“Azərsun Holdinq” regionda analoqu olmayan istehsal müəssisələrini Azərbaycanda yaradır.

Azərbaycanda və ölkə hüdudlarından kənarda ciddi maraqla izlənən 2008-ci ilin 15 oktyabr prezident seçkiləri kifayət qədər demokratik, azad, şəffaf şəraitdə keçməklə respublikamızın davamlı iqtisadi və demokratik inkişafında keyfiyyətcə yeni mərhələnin əsasını qoymuşdur. Seçkilərin yekun nəticələri xalqın öz gələcəyi baxımından iradə və qətiyyət nümayiş etdirdiyini, habelə Heydər Əliyev siyasi kursunun alternativsizliyini tam təsdiqləmişdir. Ötən beş ildəki əzmkar fəaliyyəti ilə xalqın böyük etimadını qazanmış cənab İlham Əliyevin seçkilərdəki növbəti qələbəsi də ölkə vətəndaşlarının prinsipial mövqeyini əks etdirmişdir. Azərbaycan Prezidenti cəmiyyət həyatının bütün sahələrində dinamik tərəqqi və yüksəlişi təmin etmiş, habelə davamlı iqtisadi nəticələrin əldə olunması baxımından iş adamlarını, sahibkarları dəstəkləmiş, onların fəaliyyətinin stimullaşdırılması istiqamətində ardıcıl tədbirlər həyata keçirmişdir.

Özəl sektorda xüsusi yeri, sanbalı və çəkisi olan "Azərsun Holdinq"in prezidenti Abdulbari Gözəl müxbirimizə demişdir ki, cənab İlham Əliyevin ikinci dəfə Azərbaycan Prezidenti seçilməsi ölkə iqtisadiyyatın və sahibkarlığın inkişafında keyfiyyətcə yeni mərhələ açacaqdır:

- Azərbaycan xalqının 2008-ci ilin 15 oktyabr tarixli müdrik seçimi tamamilə gözlənilən və məntiqi idi. Çünki son beş ildə Azərbaycanın qazandığı böyük uğur və nailiyyətləri öz gündəlik həyatında qabarıq hiss edən Azərbaycan vətəndaşları bu siyasətə alternativ görmürdülər. Cənab İlham Əliyev Prezidentlik dövründəki əzmkar fəaliyyəti ilə hər bir azərbaycanlının böyük rəğbət və etimadını qazanaraq milli liderə çevrilmişdir. Fikrimcə, bu, həm də cənab İlham Əliyevin hər bir vətəndaşın maraqlarını uca tutması, çoxluğun mənafeyinə cavab verən siyasət yeritməsi ilə bağlıdır. Dövlət başçısı zaman etibarilə o qədər də böyük olmayan bir müddətdə respublikanı dinamik inkişaf və tərəqqi yoluna çıxara bildi. Azərbaycan ötən beş ildə bütün sahələrdə inkişaf edərək yüksək iqtisadi nailiyyətlərə imza atdı. Qısaca vurğulamaq kifayətdir ki, ötən beş ildə Azərbaycanın ümumi daxili məhsul istehsalına görə dünyada lider dövlətlərdən biri olaraq qalması, büdcəsini 10 dəfədən çox artırması, sənaye potensialının 2,7 dəfə yüksəlməsi, milli sahibkarlığın ÜDM-dəki xüsusi çəkisinin 85 faizə çatması olduqca böyük uğurlardır.

Ötən müddətdə regionların inkişafı məsələləri də dövlət başçısının xüsusi diqqət mərkəzində olmuşdur. Bu istiqamətdə ardıcıl tədbirlər həyata keçirilmişdir. İcrası bu gün də uğurla davam etdirilən "Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)" mahiyyətcə təkcə davamlı və tarazlı regional inkişafı deyil, həm də insan amilinin yüksəlişinə xidmət edən strategiya kimi aktuallığını qoruyub saxlayır. Dövlət başçısı seçkilər ərəfəsində bir daha ayrı-ayrı bölgələrə səfər edərək proqramın yerlərdəki icrası vəziyyəti ilə tanış olmuş, vətəndaşların arzu və istəklərini onların özündən eşitməyə üstünlük vermişdir.

2008-ci ilin dövlət büdcəsinin, həm də investisiyayönümlü olması ölkəmizə xarici sərmayələrin cəlbi baxımından vacib əhəmiyyət daşıyır. Adətən dövlətin payı və birbaşa sərmayəsi olan qlobal biznes layihələri iş adamları, xüsusilə xarici sərmayədarlar üçün daha cəlbedici görünür. Hökumətin investisiya layihələrinə, o cümlədən infrastrukturun yeniləşdirilməsinə xüsusi diqqət yetirməsi, bu sahədə əməli tədbirlərin həyata keçirilməsi sahibkarların normal fəaliyyətinə şərait yaradır.

"Ötən beş ildə ölkə iqtisadiyyatının dinamikası ilk növbədə özəl sektorun uğurlu fəaliyyəti hesabına mümkün olmuşdur. Daxili investisiya qoyuluşunun həcminə görə Azərbaycanda lider şirkətlərdən olan "Azərsun Holdinq"in fəaliyyəti bu baxımdan xüsusi qeyd olunmalıdır. 2006-cı il mart ayının 23-də Azərbaycan Prezidenti İlham Əliyevin iştirakı ilə şirkətin ən modern texnologiya əsasında inşa olunmuş İmişli Şəkər Zavodunun açılış mərasimi keçirilmişdir. Cənubi Qafqaz regionunda ən müasir və böyük Şəkər Zavodunun fəaliyyətə başlaması "Azərsun Holdinq"in təkcə regionların inkişafına deyil, həm də respublikamızda güclü sənaye potensialının formalaşmasına mühüm töhfəsi olmuşdur.

İmişli Şəkər Zavodundan sonra adınız Azərbaycanda Kənd Təsərrüfatı sahəsinə yeniliklər gətirən insanların adları ilə birlikdə çəkilir. "Bu ehtiyac nədən yarandı və bu sahədə hədəfləriniz nədir?" sualımıza tanınmış iş adamının məntiqli cavabı oldu. O dedi ki, mən təbiəti və torpağı çox sevən adamam və özümü torpağın bir parçası hesab edirəm. Çatlamış torpağa verdiyim suyu təşnə qəlbimə tökmüş kimiyəm. İmişli Şəkər Zavodunu tikməyə isə məni ümummilli liderimiz Heydər Əliyev təşviq edib.

Tamamilə avtomatlaşdırılmış və son texnologiyalarla təchiz olunmuş İmişli Şəkər Zavodu gündə 5000 ton şəkər çuğundurunu və 1200 ton xam şəkəri emal etmək gücünə malikdir. Hazırda emal gücü bir mövsümdə 600-650 min ton şəkər çuğunduru təşkil edir. Zavodun inşasına və istifadəyə verilməsinə 100 milyon ABŞ dolları sərmayə sərf olunmuş və fəaliyyətə başlaması ilə əlaqədar əlavə 14 milyon dollar dövriyyə vəsaiti yaradılmışdır. "Azərsun Holdinq" yaxın illərdə daha 10 milyon ABŞ dolları həcmində əlavə vəsait cəlb etməklə gündəlik istehsal gücünü 1500 tona, çuğundur istehsalı üzrə isə mövsümdə 900 min tona çatdırmaq niyyətindədir. 70 hektarlıq ərazidə müasir tələblər səviyyəsində inşa olunmuş zavodda 1300-dən artıq insanın daimi işlə təmin olunması onun milli iqtisadi inkişafdakı müstəsna rolunu aşkara çıxarır. Zavodun inşaat-quraşdırma işlərinə cəlb olunmuş işçilərin 90 faizini Azərbaycan, qalan 10 faizini isə Türkiyə, Ukrayna, Çexiya, Polşa, Almaniya və İran mütəxəssisləri təşkil etmişlər.

İmişli Şəkər Zavodu qısa müddətdə öz uğurlu fəaliyyəti və müasir iş metodu ilə Azərbaycan regionlarının sosial-iqtisadi inkişafına mühüm təkan vermişdir. "Anadolu Kənd Təsərrüfatı" Məhdud Məsuliyyətli Cəmiyyətinin və İmişli Şəkər Zavodunun həyata keçirdiyi şəkər çuğunduru kampaniyası Azərbaycanda kənd təsərrüfatını canlandıran mühüm tədbirlərdən biri kimi vurğulana bilər. Bu strateji müəssisə faktiki olaraq Azərbaycan fermerlərini geniş miqyasda şəkər çuğunduru istehsalına başlamağa həvəsləndirmişdir. Sabirabad, Saatlı, Biləsuvar, Beyləqan, Ağcabədi və Bərdə rayonları şəkər çuğunduru istehsalında daha uğurlu nəticələr əldə edirlər.

2006-cı ilin oktyabr ayından İmişli Şəkər Zavodunda fermerlərin istehsal etdiyi şəkər çuğundurunun qəbulu kampaniyasına başlanılmışdır. Fermerlərin geniş miqyasda şəkər çuğundurunun becərilməsinə başlaması minlərlə kəndlinin də işlə təmin edilməsində mühüm rol oynayır. Şəkər çuğunduru hər sota yüksək məhsul verən, çox gəlirli, digər tərəfdən isə torpağın məhsuldarlığını artıran, başqa bitkilərin də məhsuldarlığına müsbət təsir göstərən bitkidir. Şəkər çuğundurunun becərilməsində məhsuldarlığı təmin etmək üçün əkin sahəsinə xüsusi diqqət yetirilməli, yaxşı qulluq edilməli və gübrələnməlidir. Kənd təsərrüfatı sahəsində xüsusi yeri olan şəkər çuğundurunun becərilməsi üçün Azərbaycan fermerlərinə müasir təsərrüfatla əlaqədar lazımi texniki və nəzəri dəstək də göstərilir. "Anadolu Kənd Təsərrüfatı" MMC yüksək məhsul əldə etmək üçün, keyfiyyətli toxumun əldə edilməsində, torpağın hazırlanması, gübrələnməsi və məhsulun becərilməsində Azərbaycan kəndlisinə hərtərəfli dəstək verir. Fermerlər əkindən biçinə qədər müddətdə xaricdən gətirilən müasir təsərrüfat avadanlıqları ilə təmin edilirlər.

Azərbaycan "Azərsun Holdinq"in uğurlu fəaliyyəti sayəsində artıq keyfiyyətli şəkəri ilə də tanınmağa başlamışdır. Azərbaycanın sənaye inkişafı üçün böyük əhəmiyyət kəsb edən zavodun istehsal etdiyi yüksək keyfiyyətli məhsul dünyanın bir sıra qabaqcıl laboratoriyalarında testdən uğurla çıxmış, yüksək medallara layiq görülmüşdür. Respublikamızdakı "Coca-Cola" və "Pepsi-Cola" kimi nəhəng şirkətlər qısa zamanda İmişli Şəkər Zavodunun böyük müştərisinə çevrilmişlər. "Coca-Cola" şirkəti ötən il zavodun istehsalı olan şəkəri Belçikada beynəlxalq laboratoriyada test etdirmiş və alınan nəticələr məhsulun Avropa keyfıyyətindən də yüksək olduğunu göstərmişdir. Belə yüksək keyfiyyətli məhsulun istehsal edilməsi isə, ilk növbədə İmişli Şəkər Zavodunun ən müasir texnologiya və biznes konsepsiyaları əsasında fəaliyyət göstərməsi, güclü kadr potensialı formalaşdırmasıdır. İmişli rayonundan olan gənclər zavodun avtomatlaşdırma, elektrik və istehsal kimi mühüm bölmələrində böyük nailiyyətlər əldə edirlər.

"Azərsun Holdinq"in ölkəmizin qida sənayesi sektorunda həyata keçirdiyi layihələr, yağ, çay, kartontara, Qafqaz konserv, Lənkəran çay və konserv, Zaqatala fındıq zavodlarından başqa siz daha hansı layihələri həyata keçirməyi nəzərdə tutursunuz" sualında da Barı bəyin cavabı ürəkaçan və sevindirici oldu.

Bundan başqa, İmişlidə-Azərbaycan Şəkər İstehsalat Birliyinin ərazisində yeni sənaye kompleksinin də inşasına başlanmışdır. Burada ildə 180 min ton istehsal gücünə malik qarışıq, müxtəlif çeşiddə, iri və xırdabuynuzlu mal-qara, quş və broyler yemləri, eləcə də xam bitki yağları istehsal olunacaqdır. Eyni zamanda bu kompleksdə istehsal gücü günə 300 ton olan şəkər çuğunduru cecəsi qurutma sexi də inşa ediləcəkdir.

"Azərsun Holdinq" ölkəyə sərmayə qoyuluşunu uğurla davam etdirir. Yaxın gələcəkdə şirkət Kürdəmir rayonunda illik istehsal gücü 12 min ton olan Süd Emalı Zavodu, habelə illik istehsal gücü 50 min ton olan Masazır Duz Zavodu, Etil Spirti Zavodu inşa etdirmək niyyətindədir. Sumqayıt sənaye zonasında 30 milyon avro sərmayə qoyuluşu ilə qurulacaq kağızın təkrar emalı fabriki isə Azərbaycanla yanaşı Dağıstan, Türkmənistan və Gürcüstanın kağıza olan tələbatını ödəyəcəkdir.

Şirkət bir sıra sosial layihələrin reallaşmasında da fəal iştirak edir. Bu baxımdan yaxın gələcəkdə "Qarabağ" Futbol Klubu üçün nəinki Azərbaycanda, regionda analoqu olmayan böyük idman kompleksinin inşasinı nəzərdə tutur. Bununla yanaşı, Binə qəsəbəsində 300 hektarlıq ərazidə sağlamlıq, yaşayış və ticarət mərkəzlərinin, universitet və təhsil kompleksinin, qolf meydançasının tikintisinə başlanmışdır. 2 milyard dollarlıq bu layihə nəticəsində yaranacaq nəhəng kompleks "Xəyal adası" adlanacaqdır. "Xəyal adası" gerçəkdən xəyallarımızda qurduğumuz fərqli bir şəhərcik olacaqdır.

"Azərsun Holdinq"in Azərbaycan iqtisadiyyatının inkişafı naminə bundan sonra da böyük işlər görmək, strateji layihələri uğurla gerçəkləşdirmək əzmindədir. Şirkət fəaliyyət göstərdiyi bütün sahələrə kompleks yanaşır. Yeni qurulan müəssisələrin xammalının da Azərbaycanda istehsalı holdinqin əsas prioritetlərindəndir. Bu həm istehsal, həm də müəssisələrin asılılığının minimuma endirilməsi baxımından mühüm əhəmiyyət kəsb edir. Xüsusilə də regionların inkişafına xidmət edən layihələr holdinq üçün əsas hədəflərdəndir. Minlərlə insanın məşğulluğuna şərait yaradan bu müəssisələr ildən-ilə güclənir, inkişaf yolunu tutmuş Azərbaycanı bölgənin istehsal mərkəzinə çevirir.

Ölkəmizdə mövcud olan əlverişli və münbit sahibkarlıq mühitindən səmərəli şəkildə faydalanan şirkət Azərbaycanın Prezidenti İlham Əliyevin müəyyənləşdirdiyi strateji vəzifələrin həyata keçirilməsinə bundan sonra da öz töhfəsini verməyə çalışacaqdır. İnanırıq ki, İlham Əliyevin yenidən Prezident seçilməsi Azərbaycanın hərtərəfli inkişafına, habelə milli sahibkarlar təbəqəsinin cəmiyyətdəki mövqeyinin daha da möhkəmlənməsinə yaxşı imkanlar açacaqdır.

Türkiyə Cümhuriyyətinin prezidenti Abdullah Gül Azərbaycanda olarkən Bakıda "Azərsun Holdinq "in maliyyə dəstəyi ilə inşa edilmiş yeni bir məktəbin açılış mərasimində olmuşdur. Yeni təhsil ocağının qırmızı lentini kəsən cənab Gül öz ölkəsində də yaxşı tanınan iş adamı Abdulbari Gözələ belə nəcib əməl uçün dərin minnətdarlığını bildirdi. Hər iki ölkənin səfirləri və təhsil nazirləri "Azərsun Holdinq" rəhbərinin həyata keçirdiyi yüzlərlə humanitar tədbirdən biri olan təhsilə qayğı layihələrini alqışladılar.

Rəhimzadə M.

Respublika.- 2008.- 4 dekabr.- S.4.