Uşaqlara qayğı xoşbəxt gələcəyə stimul yaradır

Suraxanı rayonunun Yeni Günəşli "V" yaşayış massivindəki 23 saylı körpələr evi-uşaq bağçası paytaxtımızın nümunəvi müəssisələrdən biri sayıla bilər. 1986-cı il 20 noyabrda tikilib istifadəyə verilmiş körpələr evi-uşaq bağçasının təcrübəli, uşaq psixologiyasına dərindən bələd olan kollektivi ilə tanışlıqdan sonra dərhal belə təəssürat yaranır ki, burada müəssisənin rəhbərindən tutmuş sıravi təsərrüfat işçisinədək hamı gələcəyimiz olan körpələrin qayğısına qalır, layiqli vətəndaş kimi yetişmələri üçün zəngin bilik və bacarıqlarını əsirgəmir, eyni zamanda üzərlərinə düşən vəzifənin məsuliyyətini yaxşı dərk edir.

Qarabağ torpağı uğrunda döyüşlərdə qəhrəmancasına həlak olmuş Fərhad Şirinovun adını özündə əbədiləşdirən bu uşaq müəssisəsinə təcrübəli pedaqoq Sevil Balayeva rəhbərlik edir. Sevil xanım o zamankı Lenin adına Azərbaycan Pedaqoji İnstitutunun (indi ADPU) ibtidai təhsilin pedaqogikası və metodikası fakültəsini bitirdikdən sonra iyirmi altı illik fəaliyyətini balalarımızın təlim və tərbiyəsinə həsr etmiş, səmərəli əməyi Bakı Baş Təhsil İdarəsi tərəfindən dəfələrlə fəxri fərmanlara layiq görülmüşdür. O, iyirmi iki ildən artıqdır ki, 23 saylı körpələr evi-uşaq bağçasının müdiri vəzifəsində çalışır.

Uşaq bağçasının böyük ərazisi var və həyət qapısını açıb içəri daxil olan hər kəs oradakı təmizliyin, abadlığın, səliqə-sahmanın şahidi olar.

Gəlişimizdən kollektivin xəbəri olmasa da, səhər saat onda həm uşaqlar, həm də bütün işçilər öz yerlərində idilər. Həkim Məlahət Abbasova və tibb bacısı Ruqiyyə Məmmədova körpələri müayinədən keçirib qurtarmış, tərbiyəçilər böyük və orta qruplarda məşğələlərə başlamışdılar. Məşğələ və yataq otaqlarında səliqə-sahman və təmizlik diqqəti cəlb edirdi.

Səkkiz qrupda 165 uşağın tərbiyə olunduğu bağçada tərbiyəçilər Günay Rüstəmova, Rəna Qəhrəmanova, Tamella Abbasova, Səbinə Quliyeva, Lalə İmanova və Səbinə Əhmədova balacalara əsl ana qayğısı göstərirlər. Məktəbə hazırlıq qrupunun tərbiyəçiləri Məlahət Cəfərova, Minayə Almazova, Elnarə Məmmədova və Larisa Çavkina uşaqlara riyazi anlayışlar, vətənpərvərlik hissləri aşılayır, səsləri, musiqi, folklor nümunələri, əmək vərdişləri öyrədirlər. Uşaqlar dövlət rəmzlərini tanıyır, dövlət himnimizi əzbər bilir və musiqi ilə oxumağı bacarırlar. Beş yaşlı uşaqlardan Məryəm Fərzəliyeva, Ruslan Cəfərzadə, Aytac Savziyeva və başqaları gildən, plastilindən fiqurlar düzəldir, rəsmlər çəkir, şeir və nağıllar söyləyir, bədii-estetik zövqlərini nümayiş etdirirdilər. Onların nümunəvi əl işləri seçilib saxlanılır.

Metodist Şəfiqə Hüseynova məşğələlərin məzmunlu keçirilməsi üçün təlimin və təhsilin mütərəqqi metodlarını tətbiq edir, bu işlərin Avropa standartları səviyyəsində aparılmasına çalışır. Müəssisə rəhbərliyi və tərbiyəçilər uşaqlarda təbiətə məhəbbət oyatmaq, yol hərəkəti qaydalarını öyrətmək məqsədilə onları Bakının görməli yerlərinə aparır, paytaxt barədə məlumatlar verirlər.

23 saylı körpələr evi-uşaq bağçasının müdiri Sevil Balayeva uşaqlara yaradılan şəraitdən, dövlət rəhbəri İlham Əliyevin, Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban Əliyevanın diqqət və qayğısından razılıqla danışaraq bildirdi ki, gələcək nəslin yetişməsində onların fəaliyyəti əvəzsizdir. Müstəqillik əldə ediləndən sonrakı on beş ildə 1700-dən çox təzə məktəbin və yüzlərcə uşaq bağçasının tikilib istifadəyə verilməsi, onların müasir avadanlıqlarla təchiz edilməsi buna əyani sübutdur.

Sevil xanım fikrini davam etdirərək söylədi ki, uşaqlara qayğı göstərən ümummilli liderimiz Heydər Əliyev onları xoşbəxt görmək istəyir, ona görə də həmişə balacalara böyük himayə göstərirdi. Ulu öndərin, nəhəng dövlət xadiminin müəyyən etdiyi strateji xətti uğurla davam etdirən Azərbaycan Prezidenti İlham Əliyevin bu sahəyə diqqəti bizi sevindirir. Prezidentimizin dediyi "Biz maddi dəyərlərimizi, iqtisadi potensialımızı insan kapitalına çevirməliyik" sözləri bizim fəaliyyətimizin istiqamətini müəyyənləşdirir.

Prezident İlham Əliyevin 12 aprel 2007-ci ildə imzaladığı "Azərbaycan Respublikasında məktəbəqədər təhsilin yeniləşdirilməsi Proqramı"nın (2007-2010-cu illər) təsdiq edilməsi haqqında sərəncamı məktəbəqədər təhsil müəssisələri qarşısında mühüm vəzifələr qoyur. Ən mühüm vəzifə isə ondan ibarətdir ki, uşaqlar bağçadan məktəbə müxtəlif ilkin bilgilərə və anlayışlara malik olmaqla hazır getsinlər.

23 saylı körpələr evi-uşaq bağçasının kollektivinin də əsas məqsədi budur. Uğur olsun!

İlyasov V.

Respublika.- 2008.- 21 dekabr.- S.4.