Sosial müdafiə tədbirləri gücləndirilir

Ölkəmizin sosial-iqtisadi qüdrəti artdıqca, iqtisadiyyatın inkişaf templəri yüksəldikcə, əhalinin sosial müdafiəsinin gücləndirilməsi, yoxsulluğun minimuma endirilməsi sahəsində ardıcıl tədbirlər həyata keçirilir. Respublika Prezidenti cənab İlham Əliyevin son vaxtlar imzaladığı sərəncamlar əhalinin həyat şəraitinin yüksəldilməsinə, insanların maddi durumunun yaxşılaşdırılmasına yönəldilmiş səmərəli addımlar kimi qiymətləndirilir. Bölgə müxbirimiz Beyləqan rayonunda bu sahədə görülən tədbirlər haqqında məlumat verməyi rayon əhalinin sosial müdafiəsi mərkəzinin direktoru İnqilab Tağıyevdən xahiş etmişdir. İ. Tağıyev demişdir:

- Sosial sahəyə xüsusi diqqət və qayğı ölkə başçısının bu yaxınlarda imzaladığı yeni sərəncamlardan daha aydın görünür. Həmin sənədlər əsasında minimum əmək haqları, əmək pensiyaları, müxtəlif növ pensiya və müavinətlər növbəti dəfə artırılmış, bu sahədə xeyli sadələşdirmə aparılmışdır. Həmin tədbirlər sosial müdafiə sahəsində kompleks işlərin daha intensiv templə davam etdirilməsinə stimul yaratmışdır. Vətəndaşlarımız inanırlar ki, belə tədbirlər üzümüzə gələn yeni 2009-cu ildə də davam etdiriləcəkdir.

2006-cı ilin aprel-may aylarından əhalinin maddi cəhətdən aşağı səviyyədə yaşayan hissəsinə ünvanlı sosial yardımların verilməsi işlərinə başlamışıq. Həmin il 602 ailənin 2594 nəfər üzvünə sosial yardımlar təyin etdik. Əlbəttə, müraciət edənlərin sayı çox idi. Ancaq real vəziyyəti araşdıranda gördük ki, özlərinin maddi durumu haqqında düzgün məlumat verməyənlər də vardır. Bəzilərinin torpaq paylarının həcmi, başqalarının müxtəlif sahələrdən maddi gəlirləri, əmlak məsələlərindəki bəzi uyğunsuzluqlar verilmiş ərizələrdə tam reallığı ilə əks olunmurdu. Bu səbəbdən elə həmin vaxt 132 ərizəyə müsbət cavab vermək məsləhət bilinmədi. Bundan başqa, həmin tədbirin əsl mahiyyətini lazımınca başa düşməyənlər də vardı. Əhali arasında maarifləndirmə və izahat işlərini həyata keçirdik, məsul işçilərimizi rayonun ən ucqar kəndlərinə yolladıq, bir sıra qeyri-müəyyənlik doğuran məsələləri yerindəcə yoxladıq. Görülmüş tədbirlərin nəticələri çox tez bir zamanda özünü göstərdi. İndi tam əminliklə demək olar ki, bu iş artıq nizama düşmüşdür.

Məlum olduğu kimi, "Ünvanlı dövlət sosial yardımı haqqında" Azərbaycan Respublikası qanununa dəyişikliklər və əlavələrin edilməsi barədə" Azərbaycan Respublikasının Qanunu 13 iyun 2008-ci il tarixdən qüvvəyə minmişdir. Yeni reallığa əsaslanan bu sənəd əhaliyə xidməti daha səmərəli təşkil etməkdən ötrü bir sıra yeni vəzifələr irəli sürmüşdür. Məsələn, əgər 2006-2007-ci illərdə yardımın verilmə müddəti 6 ay idisə, cari il iyulun 1-dən bu müddət 1 il müəyyən edilmişdir. Bu o deməkdir ki, az təminatlı ailə ildə iki dəfə yox, yalnız bir dəfə sənəd təqdim edir və təqdim edilən sənədlərin sayı xeyli azaldılır.

Hazırda rayon üzrə 2419 ailəyə, bu ailələrin 11000 nəfərdən çox üzvünün hər birinə 85,2 manat məbləğində ünvanlı sosial yardım ödənilir. Təyin edilmiş yardımların 90 faizə qədəri öz ünvanlarına bankomatlar vasitəsilə çatdırılır, ilin sonunadək ünvanlı sosial yardımların ödənilməsi bütünlüklə bankomatlar vasitəsilə həyata keçiriləcək, şəffaflıq, qarşılıqlı etimad və etibar kimi prinsiplər tam təmin ediləcəkdir. Bununla yanaşı, əhalinin müvafiq məzmunda ərizə və şikayətlərinə həssaslıqla yanaşmağa çalışırıq, vətəndaşlar maksimum 10 gün müddətində verilmiş ərizələrə qənaətləndirici cavablar alırlar.

Mərkəz 3144 nəfər müavinət alan insana xidmət göstərir. Milli qəhrəmanlara, Böyük Vətən müharibəsi veteranlarına, şəhid ailələrinə, əlillərə, kimsəsizlərə və ahıllara da tərəfimizdən yüksək qayğı və diqqətlə yanaşılır. Tənha və kimsəsiz adamlara, xəstələrə öz evlərində xidmət göstəririk, onlara əlamətdar günlərdə və milli bayramlarda sovqatlar və pul yardımları veririk. Bu iş vəzifə borcumuzdan savayı, həm də vətəndaşlıq və insanlıq borcumuzdur. İnkişafımızın müasir mərhələsində insana qayğı hər şeydən öncül, prioritet məsələdir.

Fəaliyyətimizdə rayon rəhbərliyinin, nazirliyimizin yaxından köməkliyini daim hiss edirik. Bir neçə gün bundan əvvəl yeni tikilmiş və hər cür müasir avadanlıqla təchiz olunmuş binaya köçmüşük. Əvvəlkindən daha yaxşı yaradılmış iş şəraiti bizi səylə çalışmağa sövq edir.

Mustafayev S.

Respublika.- 2008.- 19 dekabr.- S. 3.