Azərbaycan Cənubi Qafqazda siyasi cəhətdən sabit, iqtisadiyyatı güclü ölkədir

Dünya və Avropa Birliyində nüfuzu artan, siyasi və iqtisadi mövqeyi möhkəmlənən Azərbaycanın imicinin yüksəlməsinin səbəbi düzgün müəyyənləşdirilən, balanslaşdırılmış daxili və xarici siyasətdir. Başa çatmaqda olan 2008-ci il ərzində ölkə iqtisadiyyatı dinamik inkişafını əvvəlki yüksək templə davam etdirmişdir. Son dörd ildə iqtisadi artım sürətinə görə, dünyada birinci yeri tutan Azərbaycan bu il ümumi daxili məhsul istehsalını 15 faiz artırmışdır. Sənaye istehsalının artımı 12 faiz təşkil etmiş, kənd təsərrüfatında artım 8 faizdən çox olmuşdur.

2008-ci ildə ölkədə bütün sahələrdə inkişaf sürətlə gedib, regionların sosial-iqtisadi inkişafı Dövlət Proqramı uğurla başa çatdırılmışdır. Azərbaycan Prezidenti İlham Əliyev bildirmişdir ki, regionlarda böyük işlər görülüb, rayon, şəhər və kəndlərimizin sosial mənzərəsi tamamilə dəyişib. Son beş il ərzində əksər rayonların iqtisadiyyatı iki dəfədən çox artmışdır. Yüksəlişin əsas səbəbi ilk növbədə qeyri-neft sektorunun sürətli inkişafı ilə bağlıdır.

Dövlətimizin rəhbəri müxtəlif səviyyəli tədbirlərdə dəfələrlə vurğulamışdır ki, qeyri-neft sektorunun davamlı inkişafı dövlətin diqqət mərkəzində olacaqdır. Xatırladırıq ki, Prezident İlham Əliyevin 11 fevral 2004-cü il tarixli fərmanı ilə təsdiqlənən "Regionların sosial-iqtisadi inkişafına dair Dövlət Proqramı"nda neft gəlirlərindən səmərəli istifadə və bunun nəticəsində qeyri-neft sektorunun inkişaf etdirilməsi başlıca yer tutmuş, bu istiqamətdə məqsədyönlü tədbirlər həyata keçirilmişdir. Ümumi daxili məhsul istehsalında özəl sektorun payının artması fikrimizə əyani sübutdur.

Ölkəmizdə sosial-iqtisadi məsələlərin həllinə xüsusi fikir verilir. Məktəblər, xəstəxanalar, poçt-rabitə, məişət, ictimai-iaşə, uşaq bağçaları inşa olunur, yollar, körpülər salınır, yaşayış binaları və inzibati idarə obyektləri, idman kompleksləri, istehsal müəssisələri və s. tikilib istifadəyə verilir.

Son rübdə minimum əmək haqqı və minimum pensiyaların baza hissəsi artırılmışdır. İnsanların həyat şəraitinin daha da yaxşılaşdırılması üçün məqsədyönlü tədbirlər həyata keçirilmişdir. Sənaye və kənd təsərrüfatı sahələrinin inkişaf etdirilməsi üçün dövlət tərəfindən maliyyə dəstəyi göstərilir. İri iqtisadi layihələrin reallaşdırılması üçün sərmayələr qoyulur və kreditlər verilir.

Dövlət sahibkarlıq fəaliyyətinin genişləndirilməsi üçün özəl təsərrüfatla məşğul olanlara lazımi şərait yaradır, onların texnika ilə, toxumla, gübrələrlə təmin olunmasına kömək göstərir. Artıq xeyli vaxtdır ki, özəl müəssisələrə yersiz müdaxilələrin, əsassız yoxlamaların aradan qaldırılması üçün müvafiq tədbirlər görülmüşdür ki, bu da istehsalın daha da yüksəlməsinə müsbət təsirini göstərmişdir.

Cəmiyyətin müxtəlif sahələrinin sürətli inkişafı istiqamətində görülən işlər, həyata keçirilən islahatlar bəhrəsini verməkdədir. Azərbaycan Cənubi Qafqazda lider dövlətə çevrilmişdir. Müəyyən sahələrdə isə hətta Avropa və dünya ölkələri arasında ən yüksək pillədə bərqərar olmuşdur.

Dövlət büdcəsinin neft gəlirlərindən asılılığını aradan qaldırmaq üçün vaxtında atılmış addımlar indi müsbət nəticəsini göstərməkdədir. Məlumdur ki, son bir neçə ayda dünya iqtisadi böhran keçirir.

İnflasiya, işsizlik, istehsalın aşağı həddə düşməsi və digər mənfi meyillər dünya ölkələrini və xalqlarını sıxmaqdadır. Bu problemə münasibət bildirən Prezident İlham Əliyev vurğulamışdır: "Son üç ay ərzində energetika və neft qaz sektorunda işlərimiz çox uğurlu aparılmışdır. Baxmayaraq ki, bölgədə yaranmış böhranlı vəziyyət bizim iqtisadi maraqlarımıza ziyan vurmuşdur, ancaq Azərbaycan dövləti və xalqı bunu hiss etmədi, yəni bu insanların gündəlik həyatında özünü göstərmədi. Düzdür, Azərbaycanın ixrac imkanları qısa müddət müəyyən dərəcədə məhdudlaşmışdı, ancaq bizim çevik hərəkətlərimiz və mövcud olan bütün infrastruktur layihələrimiz və artıq güclü olan imkanlarımız yol verdi ki, biz bu vəziyyətdən minimum itkilərlə çıxaq".

Əlbəttə, burada güclü iqtisadi imkanlar, möhkəm siyasi sistem və dövlətçilik prinsiplərinin güclü olması ən başlıca amillərdir. Hazırda biitün dünyada davam edən maliyyə böhranı bir çox ölkələrin iqtisadi potensialına ağır zərbə vursa da ölkəmiz buna hazır olduğundan böhran o qədər də ağrılı keçmir. Bu problemlə bağlı fikrini davam etdirən dövlətimizin başçısı demişdir: "Bütün bunlar çox narahatedici hadisələrdir. Amma biz düşünülmüş siyasətlə və yaradılan güclü iqtisadiyyatla özümüzü bu böhranlı vəziyyətdən qoruyuruq. Nə Azərbaycan dövləti, nə Azərbaycan iqtisadiyyatı, nə də Azərbaycan vətəndaşı bu böhranı hiss edir. Bu, böyük nailiyyətdir və bir daha onu göstərir ki, bizim düşünülmüş iqtisadi siyasətimiz, risklərə çox ehtiyatla yanaşmağımız ən düzgün siyasətdir".

İlyasov V.

Respublika.- 2008.- 19 dekabr.- S. 1.