Milli təhsilimizin inkişafına əvəzsiz xidmət

Hər bir tarixi mərhələdə cəmiyyətin tərəqqisi bilavasitə təhsilin inkişafından, onun əhəmiyyətinin düzgün qiymətləndirilməsindən asılı olub. Bu gün təhsilin rolu və əhəmiyyəti qloballaşmanın getdikcə vüsət aldığı, insan resurslarının, elm və texnologiyanın iqtisadi inkişafda həlledici amilə çevrildiyi çağdaş dünyamızda getdikcə artmaqdadır. Elə bu səbəbdən BMT XXI yüzilliyi "Təhsil əsri" elan etmişdir. Yüksək intellektə malik insan kapitalının formalaşmasında, davamlı inkişafa zəmin yaradan güclü iqtisadiyyatın qurulmasında təhsilin rolu indi daha aktuallıq kəsb edir. Bu mənada respublikamızda milli təhsilin inkişafı istiqamətində həyata keçirilən hərtərəfli layihələrin uğurlu nəticələrini xüsusi qeyd etmək lazımdır. Ölkəmizdə digər sahələrlə yanaşı milli təhsilimizin formalaşdırılması, onun beynəlxalq səviyyəyə çatdırılması sahəsində əldə olunan bütün nailiyyətlər məhz ümummilli liderimiz Heydər Əliyevin adı ilə bağlıdır.

Paytaxtın Yasamal rayonundakı Arif Hüseynzadə adına 20 saylı məktəbliseyin direktoru Əkbər Qocayev bizimlə söhbətində bu və ya digər məsələlərə aydınlıq gətirərək bildirdi ki, ulu öndərimizin 1999-cu ilin iyun ayında imzaladığı sərəncamla "Azərbaycan Respublikasının Təhsil Sahəsində İslahat Proqramı" təsdiq edildi. Bu islahatların mahiyyətinə uyğun olaraq ölkəmizdə yeni əsrin yeni təhsil sisteminin yaradılması, təhsilimizin məzmununun yeniləşdirilməsi, təhsilin maddi-texniki bazasının möhkəmləndirilməsi, informasiya texnologiyalarının tətbiqi istiqamətində geniş layihələrin reallaşdırılması respublikamızda milli təhsil sisteminin tərəqqisinə güclü təkan verdi.

Müasir Azərbaycan tarixinin bütöv bir qərinəsi yaddaşlarda məhz Heydər Əliyev epoxası kimi qalacaq, həmişə məhəbbət və ehtiramla, minnətdarlıqla yad olunacaqdır. Siyasi tariximizə qurucu və xilaskar kimi daxil olmuş ulu öndərimiz Azərbaycan xalqının taleyində, onun mənəvi-siyasi və ictimai həyatında misilsiz xidmətlər göstərən dahi bir şəxsiyyətdir. O, hakimiyyətdə olduğu bütün dövrlərdə daim ölkəsinin sabahını, gələcəyini düşünmüş, əməli fəaliyyətini də bu prinsiplər əsasında qurmuşdur. Ümummilli liderimiz öz zəngin təcrübəsi, yüksək intellekti, milli mədəniyyətimizə və mənəviyyatımıza dərindən bələd olması sayəsində ardıcıl olaraq milli tarixi siyasətimizi işləyib hazırlamış və bütün çətinliklərə sinə gərərək onu dönmədən həyata keçirmişdir. Heydər Əliyev həyatının mənasını yalnız xalqına xidmətdə görmüş, ömrünü onun xoş, firavan gələcəyinə həsr etməkdən şərəf duymuşdur. Qismətinə taleyüklü problemlərin həlli kimi ağır vəzifələri yerinə yetirmək missiyası düşən insanlar tarixdə özlərinə əbədiyaşarlıq ömrü qazanırlar. Tarix bu mənada Heydər Əliyev kimi böyük şəxsiyyəti zamanın fövqünə qaldıraraq ona ölməzlik haqqı vermişdir.

Böyük öndərimizin həyat amalı bütün varlığı qədər sevdiyi Azərbaycan xalqına, dövlətçiliyinə, ölkəmizin siyasi, sosial-iqtisadi, mənəvi inkişafına xidmət olub. Özünün dönə-dönə vurğuladığı kimi bütün gücünü və iradəsini yalnız müdrik və qədirbilən xalqından alıb. Məhz bu birlik sayəsində Azərbaycan qısa zaman kəsiyində əsrə bərabər yol keçərək müasir dünyada özünə layiq yerini tuta bilibdir. Ötən illər ərzində xalqımız müstəqil Azərbaycan dövlətinin qurucusu və memarı Heydər Əliyevin rəhbərliyi dövründə bəyan etdiyi demokratik, hüquqi və dünyəvi dövlətini qurub, onun Qərbin ən mütərəqqi dəyərlərinə söykənən təsisatlarını yaradıb. Həyatımızın bütün sahələrində köklü dəyişikliklər baş verib, respublikamız hərtərəfli və dinamik inkişaf mərhələsinə qədəm qoyubdur.

Məktəb direktoru söhbətinə davam edərək bildirdi ki, ümummilli liderimiz tərəfindən əsası qoyulan təhsil islahatları ölkə başçısı möhtərəm İlham Əliyevin rəhbərliyi altında uğurla davam etdirilir. Təhsil sahəsinin beynəlxalq standartlar səviyyəsində qurulması dövlət siyasətinin prioritet istiqamətlərindən biridir. Yeni məktəb binalarının tikilməsi, mövcud təhsil müəssisələrinin əsaslı təmiri, onların maddi-texniki təchizatının yaxşılaşdırılması bu sahəyə daima artan dövlət qayğısının bariz nümunəsidir. Təhsil sahəsində perspektivli layihələrin həyata keçirilməsində Heydər Əliyev Fondunun xidmətləri daha böyükdür. Dövlət başçısının sərəncamı ilə əsaslı təmir olunan Arif Hüseynzadə adına 20 saylı məktəb-lisey dövlət qayğısına cavab olaraq tədrisin keyfiyyətinin yüksəldilməsi sahəsində əzmlə çalışır. Onu da qeyd edim ki, 50 yaşı tamam olan məktəbimizin özünəməxsus ənənələri var və bu tədris ilinə də ciddi hazırlıq görülmüşdür. Artıq bu hazırlığın bəhrələri özünü büruzə verir. Məktəbimizdə dövlətçiliyə sədaqət, hərbi vətənpərvərlik mövzuları daim geniş təbliğ olunur, dahi şəxsiyyətlərimizin həyat və fəaliyyəti mütəmadi tədbirlərlə şagirdlərimizə örnək kimi aşılanır.

"Təhsil millətin gələcəyidir" deyən ümummilli liderimizin anım günü ilə əlaqədar məktəbimizdə silsilə tədbirlərin həyata keçirilməsi nəzərdə tutulubdur. Onu da xüsusi olaraq qeyd edim ki, məhz ulu öndərə ehtiram, məktəbin ilboyu fəaliyyətində daima təkrarlanan vacib tədbir kimi ardıcıl gündəmdə saxlanılır. Anım günündə bütün siniflərdə bir dərs onun mənalı həyatına həsr olunacaqdır. Məktəbimizdə bu günlə bağlı divar qəzetləri təşkil olunubdur. Xüsusi guşələr, stendlər məktəbin görünən yerlərində yaradılıbdır. IX-XI sinif şagirdləri arasında ən yaxşı inşa yazısı müsabiqəsi keçirilir. Qaliblər mükafatlandırılacaqlar. Həmin gün, eyni zamanda tamamilə yenidən qurulan konfrans zalının açılışı olacaqdır. Heydər Əliyev irsinin öyrədilməsi mövzusunda konfrans keçiriləcəkdir. Şagirdlərimizə ümummilli liderimiz Heydər Əliyev və akademik Zərifə xanım Əliyevanın ömür salnaməsi ilə bağlı film nümayiş etdiriləcəkdir.

Əkbər müəllim söhbətini yekunlaşdıraraq dedi ki, milli təhsilimizin qurucusu Heydər Əliyevin gənclərə örnək həyat və fəaliyyəti gələcəyin dövlət qurucuları olan şagirdlərimizin həyat mövqeyinin formalaşmasında əvəzsiz irsdir. Məktəb kollektivi bu mənada nəzərdə tutulan tədbirlərin yüksək səviyyədə yerinə yetirilməsi üçün ciddi hazırlıq görübdür.

Kamal M.

Respublika.- 2008.- 11 dekabr.- S.7.