqlarımızıın bütövlüyü və müstəqilliyimiz uğrunda mübarizədə qurban getmiş şəhidlərin xatirəsi böyük ehtiramla anılır, fotosərgilər keçirilir, konfranslar təşkil olunur.

Keçmiş Sovet imperiyasının Bakıda törətdiyi qanlı qırğının 31-ci ildönümü ilə əlaqədar İstanbulda da anım mərasimləri keçirilib. Azərbaycanın İstanbuldakı baş konsulluğunda 20 Yanvar faciəsi ilə əlaqədar fotosərgi təşkil edilib.Tədbirdə ölkəmizin İstanbuldakı baş konsulu Nərminə Mustafayeva, diplomatik nümayəndəliyin əməkdaşları və media nümayəndələri iştirak ediblər. Anım mərasimində çıxış edən baş konsul 20 Yanvar tarixinin Azərbaycanın müstəqilliyi yolunda atılan mühüm addım olduğunu bildirib. Bu qanlı gecənin ölkəmiz üçün hüzn və azadlıq rəmzi olduğunu deyən N.Mustafayeva bildirib ki, illər ötsə də, Azərbaycan xalqı bu faciəni, eləcə də Vətən müharibəsi zamanı şəhid olmuş qəhrəmanlarımızı heç vaxt unutmayacaq. 44 günlük Vətən müharibəsi nəticəsində tarixi Azərbaycan torpaqlarının uzun illər davam edən işğaldan azad olunduğu barədə danışan baş konsul Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin qəhrəmanlığı və şəhidlərimizin qanı bahasına qazanılan Zəfərin şəhidlərimizin ruhunu şad etdiyini bildirib.

Tədbirdə 20 Yanvar faciəsinin dəhşətlərini əks etdirən fotolar nümayiş olunub. Bu fotoşəkillər 1990-cı il yanvarın 19-dan 20-nə keçən gecə keçmiş sovet hakimiyyəti rəhbərliyinin qərarı ilə Azərbaycana qoşun yeridilməsinin acı nəticələri, Qanlı Yanvar hadisələrinin dəhşətləri ilə bağlı əyani təsəvvür yaradır.

20 Yanvar qətliamının 31-ci ildönümü ilə əlaqədar İstanbulda daha bir konfrans keçirilib. Onlayn formatda keçirilən “Müstəqilliyə gedən yol- 20 Yanvar” adlı konfrans İstanbul Türkiyə-Azərbaycan Dərnəyinin (İSTAD) təşkilatçılığı ilə baş tutub. Tədbirdə Türkiyə-Azərbaycan parlamentlərarası dostluq qrupunun rəhbəri Şamil Ayrım, İSTAD-ın rəhbəri Səfər Qaraqoyunlu və İSTAD-ın sədrinin müavini sosial elmlər üzrə ekspert, türkiyəli yazıçı Mətin Yıldırım çıxış ediblər.

20 Yanvarın Azərbaycanın milli qəhrəmanlıq günü olduğunu deyən çıxışçılar bu tarixin Azərbaycan xalqının yaddaşına əbədi yazıldığını vurğulayıblar. Bildirilib ki, 1918-ci ildə Şərqin ilk demokratik respublikası olaraq qurulan Azərbaycan sonradan sovet hakimiyyəti tərəfindən işğal edilib. 70 il davam edən bu əsarət Azərbaycan xalqında olan müstəqillik ruhunu əsla yox edə bilməyib və 20 Yanvar bunun ən böyük sübutudur. Müstəqillik eşqi ilə yaşayan azərbaycanlılar o Qanlı Yanvar gecəsində əliyalın tankların qarşısına çıxıb, canları bahasına uzun illər gözlənilən azadlığa qovuşublar. Azərbaycanın müstəqilliyini tanıyan ilk ölkənin Türkiyə olduğunu xatırladan çıxışçılar bu iki respublika arasında əsrlərə dayanan qardaşlıq bağlarının dünya üçün bir nümunə olduğunu vurğulayıblar. Bildirilib ki, daim birlikdə hərəkət edən iki qardaş ölkə 44 gün davam edən Vətən müharibəsində Azərbaycanın əldə etdiyi Qələbə münasibətilə Bakıda keçirilən paradda da bu birliyi bir daha bütün dünyaya nümayiş etdirdi.

Konfransda Azərbaycanın və Türkiyənin ümummilli liderləri Heydər Əliyevin “bir millət, iki dövlət” və Mustafa Kamal Atatürkün “Azərbaycanın kədəri kədərimiz, sevinci sevincimizdir” kəlamları səsləndirilib. Tədbir çərçivəsində 20 Yanvar faciəsini əks etdirən fotoşəkillərdən ibarət sərgi nümayiş etdirilib.

Esmira Yazkan ASLANOVA,

“Respublika” qəzetinin Türkiyə üzrə müxbiri.

Respublika.- 2021.- 22 yanvar.- S.5.